بحر الزجل وشاعر الضو الدكتور اياد قحوش

Eiad Kahwash
.
سليمان
لا تفتح عيونك بالحريق
بتطير روحك
وقت مايفيض البريق
نبريجك اعقدتو
وإذا بزندك حياة
فكّو
سبيل
وعلّقو بنصّ الطريق


ألشاعر سليمان طراد
علّقت صوتي
ضو عا الحيط العتيق
ودقيّت مسماري
وضربت المنجيق
وشعّلت قلبي عاطفة
ودقت الألم
تا صرت بحر النت
عن حق وحقيق


Eiad Kahwash
.
ياضو أسود
طقّ
ياطحْل السنين
المسمار رمح
وإنت ياصوت الحزين
معلّق ع باب جْهنّم
بْكيس اللبن
كل ماانفتح
بتخض ع شمال ويمين


ألشاعر سليمان طراد
مسمار ضوّي
طق؟ أمرك شو عجيب
وناسي البحر للشط
روبة عم يجيب
ولو شفتني نفّخت عا سطيلة
لبن
بيكون يا دكتور كاوييني
الحليب

بحر الزجل


Eiad Kahwash
.
لا تنفخ بنافوخ فاضي
قبالنا
وبتطير من نفخة هوا بمْجالنا
حناكك كتر ماانفخت
صارو بالبلاد
حمّالة نهود الغنم بجبالنا


ألشاعر سليمان طراد
لما ربيع الضو
عا الشعر اقترب
جيش العتم ضبضب العدة
وما هرب
ولما انوعدنا بالحقيقة
وبالسلام
صرنا يهود وكلهن صارو
عرب


Eiad Kahwash
.
يابوشربل
لوكنت سمير هلال كنت بجاوب:

عندي الحقيقه مشبشبه
وعندك مشيب
مابيقدر يوقّف بهالجو الرهيب
بتنداس كل جيوشك
بصرخة إله
حرر جيوش الشعر عاخشبة صليب

.....
ولو كنت عصام يوسف كنت بجاوبك:

فتّح بواب اللون
ع جنينة جنون
واحلام متلي بالنهوره وبالعيون
رموشي زهور
مسيّجه عيون الخيال
وكل الحقيقه خيال جوّات العيون
..........
ولوكنت بدر كنت بجاوبك:

جرّار جيشي
وكل ماالشرق انخرب
بترجع قريش تبيّض ليالي العرب
وعالجاهليه
ان فت بدي رجّعك
توقف صنم بحجار الله بينضرب

.......................
ولو كنت حسن بنوت كنت بجاوبك:

قبالك قمر للشعر
عامل مؤتمر
وقاعد علي عالطاوله وقاعد عُمر
لا شمال اسرائيل
قادر عالجنوب
ولا إنت قادر تطلع قبال القمر

.....................
ولوكنت رامي كنت بجاوبك:

جيّشت جيش الشعر
تايحمي السلام
و وقّتت ميقاتي ت سلّم عا سلام
بتعرف أنا
رب الحروب الطاحنه
إركع وصلّيلي الأبانا والسلام


ألشاعر سليمان طراد
لو كنت مين ما تكون
ما بتقدر تخوض
حرب الزجل مع بحر
ما بيهوا الغموض
معقول تربح تاج
مملكة الفضا
لكن ما فيك تخوض
معركة العروض

هههههه


ألشاعر سليمان طراد
دقيّت راسي فيك
تا شع الوحي
واحمر وجّ الضو
يمكن مستحي
واسست جتى نجن
جنيّة ورق
ومنعت يا دكتور بالشعر
المحي

هههههه
بحر الزجل


Eiad Kahwash
.
ليك هيك بيجاوبك بوعلي زين شعيب الله يرحمو

لاتعرّم قبالي
ياعثمان الدنا
بتعرف إلهك ماإلو عني غنى
راسين الله
حطّهن ع مخدّتو
صنين طربوش الدني
وراسي أنا

متذكرو ل عثمان الدنا؟


ألشاعر سليمان طراد
ما زال الله حط راسو
تا غفي
صلّي الأبانا ونام
بالهم اكتفي
وعرّم قبالي وقول
يا بحر الزجل
انتي الوحيد بقيت
للكلمة وفي
هه
بحر الزجل


ألشاعر سليمان طراد
جبلي سمير هلال
مع رامي نعيم
وخلّي حسن بنّوت
بالجرحى يقيم
وقلّو ل بدر
زيبق بيوتك بالعروض
وبالبحر كب ..؟ وقـــول
الله يا حكيم

بحر الزجل