حبيب وسليمان والصورة

غيرو المدير وين الصورة

موسى وحبيب...وطارت الصورة
وشوفو حبيب ..تأملو ببوزو
شال صورة ..هون منشورة
يلا سوى تا نطالب بزوزو

حبيب
ما زال قاصد حقدك تبرر
و جايي الشعر من حاكمو تحرر
حرك الشارع ضد بو انطون
و طالب انت لكن انا بقرر

ألشاعر سليمان طراد
قلي الصورة وين..واسمعني
اسألتك انا ..كسّرتها..!! يعني؟
بدي جواب يكون ..واضح رد
حاجي..تلوفك لا تضيّعني

حبيب
نسيت الأمس و بحاضري راضي
و لما الغدر وكل الي قاضي
محيت المضا و كل الصور خزقت
و حالف ما رح ارجع على الماضي

لشاعر سليمان طراد
الماضي يا بو انطون ابيض كان
ما بينقبع بالزاكرة ملزّق
وما في قلب بيعيش عا النسيان
لو ورد عمرو بالهوا تخزّق

حبيب
مين خبرك كلما حنيني سال
ببكي على الفرقه دمع خنسا ؟؟؟
فضيت بالي عا مرايا البال
و ما في حدا بالبال تا إنسا


ألشاعر سليمان طراد
زعلان ..عندك بالهوى ضرورة
فرفش معي يا صاحبي ما عليك
يعني...!! اعترفت..؟ مكسّر الصورة
عا غيابها ..!!يتكسّرو ايديك
ههههههههه

حبيب

لا تظن قلبي بالجفا مأسور
بصورة انكسر خاطر بعينيها
مكسور قلبي من حلم مكسور
و كاسر يميني و شاحد عليها

ألشاعر سليمان طراد
مأسور قلبك..؟ عيب ها التفكير
فضفض معي لا تخاف..أحلالك
طيّب...!! اذا مشتاق ليها كتير
اهديها مراية بال ..من بالك
هههههههه
حبيب
عندي مراية شعر منها خفت
بتضل فيي تعمل نكايي
و كلما انا قبال المرايه وقفت
بقشع انا حالي عالمرايه

ألشاعر سليمان طراد
عا مرايتك كلما شفت غايي
بتصير توسع ذمّتك اضعاف
بتقدر تشوف الكون عا مرايي
لكن مرايا البال ما بتنشاف

حبيب بو انطون
يودع الشحرورة صباح نهار الأحد
وينك يا بو انطون الله يا دني
تصبّحت فيك وبس يلعن ها الصباح
من كتر ما نادب وقابض ها السنة
من هيك تا نعيوك عا مأتم صباح



Habib Bou Antoun
رايح تا ودّع صوت عا غصوني شدا
اسطورة الفن ال بدمي بتنفدا
متل التحرّي و المباحث يا طراد
كيف عرفت من قبل ما يعرف حدا



ألشاعر سليمان طراد
التاجر المتلي بيعرف ببيع الدموع
وما بيشتري الدمعات من ضو الشموع
وانتي وخيّك ..بالمآتم يا حبيب
لو كان حنّا بعصركن بيموت جوع
ههههههههههههههه


Habib Bou Antoun
يا طراد يا عايش حياتك بالحلاش
عم بحلمك غافي قبالي عالفراش
انشالله انت بتموت مش بكرا اليوم
و لا تخاف لما تموت بندبلك بلاش



لما البحر بيموت كون بينقلب
وبيصير بحر العاطفة يهدر نحيب
بتعرف اذا رح موت رح اطلب طلب
ينعوا قرود السود ما ينعوا حبيب
ههههههه


Habib Bou Antoun
نحنا للي وعينا الخلق من أولو
و من ارضنا لما الخلايق يرحلو
الشاعر بدفنو لازم الشاعر يكون
و القرد بدو قرد حتى يحملو


ألشاعر سليمان طراد
يقطع لسانك عيب لازم تستحي
لا تهين بحر كبير اجمد يا دلو
قرد المنابر حاملو منبر وحي
لكن تقيل الدم مين بيحملو


Habib Bou Antoun
عا موتك و موتي اذا الناس اندعو
بدهن بعد ما صحابنا يتلوعو
شياطين شرك عا جهنم يبعتوك
و خدام عرش الرب عرشي يرفعو


ألشاعر سليمان طراد
بتعرف يا بو انطون ظني فيك خاب
عندك جشع عا المال قدرك ما ارتفع
كلما عا ميّت تندب بمأتم مهاب
ما بيرفعولو النعش ..تا تقلن دفع
ههههههههه


Habib Bou Antoun
الميت اذا بيكون متلك يا زغير
سارق و جاني و آكل حقوق الفقير
يمكن ضميري بيع لما اندبو
من هيك عم بقبض انا حق الضمير

ألشاعر سليمان طراد
بعرف اذا شي نهار عم تندب غريب
وعارف ظروفو قاهرة ووضعو رهيب
بترفض قبل ما يدفعولك تندبو
هيدا الضمير الحاملو الشاعر حبيب
خخخخخخ

Habib Bou Antoun
لولا ضميرك مع ضميري تكاملو
الجمهور رح يقشع بلا ما نجاملو
شاعر حمل عالمنبر براسو ضمير
و شاعر على المنبر ضميرو حاملو


ألشاعر سليمان طراد
مهما الكون نزوزقو ونجمّلو
غير الله ما حدا بيكمّلو
بس الضمير الحاملو الشاعر حبيب
مبروق ضهرو كتر منّو محمّلو
خخخخخخخخخخخخخخخ

Habib Bou Antoun
انت و انا بالضهر صايبنا العطب
تنين انبرقنا و حملنا علينا شطب
مبروق ضهري كتير من حمل الصليب
و مبروق ضهرك انت من زق الحطب

ألشاعر سليمان طراد
مبروق ضهري من الحطب هيدا الصحيح
وتا فهّمك عن سر ها القصة منيح
تشبّهت ب مار يوسف البار وانا
عم زق متلو قشاش تا يدفا المسيح




Habib Bou Antoun
من بيت لحم بمذود على انفراد
لما ولد فادي الدني و الرب راد
انت البتعرف مين دفى ربنا
انشاله انت ما تكون منهن يا طراد


ألشاعر سليمان طراد
مظبوط متلن كنت فسحة من الأمل
وانتي وانا تنيناتنا قمنا بعمل
انت متل الدب دفيّت المسيح
وحدّو انا ضليّت اودع من حمل
ههههههههههههههه

Habib Bou Antoun
بيلاطس للي كان العن من شارون
حاكم مسيح الكون من عدة قرون
شفتك على المذود حمل ما بينحمل
الرعيان جنو ليش طالعلك قرون


ألشاعر سليمان طراد
طلعو قروني متل ما طلعوا الغصون
ودقوا بسما الابداع تا بخشوا الأزون
يعني اذا بنطح براسك يا حبيب
معقول والله ينبخش حيط الجنون
هههههههههههه

ألشاعر سليمان طراد
هلق احكيلي بعد ما طل الصباح
رايح نهار الحد تا تندب صبااح
وموعود تقبض تقل دمّك يا حبيب
يما بلاش ..وهيك بتحقق نجاح




Habib Bou Antoun
يا طراد حد السبع سبعك ما ربض
بعروقك على الخوف وقفت النبض
قربت اقبض روحك و اندب بلاش
طلعت رخيصة روحك و ما بتنقبض


ألشاعر سليمان طراد
بتزكر بزر الشمس بكّلت القميص
واشفطتت فكرة شاعر..!! مخبّص خبيص
روحي العليي غالية بأعلى سما
بتضلها أغلىّ من الشعر الرخيص
هههه


Habib Bou Antoun
لا طراد لا تتشامخ بتعريمتك
غراب و طوشت الشعر من تقسيمتك
وجودي معك متل الدهب حد الحديد
برخص انا تا اتركك عا قيمتك



ألشاعر سليمان طراد
يا رندلى يا لابسي توب الشموخ
بتعرّمي بمجلسك متل الشيوخ
الي عقلهن أغلى من كنوز الدني
قيمة مضافة!! للعقول وللمخوخ


ألشاعر سليمان طراد
يلا عا القرادة وبالليل بنكمل


ألشاعر سليمان طراد
يا بو أنطون المدفون
حاجي تحلف بحياتو
ما زالك يا بو أنطون
عايش ع حساب الماتو
ههههههههههههههههه