رامي نعيم وبحر الزجل

ألشاعر سليمان طراد
لشاعر سليمان طراد
أووف أوفف

الزجل ورته الوحي معها تعاطى
فيها عمق ملفوف ببساطه
ومرق جيل وسهر عاكل قطبه
وتعب عاكل درزه بالخياطه
وإجا هالجيل خلى الحرف حطبه
ومع الإعلام عاحرقو تواطى
ولهالأرزه الملانه غصون رطبه
نشفها ع نيران السخافه
تضاعت بالهبا الورته فراطه
أووف أووف
الأدب بالشعر صفى اليوم شغلي
ومابقبل غش مابسكت ع زغله
وفي شاعر بس يطلع عالمنابر
بيقلل بالأدب تيصير شغله
إنت ياضعيف قدام الأكابر
دموعك عالحسد بتصير تغلي
الملك متلك ألوف ألوف قابر
بكل غابة تحدي وكل دغله
وبشكشكة الميابر بالميابر
أنا بقعد على الكرسي الملوكي
وإنت بتضيف ضيوفي المغلي
هي عا المغلي تبعو هلكنا بربا ههههههههههه
أووف أوفف
الشعر مجدو ع كل الأرض ساطي
وصفي بلبنان جيش الإحتياطي
بعصر موسى وطليع الشعر علّى
وفخت سقف الكلام الإعتباطي
ومشي مابين الله وبين الله
بحر مابين شاطي وبين شاطي
وفتح باب السما وبالجو حلّى
ندي الشحرور عازهر القماطي
وإنت جيت وضعف عقلك تولى
يشوه شعرنا بأسوأ تعاطي
شعرك شتم .. قلبك سمّ خلّى
الشعر عاقد حقد الفيك واطي
وأنا جايي بسجر طيب تدلّى
وطعما العم يصلولي ببلاطي
ومارح بتعود ياابن نعيم إلا
بعدما تعلم بوجك كفوفي
وبعد ماتعلم بجلدك سياطي
أووف أووف
أناشاعر خصب روح ضب محلك
وعلى زهوري ابعات فواج نحلك
قبل ماكب ناري فوق جوقك
واسحل فيك تاتبكي بسحلك
مارح ارميلك بهالوحل طوقك
ضلك إنت عم تغرق بوحلك
إذا مابتستحي بتقدر ع ذوقك
تفحّش قد مافكرك سمحلك
بس بذكرك رح ضل فوقك
شعري سكر بوجّك بوابك
وبطشي بواب لجهنّم فتحلك
أوووف اووف
وليالي الأوف جنه من عدنها
سقى موسى الدني شعر وفتنها
نسيت الروكز و زيغب وزغلل
بردة أوف تايقبض تمنها
وإنت قبضت دف ومابتخجل
فرس نكرت ل بيطوّل رسنها
إنت ناكر جميل فتلت مغزل
خيانه خيوطها ضعفك عجنها
لولا الأوف كنت بقيت مهمل
ساعه ماحدا بإيدو قرنها
وكنت ضليت خربه حد منزل
وإلا عنكبوتك ماقطنها
لاتتكبر ع شاعر حب ينزل
لدرجة ضعفك ويرفع بدنها
ياريتو الشافك مقرقع مهلهل
لا عبّى إبرتو بشحنة الشهره
ولا الإبره بشرايينك حقنها
=========
رامي نعيم
=========
ع باب العيد دقدقت بحنيني
فتحلي جرح من ماضي سنيني
وصرت لملم بذاكرة المُدرِّس
صُوَر عملت من سنيني حزيني
وبحقل العاطفة جرّبت غرِّس
شجر ع تمرة غصونو أنيني
بلكي هالانين قدرت خرِّس
اذا تطعّم كرامة من جبيني
وع بيدر طلعتي حبّيت درِّس
قمح شهوة من ذنوبي الدفيني
وبدمعة من العتب ع الخد مرِّس
أمل حلم الخميري بالعجيني
وببخور السهر قررت كرِّس
بيوتي وقلت يا ربّي أعطيني
وتنهجي المنبري بهالجيل كرِّس
عطاني قدرة المجد وبعتني
دعوِس ع "البحر" متل السفيني

------
انا يا طراد ع المنبر مُربّي
يا ما ناس ع شكلك مربّي
بطبعي صادق وما بحب ساير
بطبعي واضح وما بحب خبّي
منّك ما نطرت اسمع بشاير
وانت مفطوم أصلاً ع المسبّي
انا باسم المحبي جيت زاير
انت مش زاير بيوت المحبّي
وعن موسى وفضل موسى مغاير
رأيي وبالشعر ما بطب طبّي
ترجّاني تما يحمل خساير
قبّ باشتراكي الأوف قبّي
دخلت وباحترافي صار حاير
عليّي كذّب وهبّيت هبّي
وما زالك حامل القصة وداير
قلّي شو فضل موسى ع ربّو
بقلّك شو فضل موسى ع ربّي
-----/
ويا بحر المستوى شعرك فحصلك
بعد ما الحظ أحلامك قرصلك
صرت بالموهبي موصول وصلي
بعد ما ربنا بنعيم وصلك
عملت بالليل بالأشعار وصلي
الجزر سمعك عم تغني ووصلك
جدّل زرقتو خصلي وخصلي
عزم مَوجو على الشط ورقصلك
عني حكيت والغالي رخصلي
يا بحر بينشكر أصلك وفصلك
وتنحكي عن كبر أصلك وأصلي
يا ريت حكيت متلي شعر لكن
بأصلي حكيت وبتحكي بأصلك

ألشاعر سليمان طراد
شاعر سليمان طراد
بحر الزجل

ياشاعر البتخون تاتربح نمر
عملت الخيانه بالزجل وجهة نظر
بتسهر على ضو القمر كل السهر
وبتخون من بعد السهر ضو القمر
خنت الملك ولسان شعرك مااعتذر
وعندك عبد عامل مسيح المنتظر
اسمو الحبيب وقبل مايصيحو الديوك
خونو تلات مرات قدام البشر

رامي نعيم

اتركلي الحبيب وحلّ عن ضهر الوعي
وإلا على الإعدام لا تجد السعي
ما بخون لكن بفضح اللي بيدّعي
وما بدّعي بمجدي ع مجدي بندعي
ب" الأوف" مني تسرسبو لما وعي
لساني على فضح الحقيقة وما كعي
غلطو معي وع كتافهن ما ضَل روس
تيضل عندك راس ما تغلط معي

بحر الزجل

أووف أوفف

تواضع يا رامي وخود عا قدك مكان
غرورك ما خلى شوك يقشع بيلسان
لو وقفت عاري عا المرايي بها الزمان
بتشوف حالك تاج شعر وصولجان
شوف الفرق بيناتنا بحرب البيان
ما بين شاعر عبقري وشاعر جبان
بتصير لولا قطعت راسي راقصة
وبصير للمنبر يوحنا المعمدان

رامي نعيم

حاجي بقا كلما شي شاعر ينهجي
بيركض ع حجّة دين الها يلتجي
تمرجل بشعرك واكتفي من منهجي
وبشّر بإسمي وقول عنّي حربجي
قبلك لسان المعمدان الما نجي
بشّر بربّو ، وهيك انت بترتجي
قَلُّن بعد مني بيجي عيسى المسيح
قلّن بعد منّي انت رامي بيجي

بحر الزجل
رده قديمه وكان موسى قالها
بحبوب للزغلول جيب بدالها
ولاتنتقد شعر الديانه وحالها
وترد طبق الأصل رده قبالها
بالشعر عنا مملكه ورجالها
موسى وأبوشادي وخليل الآلهه
حكيو عن الدجال قبلك بالزجل
والمملكه عرفت إنت دجّالها
Rami Naim
كل ما اجا متلي نبي بالموهبي
بيخلق الو بيلاطس من التجربي
ضبضب كلاكيش المعنّى يا صبي
وجرّب شي مرّة بمحضري تبطّل غبي
لما اليهود تحجّموا بالمرتبي
دجّال قالوا عن يسوع الما كبي
ووحدي نبي ع المنبر وفكري أبي
ومهما اليهود يلبّقو عليك العِبي
كعيو وما قدرو يدنّسو خلود المسيح
بتكعا وما فيك تدنّس خلود النبي
بحر الزجل

مش رح زوغل وجاوبك بخمس أبيات متلك
بيتين بيكفوني تجاوبك .. واعتبر أول بيتين
نصايح إلك وللشعرا الشباب

تكرار هالفكره حرقها وصار عار
عالشاعر يفاخر بشعر الاجترار

من طيّبو الجمهور عالحفلات صار
بيروح مالو نفس يسمع هالعيار
مش كل ماشاعر فشل بالإبتكار
يركض عألله وياخد بإسمو قرار
ويعمل نبي ويعمل مسيح وشغلتو
يتاجر بألله عالكبار وعالزغار
Rami Naim
سليمان طقّو من الزعيق حناجرو
بأبيات شعري صوت الله زاجرو
بيفنزويلّا تاجِر وبخناجرو
شريان أخلاقو بإيدو فاجرو
ما بتاجر بالله وتحتى آجرو
بفضح حقيقة كم تاجر هاجرو
بتاجرو بالله وبأرزاق الدني
وبيتهمو اللي متلنا بيتاجرو
ألشاعر سليمان طراد
أووف أوفف

مابتاجر بألله ولابشعري تجيب
مال وصلاتي شعر قدام الصليب
إنت العلى الإعلام تاجر مش أديب
وبهدلت منبر شعر لبنان الرهيب
بتبيع موسى شعر تايعدك حبيب
وبتبيع موسى زغيب بطنعشر حبيب
ولوكان بوأنطون بيوفّي معك
تاكنت بعتو بديك وسطيلة حليب
هههههههههههههههههههه

صحيح هي اضعف ما عندي واقوى ما عندك ههههههههههه يا ولد
ألشاعر سليمان طراد Rami Naim

تركت التجارة ولعنت أعراضها
واستسلمت لما عرفت أعراضها
اتركها الي رح خوضها وما خاضها
الا اللي زارع وهرتو بحواضها
وما زال بو انطون بيضة باضها
ببيعو مع بيوت الخيال الفاضها
لكن انت لو بعتك بسوق الأحد
ما بشتري بحقك لطفلة حفاضها

ألشاعر سليمان طراد

تاجر إنت والشعر أشرفلو بلاك
مافي حدا قلك ع هالرده عفاك
بتبيع رفقاتك وبتبهدل سواك
حتى جيابك يورموا ويبقو سماك
لاتحتقر طفله ببراءتها سماك
بتشرف ان دفّيت إجرين الملاك
فستان طفله طاهره بخيمة فقير
بيسوى ألف تاجر زجل من مستواك

Rami Naim
تاجر أنا بفضلي الشعب خير احتسا
وقدموس متلي ع البحر حرفو رسا
قرّرت تاجر بالوفا علّ وعسى
ببيعك شي كمشة تخفّف فجورك قسا
وهالطفلة اللي طهرها ما بينتسا
لوما بفضلي جسمها منين اكتسى
صبح ومسا كان الحزن معها بقي
وعاش البرد ع جسمها صبح ومسا
ألشاعر سليمان طراد
ياتاجر البتبيع أرضك والعرين
بتسرق تعب فلاح عرقان الجبين
بتحكي بتجاره وهيك حتى المجرمين
بلبنان صارو يحكمو شمال ويمين
جايب سفينه بالبحر فيها طحين
من فوق..!! حتى تغش فيها الحاضرين
ومن تحت فيها سلاح إنت بتنقلو
للمجرمين بجرد عرسال الحزين
Rami Naim
متلي النبي تاجر يا ابن طراد كان
ويوسف ابن يعقوب وسميّو كمان
والصوت متلي تاجر وصرلو زمان
بيبيع كلمة حبّ بشويّة حنان
ومظبوط جبت سلاح ع أشرف مكان
لمقاومتنا الحاميّي أصل الكيان
حتى العدو المفتكر حالو بطل
يوصل بطل ع حدودنا ويرجع جبان
7
ألشاعر سليمان طراد
أووف أووف أووف

تعلم الشعر يا ولد هيك بيكتبوا

ياريح النار هبي عالبراري
الطقس ناشف ربيع الشعر عاري
احرقي هالموت لاتخلي ع منبر
شعر يابس بساحة اخضراري

يارامي بمعدنك صفيت أشطر
من الغيمه بمجرا نبع جاري
إنت فافوش بتكنفش بتظهر
بحجم أكبر من السعر التجاري
وصولي بشعرك بتمدح تتقدر
تغش الناس بالتوب العياري
وإذا بتهجي الجواب بكل محضر
بيطلع بربري بمنطق تتاري

إنت تاجر على الإعلام دمر
صورة شعر لبنان الحضاري
بتمدح ديك بتقلو غضنفر
تيمدح فيك ويزيد المصاري

الشعر أخلاق .. ذوق وفن أطهر
من البوسه على خدود الحواري
الكلمه مقدسه لاتهين دفتر
شعرك هون بايع هون شاري

إذا غشيت هالعالم تذكر
في ناس بيعرفو بسوق الدراري
ووقت حك المجوهر بالمجوهر
بدك تنفضح شاعر بزاري

لاتحكي عالصمود الشعر أخبر
برأيك إنت ياشاعر فراري
المقاوم مابيرضى تبيع بيدر
ولا تتاجر بأرضي ولابداري
مقالاتك قريناها و فنجر
منها حقد شاعر انكشاري
المقاوم بالشرف وقف وكبر
ومش للمال متلك انتحاري
مقاول إنت عابد مال أصفر
ماهمك ابن خيي وبنت جاري

وهلق روح ياشويعر تحضر
ونضف قلبك واسمع قراري
الزجل هالكان تاج بقصر مرمر
انت خنتو وصفي بحضرة جنابك
مهرج تحت إجرين الجواري.
Rami Naim
يا بو وجّين ولسانين حاجي
تحكي وبالحكي ما قضيت حاجي
انا راعي النعاج المنبريي
وانت حارس على مرعى نعاجي
اتركلي الديك والطلّي البهيي
شو دخّلني اذا بطبعك دجاجي
ويا دجاجي بهالعركي القويّي
حصرتك همّ بمكعّب " الماجي"
أنا شاعر بيوتي فلسفيّي
وقبل ما صير موسى زغيب هاجي
عليّي كذّب وخان القضيّي
هجيتو بعد ما عكّر مزاجي
وتحتى تشوف كيف العنجهيّي
بطبعو صارت تطوّر هياجي
اذا ما بتمدحو الصبح وعشيّي
بسهرة "وأوف" بتسكّج سكاجي
انا تاجر متل عنق الصبيّي
اللي مرّق شهقتو ع عقد عاجي
وتحتى يشتري البوسة الوفّيي
ع عقدو قرّرت اعقد زواجي
انا تاجر متل خوري الرعيي
اعترفلي بدل ما ربّك تناجي
ببيعك مغفرة بحق الخطيّي
ورجا حقو صلا لو جيت راجي
انا تاجر ع صورة مجدليّي
شَعري من ودايا ليل داجي
بِعت الرب دمعة مريميّي
عطاني بالسما بيوت وملاجي
وع المنبر انا ع كفوف ديّي
طعمت كتار من خبزة كماجي
صرت تاجر ومتلك خمسميّي
ما فيهن يقدرو يفزّو سياجي
وتاجي بلبسو بالعبقريّي
وبسهر مع سكون الليل ساجي
وقدر ما تزرع العلّات فيّي
تاجي حصرمي بعيون غيرك
انت بدّك دهر تتشوف تاجي