صفحة الشاعر مروان سليمان

مروان سليمان

يا تراب

شو هالعجيبه بخامتك ياتراب=ياحاضن بقلبك عِدا وصحاب
من ميل فاتح للمنيّه بيوت=ومن ميل مانح للحياة خْصاب
***
متل البحر مَ المَي يِرْغيها=وموجات عاصدرو يعَلّيها
من جَبلْتك بتعَمّر الأجساد=وبجبلْتك بتعود تطويها
***
فوق الملامح وين ما بتزيح=مَ بتُرْسم بوجه المحبّه زيح
عاشق إنت للشمس بالصّحرا=وبالغاب عاشق للشّتي والريح
***
بين الدهور بْلعبتَك ماضي=بِتْوَشْوِش الزعلان والراضي
عا وجهك مْنِقرا خْبار اليوم=وبقلبك مْنقرا عن الماضي

مروان سليمان

لو كنت ريح

--------------------------------------------------------------------------------

لو كنت ريح
وهمّتي فيّي

كنت دْفَشت هالأرض
من عهد ال مضى

تتصير تبْرم
حول نفسا بهالفضا

أربع خمس مرّات
يوميّه

وتخلص بقى دوراتها

ومايضل حجّه
للزمن جوّاتها
***
ناطر أنا
وبْطيبة الخاطر

تمضى السنين بطولها
وكل القصص وفصولها

لكن مابعرف بعْد ...
شو ناطر

بو شربل

واقف ب وج العاصفة وناطر
ريشة حلم ترسم دني بلا حدود
كتار البيقولوا سافر الشاطر
لكن ما عرفوا أشطر البيعود

رائع يا مروان

مروان سليمان

سليمان يامسافر عَ درب النور=يازارع البسمه بقلب مهجور
بكروم شِعر ال فايقه بْ نيسان=بْتبقى إنت نسمه وأنا الناطور

ونتابع مع الشاعر المرهف

مروان سليمان

نور الشمس

مرّه وأنا لغروب عَم شِمّو=شِفْت القمر مَكبوب عا تِمّو
ونور الشمس وارب عَ تاني ناح=طافي السّما وزعلان من إمّو
***
قَلاّ ياإمّي ما بَقَى فيّي=إنزل على هالأرض يوميّه
ضوّي لَناس بتقتل الأرواح=ودَفّي قلوب بْدون حنّيّه
***
قالت باإبني لازم بإحساس=تعصر مْحبّتنا بدون قياس
هيّي اللّي لَ بواب السّما مفتاح=ومابتعرف تْفَرّق مابين الناس

مروان

بين الحرف والشاعر

بين المعاني الحرف هاج وماج=ولَوّع خَيال الشاعر المهتاج
غارت بفكْرو نبعة التعبير=وبكوخ موهبتو انطفى لسراج
***
ياحرف يلّي طايع بإيدي=بكفري بصلاتي بشقوتي بعيدي
شوباك هالمرّه معي غصّيت=متل النَّفَس عَ بواب تنهيدي
***
ياشاعري باقي أنا بإيدك=كلما تناديني عناقيدك
إنتي تخطّيت العتم والنور=وهوني أنا مابقدر بفيدك
***
لمّا بتدخل هالحقل بتشوف=ذابو بطيّاتو جُمَل وحروف
إنت وأنا نفس اللحن منصير=ومافي فَرق بين واصف وموصوف

» مع مروان سليمان بمشتاوي بعد حركشي
» مروان سليمان وبحر الزجل صمت وسكوت
» صفحة الشاعر نجيب كرم
» صفحة الشاعر عصام يوسف
» صفحة الشاعر بطرس شاهين