بحر الزجل وحسن كوثراني

ألشاعر سليمان طراد
من بعد ما بو شربل استأصل عيوب***شعّار يا حسّون تاهت عا الدروب
شو رأيك نحمّي الحديدي بالغروب***ونرسم شروق الموهبة ونمحي الغروب
عرفتك أرز مزروع بتراب الجنوب***وقلعة جبل عامل وقبلة للشعوب
أيدك بأيدي حطها يا بوعلي***تا نحفر حروف المعنى بالقلوب




Hassan Kawtharani


يا أبو شربل ع رموش العَين ميـــل *** ما العَين عشقت رسمك ورسم الخَليل
وعا جبل عامل طل بالقــــَدْر الجــليـــل *** بتستقبلك بعيونها قانا الجــــــــليل
أحفر بقلبي الحرف ع البحر الطَويــــل *** وما بيحفر بالقلب إلا الأصـــــيل
ما كل عمري بواب قلبي مشـــَرّعة *** ومنعرفك يا طراد مذوق بالزميل

طلبتك عا ملقا شاعر بحكم القدر***راسم بضو المعرفي دروب النظر
لقيتّك بصوت الضو فيّقت القمر***ونازل متل شلّال تنحت بالسهر
جرّب معي.. وبالروح أضرب عا وتر*** لحن الصدا بالعاطفة بتخلق صور
مغارة جعيتا شوفها بعين الجمال***كلما تنز المي بيحس الحجر

بحر الزجل

تعقيبا على صوت الضو بحب وضّح ها التعابير من ابتكار شاعرنا الدكتور اياد قحوش وكلنا
تلاميذو
تحياتي للدكتور قحوش


Hassan Kawtharani
كلما عيوني لحلا الكلمــة تجوع *** بيعزف نبض قلبي على وتار الضـلوع
وعَـزيِّف يا سليمان عا صَخر الـــــربوع *** بتنحت بقلبي بالنزول وبالــــــــطْلـوع
عا مغارتك المقدسة برهبـــة وخُشوع *** بوُفي النــدرْو بشعشع العَشرة شموع
وعين اللي بتحب الجمال بعــــاطفـــي *** بتكتب على خد الحجـــاره بالـــدْمـــوع

ألشاعر سليمان طراد
لبّس عيونك صوف من رمشك رقيق***كلما دعس أحساسها فوق الطريق
ووج الصبح بيدوّخك كلما تفيق***وشوب العطش بيعرّق قزاز البريق
وما زال عندك عاطفة وقلبك رقيق***فيّق جروح الليل بالخمر العتيق
وبلل خدود الموهبة بضو الوحي***بركي القمر بيصير لشرودك رفيق

بحر الزجل

Hassan Kawtharani
بتعرف حــَسَن قلبو متل قلب النهـار *** أبيض ومـِنّـو الليل تا يستّد تار
دلدق على جفونو العـتم شلال نار *** فتــّحْ بجرن العــَين فل وجلنـــار
وما زالها فـَيروز قالتلي ســــهار *** جيران نحنا والقمـــــر بها الحـِوار
يا بـَدر وادي التــَيم خـَبر مشـغره *** عن بو علي بيحب يلعب بالقمــار


ألشاعر سليمان طراد
لمّا قبرت الهم وخلقت الوضوح***صار العمر خزّان يدلف عا السطوح
سألت الوجع بالصوت كنّو عم يروح***جاوب صدى الآهات من وادي الجروح
شك الورد بالروح تا يرجع يفوح***بتشوف زهّر مزهرية بكل روح
لعب القمار بيخربك حيث القمار***بيقتل بروحك يا حسن روح الطموح
بحر الزجل


Hassan Kawtharani
خَيــّك حَسن للكل باسط راحتو *** خبز القَصيدة قـَمّرو عا راحتو
ومن الوجع صَفيَت تقرب ناحتو *** طامح تا تستعرض اللبيت الناحتو
ال شد الفلك تا ينجدو طـــَرَّاحتو *** بها الفضا يا ما لـِعْب عا راحتو
شاف البسيطة تحت مـِنّو طاولي *** توقـَّى ما تخسر هَيبتك بيساحتو



ألشاعر سليمان طراد
فتّ النجوم وفرّق وراق المدا***بتشوف فوق الطاولة ما في حدا
اكشف وراقك كلها من المبتدا***ولا تعصّب الألوان بيجن الصدى
لكن عا طاولة التحدي اللي ابتدى***لا تفتكر في طاولة عليها غدا
ان ضويّت نجمة بو دنب ما همنّي***البيهم يضوي نجمك بها المنتدى

بحر الزجل

Hassan Kawtharani
عيوني البسيطة والمَجَرّه روفها *** حـَلّق على جناح الخَيال وطوفها
حتى الورقة اللي انكرت مَعروفها *** نجوم السما متل النُقط ع حروفها
يا قاطع وراقي عا حَدْ سيوفهــــــا *** منشان أعطي لكل ساعة ضروفها
والله.إذا مشتاق تا تشوف النجــوم *** بخليك بــِعزْ النـــَهار تشوفــــــــــها



Fidaa K Mattar
حلو ووووو يسلمك تمك


ألشاعر سليمان طراد
عيونك بسيطة والشقا قيدومها***لو راح منها الضو اوعى تلومها
يا حامل جروح الدني وهمومها***حلّق وكشّح من سماها غيومها
عمري سما زغرت عليها هدومها***الضو انفلش متل الأبد ع تخومها
ومنشان ضوّي صبح يطلع يا حسن***ورقة وورقة صرت هر نجومها

بحر الزجل