وجع ارمله وخافو الله النسر القوي

بدنا السلام

ان ضل باقي من العمر نهار
رح ضل كافح تا السلام يحل
ويفهم الظالم ها الشعب ما اختار
موت الطفالى كفر اكبر عار
العملو الحرب يحكو باسم الكل

وجع أرمله
مبارح قتل إبني وإبن خيي
وزوجي قبل شهرين شيّعتو
وضليّت وحدي ببيّتنا حيي
وندمت ليش البيت ما بعتو

ما كان بدّي يقتلو ولادي
ولا كان بدّي اهجر بلادي
بس الظروف بتجبر الإنسان
يحمي الوطن ما يضل ع حيادي

يا تراب ستّي ومفخرة جدي
ما تعتبو لو قلت ما بدّي
يمكن أنا هديّت تا انهديّا
وقديّش قادر شعبنا يهدّي

ع كل حال الحرب ما بتدوم
والكل رح يرجع ل أحبابو
بس اللي مات استشهد ومظلوم
الله يرحم غبرة ترابو
ما عاد بدنا نموت بدنا نعيش
ما الكل عنا عم بيتخلّى
في ناس فرشتها ديباج وريش
وفي ناس خلقو بها الدني دراويش
الرحمه بتطلب بس من الله
تروق الحرب ببلادنا حلّا

خافو الله
بعدو الوجع فيي ما كان يروح
وما كنت أعرف كيف رح شيلو
والآخ مش عم تطلع من الروح
عم تطلع من دموع بيسيلو
لبنان خلف مصايبو مشلوح
ومتل العريس بيوم إكليلو
ناطر الفرحه بس مش مسموح
يضحك لأنو في مقابيلو
جنوب اندبح عم ينزف ومجروح
وما في حدا من اخوتو يشيلو
ما عاد يستحمل وجع وجروح
بدّو بقا يرتاح من ها الحرب
لا بشرق فينا نوثق ولا بغرب
لبنان تا يبقا منارة بس
عنّو إيديهن كلّن يشيلو

النسر القوي
همّي ع قدّي دشّروني نام
ما عاد بدّي تشغلو بالي
وما عاد بدّي عيش بالأحلام
لبنان وحدو ع القلب غالي
شوفو معي سجّادة الأيتام
تراب وعشب يابس بالحقالي
ولك كيف بدّي افرح وما دام
كل الوطن نازح من خيالي
ما ضل عندي فلسفة إلهام
وما ضل فيي اقتل بحالي
يا ناطرين الكسر بالأوهام
لبنان ما بيركع ل متعالي
نحنا وطن ما بينكسر قدّام
همّو... تا منّو البعض يرتاحو
النسر القوي بيعض ع جراحو
بيضبّ ع الميلين بجناحو
وبيرفرف وبيطير بالعالي