بحر الزجل وناجي بو عساف

ألشاعر سليمان طراد
قالت ألي ما بحب اشوي بتنجان
وحتى البصل بيدمّع عيوني كمان
قلتلها يوم الأحد لا تطبخي
قلبي حنون كتير وعليكي الأمان

......بحر الزجل
بشرفكن ما بحبا
عندا نهار عطلة
هههه

Naji Abou Assaf

منّك خيال الشّاعر توخّى الحذر
ولمّا طلبتو عالمباراة اعتذر
الشّاعر اذا جوّع بطن مش مشكلي
لكن حرام الشّاعر يجوّع نظر
ألشاعر سليمان طراد

توخّى يا ناجي بس لا تفضّي الكروش
بتصير تدبل متل الزهر المردكوش
عبّي الخيال بيوت بتطعمي الوحي
وفضّي الجياب بتحرد عليك القروش
ههههههه
...
الله لا يفضيلك جيابك يا مهجتي وتضل بصحتك
وترجعلنا تا نعمول مهرجان الرجعة

بحر الزجل

Naji Abou Assaf

جيابي أنا مش بالقروش بقيسها
تا اشتري بدلات جاه وقيسها
جيابي لأنّو كيسها بحر الخيال
بتصرف بتصرف ما بينقص كيسها

...الله كريم ومنرجع وأحلى مهرجان والله

ألشاعر سليمان طراد

دأوووف أوووف

مفلّس بيصرف..؟.حاج ...!!تضحك عا اللحي
الزنكيل متلي بيصرف وما بيستحي
وإلهامك بينطر خيالك تا يروح
يتضيّف من جيابها خبز الوحي
...
بحر الزجل

Naji Abou Assaf

زنكيل انت, كتير حلوه البهورا
وتا كون متلك ما اعتدت طلّع ورا
بفضّل مفلّس كون عندي احترام
بالمال ما في احترام بينشرا

ألشاعر سليمان طراد

شوف المرا عا سوق صيغة ساحبي
وما بتشتري تا تكون متلي مصاحبي
أبّبقوة يا بو عساف مش باقي حدا
وحتى الضمير بينشرا يا صاحبي

...بحر الزجل

Naji Abou Assaf

الباعو الضمير بهالدني متل الجراد
ومعهن اذا بتمشي عا موسم للحصاد
البقوه بأبو عسّاف رح تنسى الفرح
تتشارك الأحزان مع عيلة طراد
ألشاعر سليمان طراد

شارك بدفن العاطفي وآجر وشيل
تا نشيل كفنك بعد ها العمر الطويل
وتا تشارك بإكليل زهر بيلزمك
عملة واذا ما دفعت بيقولوا بخيل

...بحر الزجل

Naji Abou Assaf

ما بشارك باكليل زنبق ما اعترف
بمحبتي وبعاطفه ومدمع ذرف
اكليل حبّي دموع عا قبر الشهيد
يللي بيدفع دم من جرح الشرف

ألشاعر سليمان طراد

جرح الشرف عند الفقيرة بالغرام
حكمو حكم اعدام عا بنت الكرام
ولاد الحرام بيفتحوا جرح الشرف
ومال الحلال بيستر ولاد الحرام

...بحر الزجل

Naji Abou Assaf

جرح الشرف بالبنت مش ذنب الجمال
ذنب الطمع بالمال وبمربى الدلال
ومال الحلال بيستر ولاد الحرام
ومال الحرام بيخرب بيوت الحلال

ألشاعر سليمان طراد

مالي حلال ..!!وكيف ..؟جمّعتو بتعب
خوفي قتلني من الحرام وما ارتعب
وأمنيتي كانت يا ناجي من زمان
اغفا مع الأحلام عا سريري لعب

...بحر الزجل

جرح الطفولة ما بينتسا

Naji Abou Assaf

مهما تجمّع مال من زند اندعك
منشان تنسى جرح عشتو بمطلعك
بقلّك بانّو من بعد عمر الطّويل
اللا السّمعه مش رح بتاخد معك

ألشاعر سليمان طراد

الخدتو معي بها العمر حلم وزكريات
واللي تركتو ضاع متل الأمنيات
وسمعة الشاعر ما بتتاخد معو
بتبقا يا ناجي ثروتو بعد الممات

...بحر الزجل

Naji Abou Assaf
f ضلّيت اعجن فيك بكفوف الأمل
حتّى اعترفت وبدر ابداعي اكتمل
انّو الشّاعر ثروتو سمعه وبيت
مش مال بجياب الزمان بينحمل

ألشاعر سليمان طراد بنك الزمن تاريخ أكتر من غني
بيصرف سنة من جيابنا بيقبض سنة
وحق الدني مصروف عا حساب البشر
ومنقول مال العمر عا تاني دني

...بحر الزجل

Naji Abou Assaf

عمري أنا مصروف عالجملي
تا يفرحوا الأحباب بالجملي
ويطل رب الموهبه بالذّات
وعا صفحة الابداع يختملي
من جياب عيني بدفع الدّمعات
...منشان كاسات العطف املي
من جياب روحي بدفع النّهدات
وبقول يا عوّاد قسّملي
والليل يللي بيعزم النّجمات
قبل ما الأجفان يهدملي
بدفع سهر وبحرقص النّغمات
حتّى القصيده تصير مكتملي
وبقول للفجر الالو وقفات
تأهّب, تحيّي الشّمس قدّملي
هيدا أنا شاعر عُلى وشردات
هالكون حملي وقايم بحملي
كتابي زهور مغلّف بنسمات
رح بنشرو تالجوهر يدملي
وحتّى اذا الجسم الحملني مات
بتركض العملي خلف منّي وانت
بتموت راكض تشحد العملي

ألشاعر سليمان طراد

ما خدت ما انسان مصروفي
وما قبلت رافق ناس منتوفي
الله خلقني بالدني زنكيل
شعري تبر ومدهّبي حروفي

......ليلي منجّم بكره القنديل
وكل يوم بسهر احسب ألوفي
ومن الحسد برتاح قال وقيل
وعندي وقت بستقبل ضيوفي

ومع كل هيدا بطالع الإنجيل
وخبز اليتامى معجنو كفوفي
واحسب لآخرتك يا ناجي وشيل
جماع المصاري وضب نتّوفي

بكرى العمر بيوقّف التمويل
وايد الغدر بالهدر معروفي
شوف بوطنّا عايش التدجيل
مشاريع رغم الجهد موقوفي

لو كان عنّا شخص دولة تقيل
بيوعد الشعب وبعدها بيوفي
وما كان متعوّد على البرطيل
ما كنت عم تاكل سنينك هجر
من بنك ها الايام مصروفي

بحر الزجل

» بحر الزجل وناجي عساف من جديد
» ناجي عساف وبحر الزجل سكرة شمس
» العم امطانيوس وناجي عسّاف
» اقوى حوارات بتاريخ الزجل بحر الزجل وحسّان البسطاطي
» بخر الزجل ومخايل لطيف رايس عصبة الزجل بسدني