سليم المجنون

تمهيد:
باسم بلادي وأمي وحبيبتي
عشتار واحدة
آمين

... القصيدة:

بكفِّك قمح روما...
وسهل البقاع...يرقص ع نغمة ريح...
خْلَقتي خطف بيروت بوسيدون..
ع الشط يرسم زيح..
ويصيح..
صوت الْ ما عدا إنتي ..
ما حدا عم يسمعو...
يمكن لأنِّك عشتروت..
تخبّالِك بعلبة هوا..
وعند الفجر..
يتحمّم برقصة نِدي..
ويتنشّف بضحكة عطر...
ويمكن لأنِّك عشتروت..
غيرِك..ما شاف الدمّ...عا ضفّة نهر...يكتب كتابو ع الزهر..
ويخلّفوا أول ربيع..
ويمكن لأنّك عشتروت..
سمّوه عيد الإم..
.......................................................
آشوريا...يا سوريا..
وبلادنا الْ شليب براسا الغيم..عم تندهِك..
طلّوا العرب...أكلوا العرب...شربوا العرب...ضربوا العرب...خربوا العرب...مشيوا العرب...
بعدو مسيجِك ما انصلب...تَ يردّ عنِّك هالجَلَب..
........................................................
ويمكن لأنِّك عشتروت..
كل يوم إنتي بتخلقي 100 مسيح...
100 قصيدة انكتبت بدم الجريح..
تحمل صليب قيامتا صرخة غضب...تا تنصلب...بس العتب...بعدو مسيحِك ما انصلب...
ويمكن لأنِّك عشتروت..
لازم مسيحِك ينصلب..
.........................................................
إسمِك ذكا..
إسمِك شمس..
إسمك طهارة زهر...ويفوح العطر ..
إسمِك..فَشَر يتفاخر بإسمو الشِعِر..
إنتي الأصل..
إنتي القداسة والصلا..
إنتي الفِعِل..
إنتي الألوهة بأوّلا..
إنتي ..
تِعِب الله..
برحمِك نزل يرتاح..
من غيرتو..
ضحكوا علينا بقصة التفّاح..
.........................................................
ما بتنقصِك كلّ الدني..
ما بتركعي ..ما بتنحني..
مش هامِّك ..دقّة جرس..
أو صوت..يتغنّج صلا..وقت الفجر..من فوق راس الميدَني..
.........................................................
يا كاملة..ما يكمّلِك..حتّى أنا..
شو ضلّ؟...غير كمشة حكي..بأصل الحكي..
كتبتُن..مثل يبكي بحضن إمّو الضنا..
جمعتُن..مثل مشيوا الغَجَر..
ومثل انفَجَر..
حزَّمت حالي بالقصيدة الناسفة..
وزتَّيت حالي بالخطر..
جيتِك شِعِر..
تَ إنصلب عندِك مسيح..
وأرقص حجر..
وتكبّني إيدِك مسافة ريح...
أوصل سَفَر..
أوقَع ع بابِك.. حبّ مجنون انتحر