ثابت ومتحرك بحر الزجل عدنان سعيد

h

حتى الشعر يستفيد رح عيد نشر حوار صار بيني وبين بحر الزجل سليمان طراد على موقع "نصيّة زجل"

Adnan R. Said
سليمان موهبتك شربنا نبيدها
وما زال صارت نص.. ما منريدها
من فضلة خوابي القوافي الطيّبي
خدلك شي خصله وعيش عا عناقيدها
------------------------
ألشاعر سليمان طراد
اهلا بخوابي معتّقه عا الفيسبوك
فيها نبيد القافية وما في شكوك
بتكتوب بموقع..نص ألفية زجل
لو كنت غير محل كانوا بيزعبوك
Adnan R. Said
عندي حِــما بتنعد من اغلى حِــما
مش نص لا كنّي بعدّو ولا حَما
ما عاش يللي بيزعب نسور الزجل
معوّد انا ازعب بدور من السما
هههههههههههه
ألشاعر سليمان طراد
بدر اللي كبّك هيك بيقولوا كتار
لا تغيّر التاريخ تا تفك الحصار
يوم اللي انتي طلعت من موقع زجل
فادي وبدر علنوا عليك الأنتصار
هههههههههههههه
Adnan R. Said
صغرو تيابي عالغصون الوارفي
وضوّيت شعلة نور صعبه تنطفي
كنت النجاح وكنت راس القايمي
من هيك صار عندي الوف مألّفي
-------------------------
ألشاعر سليمان طراد
الله يزيدك ما حدا عندو حسد
خبز وملح بيناتكن ما بينفسد
بعرف الواوي كل ما يشعر بجوع
بيروح يجمع كل فضلات الأسد
ههههههههه
Adnan R. Said
نسر الشعر عندي جناح مرفرفي
كاسر على طيور الشعر والمعرفي
وألقابكم واوي وأسد ما همني
بيناتكن تبقو اقسموها مناصفي
--------------------------
ألشاعر سليمان طراد
ما عاش مين يقسّم البيت العريق
ويفتن ما بين الأهل تا يشعل حريق
ما الشعر بيت الكل ومواقع زجل
اخوة واحبا وكلنا زات الفريق
ههههههه
Adnan R. Said
ما زال للإلفي حملت راياتها
صرنا سوى وعنا المجبة ذاتها
هات نصيّة و تعا لموقع زجل
ونادي الخوابي تنسكب كاساتها
--------------------------
ألشاعر سليمان طراد
مشي سوا نعمل اليوم محاوله
ونكتوب سوا شعر وتحدي مداوله
عا شرط تدعي بدر والشاعر زهير
يمدوا لها الشعّار اكبر طاولة
هههههههههههههه
Adnan R. Said
هات المحبة اليوم نشرب كاسها
وروحي اشربو من خمرها واحساسها
بدر و زهير بيقعدو معنا اكيد
والطاولة تنيناتهن عا راسها
---------------------------
ألشاعر سليمان طراد
بتعرف قراري شبه صدفة ومرتجل
نصيّتي لما عملتا عا عجل
حسيّت في واجب عليي اعملو
كلما المواقع تكتر بيمشي الزجل
Adnan R. Said
كتر المواقع للتجارة والفتن
خلو الخوابي للشعر اكبر وطن
مش هم تعمل موقع ويمشي منيح
لمهم انو يعيش شهر من الزمن
------------------------
ألشاعر سليمان طراد
لا تنطر التخليّد خبزك حمّصو
ما الكل يا عدنان رح يتقمصّوا
يعني اذا انسان بيحب الخلود
مش عيب حد الارز يزرع حمصو
هههههههه
Adnan R. Said
جبت التقمص تا نهر شعري اندلق
وحمّص مع الارزات؟ لازملك فلق
بيموت كافر ؟ كافر بيرجع يجي
و لازم متل ما يموت يرجع ينخلق
------------------------
ألشاعر سليمان طراد
روح وتعا ..معقول حكمة وفلسفة
اللي بيظهر على الناس لازم يختفي
طيّب اذا في ارنب بغابة اسود
معقول يا عدنان يرجع سلحفي
Adnan R. Said
علوم التقمّص لو فتحنا كتابها
بتشوفني يا بحر من اربابها
روح الأصيلي رح تجي بثوب الأصيل
و صعبة النفس تنزل بغير تيابها
-------------------------
ألشاعر سليمان طراد
طيّب اذا انسان عندو سيئات
معقول الله يسامحو بعد الممات
ان الله كتبلو عمر يرجع من جديد
بأيا تياب بيرجع يعيش الحياة
Adnan R. Said
يللي بحياتو بعالم الكفر التهى
ممكن بتاني جيل يشعر بالبهى
عا شرط ما يضلّو بمطرح ما اشتهى
وما يكون رب الكون عن فكرو سهى
يعني الخلص عمرو.. العلم زوّادتو
بيبلّش بهالجيل مطرح ما انتهى
-----------------------------
ألشاعر سليمان طراد
وين انتهى ..يوضاس ..وبمين التقى
من بعد ما تعلّق عاهاك المشنقة
يعني ما في انسان خالد بالدني
عا النار كل الناس...؟ ول الله البقا..؟
Adnan R. Said
يوضاس بعد الشنق صار جسمو تراب
وروحو بتاني جسم ما بتعرف غياب
بعد التقمّص سار عا دروب العذاب
يتحاسب على الارض فقر واغتراب
ويمكن اعاقة بالجسد تا الجسم داب
و جوع ووجع ودموع وجنون ومصاب
تا يركع ويستغفر الرب المهاب
ويتبع اصول الدين ويبوس الكتاب
يعني اذا بيتوب الله بيقبلو
وان ضل كافر ناطرو يوم الحساب
-----------------------
ألشاعر سليمان طراد
يعني انا..!! لما عروس الشعر بوس
بقدر بتاني جيل ارجع للعروس
طيّب اليوم الكافر البيقص روس
ايا جريمة بتنغفرلو بالطقوس
معقول يرجع شيخ أو خوري جليل
يوزّع على الأيتام بالدنيا فلوس؟
Adnan R. Said
مين قال يللي شال من صدرك قلوب
مجرم بشرع الدين ؟؟ والدنيا حروب
يمكن اذا اسبقتو انت عا هالدروب
رح تدبحو ورح تسبقو بهيكي ذنوب
معناتها صعب الجواب بهالدني
والله بيسامح كل مؤمن رح يتوب
-------------------
ألشاعر سليمان طراد
يعني اتفقنا ..في حساب وفي عقاب
وبو الحن ما بيتقمّص بطير العقاب
التوبة اللي عنا ..قبلها فحص الضمير
وعا جهنم الحمراء قصّاص الرقاب
Adnan R. Said
الله عطانا الروح روح مسخّره
لحكم الطبيعة وحكم رب المقدره
بتضلها تنقل اجبال مكررة
تا تدرس وتا تنال عفو ومغفره
يعني اذا بتكون روح مدمرة
بتروح عا دنيا العدم والزعبرة
اما اذا بتكون حرّة وخيّرة
بتضل تعلا تا تصفي جوهرة
وتقرب لحد الرب في دنيا الخلود
تعيش الأبد... و بنور الله منوّره
------------------------
ألشاعر سليمان طراد
سألتك سؤال..!! وليش بتحب الهرب
وناسي التطرف شر عا كل العرب
بأيا زمان تقمّص الداعش ورب
رب اللي خلقو بسيف تا الجندي ضرب
ما بعتقد في رب يتقمّص وحوش
وغير بأسيد ونار ما بنمحي الجرب
Adnan R. Said
اتركلي شعب داعش اجا مبارح لنا
وبكرا بيفل برقبتو في انحنا
الروح الرديه بتنقل بدنيا الفنا
وبدها رديه تضل ما تعلّي البنا
و روح الأصيلي بتتعب بعدّة جيال
تا سرمديه تصير وتنال المنا
--------------------
ألشاعر سليمان طراد
ما زال عم تنقل الموتى ..للحياة
تروك الخطية ميّتي بحضن الممات
غمّق معي..وحجّة زكية.. اليوم هات
واحفظ دما ابطالنا بالتضحيات
فهمت التقمّص..!! نقل زات بروح زات
وجيل البيخلق بالشهر من دهر مات
الارواح عم بتقول منها ثابتي...؟
ونسيت..!! يا عدنان عا الدين الثبات
Adnan R. Said
عم بنقل اﻻرواح عا تاني مطاف
تا ترتقي روحك على اعلى مصاف
ومتل ما انقلت الحكي وحكيو الشفاف
و متل ما انقلت الجرار على الكتاف
روحك قبل ما انقل لدنيا الفنا
رح انقلك عا كنيستك للاعتراف
------------------------
ألشاعر سليمان طراد
بتنقل حكي..؟.ثرثار يعني بلا أمان
ونقل الحكي ما صار الا باللسان
يعني ثبات لسانك ببيت السنان
خلّاك تحكي الحق ..أو تخرس كمان
الثابت وفي ..بيضل عا طول الزمان
واللي بينقل ..سر بنعدوا جبان
اثبت معي بموضوع يرضي السامعين
لا تضل تنقل من مكان على مكان
Adnan R. Said
قضيت عمري فوق هالازهار طوف
واتنقل وجبلك عسل عبا الظروف
ولو جيت تتهمني بلقلقة الحروف
ونقل الحكي .. بقلك بعد ضرب الكفوف
يا ناكر جميل المربّي بالصفوف
يللي نقلتك من صفوف على صفوف
تا صرت شاعر كنت استاذك انا
وانقلّك الحكمة الكتبها الفيلسوف
-------------------
ألشاعر سليمان طراد
تنقّل عا مهلك بس لا تبرم كتير
وتنسا ثبات الموقف ..الحدد مصير
كانوا البدو من عهد جدي عا الحصير
وبعدو التنقّل منهج الشعب الفقير
يعني النقل عن افلطون وشكسبير
هيدا طلع استاذ ما عندو ضمير
لو كان يثبت بالمناهج عا الوطن
علّم عن الشحرور والحج الكبير
ههههههههه
Adnan R. Said
عم تذكر الشحرور والحج وغشي
لسانك .. ما هنّي تنين شعر ودروَشي
ما تعلمو وبقيو قوافي مكنفشي
وتا يوصلو بدهن علوم وروتشي
ويا هاين العربان و البدو اختشي
لحقو المراعي تا قوي النسل ومشي
وهلق رح بردك عا دنيا الفرفشي
لبنان يللي فيه حكم بيرتشي
لوما نَـقلت الجيش عا حدود الوطن
كنّا انتهينا من الظلم والدعوَشي
-----------------------
ألشاعر سليمان طراد
يا مفتكر بتعيش متل السندباد
ما فيك تنسا بالوطن عندك ولاد
لما الكفر بالشرق يا عدنان زاد
انباعت بلاد النفط كلا بالمزاد
داعش تنقلّ حر و الغرب استفاد
وحرّك خلايا الكفر تا عم الفساد
ولمّا الفتن تتحرك بأرض الوطن
لوما ثبات الجيش بتروح البلاد
Adnan R. Said
مع سندباد وإبن بطوطة الوحيد
سافر يا شعري وروح عالغرب البعيد
وحركلنا أساطيل من نار و حديد
تحضر تا تقتل داعش الشرق العنيد
و لبنان يا سليمان مش دولة ونشيد
لبنان سرقة و نصب إيد تدل إيد
و لوما انت تتنقل بأرض العبيد
طفران كنت بقيت ما عندك رصيد
عطيتك بجيش بلادنا حجة و أكيد
تا تفهم عليي الشرح مفروض زيد
لوما تنقل بالرتب من و إلى
ما كان في عنا عقيد وﻻ عميد
ءءءءءءءءء
تنقل يا شعري و روح عالكرم السعيد
هات العنب زقو على خوابي النبيد
و دخلك يا تمي تنقل على غصون غيد
فلفش وراق وعيد كل ما تقول عيد
واشرب ندي من شفافها ... و بنهار عيد
دوق الكرز و تنقل و ضلك شريد
هههههه
----------------------
ألشاعر سليمان طراد
تنقلّت حتى تعبت من زق العنب
وفتّلت يا عدنان تا تبيّن شنب
قدّام شاعر ثابت الخلّى الجنب
يزرّق من كرباج ..حطك عا جنب
الثابت قلب ..والعقل ثابت ..والدماغ
ما بيحرجو بالشعر لو اتحرك دنب
Adnan R. Said
كنت افتكرتك شاعر بأعلى النمر
لكن يا غبنو فيك شعري اللي اختمر
ولما وقفت عا مرايتك متل القمر
شفت الدنب مش ثابت و فيك انغمر
و لوما الدما تمشي بعقلك يا طفر
مجنون كنت ومسخرة لزيد وعمر
و لوما القلب يتحرّك وينقل دما
كنّا العوض بسلامتك ماتو البشر
----------------------
ألشاعر سليمان طراد
كنت افتكرتك..!! شاعر محنّك زكي
ما عرفت شاطر بالهرب واللوفكي
الثابت شجاع وما بيخسر معركة
واللي تحرّك بالحرب راسو تكي
والدش يا عدنان متلي برمكي
بينقل صوّر للشعر وبينقل حكي
ثبتت دشي وجيت انقل صورتك
الليلي رح منحضر صوّر متحركي
هههههههههههه
Adnan R. Said
اثبت معي وخليك قلعة معمّره
عا صخر ثابت تا نعدك جوهرة
وثابت انت بالحرب؟ حرب المسخره
نيشان للقناص صيدي مسوكره
ويا دش يا صحن اللعب والفرفره
ان ضليت ثابت شو منحضر يا ترى
وخليك متل الدش ثابت بالغرام
وفحّـل يا طج الحب عا سرير المرا
ههههههه و اوعى تتحرك
---------------------
ألشاعر سليمان طراد
ضليّت تحرك ..بالهوا حتى انبرق
ضهرك ..وصار الحب حبر على ورق
لما عا بالك حلم شيطانك طرق
تثبّت غرامك بعد ما القلب احترق
غصن الهوى بالريح عمرو ما ورق
والأرز ثابت ..رغم ما مصايب مرق
وكل البيحرّك جرن ثابت من حجر
ان ما كان قد الحمل نفّس وانقرق
Adnan R. Said
حاجي بقا بزخم الرجولي تعتني
ما بفتكر فيك البطولي محصني
وتا اقنعك من بعد سحبة ولدني
بفضل التنقل بالدني عم نغتني
ﻻ كنت انت وﻻ دني وﻻ كائنات
لو ما انقلت من رحم امك عالدني
-------------------
ألشاعر سليمان طراد
كل البيطلع جحش دولة او طحم
ما تحرّك من الباص لولا ما انزحم
هههه
ضرسك اذا ما كان ثابت ما انلحم
واللي ثبت عا الدين من الله انرحم
الدولاب ياا عدنان رح قلك ..أحم
ما بينبرم لوما تزيت وانشحم
وما كنت قادر انت تظهر عا الوجود
لوما البزرة تثبت بقلب الرحم
Adnan R. Said
بدولاب وبموتور الله يبهدلك
بيتحركو عالبيت حتى نوصّلك
ضحّكتنا وعالجد تفكيري سلك
و تا إختم الموضوع بدي اسألك
وين كنت هلق انت يا عامل ملك
وبهالدني مين ال اجا يستقبلك
ان ضلّيت بزرة ثابتي برحم المرا
ونطفة رجولتنا ما وصّلتا الك
===============
ألشاعر سليمان طراد
ما زال فكرك آخدك صوب السرير
اسمعني انا استاذ ..صدّقني خبير
بتقول انو نقلت بزرة ..تا تصير
طفل برحم .. مظبوط ..!!بدك للضمير..!!
بس المصيبة نسيت قبل الزمهرير
في بحر ساكت لا مواج ولا هدير
الشهوة غريزة...؟ وقد ما تحرك شعور
حتى الغريزة..!! تخدمك ركّز كتير
هههههه
Adnan R. Said
سليمان هالموضوع قمّة بالحوار
متلو ما غنّا لا صغار ولا كبار
لكن تا نرمي كل شي عنا وقار
وانت وانا عالتخت نعمل هالنقار؟؟؟
لا لا ما بدي قوم تا نعلّي العمار
و نختم سوى موضوعنا بباقة قمار
ونخبّر الشعّار عا تلال الزجل
نحنا سوى ال مِنْشك بيرق انتصار