عدنان سعيد وبحر الزجل التحرش الجنسي

1 hora
متل العادة لما بيجتمعو العمالقة بياخدونا عالمطرح للي ما حدا بيسترجي يروح عليه غيرهن وبحنكة ب عالجو موضوع وكتير خطر وفايع بيومنا الحالي

يفتتح خيينا ألشاعر سليمان طراد وبنادي ملك متلو للي هوي خيينا Adnan R. Saeed وبقللو

الجنس والصحه

قالو الجنس بيجوهر الصحه
هيك سمعت عا الدش يا عدنان
شو قولك ..الأنسان لو تنّحى
عن واجبو ..!! بيصير مش انسان

وين الحقيقه وين يا عدنان

عدنان
ما أطيبو شو كان يحملني
فلفش قصص عا مسرح شياطين
و ياما مع الجيران بهدلني
و نيسن خريفي و ربعن تشارين

يمكن قبل ما الشيب كلّلني
و لما كنت مغروم بالحلوين
من كتر ما العنّاب دلّلني
هوي السمحلي عيش للستين
يمّا على الستين وصّلني
و مفكرتني الناس بالتسعين

سليمان
شعرك قبل ما يهر أو يبيّض
كنت شب وكان ياما كان
كان العمر يا بو بهاء الغض
يتشيطن على طيبة الانسان
ومرطبات العمر بدها خض
تا فيك تسقي لهفة النسوان
توقى عليك بخاف لا تنرض
وفّر عا حالك ادويه وحبوب
عمرك الو استحقاق يا عدنان

عدنان
من قبل ما اخلق كنت مغروم
و لما خلقت تا يبتدي سيري
عملت راهب كتر ما محروم
و لجنس حوّا خصّصت ديري

غير شكل عن غيري كنت مهضوم
و ما كان يهدا عالغصن طيري
و اليوم صرلي كم سني مفطوم
يا ريتني قادر متل غيري

سليمان
علينا بها الموضوع ما زال انفرض
لازم انا وياك نوفي بالغرض
ان قلت بعدك ع النساء بتنعرض
بتشوف سنّك جن وعليك اعترض
خايف بعد ما تصير ختيار ونحيل
يصير التحرش عندك هوايه ومرض

عدنان
اللي تحرّشو فيي و قلت عنهم حرام
لو شفتهن رح تركع و تضرب سلام
و هلق بعد ما كبرت و اصْفَرْ الخزام
و كل الحلال عملت و نسيت الحرام
ما في ضرورة صير اتحرّش ما دام
كلما صبية تشوفها عيوني قوام
بكتبلها ردّة و كأني طلتها
و دوّبتها عا لحن نهدات الغرام

سليمان
بالشعر لو حبيتها ما في لزوم
تندم على اخطاء حرفك بالعموم
لكن انا خوفي عليك من الهجوم
النسوان ما بيتنضفوا بخمسين زوم
هني الخطايا والصعب انك تقوم
تشغل ايديك بملش رمان الكروم
من هيك قلت بخاف من بعد الكبر
تقوى الشهيه عليك ما تقدر تصوم

عدنان
صايم انا و ممنوع ما باخد دوى
من وقت ما الشريان بضلوعي التوى
و لا تقول عن حوّا ما الها مستوى
بشفافها الأعجر اذا دق استوى
عليها الهوى بالغصب ما مرّه نوى
و لولا صيامي كان ما منّو نوى
بحفظ كرامة شيبتي و عا مرايتي
بعشق حدا و منكمّل الرحلة سوى

وهون كنت وصلت وطالبت بالزودة فااا ما كان ع خيينا عدنان
تكرم يا جان ، و اسمع المدفع دوا
تا يرقصو عا نغمتو العالم غوى
و وين البحر ما يكون من ناري انكوى
و بطّل يطوف و كش بالوادي انزوى

سليمان
يا عبد حوّا ومدعي متل الملوك
حب المرا مش وات ساب وفيسبوك
النسوان يا عدنان لوما عذبّوك
ايّامك الحلوين كانو عاتبوك
قلت الشهيه بتنفضح لما يجوك
اربع صبايا عاالفراش يغنجوك
مش هم تحفظ شيبتك بعد الكبر
أهل الهوى المهم هني اليحفظوك
الزودة
راحت النيره وصرت تاكل جبن بوك
هيدا سبب نسوان كاجو اطعموك

طالبتو ب زودة محرزة وبهضامتو وطيبة قلبو ومحبتو ب قول
عا الشغل رايح بس وبرحمة ابوك
ما عاد فيي زيدها بتصير توك

عدنان
هنّي ان إجو تا يشاركوني بالغدا
بقلّن هلا و نحنا حبايب مش عدا
ياللا تعو اشتاق الندا يغمر ندا
و لولا كبرت صوتي الو رنّه و صدا
يعني يا بحر الشعر عم لبّي الندا
و هيكي حياتي عشتها من المبتدا
هنّي اللي عم يتحرّشو فيي و أنا
عيبي عليي اكسر بخاطر حدا
الزودة
لولا صرت تعبان بمشي عالهدا
و طيري بيتكتك بعد ما زاف و شدا
و كرمال حوّا العمر ودّيتو فدا
راح و رجع تعبان و صيامو ارتدا

سليمان
النهر البيحفر خندق بيحفر قنا
بيكون رايح عا البحر يعمل زنا
بيمشي بغنج بين الفيايا والسنا
هي شيطني مش ضعف تا ينال المنى
كون متلي ريح فرع ىالغنا
وعري غصون الموهبه واعطي جنا
ولا تكون متل البحر هادي والشجر
تعلم تحركش متل ما بحركش انا
الزودة
الكاجو على سنان الكهوله لو دنا
بيفقعو ضراس البتمك كستنا

عدنان
تحركشت يا نهر ببحر رح يبلعك
شو هالشطارة روح الله يقطعك
سليمان نهر الفيك يمكن طمّعك
تتحركش بنسوان حتى تدلّعك
غير شكل عنّي شيبتك ما بتردعك
ما زال عالنسوان غدرك شجعك
بحيثك بلا شوفة و مافي عندك خجل
لولا اكلت شي كف ما بتفرق معك
الزودة
يا شعر مش رح زيد فيك و أوجعك
قلبي بيوجعني عليك كلما اطبعك
و ما بحب اني كرّرك تا انزعك
هيكي خلقت تا صرت زينة موقعك

سليمان
لما الخطيّه نبلش بتحليلها
كل جهلة عمر الها جيلها
بتحركش بنسوان وبغنيلها
ان راحت عا بحري وعاقدي منديلها
بوقف بعين الشمس وبناديلها
بلطش عليها بالحكي وبوميلها
وبجمّر البوسات وبوديّلها
باكل كفوف وبقعد مقابيلها
متل الصخور الآكلي كفوف المواج
وعيني عن الحلوين مش رح شيلها

عدنان قصيد
يا سليمان بالورد و حقولو
تحرّش قد ما كفوفك يطولو
تا يفوح العطر و العطر انعش
قلوب ال بالحديقة عم يجولو
تحرّش بالقلم تا تشوف طرطش
حبر الفلسفي اللي بيشهقولو
تحرّش بالكتاب و كيف ادهش
عقول الناس تا اخضّرت فصولو
تحرّش بالتراب الفيه نكّش
مزارع تا القمح عبّا سطولو
تحرّش بالخوابي الما بتعطش
و سرغس عا خمر بلّش نزولو
تحرّش بالعطر ما العطر اطرش
ما بيسمع عند ما تندهولو
و انت لوما دماغك شعر خرطش
و إجا يتحرّش بشعري و سيولو
ما كان الشعب منك شعر حوّش
ولا كنت لبست منّو تاج لولو
و يللي لهالصبايا راح وشوَش
تا يعرض منظرو عليهن و طولو
ولولا شعور هالنسوان خدّش
الصبايا الطاهرات بيحلقولو
و فكري بعد ما الموضوع نبّش
و حتى الشرح نختم عا اصولو
يلّلي ب عرض هالعالم تحرّش
على بيصور يعملّو زيارة
تا الله يرحمو..... عنو يقولو

سليمان قصيد
يا عدنـــان الأهـــالي لو اهتموا
بترباية ولادن مـــا انهموا
شوف اليوم اخطاء الخليقه
التباهي مين اقصر صار كمو
انا بتحركش بزهره رقيقه
نحل قصايدي عليها بلمّو
بحركش ضل ..ما بضيّع دقيقه
المرج بخرّبو وبرجع بلمّو
انا الريح اللي حركش بالحديقه
تا فاح العطر والعالم تشمّو
لكن ما بحركش بالحريقه
المفتن قبل ما يحركشس بطمو
انا بتحركش بشجره عتيقه
بعرّي غصنها عن جزع أمو
بخرب كون ما بضيّع دقيقه
لأني للشعر خلقان يمّو
انا بحركش اذا عندي عشيقه
بصدر مليان كل ما بروح ضمّو
لأنو الحب عقد بلا وثيقه
ونعمه ما بقا لازم نذّمو
المرا أم وبنت اخت وشقيقه
ان فيي تحركشت.. بصرخ يا عمّو
لأنو عند ما تحز الحقيقه
تأكد لو اجا مهووس حركش
ببنتك او ببنتي. بمص دمو