بحر الزجل وحنا ديب

افتتاح سليمان طراد :
قبل ما تسألوني عن فضولي
تا اعرف مين حنا ..بتسمحولي
اسأل كل اعضاء الخوابي
اذا مسموح عبّر عن ميولي
حنّا رعد ..؟ما بدّي إجابي
شاعر..بعرفو وشعرو مهولي
وحنّا لل فرح شاعر اهابي
ما بدي كتير عنو تفصلّولي
وبعرف بو أمل ..!! ما كنت رابي
على مراثيه ومعرّج خيولي
وحنا كور زكّرني بشبابي
ولد موهوب ومعبّى رجولي
لكن بالخوابي يا حبابي
حنا ديب؟ فيكن تشرحولي!
مين الدازو تا يدقّ بابي
وعارف بعدني ..ولحد هلق
ما تشلّحت زنّار البطولي
----
يا شب الأسمراني ..لا تراني .؟
تا جايي مغمّض على امتحاني
انتبه للبحر موجو الريح نسّر
وبعدو من جروحو عم يعاني
يا حنّا حلمك الليله تفسّر
بملقى رب ملكوت الغناني
تا توصل للعلّى عا الغيم جسّر
قلبي ..ووصّلك دار الحضانه
قبلك عا المجد ياما تحسّر
شادي وقال ظالم يا زماني
ورجع حسّان بمواجي تكسّر
وأكل حمّام بدموع الجبانه
المعي غنّى اذا تعملّق ونسّر
بفرح فيه وحياة الحماني
ولأني الكل يا حنّا مخسّر
حابب تربح الليله عليي
بركي بتستلم مني الأماني
----
انا لوما ضميري بكب حالي
على بركان همي وانفعالي
كتر ما شفت عا المنبر جرايم
كأنو صار منبرنا قتاله
لها الاسباب ما بقبل عزايم
على الحفلات تا اسمع رزاله
الي سنتين ما عدنان صايم
بشعّار المنابر لا مبالي
ولأنك كنت فوق البحر هايم
ولمحتك تحت غيمه من خيالي
قلت يا بحر حاجي تضل نايم
يمكن تلتقي بشاعر خيالي
ولأنو الشاعر بيبعت علايم
فهمت عليك يا حنا لحالي
شفت بكلمتك ورد وخزايم
وريحة طهر من ورد الحقاله
انا يا ديب منّي قش عايم
انا شاعر عيوني عا اللآلي
فينا نكون بالموقع حمايم
عا شرط تضل حدّي بالتحدي
واخر شيئ يا حنا ما بدي
نبيّن كتف واطي وكتف عالي
----
ولأنو بتشهد عليي صحابي
معوّد بس عا خمر الخوابي
وكلما الريح نار الشعر اضرم
بفيّق غفوتي وبلبس تيابي
انت غالي عليي كتير تكرم
حوار منزّه ولا حرف نابي
عليي السب بالأشعار يحرم
لأني عا طهر قدموس رابي
ولأنك بالشعر والحرف مغرم
عطيتك حظ ما تحكي بغيابي
ولأنك شاعر وبعرف مخضرم
انا قررت اقبل بالتحدي
عا شرط تكون شاطر بالإجابي
----
انا يا ديب مش انسان عادي
ما بجرح ورد ما بربّي أعادي
كتار بيكرهوني وب الصراحه
ما بعرف جوخ مسّح بالأيادي
المنابر بالطفالى مستباحه
وجيش الموهبه بدّو قياده
ولأني بحب عبّي كل ساحه
دعيتك للغنا مش للإبادي
واذا بتقول سوري وبوقاحه
وجارك يا بحر وين االمبادي
لا غبطه بتنفع ولا في سماحه
تغطّي جرمك ..بموقع سيادي
انا ما بآمن بجيره ..مباحه
انا الجيره يا حنا بإعتقادي
لما جارتك تشعر براحه
انت بتشعر بطعم السعاده
بلا استعطاف بلّش بالإطاحه
وعلى حسّان نادي وجيب شادي
وقلّو البحر بلّش بالكساحه
بدّي لعيلتي وصّل وصيه
انا استشهدت دافع عن بلادي
----
وبعد ما غاب حنّا طل حنا
وغيابو صار ل حنّا ضروري
ولأنو ضيف ديب اليوم عنا
لازم حمّلو رقة شعوري
ولأنو الشعر عنا مش مغنّى
منقّح مش منكّح متل دوري
تأنى عا حرف شعرك تأنى
قبل ما تجرفك موجة حضوري
المواقع اخدت الرهجه بوطنا
انفقدت قيمة الصوت الجهوري
السبك والقافيه قيمة مثّنى
وبلا ما تعتمد عا الصوت عنا
بيّن قيمة الشاعر السوري
----
وانا مش وقحنه منّي وهيني
حدد مين سوري ومين صيني
انا مجبور اتوقحن بوجّك
وادلك دينتك متل العجيني
بوجّي توقحن وممنوع طجّك
الك حريتك بحلف بديني
اذا بالشام يا حنا محجّك
انا مارشربل الطاهر عريني
حضّر موسمك لا تجيب فجّك
لأنو الشعر مش كلمه مهيني
واذا فزعان مني اليوم زجّك
بسجن القافيه اتطمّن لأنو
طليع واسعد من زمان غنّوا
قوافي هيّني وغنيوا المدينه
----
وبعد ما تهرب ونسمع انينك
على أيام راحو من سنينك
تزكّر كنت حدي عم تغنّي
وهلّق عارفين الكل مينك
انا بغنيك..روح اسآل عني
بعمري بالتحدي ما بهينك
شاعر عاطفي ومذوق لأني
واذا قصّرت بالجوله بعينك
لا تفزع انت قاعد حد مني
لا تدعس عا الهريبه بنزينك
هدّي رجفتك بيّنت سنّي
وأمان عطيتك تفضّل وغني
عا شرط تكون راضي مناصرينك




افتتاح حنا ديب :
أنا و نايم على مخدة خيالي
سمعت تنقيط شاعر في مجالي
غسلت النوم ب يقظة ظنوني
سألت....قالو البحر طايف جهالي
و جنابو جاي يسأل عن فنوني
برياح الجهل موجو صار عالي
فتح باب التحدي في رعونةي
رعونة مجرم بعين العدالةي
إنت مينك قبالي يا عيوني
ت تعطي لصغر حالك هالتعالي
م برضى بالتحدي يجمعوني
بمتلك (دون كيشوت) بلا رسالةي
يا بو شربل ب ماروني دعوني
أبو مارون جوهر شعر غالي
و متل م ولادنا بمذهب ماروني
نحسب مارون إستاذو لشربل
بصفي إنت طالب إرتجالي
----
و قبل ما تقسم و تجمع و تطرح
قبل م تكون لبناني.....لاتفرح
إنت سوري بتاريخ الحقيقة
و أنا لبنان فيي ما تزحزح
و على شعار بالشام العريقة
م شفتك نص مرة كنت ترجح
و لأنو ضلت جروحك غميقة
بحرب الديب بدها تعود تفتح
انا للشعر يا شاعر حديقة
لا تطلع عوسجة حالك بتجرح
بصمتي في بلاغة و في موسيقا
ع كتر الجعجعة العندك بتربح
و إذا بدك تحارب كل ضيقة
و شهيد تكون عندك درب أصلح
لا ترمي حالك بلجة غميقة
و ببحر الزعبرة لا تضل تسبح
بحرب الجهل في عندك طريقة
و اذا بتموت رح منقول مصلح
و بحرب الفقر جاهد شي دقيقة
الشهادة هيك رح بتكون أوضح
ع حربي جاي عم تعمل طبيقة
و بمقبرة الشهادة الاسم تشلح
بحرب الشعر و حروف السليقة
ما رح أعطيك مطرح للشهادة
بسجن العار في لك بس مطرح
----
إجا سليمان ت يكبر مقاسو
بعد ما شهرتو العالم تناسو
و انا المش وارد ببالي التباري
صرت مجبور فصل ع قياسو
فرض انو بمباراتو انبهاري
لأنو معود يسخر حواسو
و بحيثو تعود يصيد الدواري
ع نسر الشام مش نافع قواسو
ما فيه يصيب بجنونو وقاري
قدر ما مناصرينو فيه واسو
ولانو مدهب الاسم العياري
انفضح لما كشفنا عن نحاسو
رجع يحكي بمنطق انكشاري
و لهيكل كلمتو يركز أساسو
و تردو عن هجومو الانتحاري
تركتو يبيع ربو بالمصاري
ت اهدم هيكل طموحو ع راسو
----
بخوابي الشعر حنا من رصيدو
سقي الأنصار من دمعة قصيدو
تركها و غاب عنها و ما نسيها
و رجع يوصل قديمو في جديدو
تركها بإيد عدنان السقيها
سهر بي الوحيد على وحيدو
و اذا كلمة عتب قلبي حكيها
ع قلب الديب ما بيرخص سعيدو
الخوابي الخمرو الكلمة بنيها
شو صرلو الخل فيها مد ايدو
بأسامي دينتي ما بتشتهيها
ع شكل البحر و النهر و نشيدو
ولأنو الخل عارف شو إذيها
ع سيدو... نبيدها لو مد إيدو
خوابي الشعر مابيضل فيها
بحيثو مناصري الأدمن نبيدي
م عاد يقبل بهالخل و أسيدو
----
انتبه يا بحر (ميت )من هياجك
ما في تنين يطلع ع مزاجك
و اذا التنين ع رملك تملك
بجرمك بدبحو و بصبغ مواجك
الفكر سمكات ما عاشو بظلك
لأنو الطبع مرمرلك عجاجك
و مزالك يا بحر ميت ع حلك
ع نبع الموهبة ليش احتجاجك
انا صياد ....ما بقبل بذلك
على العلقة بلساني مين حاجك
لاتعزمني ع صيد الشعر كلك
سمك أفكار ما عندك لأنو
ع فقر الحال موراني زواجك

قرادي :
سليمان :
حنا ديب واتباعو
ان برموا الكون واصقاعو
بدو يضلو مغطى البحر
ها الكون تلات ترباعو
------
يا جايي تقبض من سيدر
وتنهب خير ..بموطنا
كلّك ..قدّك قد الفدر
وبالأمجاد بتتكنّى
حملان الكلمه والقدر
بخوابينا يا حنا
ما بينصاعوا لديب الغدر
بس الأمري بينصاعوا
حنا :
رغم الالفة و جو الصلح
بالبحر العالم ضاعو
الكلن ملح و باعو الملح
بنص فرنك بينباعو
------
شو عم تعمل يا فهمان
بجمهور مخيب ظنو
عملتن بالردة حملان
ت تشتم ديب و فنو
باول ردة يا سليمان
خسرت الفيك بيتكنو
الما رح ينصاعو لانسان
شايف انهن صناعو
سليمان :
لا تفكر انصاري بسيب
ومجدي عملتو ما لقيتو
رشرشت على، العالم طيب
وديب، الكلمه رشيتو
ولو بحر الاخلاق بجيب
وللديب، الالفه اسقيتو
بدو الديب يضلو ديب
وما بتتغير اطباعو
حنا :
ن كنك أرنب بالافكار
مشكلتك مش حنا ديب
الديب بيبطش بالشعار
و الارنب مش قد الديب
وبتهددني بالانصار
وانك حردان وبتغيب
مش ديبي هوي الغدار
الارنب هيدي اوضاعو



معنّى :
سليمان طراد
عا النازحين اليوم يا عيني ادمعي
وجايي انا بالجرح اوضع اصبعي
حق الرجوع مقدس برايي ووعي
من بعد، ما خلصنا مواويل ونعي
يمكن يا حنا احرجك من موقعي
لكن ضميري بيجبر عليي السعي
اعمل وزير الخارجيه... وبسالك
انتي على استعداد تتفاوض معي؟
حنا ديب
الحرب انتهت يا ناس لازم ترجعو
انتو جرح وحدو الوطن عم يوجعو
واللي عيونو بالكذب عم يدمعو
يبكي ع حالو و عالوطن للي مضيعو
السوري على لبنان حبو شجعو
ما كان بدي تسألو و لا تطلعو
بعدو بجنوبك في عدو و احتلال
ن بدك تفاوض روح وتفاوض معو
سليمان طراد
ما زال نحنا تنينا خدنا قرار
بوحدة مصير الشعب يا حنا ومسار
لازم نفاوض بعضنا بحكم الجوار
من بعد ما علينا الدهر يا جار جار
نحنا دفعنا دم واحملنا دمار
منشان ما نحاور يهودي وهيك صار
الجولان قطعه غاليه من سوريا
ليش دخلك بعد ما افتحتوا حوار؟
حنا ديب
باسم السلام العادل فتحنا مجال
نفاوض ت نحقن دم ع دروب النضال
ولما التفاوض سكر بوجهو المجال
دعمنا المقاوم طالب العون الحلال
ولما بأرض لبنان قدمنا رجال
والردع حافظ عالجنوب و عالشمال
راحو اللي متلك بالتفاوض فالحين
ت يشرعنو بأيار جيش الإحتلال
سليمان طراد
ما زال شاطر بالحكي وبالإنتقاد
رح خبّرك شو كان صاير بالبلاد
فات عنا بو نضال وبو أياد
يستوطنو ويا للأسف كنا ولاد
وطرحوا البديل...وهون نفّضنا الرماد
وقلنا بنرفض ما قعدنا عا حياد
نحنا منعنا الأستيطان بأرضنا
وانتوا زرعتو بالوطن طبقة فساد
حنا ديب
ان كنا زرعنا في بلادك فاسدين
نحنا طلعنا ليش هني باقيين
معناتها يا شب مزغول العجين
لا تحط حقك ع الخميرة يا فطين
نحنا اللي كنا ندعم مقاوم امين
ليش انقسمتو شي لحد شي مقاومين
حملنا المقاوم باليمين و بالشمال
وانتو بترتو شمالكن بيد اليمين
سليمان طراد
لما رزحنا تحت حكم الإحتيال
كنتوا يا حنا تنسّقوا ما في جدال
انقصفت بعبدا تحت عين الإحتلال
ولا تدخّلت لا اسرائيل ولا الصومال
قسمتوا الجبنه عا اليمين وعا الشمال
وكل حاكم من شرف لبنان نال
رح ينتهي قدّام محكمة السما
تا ينزكر بكتاب مزبلة الزوال
حنا ديب
دور الضحية جيت تلعب شو جرى
ما عطيتني لهلق جواب بينقرا
قصفنا بعبدا بعد طول المشورة
ت تطبقوا الطائف و تنهو الزعبرة
واللي تسطر بالفساد بينقرا
وبجمهورية موز صارت مسخرا
ال بيبيع حالو لا يلوم المشتري
ن شافو بضاعة بالرخيص بتنشرا
سليمان طراد
حاجي بطوله وعنتريّه تبيعنا
رغم القصف ما حصلت عا توقيعنا
موضوعنا بيضل عن تطييعنا
مهما يا حنا تعددوا مواضيعنا
الفتنه العماله قلت من تصنيعنا
وبيع الضماير والهدف تضييعنا
نحنا انّفينا وما انشرينا بالوطن
للموت عزرايل ما فيه يبيعنا
حنا ديب
لما الروح بتقبل النفي الخطير
لازم جسدها ع الهفى يشد المسير
و لما المواطن يقبل بنفيو المرير
بحجة نفي او حجة الوضع الفقير
بيكون تارك موطنو بظرفو العسير
بيصير فاقد حق تقرير المصير
يكتب بدمو بعت روحي للوطن
و لايبيعنا من غربتو شعرو الغزير
سليمان طراد
لما انفى ديغول ما قالو هرب
قالو تراجع بس، للنصر اقترب
نبيد الكرامه بيسكرك كلما انشرب
وخل العماله بالوطن متل الجرب
صدام مات وبعد ما بلادو خرب
وعمار راح وبعد ما اتقطع ارب
قايد بيعرف يخسر ويربح وطن
وظالم...!! مدمّر شعب... فالتحيا العرب
حنا ديب
انفي العقل من راسك و هات الجواب
ت الشعر ينفي حضور ....يا محلا الغياب
مش كل قايد من نفي عاد بصواب
الشاه انتفى و صار العرش عندو سراب
ولبنان لما عليه فرضو الانتداب
رجالو ما هربو .... و حررو كل التراب
لكن بجيلك عند م قبلتو النفي
كنتو صحاب البيت ..... ما بقيتو صحاب

وف اوف
يا حنّا بعد ما اندحروا الدعاشي
انا ما جيت وقّف خط ماشي
انت ما خصّك بلعبة أممنا
انت متلي ضحية حكم فاشي
نحنا بالوطن لما حلمنا
ما كنا نسهر على أي شاشي
عبدنا شلوش ارزنا وعلمنا
ولقينا ضيفنا بضحكة وبشاشه
عا طيبة قلبنا يمكن انلمنا
وحرقنا حالنا متل الفراشه
نمنا عا حلم اخضر وقمنا
لقينا بارضنا فلتوا المواشي
بحرب لبنان يا حنا انظلمنا
ونشّف دمنا عا كل شاشه
ودخل جيش الغريب على حرمنا
هجّر شعبنا وعشنا بجآشي
الشرق و الغرب بالحرب استلمنا
رفضنا بوقتها نقبل اعاشي
ورغم قلّة مواردنا هزمنا
جيوش مغطرسه بثورة دباشي
بيارق نصرنا غطّتت قممنا
وما كنا نقبّل نصفّي أباشي
/ هنود الحمر/
ولأنو المعتدي الضحكه حرمنا
كسرنا بشوكتو ولحد هلّق
بيفيق ملغشن وبينام غاشي
بحب نوّه انو انا افتعلت ها المشكله مع حنا قسما بالله ما بعرفو ولا بيعرفني والي الشرف انو يختم عليي حنا ديب بس شادي موسى حستبو قريب ههههههههههههه

حنا ديب

رجعي يا شام اختك عم تنادي
شتاقو لحضنك الدافي ولادي
حضنتْ ولادك و رغم المرارة
بقت بيروتهن جنة سعادة ي
الماضي.. يا أبو شربل تجارة
بسوق التفرقة و مالها إفادة ي
ما في تاريخ صادق عن جدارة
لأنو الحبر خادم للسيادة ي
انتصر ع ضعفك و لاتشن غارة
على وهم التآمر و التمادي
و على شماعة الغير بمهارة
تعلّق مشنقة و تشنق أعادي
البلد لو كان في عندو إدارة
و مهارة في رجالات القيادة
ما كان بتحكم بأرضو سفارة
و بِ وادي حكومتو و شعبو بوادي
و بعد ما شاعر و شاعر تبارى
ضروري من الشعر نربح إفادي
تعا نجمع محمد مع بشارة
بيكفي تفرقة و نلوي أيادي
و متل م البحر في عندو منارة
انا وياك ع ذات المبادي
أنا ببيروت بتنفس حضارة
ت صرت لسوريا عاشق زيادة ي
و إنت في غربتك عشت بمرارة
ضروري تنتصر فيك الإرادة ي
تعا ع الشام لكن مش زيارة
و قلي جاي ع بلادي يا حنا
ما بدي موت.... الا في بلادي