خمر ودين علي جعفر والبحر

حوار مع بحر الزجل : الموضوع كراسي او مطاعم ومشروب

سليمان طراد

في بوست شفتو مبارحه بسرعه مرق

ولما عرفت قلبي من الغيره احترق

الحفلات شاعر من حلم الله سرق

وحرّك بحرفو كل ما الديني طرق

المنبر بلاغه مش متل لعب الورق

وصوت دافي حيط احساس اخترق

يمكن علي يرتاح عا كراسي وانا

بفضّل بمطعم قاعد واشرب عرق

علي جعفر

اشرب عرق يا بحر مين بيمنعك
وسم هاري بنص بطنك يندعك
انت بحر الشعر صافي منبعك
بكرسي و مطعم لو حكيت منسمعك
لكن عا هالموضوع يللي شجعك
ضرك ورح خبرك شو بينفعك
ترم الشعر بتروح عالكرسي معي
وترم الهبل رح روح عالمطعم معك

سليمان طراد

الاجواء لما بالزجل صارت سموم
الطاولات صارت عبىء ما الها لزوم
قلي المنابر وينها وين النجوم؟
تا ضل قاعد عا الكراسي.. وما بقوم
الانسان لما عن ملزاتو يصوم
بيطلع عا بالو يسطل بخمر الكروم
حول لعندي وكب همك يا علي
بسقيك كاس السم تا تنسا الهموم
هههههه

علي جعفر

مشروب كاسك بالقصيد المرتجل
شاعر بديهي و كلمتك كرج الحجل
بتقول ما في نجوم منقلك اجل
هيي المطاعم جابت لشعرك اجل
لو في كراسي بس وعقاب ووجل
ما كان شاعر خبص وما بينخجل
ومن قبل ما تسقي علي وينسى الهموم
فش خلقو بكاس من كركة زجل

سليمان طراد
يا شعر كلما كاس همي بينتلي
بفضي همومي عا موايز طاوله
قعده وكرسه بلا شرب منها الي..!!
هي قعدة النسوان وقت الولولي
عن جيلنا لا تجيب سيره قنبله
وتا نسكرك جبنا خوابي متلتلي
اسقيناك نصية زجل راسك برم
كيف لو تشرب الكركه يا علي

علي جعفر

راسي برم من كتر ما سامع مديح
عن اعرج بيترقوص قبال الكسيح
لك قعدة كراسي والسمع لا تستبيح
هاي قعدة رجال الكنايس للمسيح
هاي قعدة رجال المآذن للذبيح
هاي قعدة الشعار للفكر الصحيح
هيك حفلات الزجل حبيتها
ازلع خمر تا تقول شقيت الضريح

سليمان طراد

لا تشرب ولا تقول ما بتسوا الخمور
تا تضيع بين الخصر وحبوب الصدور
الخمره حياة مهيّني بعض الأمور
والدين صعب بها الدني الكلا شرور
قرّب معي عا جهنم ..وبنّج شعور
وانسا همومك يا علي وعيش السرور
لوما ابو النواس بالخمره انتشا
كان حامل مكنسه يكنس قصور

علي جعفر

خصر المناجل ضم مية سنبلة
ولومك على البياع وقت الغربلي
يا بحر بو النواس شاعر ترغلي
بس الفرزدق كان اعلى منزلي
تقصى عن الاسباب..كرسي وطاولة
وكان الملك بالحج عامل بلبلي
عطيني السمع قال الفرزدق للملك
وخلد قصيدو بلا فتى الا علي

وهون هرب صاحب المطعم ههههههههه



اوف اووف
انا ما كان بدّي ..قبال ناسي
غنّي يا علي بفائق حمــــاسي
وما اقشع صاحبي بالكاس علّا
كاسك يا بحر.. بنّج حواسي
انا والكاس رفقه مش مخلّى
عليي يعتبو خوابي الأماسي
ومهما يكفّروني ولاد الله
بدّي ضل عا المنبر بكاسي
اذا بتقول ..عن كفرك تخلّى
وارجع للطهاره وللقداسه
انا رح جاوبك ما بعود كلّا
الخمر والخصر قاتول التعاسي
اسمعني يا علي وحدّي تجلّى
وخدلك كاس ..!تاما تدوخ كاسه.؟
وسلطن ..بالخوابي العمر ولّى
انا ويّاك عا جهنم سواسي
تركني يا علي بحياة الله
اسكر عا الجروح وعا المأسي
ضهري منحني وراسي معلّى
وشو مرتاح من اهل الكراسي
بعرس قانا مسيح الكون ملّى
الخوابي بخمر اوعى تكون ناسي
وقليل من الخمر قلّن وعلّى
بصوتو.. بيسعد القلب الموأسي
وانا تعلّمت هون بفنزولا
الخمر بالدين عا المذبح اساسي
ولأنو ربّنا عا الخمر صلّى
انا رح ضل صلّي عا المنابر
تا الجمهور يسكر عا الكراسي