عدنان سعيد وبحر الزجل موضوع النوم والوعي

سليمان طراد
ي شعر فيّق بو بهاء من المنام
تخت الموسيقي بلّش يطوي الحرام
ويا موج .قاتل بالرياح ولا تنام
جاييك اعصار المعاني والكلام
الطقس الربيعي خيّم وفتّق كمام
والشمس طلعت والهوا ضب الغمام
وما ضل نايم غير عرّاب الزجل
يا مين ينده صوت كشّيش الحمام
عدنان سعيد
اتركني يا بحر الشعر نام بمقمطه
متل الطفل من بعد كتر النطنطه
و خلّيك واعي بس ما تعمل خطا
و لا تكون متل العا درب كفرو خطا
و خدلك روايي و ما بظن مغلّطه
عن انبيا من مجرم عليهم سطا
أهل الكهف بالكهف نامو من زمان
اتركني دخيلك نام ... ما تزيح الغطا
الزودة
روحي بِ ديني و بالإله معربطه
و مؤمن صرت فيي المحبّه ملّقطه
وما بحب عا سريري الصبايا مزلّطه
ولا شوفها من نار جسمي مشوشطه
سليمان طراد
يا موج ضلك للصبح سهران شوف
نجوم السما ..عا صفحة الزرقا حروف
ويا بخل طفّي الموقده..جايي الضيوف
واغفا بمطرح ما غفو أهل الكهوف
تركني ما بدي نام بدي ضل طوف
الآمال وعّي وقلّب عليها الظروف
وفيّق الفتنه النايمه بيناتنا
بركي بيوعى شي نبي وشي فيلسوف
عدنان سعيد
يا غيوم نامي و يا عواصفنا اهربي
و ربعن يا جو وقول يا زهور اكتبي
و إركع يا بحر الشعر و امشي دبدبي
هلّق إله الشعر طل من الخبي
فكّرت حالك قلت للفتنه العبي
و ناسي مصير الكون طابي بملعبي ؟؟
لما الكفر قرّر بليله مشقلبي
يموت النبي و تنهار أمّه طيّبي
خلّص محمد و انجلا اسلامنا
بنومة علي بفراش سيّدنا النبي
الزودة
يا شعر إبكي و يا مواهبنا اندبي
و لولا عطشتي من البحر لا تشربي
جيتك انا شلّال شعر و موهبي
ضلّي اشربي كوثر تا حتى تتعبي
سليمان طراد
مين ...قال نايم يا علي.. !! مين قال....؟ مين
جاهل..وناسي يقظتك عا المشركـــــين
باب الديانه.. بتعرف وحالف يمين
ما بفتحو إلا بوج المؤمنين
ويا نايم وغاشي على سرير الأنين
وحولك اطبا عا الشمال وعا اليمين
عجزو معك ما كنت توعى... وخبّرو
بتضل غافي من تعاطي الهيرويين
الزودة
اصحى يا متعاطي حشيشي وكوكايين
الجمهور ناطر والمراسي مصوبنين
شوف الخميره الما بتغفا بالعجين
تا تخمر وتطعم يتامى جايعين
عدنان سعيد
هاتلك شي شمّه بنام بعد الواجبات
يمّا شي مجّي من حشيشة كيف هات
و حتى الشعب ينسى الوجع و السيئات
عنا الحكومي شرّعتها للذوات
و حضرة جنابك قوم من بين الرفات
و متل السمك سهران ضل و لا تبات
وبكرا عند ما تدق عا بواب الممات
وقلبك يقلك هات اعمل معجزات
كرمال تشفى و ما تموت من الوجع
بسقيك جرعة نوم من بنج الحياة
سليمان طراد
يا حلم نام و يا مشاوير انبري
دكي طريق الكزدره تا تهتري
ويا كروم ضلك نايمه ولا تسهري
الا بخوابي معتقه تا تخمري
شكيتني ابرة بنج بخواصري
وعارف ما بغفا بضل متل العسكري
مفتح عيونو ..عا الخلايا النايمه
منشان نغفا كلنا يا مفتري
عدنان سعيد
منغفى سوى و منّنام عا مخدّة أنين
من طائفيي ما بترحم جايعين
و العسكري السهران تا يحمي العرين
بياخد أوامر من أسود الكاسرين
أسود الوطن إلهن على الكرسي سنين
و تا يسرقونا حلّلونا بكل دين
هودي أبالسة النظام الحاكمين
البعدن ما نامو من التلاتي و اربعين
و لبنان إلنا مش رح نشوفو وطن
تا الشر فيك ينام يا ابليس اللعين
سليمان طراد
ما زل جرحك يا وطن بقلوبنا
ما في برأيي مغفره ل ذنوبنا
نحنا شعب بشمالنا وبجنوبنا
خبز الكرامه همنا ومطلوبنا
حكّامنا النكشو الفتن عا دروبنا
وحلّو مشاكلهن تا نتفو جيوبنا
ناموا على ثرواة امتّنا سنين
وما بينتهوا حتى تفيق شعوبنا
عدنان سعيد
بلبنان لما الشعب بلّش بالهجوم
ركّب شعار كبير بيطال النجوم
و تشرزمو بثوره ما في الها لزوم
هوني دروز و هون شيعه و هون روم
من دون قيادي هوشلو بكل الكروم
و فشلو و تا قلّك انطباعي بالعموم
الثورة المتل ثورة بلدنا الفاشلي
اتركها تنام و ألف عمرا ما تقوم
سليمان طراد
لما علينا بالمشاكل ضيقو
صارو مفاتيح السعاده يزيقو
مشي معي عا الحب نعرض شيقو
ووسع خيالك بالعشق لا تضيقو
لما التخت تعطرو وتليقو
وتغفو عليه تنينكن وتريقو
توقا البفكرك كان نايم من زمان
اياك تزعج خاطرو وتفيقو
عدنان سعيد
أزعر انت ما تفسّد عقول الكرام
يمّا اعتذر يا سحاب هالكلمة قوام
و اترك همومي النايمي براسي تنام
ما عدت اقبلها و حتى و بالمنام
ولولا عا جسمي تحرّك بنومي حرام
صفّيت قلّو الضرب بالميّت حرام
نحنا بشهر صيام و صيام الجسد
لا بالحلال بيسمح ولا بالحرام
سليمان طراد
لما الصيام بيبتدي جدي بحلول
اخر شهر نيسان بينام الخمول
بعد العشا..مسموح او ممنوع قول
تفلت طيور الحب عا سرير الميول
نيم النزوه ولا بقا تشرب كحول
صيام الجسد ما بيمنعك تركب خيول
عند المسا مسمحلك تفك الصيام
والصبح رد صيامك وارجع بتول
عدنان سعيد
محلا الغفا برحم الأمومه عالهدا
كلو دفا تا يحين وقت المبتدا
و لحّق عذاب و ركض تا تأمّن غدا
و تحمي ضناك من التعدّي و الردا
تلتين عمرك شغل و هموم و عِدا
و باقي التلت للنوم مش رايح سدا
بالنوم بيحِل السلام العالمي
وما في حدا بيسرق ولا بيقتل حدا
الزودة
لا توزّع دروسك على مؤمن بدا
صيامو هروب من الصبايا و الندا
و قهر النفس تا يترك بنفسك صدا
شوف الحلا و خليك عايش عا حِدا
سليمان طراد
لا تنام يا عدنان ..اوعى يا رفيق
جايي السلام العالمي تلحلح وفيق
القبطان ما بينام تا يقطع مضيق
ونوم الجمر بالقش بيولد حريق
وكيف الجسد بينام حكيك مش دقيق
ماالجسم فايق بالزفير وبالشهيق
وما زال شرب الخمر مصدر للغفا
جبلك شي بطحه ونام بنص الطريق

Adnan R. Saeed
Adnan R. Saeed
ختام

خلّلي الكورونا تنام يا سليمان
من قبل ما يتدمّرو الأوطان
بْ ووهان وعّوها البلا تفكير
يا ريت بقيِّت نايمي بْ ووهان
و لولا خدمني بوصفك التعبير
بتطلع كورونا الشعر و الأوزان
نملك شويي ما بقا بكّير
كتر السهر بيشتت الأذهان
و خلّلي الدولار ينام ما بيصير
يجوّع الفقّر و ينتف الشبعان
و عالسرير ينام طفل صغير
مطرح ما إمّو راكعه منشان
يرضع بقايا صدرها التعتير
المتل تمّو منشّف و عطشان
حتى انا بعد اللي عم بيصير
ببلادنا الفيها الأمل فزعان
و إرتاح نتفه من عذاب كبير
خدني تا نام مدهدك و تعبان
بِ حضن وادي و عجقة عصافير
و عبقة فضا معبّا الدني ألحان
و نسمة تغط و ما تعود تطير
عا خدود لوهجها قمر نيسان
و انت و أنا العا رزقنا نواطير
و العمر منّا للأسف هربان
مش حق نحلم بعد بمشاوير
و فينا الفجع يوعى على النسوان
لما التراب يصير إلنا سرير
منعرف محلّو بآخر الضيعة
و ما في حدا بيضيّع العنوان


البحر ختام

اوف اووف
يا نوم حاجي تشد بعيوني
اعتقني قبل ما تكلخ جفوني
اعتقني يا شيطاني ما بدي نام
تركني ل وحدي ونام من دوني
عدنان يا عدنان ما بتنلام
بتنام..مع احلام مجنونه
ومنشان تنسا الهم والآلام
عينيك للاحلام مديوني
شو النوم يا عدنان استسلام
وبزنز فشل أرواح مسجوني
وشو توسّع المشروع بالإعدام
لما كورونا صار مليوني
مشيّ معي عا شارع الأيتام
لمشهد كئيب .الناس مرهوني
اطفال عم تغفا بدون حرام
نوم الضمير القلق ظنوني
تركني ل حالي ...قلق الإيام
ووبّخ العدل وسن قانوني
ووعّي العداله ونيم الحكّام
بالحبس بس بشكل قانوني
قديّش في مظاليم مش ظلّام
بقيو بلا دين ولا دينوني
ملفّات نامت ما صدر احكام
ولليوم يا عدنان مدفوني
وبليبا تأمل معي وبالشام
نامت خلايا شر ملعوني
ولما غفي العسكر المجرم قام
بأعمال وحشيه ومجنوني
وعّي ضميرك حاج استزلام
وبلّش بثوره حق مضموني
ووقف بساحات الشرف مقدام
الناطور لولا نام ها المره
بدها الثعالب تسرق الموني