عممصكبنرعش

موضوع: عممصكبنرعش الثلاثاء مايو 27, 2008 7:53 am

عممصكبنرعش اسم مختصر لجبال وطننا الحبيب لبنان
=====================

وقفت ع جبال لبنان بفطانــــــة ... حلل إسمها وأعطي معـــاني
وعممصكبنرعش اعمل مخـدة ... بطبيعة ما لِها بالكون ثــــــاني

وقبـل مازيد حرف كتــــبـت ردة ... عا إسم جبالنا بأعلى مكـــاني
ع) العين من عامل الكلو تصدي ... عمل أيار عيدو الأرجـــــــواني

م) وميم المكمل البيكل مـــدة ... تكمل متل مؤمن بالديــــــــاني
وبين جبال هالكون بمــــــــودي ... معو لاقى المثل صون الامـاني

م) نده يامنيطرة بالميم مِـــدي ... أيادي العون تاتكوني الضمانـــة
ص) وصنين البقي صامد بقدي ... نخ الدهر قدامو وحــــــــــــاني

ك.ب) والكنيسة اذا بيوقع بشِدة ... الباروك بيسعفو بأرزة مصــاني
ن) ونيحا ناحتي بصخرة مّـهـــدّي ... النبي أيوب عاطيها إعــــــــانة

ر) وعلى الريحان مني شعر وَدي ... سلام وسلمولي ع الريحـاني
ع) وعلى عكار برسل كــــل وِدي ... لجبل مابيعرف بعمرو الخيانــة

ش) وشين الشيخ وجبين المندي ... شردق غيم ثلجات العيــــانة
وآخر حرف رح زيــــــــــــدو تحدي ... بأسم عمار سجلتو لأنــــــــو
جبل للشعر وصخوري المعاني

* * * * * * * * * * * * *
lol!

فكرة جميلة جدا...حلو يا عمار

أ - أمير القافيي ورب القوافي
ب -بدر بالمنتدى وعندك ثقافي
ت-تربع عا عرش من معنويي
ث-ثناء الروح يعطيك العوافي
ج-جميل الخلق عندك طيب نيي
ح-حامل مجد لبنان بشفافي
خ-خريف العمر لو قرّب شوي
د-دواعي الرب بتشيل المخافي
ذ-ذواب التلج بيفجر الميي
ر-رواق الفكر بيدوّخ صحافي
ز-زوال المملكة بيعمل قضيي
س-سلام الأهل بيزيد الرهافي
ش-شواذ القاعدة بلا معلميي
ص-صواب العقل خلّى النطق دافي
ض-ضريبة عا الزجل مش واقعيي
ط-طبق بالأكل بيحلّي الضيافي
ظ-ظروف المرء مش أكلي شهيي
ع-عوافي الروح فكر وقلب صافي
غ-غريب الطبع يمكن فرخ حيي
ف-فوائد منتدانا باللطافي
ق-قوافي تكون مسبوكي قويي
ك-كأنا روح من فكر الرصافي
ل-لأنو ال ما فهم الله خطيي
م-ملك عا عرش ما عندو خلافي
ن-نوابغة الوطن بالجمهوريي
ه-هودي زهور عا شفاف الحفافي
و-ورايي رددو بالأبجديي
ي-يوم الدين عا الأنسان جايي
مهما يبعدو عنّو المسافي

ابتكار جميل لعمار، وطريقة رد جميلة من سليمان، وكل يوم إلنا شي جديد من شعار بينرفع فيهم الراس

بأبجد هوز وكلمن وحطي = وصعفص قرشت الردو عليي

وثخذ مع ضغط زادوا حروف خطي = بقوافي عبقرة بالشاعرية

ابراهيم وكوبيلو بحور شطي = تبر بي زودني ومعنوية

وابو شربل الكاتب ع محطي = مابفرق محطي عن محطو

وعن قدموس بي الأبجدية

* * * * * * * * *
شكرا على مروركم جميعا ونحنا منرفع راسنا فيكم