الفلاح

موضوع: الفلاح الأحد يونيو 01, 2008 2:24 am

بصبحك بالخير يا فــــــــــــلاح … كيفك انشالله بعيشتك مـــرتاح
وكيف كرم التين والزيتـــــــون ... انشالله السنة يكونو كتير مناح؟

يسعد صباحك قالها وممنـــون ... وتنهد بنهدة كبـيرة ونــــــــاح
وتدحرجوا العبرات تحت عـيون ... وشال محرمتو بأيـــــدو ولاح

وفيي تطلع نظرة المحــــــزون ... وقال المزارع كيف رح يرتـــــاح
الشرحة بألف وتنين شو مايكون ... كوسى وبطاطا ولوبيـة وتفـاح

ومش رح بّعد الموز والليمــون ... يـمّا المقتة وسحرة السّــــواح
كلن يا ابني مابيوفوا ديـــــــون ... ولا حواشهم ردوا كثير شحاح

ونقدة ماعاد بيدفع ولا زبـــــــون ... الشكوة لغير الرب ما بتنبــــاح
بتبقى مذلة ورزقنا تا نصــــــون ... علينا عم يشنوا حـرب منـتـوج
وبكتير أصعب من حرب السلاح

* * * * * * * *

موضوع: رد: الفلاح الأربعاء يونيو 04, 2008 11:54 am

عمار شاعر مبدع، والحق يُقال.

موضوع: رد: الفلاح الأحد أغسطس 31, 2008 11:31 am

عمار يا ابن لبنان الحبيب****عرفتك شاعر محنك لبيب
فلاح بالارض الملاني حبوب**** وشاعر بالموهبي اكبر اديب

موضوع: رد: الفلاح السبت يناير 24, 2009 5:12 pm

بحياة الله منين يا عمّار***بتجيب ها الأبداع بالأشعار
وبتصوّر الفلاح مش مرتاح***وسعر البطاطا صار بالدولار

قديش قلّي شرحة التفّاح***وكيلو الشمندر صار متل النار
وشعب الفقير من الغلا ما ارتاح***والله يعين اللي سكن بأجار

من هيك يا فلّاح ضل فلاح***وازرع بطاطا ولوبية وخيار
بركي لعنّا بيرجعوا السوّاح***وبيصير سعر الفجل غالي كتير
ويا كوتاراني ليش هيكي صار

خبّرنا خيي حسن ليش ما حدا مرتاح

موضوع: رد: الفلاح الأحد يناير 25, 2009 8:08 pm

قال كان ي سليمان في مَـــــــرّه ... فلاح ِسمع بعالم الــذره

وقال تالنعمي عليـــي تــدوم ... رح طَعّم العِليق بو صــره

ومَوز رح يطلع ع جبْ التوم ... وبطيخ بدها تحمل الحَره

وبجمع الغلي من جنا الكروم ... وع السوق بنزل شفلهن شرا

وكل يوم قبل الفجر صار يقوم ... ع كعبها ت يسكب الجَره

ويخاف م يهب الهوا المشؤم ... وباالعاصفي المطعوم يتعرا

ولما عيونو فَتّح المنضوم ... وصفا عن الأرباح يتحـــرا

الفجل ضلو فجل عاالمطعوم ... وعا حالها بقيت الــــعليقة

تحمل فواكي حامضة ومُره[center]

موضوع: رد: الفلاح الإثنين يناير 26, 2009 7:11 pm

حنيّت للفلاح والموني***ومع كل كلمة دمّعوا عيوني
وحسيّت فيي يا حسن نيران***حرقت حنيني بنار مجنوني

ايمتين قولك رجعة الأوطان***ومركب عا صيدا يوصل وجوني
وما نضل خلق البحر نحلم كان***لبنان جنّة بس مرهوني

مشتاق للرفقات للدكّان***معقول عم يتجمّعوا بدوني
وقديّش مشتاقين يا لبنان***نرجع بفيّة أرزتك نرتاح
ونلبس سوا من بركة أووني

موضوع: رد: الفلاح الثلاثاء يناير 27, 2009 3:48 pm

فلاح أصلي وعاشق جـذوري = والشيخ جدي وجارنا الخـــوري
هني مزارع علمـــوني ضـل = وبحضـورهن بعتز وحضـــوري

تعلمت منهم اكتــــفي والحـل = في ضيعـتي تاعيش بســــروري
بالحوض إبدا بالحبق والفـــل = وطعّم الدفـلي بوردةّ الجــــوري

الفدان عندي ونير خلف الجل = والعود والكابوس شي ضروري
منشان إفلح أرضــــــنا وتغل = وإهنا بجنا الخيرات بشعـــوري

هون خلقت مابفل حتى فــــل = والعمر يمضى وتنتهي أمـــوري
فلاح باقي رغـــم حرب الكل = بيكفي رضا جدي ودعا النملات
من بيدري عم يشبع الدوري

* * * * * * * * *

موضوع: رد: الفلاح الثلاثاء يناير 27, 2009 7:37 pm

"مشتاق للرفقات للدكّان***معقول عم يتجمّعوا بدوني"

وبدوني

» الفلاح والداليه