مكنة التصوير

شلحني عا مفرق زتّني عادروب
بيع الحقيقة وكذّب عليي
سرقني من الأحلام يوميي
تركني عامذبح واقعي عن دوب
وفيّق عيون الراهبة فيي
بتعرف من الأحلام با محبوب
عن عيش جرحة وموت حنيي
..................................
شالح قبالي صورتك زهآن
صارت خدودي دروب محفورة
ودمعات عيني نازلي نهورة
بترسم طبيعة بتسرق الألوان
بنقل خبارك متل عصفورة
وإنت زكية بتعرف سليمان
عايش مع النسوان اسطورة
وبيجن لما بتعقل الخوتان
وبيحن كلما يشوف تنورة
مشتاق ليكي مفرفح وزعلان
ومابحب شوفك ببرم الصورة

خلصت سنين العاطفي وشوقي
إبن السني مولود متل الروح
سرالهوى البقلوبنا مفضوح
يا بتتركيني عيش عاذوقي
يا بتركك تستفقدي وبروح
..............................
بعرف بعيدة ورسمك قبالي
إنت وأناتنيناتنا دراويش
لاتزعلي راح العمر بخشيش
لاتتركيني بتشغلي بالي
كل الي بيبقى بها لدني بالي
والي ماعندو حظ مابيعيش
.................

لاتصدقيني بعيشتي كذاب
عيشي حياتك فرفحي وجنّي
ون كان بدك تسمعي مني
ما في ولا شيطان مرة تاب
ولافي ملاك بيترك الجني
.......................................
جنة حلاكي مدوّختني كتير
وشيطان فكري تشيطن زيادي
وأيوب حمل الهم زوادي
لاتفزعي من السر عندي بير
زتّي من الأسرار شو بيصير
بفرش بعين الشمس سجادي
وفوق الغيوم بطيّرك وبطير
وقوس القدح بنعلمو يدادي
وبسرق من الأحلام خيط زغير
بنقل دموع الغيم للوادي
وبزتّ حالي بّ حر حب كبير
وببكي مع الموجات وبنادي
بوعى عاحالي مشلقح على سرير
بنده عليكي ما بلاقيكي
وصورة بإيدي ومكنة التصوير