وينك ي سليمان؟؟

سْلَيْمَان!،. بَلِّل رِيقَك وْلَبِّي النِّدَا = خَصْمَك بِنَارُو نَشَّف عْرُوق النَّدَى
دْعَيْتَك إنِت مِن حَيْث مَ مْلاقِي حَدَا = يِسْتَاهَل يْغَنِّي مَعِي شِعْر وْحِدَا
وْلا تِفْتِكِر عِنْدَك فِكِر وِسْع المَدَا = حْضُورَك سُكُون وْغَيْبَتك قَعْدِت هَدَا
وْلا بْغَيْبْتَك شِفْت الأمَاكِن فَاضِيِة = وْلا طَلّتَك عَبِّت فَرَاغ المُنْتَدَى

طليّت بعد غياب ..؟قلّي شو بدى***تا هجمت يا محمود...!!!عا سباع الودا
مبارح تركت المنتدى...!!!صوت وصدا***ورجعت شفت زهور عطشت للندى
مسموح...!!!تهجي الكل لـــــــــكن من عدا***ملكوت رب القافية بالمنتدى
رح فوت..!!! متل البنج بين مفاصلك***بتحسّ فيّي بس ...!!!ما بتقشع حدا

زَهْر الدِّنِي سْقَيْتُو دُمُوعِي تَ إرْتَوَى = وْصَفِّى مِثِل عَنْقُود عَ إمُّو إْسْتَوَى
مِثْل البِنِج خَلِّيك أوْ مِثْل الدَّوَا = مِنْحِس فِيك وْمَا مْنِسْمَعْلَك دَوَى
بْتَقْدِر عَ جِسْمِي تْفُوت بِلْيَالِي الغِوَا = لَكِن مَ فِيك تْغَادِر بْذَات القِوَى
وْتَ يْصِير فِيك تْغَادِر مْنِ مْفَاصْلِي = فِي وَقْتْهَا مِنْكَمِّل العَرْكِة سَوَا

رح فوت نبلة براس حربة منجّرة***تدخل بصدرك...!!!بس تطلع من ورا
عندك حروف بتنقرا وزغيّرة***وعندك سطور مبيّني ...؟وما بتنقرا
بدخل وحي...!!!بطلع قصيدة مزهّرة***بدخل أساس بعود بطلع قنطرة
بدخل زهر دبلان بمعامل عطور***بطلع كولونيا من قناني معطّرة

بْتِطْلَع رَمَاد وْبِالحَاكُورَة بْتِنْسَكَب = لَو فِتِت عَ النِّيرَان قِطْعَة مْنِ الخَشَب
بْتِطْلَع مِن العَرْكَات وِجْه بْلا شَنَب = لَو فَتِت عَ العَرْكِة بْشَنَب حَلْقُو وَجَب
بْتِطْلَع قَتِيل وْكِل مِن مِثْلَك هَرَب = لَو فِتِت عَ بْلاد العَرَب مِثْل الجَرَب
بْتِطْلَع عَ ضَهْرَك حَامْلِينَك أرْبَعَة = كِلْمَا تْجَرِّب تِدْخُل بْلاد العَرَب

تاتمدّ ايدك عا الدرج مش مشكلة***كمشك علي وما فيك تهرب من علي
بلاد العرب...!!! لو فتتها مش مرجلة***ما كل عمرا حدودها بتغلي غلي
بدخل متل عنقود عا أمو حلي***وأيّاك تفرح لو شفت دمّي شلي
وبفوت نقطة من العرق بي كاستك***ومن بعدها بنقلب عليك الطاولة

رَح "نَشِّف عْرُوق النَّدَى" إلْ مَ بْتِنْفَعَك = وْلَو جِبِت سُطَّعْشَر عَلِي يْشِدُّو مَعَك
بْكِل عَام وِإْنْتِي بْخَيْر بَدَّي شَجِّعَك = مِن قَلْب قَلْبِي "طَالْعَة" تَ تْدَلِّعَك
وْصَوْبِي إْنْ أجِيت تْفُوت مِش رَح رَجِّعَك = وْلَو فِتِت عَ الكَاسِة عَرَق مَا بِمْنَعَك
رَح بِشْرَبَك فِي لَيْلِة العِيد الهَنِي = وْإنْتِي بْتَعْرِف وَيْن بَس بْطَلِّعَك

انا جدا جدا آسف اذا غلطت بحقق خيي سليمان بهالرد...
بتمنى تقبلو بروح اخوية...
خييك الصغير وتلميذك... محمد خطيب

معروف عنّي...!!!بالمواقع سوسحت***رب القصيدة بالبلاغة...؟والنحت
لــــــــــكن أنت بالموقع السر فضحت***وضيّعت يا محمود...!!لبعيــــــــد..؟؟ورحت
جبت القدح...؟صبيّت...!!!عن جهل اقدحت***وفتحت نيعك بس...؟راسك ما افتحت
ونسيت أنو الراس مخرج للعرق***ألا ...؟أذا بيكون راسك...!!!من تحت

ولا يهمك خيي محمد انتي غالي بس لا تزعل انت

باطل، شو القصايد المدفعية هيدي، شي روعة، والقصف بالصواريخ البلستية، أه هيدا اسمو حرب النجوم عن جد، نجوم الشعر. يا هلا!

رَاسِي أنَا شَامِخ مِثِل أرْز البَارُوك = عْلَيِّي لَ تِعْمَل عَبْقَرَي بْرَحْمَة أبُوك
إللِّي بْيَعَرْفُوك بْلَقَب شَاعِر بِنْعَتُوك = بِدْهُن عَ هَالرَّدِة الوَضِيعَة يِلْعَنُوك
الرَّاس مَخْرَج لِلْعَرَق!!!.. لَلْخَبَّرُوك = مُمْكِن صَحِيح وْلَكِن بْهَاليَوْم look
مِن بَعِد نِص سَاعَة الخَلايَا تْجَمَّعُو = لْ حَتَى مِثِل مَا طَلَّعُوك يْنَزّلُوك

شكرا كثييير خيي كوبيلو على هالتعليق الحلو... ويا ريت لو تنقل تعليقك ع صفحة التعليق منشان تسلسل الحوار طبعا مش ل اشي ثاني...
واذا ما وسعتك صفحة التعليق تعال واختمو ع جبيني لانو هذا وسام منفتخر فيو... انو واحد مثلك يعجبو كلامنا ويعلق ع شي نحنا كتبناه...
تحياتي للجميع... خييك الصغير وتلميذك محمد خطيب

نقطة خمر بتفرّح القلب الحزين***وبتترك الألهام ينصبلك كمين
البيفوت يا محمود ...؟مرفوع الجبين***عا المنتدى ...!!!بيصير متل النابغين
شوف الخميرة الفايتي تهزّ الطحين***بتطلع خبز مرقوق ما بتبقا عجين
وبتفوت لقمة طيبة عا قلوبنا***والشكر ل لله بيطلع من الجاييعين

مْحَمَّد أنَا وْ عَ هَالإسِم بَانِي بْيُوت = وْمَانِي أنَا مَحْمُود يَ شْلُومُو سْكُوت!
خَلِّي الحَكِي مْنِ القَلْب يِطْلِعْلَك بْيُوت = وْ لَ تْظَل مِتْعَرْبِش بِخَيْط العَنْكَبُوت
طْلُوع الشُّكُر لِلْخَالِق بْيَعْطِي ثُبُوت = وِاْسِآآآل يَ سْلَيْمَان دِينَك وِاللاهُوت
مَجْبُور تِطْلَع مِن دُرُوب المَعْصِية = تَ يْصِير فِيك اليُوم عَ الجَنِّة تْفُوت

سليمان انا اسمي "محمد" ومش محمود ليش عم تناديلي محمود؟؟؟؟؟؟؟؟؟؟؟؟

محمد خطيب سماع... أسمك مش ألك***وشو لقّبوك سكوت... مين بيسألك
أسمك دخل عا المطبعة وفيها علك***ومطّوا حروفك حرف واو بأولك
هوني بو شربل شقلبك تا يبدّلك***وتا تبيّن بمظهر العالم تقبلك
حطّك اسم محمود تا تطلع طلوع***تاري التقل بالدم رجع ينزّلك

يتبارى في هذه الصفحة شاعران كبيران وعندما أريد التعليق على ما يقولا استمتع بذلك بقدر ما يؤذيني التعليق على شاعر صغير يصفصف الكلام ويرعبه النقد وصف أمثاله الشاعر عمار البراضعي "بالقزاليط".
أعجبني كثيرا رد سليمان وربما تفاديه خطأ وقع فيه بأن نادى "محمد" ب " محمود". حلو يا سليمان.

إسْمِي أنَا بْأرْبَع حْرُوفُو النَيِّرَة = إسْم النَّبِي إلْ بِالكَوْن أطْهَر جَوْهَرَة
وْلَو حَرْف زِدْتُو بْزِيد عِلْم وْمَقْدَرَة؟؟ = مِنْ شَان الله سْكُوت حَاجِي ثَرْثَرَة
إطْلَع مِن الصَفْحَة الشَرِيفِة الطَاهِرَة = طَلْعِة شُعَيْرَة مِن عَجِينِة مْخَمَّرَة
يَمَّا بِصِيبَك مِثِل بُوش الأجْنَبِي = مْنِ المُنْتَدَى مَ بْتِطْلَع بْلا كُنْدَرَة

شكرا الي خيتي ليلى على هالتعليق الحلو.. والله عم نفتخر بانو كلماتنا بتعجبك...

مرة ثانية بقللك شكرا كثييير.. خييك الصغير وتلميذك "محمد خطيب"

بوش الدخل عا بلاد حرّة ذلّها***لوما طلعت خاين...؟ ما كان احتلّها
وها الكندرة اللي طلعت و لا علّها***كانت عا راسك تنضرب بمحلّها
وقلّي حبيبة قلبك البتجلّها***بحبّك...!!اذا كل يوم عم بتقلّها
لوما تفوتوا بليلة الدخلة سوى***من وين ...!!! يا مفعوص رح توصلّها

إذَا الشَّاعِر بِإيدُو سَلّ سِيفُو = وْقَطَعْهَا بِالغَلَط لَ يْلُوم ضِيفُو
وْإذَا بْيَاكِل رْغِيفُو وْمَا بْيِشْبَع = لَ إلْنَا كِيف عَم يِعْطِي رْغِيفُو
بْتِحْكِي بِلَيْلِة الدِّخْلِة تْوَاضَع = العَرِيس بْيِدْخِل وْبِطْلَع عَ كِيفُو
وْتِسِع أشْهُر بْيِمْضُو الوَلَد بِطْلَع = وْعَلَى الدِّنْيَا شُو حِلْو كْثِير طِيفُو
إطْلَع عَسْكَرِي الأعْدَاء فَزَّع = يَ حِيفُو إللِّي بِعَادِينَا يَ حِيفُو
إطْلَع قُنْبُلِة مِن بُوز مَدْفَع = بِوِجْه المُعْتَدِي وْكِل مَن حَلِيفُو
إطْلَع خَنْجَر الكُفَّار أخْضَع = حَمْدِي إقْتُل وْإذْبَح صْطِيفُو
مُضَمِّد إطْلَع وْيَلَّلا تْشَجَّع = جَرِيح الحَرْب دَاوِيلُو نَزِيفُو
إطْلَع عَ الشِّغِل تَ المَال تِجْمَع = وْعُمْر الوَلْدَنِة يَ رْفِيق عِيفُو
إذَا مَ بْيِطْلَع الفَلاح يِزْرَع = بِفَصْل الصَّيْف مَ بْيِجْنِي قَطِيفُو
وْإذَا مَ بْيِطْلَع الغُصن اْلِمْفَرَّع = مَ فِينَا الخَيْر لِلرِّزْقَة نْضِيفُو
وْإذَا مَ بْيِطْلَع مْنِ الأرْض مَنْبَع = الزَّرِع بِيمُوت وِإل بِبْقَى ضْعِيفُو
إل بِيِدْخُل بِالشِّتِي تَ المَجْد يِصْنَع = مَعَايِي مَا رَح يْكَفِّي لَ صِيفُو
وِسْلَيْمَان بُو شِرْبِل الأصْلَع = دَخَل مِثْل الرَّبِيع بْغِصِن أخْضَر
طِلِع أصْفَر مِثِل طَلْعِة خَرِيفُو
********
مع تحياتي وحبي الك خيي سليمان على هالحوار الرائع..
خييك الصغير.. محمد عمر خطيب\عرابة البطوف\الجليل الاسفل\فلسطين المحتلة

يا محمود المعاني والقوافي***تعا..!!تا فهّمك بلسان دافي
اذا ما بتدخل القلب بعبارة***النظم..!!بيصير يا محمد سخافي

انا تاجر..؟دخل سوق التجارة***ب قلب من صخر..!!ما عندو مخافي
وانت طالع من التجرة خسارة***انشالله تكون ..مترسمل ظرافي

انا الحب الدخل قلب بأشارة***ومذوق بالعشق ...؟عندي لطافي
وانت دخّان طالع من سكارة***وصلت عا الجو أسود بالكثافي

انا التاريخ زاتو عن جدارة***دخلت النت جنّنك الصحافي
بدخل فلسفة بطلع حضارة***بدخل معرفي بطلع ثقافي

انا مظلوم فايت عا النظارة***بطلع بالبراءة بحكم وافي
وانت طالع متل مجرم توارى***عن القانون عا ابعد مسافي

انا فايت متل حلم العذارة***مع الأوهام أعلن اختلافي
بدخل زنبقة بين الحجارة***بطلع ورد وبمحّي الحفافي

انا زيتون فايت عا الكوارة***فتت عا المعصرة زيتون حافي
وما فيكن تاكلوني يا حيارة***بلا ما الزيت يدخل عا المصافي

انا بو شربل عرفت الأدارة***دخولي بالوزارة مش خلافي
ما بطلع يوم اركع بالوزارة***قبل ما فوت ومعرّم كتافي

انا خبز القصيدة عن جدارة***معك يا محمد رفضت التجافي
دفشتك عا الفرن تحمل حرارة***تا تطلع لقمتك خرج الضيافي

وبعد ما موقعي صفّى سفارة***تا نختم ها الحوار الأحترافي
وانت يا محمد الضدي تبارى***اعترفلك حرف أنّك صرت شاعر
واكيدي اليوم اخد اعترافي

وهلق بنطلب بأسمي وأسم محمد يهجموا علينا النقّاد ولا يهمكن نحنا ما بنزعل ولولا انتقدونا والفرق بين ها المنتدى وكل المنتديات
انو ها المنتدى كل يوم بيعطي احلا وأجمل بنتمنى عا ليلى كوبيلو حرف عمار ابراهيم والأب حنا اكيد والأديبة الكبيري وفاء كمان بيهمنا رأيها
تحياتي والى محاورات أرقى وهلق ناطرين حرف وابراهيم تا يعطونا شي حلو

شكرا كثير على هالاعتراف... وهالاعتراف يا خيي سليمان رح اخذو وحطو وسام ع جبيني ورح بفتخر فيه بين رفقاتي... اعترافك واعتراف خيي وحبيب قلبي الشاعر حرف....
وانا من عندي برضو بقول للنقاد اهجمو علينا بالقنابل الادبية البنّائة...
ويللا وانا من عندي رح ادعو شعار مش مسجلين بالمنتدى ل حتى يدخلو وينورونا باشعارهن وبنقدهن على هالحوار...
تحياتي وشكرا كثييير على هالحوار وانشالله مننال شرف الحوار مرة ثانية معك..........
خييك الصغير "محمد خطيب

ستشاهدون ردي في صفحة " بالتفصيل..." بعد خطأ فني - عذرا

» محاورة سليمان وعصام يوسف سألنا على سليمان
» وينك
» وينك خيي حسن
» يلا يا محمد وينك
» وينك يا بو شربل