سطرين دخلِك قبل ما تروحي

قرّب وْداعِك..بعد في يومين
بدّك تروحي و تاخدي جروحي
لنّو اسمحيلي...ودّع بسطريْن
سطرين..دخلِك قبل ما تروحي

سطرين دخلِك يا حياتي كيف
بدهن بليلة يطلعو منّي؟!
و كل ما إجي بلّش عا سطر نضيف
بشوفِك إجيتي.. تكتبي عنّي

و كل ما كْتبت أبيات جذابي
عم نقّط الدمعات..عا تيابي
و إنتي تشدّيني من الرمشين
مطرح ما لازم نقّط كتابي

تمرق النقطة و تدلق عياني
تغلّي بأقرب سطر..بردانة
و تلطي بكلمة..و ناطرة هونيك
ينشف غسيلِك عا سطر تاني

و شطرين..فيكي ينبعو من النوم
و يعود فيكي يلتقو النهرين
ما كنت أصلِك بعرفو و اليوم
عم بعرفو..من "ملتقى الشطرين"

ما قْدرت كفّي عالورق جولة
إهرب بميْل بتطلعي من ميْل
إلا ما إطفي الليل من حولي
و إلا ما يطْفيني عاجنبو الليل

و متل النعس إنْسلّ بالديحور
بسرعة خيال..بخفّة الومضة
و إمضي بإسمي بعد سبع سطور
و إصليلِك الدبقات..عالإمضا

و توصلي عالإسم..مبتسمة
و يضحك الفخ و تجفل البسمة
و توقعي بإسمي جنح مأسور
أكتر ما كنتي واقعة برسمي

و لمّك عن الدبقات..مكسورة
و جبلِك قفص..كرمال دفّيكي
و عا جنابِك جروحات عصفورة
تسكب و تسقي جرحتي فيكي

و قلِّك يا ريت جروحك..جروحي
بالغصب عنّي حْبستِك بروحي
بس اسمحيلي..كمّل البيتين
ليش العتب؟ ما كلهن سطرين
سطرين دخلّك قبل ما تروحي

إبراهيم......14\1\2009

و تلطي بكلمة..و ناطرة هونيك
ينشف غسيلِك عا سطر تاني

هادا شععععععععععععععععرررررررررررررررررر تسلم ايدييك يا ابراهيم

انا من جههتي موش موللع بالجزل بس بحسس الشعر اجمل مع اننو ابراهيم بيكتب جزل
بهننيك من صميمي وقبال ها النقروشه

عا السطر كاتبلك نقط
شوفي
كيف الجمال بياكل
حروفي
ومع كل بووسي بتاخدي من
من الخطط
لح تقشعي عا الشطرقلبي
غطط
وقلامنا جبهات
مكشوفي[center][b]