منطاد

موضوع: منطاد الجمعة يناير 30, 2009 11:20 am

منطاد

يا ريت عِنّا..لْوحدنا منطاد
و نقعد أنا و إنتي بْفرد سلّة
و كل يوم ياخدنا الصبح عابْلاد
و يضل عم يِِعْلا..و عم نْعَلّي

منطاد يحملنا بلا مْراجيح
و بالون.. عامل فوقنا خيمة
و تْشيلنا..و تتْعب كتاف الريح
و تْزِتنا..من الريح عالغيمة

و نادي من الغيمة بقلب مفجوع:
"عالغيم أوعا تدعسي إنتي!
بلكي المسا..صارت تْشتي طْلوع
مطرح ما بعدِك واقفي كنتي"

و عالغيم إكتبلِك شعر..و حجاب
و أحسن ما بكرا تِخزقو البرقة...
إتنكّر... و إلطي ورا الكتاب
و إطوي عا بعض البرق..و الورقة

و نرجع الظهر..نطير عا لبنان
و عرْفِك على "أفقا" و على "صنّين"
و تشهقي "بالشوف"..للبستان
و يعود يشهقلِك.."بتنّورين"

و من بعد ساعة نطل "عالقرعون"
تكوني بسابع حلم.. صفّيتي
و قلّك أنا..لا تنعسي من هون
باقي خمس تلات..عا بيتي

و نطير فوق كروم و عْناقيد
و صيّاد.. مارق تحت بالوادي
و يحس إنو شاف.."طير جديد"
مش مارق عْلى راس صيّادي!

و تّهب لينا طلقة البارود
و تنقز خدود الحمر..جفلانة
و إتطلّع و لاقي العيون السود
أكتر من المنطاد..فزعانة

و نوقع سويّة..عا نهر شفّاف
و عالبحص موجة تِقدْفِك حدّي
و إتوجّع..و نادي على الإسعاف..
لا شاش بدْها...و لا دوا بدّي

دخلك اتركنا..رماد فوق رماد
و مْسامحين الجفت..و الصيّاد
و بحْرام غطّينا..مش حْراميْن
مشدود عا ديّاتنا.. بْخيطيْن
حتى متل ما وقّعونا اتْنين
روحيْن نرجع عالسما..بْمنطاد

إبراهيم......29\1\2009

موضوع: رد: منطاد الجمعة يناير 30, 2009 12:15 pm

حلو يا ابراهيم متل عادتك

موضوع: رد: منطاد الجمعة يناير 30, 2009 6:13 pm

عملاق شعرك من وحي الله

وسكران شارب من عرق زحلة

عملّك شي جمعة عا فنزولا

بمنطاد رايح عاالسما رحلة

******
حلوييين يا برهوم كلماتك

ضليّت تحلم بالمجد ضليّت

وحقّقت بعد التجربة زاتك

وتا وصلت شاعر عا السما عليّت

***
المنطاد خليّتو قفص عشّاق

وعلّقت عا غصون الحلا دبققك

وعملت رحلة بجنّة الخلّاق

عا هيك صورة ما حدا سبقك

رهيب وحلووو

موضوع: رد: منطاد السبت يناير 31, 2009 9:55 am

كلك ذوق خيي هاني..و يا بو شربل غطيت عالقصيدة بقصيدتك

موضوع: رد: منطاد الأحد مارس 08, 2009 11:39 am

والله يا جاري ابراهيم من اجمل ما كاتب وانا بعرفك منيح وحاضرلك مرة وبعرفك شاعر كبير
وخصوصا هون

و من بعد ساعة نطل "عالقرعون"
تكوني بسابع حلم.. صفّيتي
و قلّك أنا..لا تنعسي من هون
باقي خمس تلات..عا بيتي

حسييت يا ابراهيم انني صرت فوق ضهر البيدر وبيتي بالفعل بدو تلات تلات تا وصصل عليه

عمك امطانيوس

موضوع: رد: منطاد الأحد مارس 08, 2009 5:55 pm

تسلم يا جاري العزيز...بس معقول تحضرني مرة و ما تشرفني و تعرفني بحضرتك؟؟ عاكل حال خيرها بغيرها و تسلم و كلك ذوق