نِحْنَا شَعِب

موضوع: نِحْنَا شَعِب الأحد فبراير 01, 2009 9:28 am

نِحْنَا الوَفَا وِالجُود عَادِتْنَا = وْلَو مِيِّة إْسْرَائِيل عَادِتْنَا
وْمِنْظَل إخْوِة الجَار حَدّ الجَار = مَهْمَا بْيِخْتِلْفُو قِيَادِتْنَا
وْلَو كَانِت الدِّنْيِي بَحَر ونِْهَار = وْصِنَّارِة التَّفْرِيق صَادِتْنَا
مْنِوْصَل عَلَى شَاطِي شَمْس وِنْهَار = مَهْمَا سِمَات اللَّيل سَادِتْنَا
وْلَوْلا فَلَسْطِينِي عِلِق وِنْهَار = وْنَاطِر لَ حَتَّى تْفِيق قَادِتْنَا
بْقِللُّو الفَلَسْطِينِي شَعِب جَبَّار = وِلهَالوَضِع اْلِكْبَار قَادِتْنَا
صَارُو بِسُوق التَّفْرِقَة تُجَّار = وْصَفْقَاتْهُن بِالعِز بَادِتْنَا
بَاعُو المَحَبِّة بْأرْخَص الأسْعَار = وْحَطُّو عَلَى البَيْعَة سَعَادِتْنَا
عَم يِقْشَعُونَا بْعَين إْسْتِحْقَار = وْنَظْرَاتْهُن تَشْجِيع زَادِتْنَا
وْفُخَّار رَيْتُو يْكَسِّر الفُخَّار = "إلْ بِيهِم مَا تِأذُو سِيَادِتْنَا"
وْإنْتِي يَ إسْرَائِيل بِالأخْبَار = لَ تْكَذّبِي إلنَا إفَادِتْنَا
كْثَار إللِّي مَاتُو بِالحَرِب وِكْثَار = رِجْعُو تَ يِتْدَاوُو بْعِيَادِتْنَا
نِحْنَا شَعِب إلنَا السَّمَا مِضْمَار = طْحَنَّا الأعَادِي مِن عَنَادِتْنَا
نِحْنَا شَعِب جَبَّار مَ مْنِخْتَار = إلَّلا النَصِر يَمَّا شَهَادِتْنَا
نِحْنَا شَعِب فِينَا الشَّرِع مِحْتَار = الأرْض قَبْلَ الله عِبَادِتْنَا
نِحْنَا شَعِب فَاز إنْتَصَر بِحْجَار = وْقَاوَم بَلا مَ يْشُوف سَادِتْنَا
نِحْنَا شَعِب عِنْدُو الشَّهَادِة كَار = حْجَار القَبِر هِيِّي وِسَادِتْنَا
نِحْنَا شَعِب إلنَا الفِدَا مِعْيَار = نْلَبِّي إنْ مَرَّة الأرِض رَادِتْنَا
نِحْنَا شَعِب لَو صَار شُو مَا صَار = مْنِسْمَع نِدَاء الأرْض نَادِتْنَا
نِحْنَا شَعِب لَو مَات مَ ْبْيِنْهَار = وْلَو تِقِتْلِي كِل يَوم مِنَّا ألْف
مَ بْتِقِتْلِي فِينَا إرَادِتْنَا

يا عين الله عا الشعر والفلسفة

وابيات فيها مقاومتنا مشرّفي

شعرك روائع صار يا محمد خطيب

أربع خمس كلمات فيهم بكتفي

حلووووووووو

حلو ي محمّد الشعر السكبتو

ونغم ايمانك باجمل قوافي

ان شا الله الموطن الغالي نكبتو

تزول ويعمر بعيش التصافي

يسلمو خيي

سليمان كتب:: يا عين الله عا الشعر والفلسفة

وابيات فيها مقاومتنا مشرّفي

شعرك روائع صار يا محمد خطيب

أربع خمس كلمات فيهم بكتفي

حلووووووووو

كلك ذوق خيي سليمان...
أرْبَع خَمِس كِلْمَات لَو شِعْرَك عَرَض = بْتِشْفِي جْرُوحِي يَ سْلِيمَان مْنِ المَرَض
أفْضَل حَكِي يِبْقَى قَلِيل وْمُعْتَبَر = وْكِلْمِة حِلِو إن قِلْتْهَا بْتِوْفِي الغَرَض

كلك ذوق يا علي... وممنوك انا... وبيشرفني انو شعري يعجبك..