بذكر صَبي كان بصبيّة يموت

بذكُر صَبي كان بصبيّة يموت
وكانو عيونا كلّ أحبابو

منعيونها يغرُف زَجَل مَنحوت
ويرسم حَلاها شِعر بكتابو

كان يقطفلا كبوش التّوت
ويجمعلها الوَردات بجيابو

طَلبِت يْجبلا مَرمَر وياقوت
منبلاد... خَلف البَحر وعبابو

صار الزَّمَن يمحي حلم مَكبوت
ويحفُر سنينو حَول أهدابو

لِم عاد لاقى البيت كلّو سْكوت
وتبقى الدّني كلاّ خلف بابو

صار يبكي حُب عشتَاروت
لِم ...شاف دمع الدِّلف عَ عتابو

قَلّو الصَّدى عا بيتنا لا تفوت
طال الهَجر يا جامع المَرمَر
الأحباب خلصو دموعن وغابو

رائعة وأكتفي بكلمة رائعة.

له له له له له له له يا حكمت... هالغلطة ياللي غلطانها مو غلطة.. هاي خطيئة بحق هالقصيدة الرائعة... فيك توزنلي هالشطرة "عالباب قالولو خيوط العنكَبوت" بتمنى تكون خطا مطبعي او ل غاية في نفس يعقوب.. ومو غلطة...

على كل حال القصيدة رائعة بتجنن.. ومش جديدة علينا نسمع منك قصايد حلوة

الله يخليك.. ويديمك

تحياتي... خييك الصغير وتلميذك "محمد"

الله يديمك يا محمد. ليك بصراحة كانت عجبتني صورة خيوط العنكبوت وما زبطت إلا عا وزن المعنى. لاكن رجعت غيرتها بعد ما شفت إنو كتار شعراء محترمين ما حبو نطعم القصيد ببيت معنى. كان سليمان وطوني وفادي علقو عا هالبيت بالذات.

رجعت غيرتو متل منك شايف هلق.

سيدتي ليلى... كلك ذوق. أشكر مرورك وتعليقك الراقي على قصيدتي.

معناتو انا آسف وانا من ناحيتي رجعو مثل ما كان.. لانو ما في احلى من الصورة الصادقة "وبالنسبة الي حتى لو كانت غلط ما في احلى منها..."

موضوع: كنز الخميس ديسمبر 17, 2009 1:50 pm

اندهي جبران يا سلمى كرامي تا يبقى الشعر محفوظ الكرامي

ويا عبلا فيِّقي عينين عنتر تا تِحْتَكّ الشهامة بالشهامة

ويا بلقيس البنالك قصر مرمر سُليمان الحكيم بمرج نامي

اتركي هالقصر قصر الشعر أكبر وتعي عازنود زين شعيب نامي

الشعر بيدر حبوبو حبوب جوهر وكنز في بحر غمقو ألف قامي

الشعر سحبة غزل بعيون أسمر وغزالة تكرج وتهرج نعامي

الشعر بالشعر غيري مين أخبر إلي تلاتين عام بــاحترامي

نجوم الليل عا صوتي بتسكر وبيفيق الفجر عا مطلع كلامي

الزجل بنَّى بلا معنى بيظهر متل بسمة عجوز على القرامي

يا قاصد تا توقِّع كوز أخضر بجفت مدكوك بحبوب القضامي

وزند من شوكة البلاّن أقصر وكتف حاني متل راس الحرامي

إذا غيَّرت فكرك ما بتخسر ولا بتدب حالك بالملامي

صلّي واركع وللصبح اسهر تا زين شعيب يبقى بالسلامة

لأنك ما بتعرف يا معتر إذا وقعت السما بتوقع عاراسك

وإذا ما قمت بتقوم القيامي

ابو شربل إذا بتنقل القصيدة لمحل تاني بيكون افضل بصراحة ما كنت اعرف خصصلها صفحة
تحفة نادرة وحرام تروح لقيتها على احدى المواقع العربية وكنت مفكر حالي سامع كل اشعار زين شعيب
وهيدي القصيدة قبل ما نخلق بتمنا تنال اعجابكن