خبروني بو شربل عندو كريب

فادي فيّاض

قالوا أبو شربل في عندو غريب
قاسي مسببلوا حساسيي
وخلاه عن صفحة زجلنا يغيب
يومين متل الورد بالفيي
ما بخاف عا سليمان لو بتصيب
جبينو حرارة أربعينيي
الخلا الشمس عا وهج شعرو تشيب
ما اهتم بسخونة طبيعيي
واللي فراشو الصدق والتهذيب
والحب والإلفة وصفا النيي
فراش المرض عن عالمو بيغيب
وما بتغلبوا حمة وبرديي
يومين يا بحر الزجل بتطيب
وبترجع مواجك من الأعماق
تفلش عا شاطي القلب حنيي

سلامتك

التراث اللبناني

يا أبو شربل .. قوم بترجــــــــاك
طلـّق فراش اللآخ واسمحلـــي

إرجع على المنبر أنا ويـّــــــــاك
بمرج الـورد نعمــل سوى رحلة

وصير إستحلي أنا الأشـــــواك
وإنت زرّ الورد تستحـــلــــــــي

تقلـّي .. بيكفي هيك بترجـــاك
زنودي بحد الشوك تجرحلــــــي

وقلـّك .. أنا عم دوخ من فحواك
كلما الورد عطــــــــــور فوّحلي

ما كان بدي هيك هالفيـــــــروس
يكسـّر بعد منـّي كبار الـــــــروس

وحدي احتكرت البطش والتكسير
ريـّس على الشـّعار مش مرؤوس

بدّي يا بو شربل معافى تصيــــــر
وحارس أمين وبيتك المحـــــروس

ومن بعدها عا منبر التفكيــــــــر
عيف الفيروس وجنب منـّي جلوس

بــرجع أنا بردّك مريض كتيـــــــــــر

ما كلّ ردة متل حدّ السيــــــــــف
وكل كلمة متل شفرة مـــــــــوس

سلامة قلبك يا بو شربل ناطرينك يا حبيب القلب
أخوكم العين السهرة

بو شربل بحر الزجل

حرارة بطيئة والجسم بردان
والروح عم ترقص وجع فيي
متل الكأنّو زارني الشيطان
وما عرفت مين الدازّو عليي
*********************
حسيّت فيي الأرض عم بتدور
تقلان راسي من الوجع محرور
وبتصدّقوني وقفتي بالزور
وحتى تا أشرب مي ما فيي
***************
وفوق الفراش الجسم متل الجمر
وملحّف ...!!!وهيدا ببيتي أمر
الله يطوّلك يا أمي العمر
ما بتتعبي يا نور عينيي
**************
ومرتي تقلّي تا تصفّي عال
علّق مصل بتصح يا رجّال
وان كنت ما مصدّق يا روحي سأاال
وحاجي بقا تتوجع خطيي
*************
وبعدو الوجع بمفاصلي موجود
بيسرق سعادة صحتّي وبيجود
وحتّى زلاعيمي متل بارود
ومشكّبين واااااخ يا بييي
******************
وهلق منيح شوي جابولي
أمّي ومرتي صحن تبّولة
وحامض كتير بحط قالولي
ويانسون أشرب قال يوميي
*************
وقديّشني مشتاق مش معروف
للنت للأحباب بس ظروف
بتجبر عليي بس اقرا وشوف
وما شارك بردات شعريي

شكرا يا شباب وراجع قريبا هلق كتبت ها القصيدة من وحي ما كتبتو ومش مرتاح بعدني منيح

بحر الزجل

تسلم فادي وتسلم اياها العين الساهرة
ربّ الزجل بو شربل