محاورة رائعة عصام يوسف ومروان سليمان

عصام يوسف

مروان يا مروان طوّلت الغياب *** طول شعر الشمس عَ كتاف الغياب
قالوا إلي بين الســــطور بتلتقى *** و لـْحَدْ هلّق ما لقـــيتــــــك بالكتاب

مروان سليمان

وقت اللي فيك تشـوف نغمـات الطيـور***وتشوف شو اللي مختبي خلف الدهور
وتشوف نور الشمس من بعـد الغيـاب***بتصيـر فيـك تشوفـنـي بـيـن السـطـور

عصام

شفت وهـــــج المعرفه بقــلب الدفا *** و شفت الحقيقه الساطعه بقلب الصفا
لكن ما شـفتك بين صفحات الكتاب *** بيجوز يا مروان إســـــــــمك عَ القفا

مروان

لـو مــا قـفـى آذار مـابـان الربـيـع***ولو ما قفو لسنين ما كِبْر الرضيع
ولـو مابقفـا المكّـوك حطّـو دافـعـه***الإنسان ماتجوّل بهالكون الوسيـع
عصام

مجد الحضاره و عزّها و معروفها *** تركني أنا وج الكرم عَ كفوفها
في ناس من قدّام بتشــــــوف الدني *** بس إنت من القفا بتشــــــوفها

مروان

خلـف السجـون بتلتقـي بأحرارهـا***وخلـف العـروش بتنطبـخ أقدارهـا
وهيك الحضارة ياعصام من الأزل***خلـف المظـاهـر خافـيـه أسـرارهـا
عصام

لوما الخناجر و الد سايس بالخفي *** كان الوطـــن وقـّف بوج العاصفي
من هيك كلما صـــار عنّا عبقري *** بإسم الحضاره من الوجود بيختفي

مروان

كيف تـا شفـت بـس الخناجـر بالخفـى***وماشفـت ناسـك بـرزخ الـنـور اقتـفـى
الوجه اللي عشفافو في ضحكه مزيّفه***أخطـر مــن الخنـجـر الطـاعـن بالقـفـا

عصام

--------------------------------------------------------------------------------

الناسِــــــــك فتح قلبو عَ شبّاك الصَلا *** متلو انا ضـــــــيّفت إحساسك حلا
خبّيت جرحي و ضحكت ضحكت فقير *** ما في بـِبيتو غير خبز الـ "يا هلا"

مروان

ياكابت جروحك وخافي أصولهـا***مالك جْميله وصولتك لا تصولها
الله حَشَر هالروح جـوّات الجسـد***حتّـى تعبّـر عـن ثنـايـا فصولـهـا

عصام يوسف قصيد

يلـّي حشــــــــرت الروح من جـِوّا *** و صارت بقلب الحــــــبس تتلوّا
تـْركها عَ وهج الضــــــو يا إنسان *** من طـــــــــاقة الإلهـــــام تِتـْهـَوّا

شـــــو الروح منتوره بجسم بستان *** يا ما حــــــــــــلاها زهّر و سَوّا
لو حبســــــــــتها في عالم النسيان *** بدّك تـْـــــــــلاقي صَــــــوتها دوّا

الــــــروح إحساس و سما و ألوان *** و إشــــــعاع فيه شعورك مْضَوّا
الـــــــــــــروح طلّة شاعر و فنّان *** و عصفور عَ غصون القمر جـَوّا

الروح ثورة شـــــــعب خامل كان *** درب الهزيمه جـَــــــــعلك و طـَوّا
مش حاكم بيمشي بعصـــا العميان *** و تَ يجيب وريث .. بيياخد مقوّا

من هيك بدّي ضَــــــــل يا مروان *** بســـــــــــتان من نبع الحلا مْروّا
و روحي على قوس العدل ميزان *** قرّب وراق الشِـــــــــــعر من آدم
وبعّد وراق التــــــــــــين عن حوّا

مروان سليمان

الأرواح لمّا عالجسد فاتو=وصار الزمان يعدّ خطواتو
عِمْل الأزل جنحانها نايات=تايعزف عْلى الروح وصلاتو
*****
الروح رسمه خلفها رسمات=فيها الأبد بيزيح لثماتو
الروح خابه بترشح القطرات=ال منها رحيق الكون ونْواتو
*****
تحت الشمس في عندنا حكايات=روح وجسد غافي بعتماتو
وجه وقفا فقر وغنا وحسرات=وإنسان عبينهش بإخواتو
*****
مازالنا بوادي الأبد نسمات=وكل البشر من معدنو ذاتو
ليش الرّمش لَيقاتل الوجنات=وليش القلب لَيسيح دمّاتو
*****
جايي عصام يقرّب الأبيات=ويبعد عَتاني ميل تيناتو
نْ كَنّو لهالعالم معو وصفات=انشالله عإيدو ترتقي حوّا
وآدم بقى يرجع لعقلاتو