سؤال للمبدع عصام يوسف بكل محبة

هاني ناصيف

فتّح يا ورد الموهبة بالمكتبات
ووعي قرايح شعرنا بعد الثبات
الانسان جهد و كد عندو واجبات
يعيش الحياة بكل عز و تضحيات
ويا شاعر الحسيت عندك هالصفات
جاي لعندك بو علي بلا مقدمات
قولك بعد ما مات عمك بو علي
بيعيش او منقول زين شعيب مات

عصام يوسف

الشاعر حَفيف الروح عَ خيال القمـر
الشاعر شـرود الليـل بعيـون السَّهـر
بيـزرزق غطيطـه بْفناجيـن الشـجـر
بإيد المـدى تـا تشـرب النسمـه سَفـر
و بين الدنـي و الآخـره صَوتـو وتـر
مشـدود و مـدوزن بصابـيـع السَّـحـر
و كل ما وقع إحساس ريشه مْن السما
بتخلـق قصيـده لابسـه تيـاب البـشـر

هاني ناصيف

حكيتك شمع شفتك دمع فوقي انهمر
حكيتك الم شفتك بنج كنّ و صبر
الانسان جسم و روح بتراب انصهر
الريشة ما فيها تضل عن درب الوتر
وهيك الشعر كلما تسامى بالصور
بيخلق حلا و بيتجاوز حدود القمر
بينزل وحي و الهام ع تراب الوحي
بيطلع بارض المعرفي متل الدرر

عصام يوسف

لمّا العمر يركض عـَ طِرقات الدني
بيوقع خيالو من جياب الولدني
و بيصير بينتّف وراق السوسني
كرمال " ما بتحبّني " و "بتحبّني
بس الشعر بعلّمو يبقى غني
و إلاّ متل قوس القدح ما ينحني
و لمّا السني بتمرق على شاعر كبير
متل المرا بتنسى "السني" بأيّا سني

هاني ناصيف

عمر البشر لحظة من الرب انهدا
و عمر الشعر شلال هادر بالودا
و عمر المرا لو بدلة الورد ارتدى
رزنامتوا باللون و سنينو ندى
و الشعر يا استاذ من عمر المدا
لا قبل منو و لا بعد منو حدا
و صوت و صدى بيتخانقو بيتعانقو
ولما بيموت الصوت بيعيش الصدى

عصام يوسف

صوتك إذا مات ..الصدى بيوصّلو
ولونك اذا راح المدا بيظللوا
و لُوْ فهمت "ترموديناميك" بتجهلو
كنت عرفت سر الوجود بكاملو
بالفيزيا هالكون لمّا تحلّلو
بتجمّعو "الفوضى" و إلك بتجمّلو
يعني عند مَ بتنقد العهد القديم
عصام ما بينقّصو .. بيكمّلو

هاني ناصيف

شبهت حالك بالمسيح ... بلا فدا
طرحناك صوت... و مارجع لينا الصدى
وسر الحياة من الاله بينهدا
وبيعيش روح وعاطفة من المبتدا
عمر الورد بيكمّلو عمر الندى
وعمر الشعر بيكملو وسع المدا
وحدوا المسيح الكمّل العهد القديم
ومن بعد منو ما حدا كمّل حدا

عصام يوسف

عمر الزهر بيكمّلو عمر الندي
بس الندي بيخلص عند ما يبتدي
ووسع المدى مهما هَدا و مهما هِدي
مش قد ردّي من بو روكز خالدي
شوف مفهوم الكمال بْمقصدي
ثورة محبّه و الحقيقه شاهدي
بمحبّتي بكمِّل مساحات الوجود
و لو كنت نقطه مْن الإلاه السَّرمَدي

هاني ناصيف

الشاعر نفس و القافية متل النوات
و خلود روكز عاش فوق المكتبات
وعيسى ابن مريم كمال وتضحيات
نقّص بعــمرو تا وهب سر الحياة
وهيك الطبيـعة سر كامل بالصفات
فيــــها تناقض كل نفس و كل ذات
والله تا كمّل سرّ تكويــــــن الدني
جاب الحياة و حدها بجسر الممات

عصام يوسف

أنـا شاعـر جرحنـي كبريائـي
غروبي صِغر نِقطـه بْكبـر يائـي
و على بحر الوفا شروقي بيطلـع
من "شروقي" على عالبحر "الوفائي"
******
أنا النور اللي في هالكون شعشـع
تلاقـوا هالمـجـرّات بْفضـائـي
و مَ بعرف كتر ما فكـري توسّـع
لَ أيّ مــجــرّه إنـتـمـائـي
******
خيط اللا نهايـي اللـي ترفّـع..
عـن عرشـو ترفّـع إستـوائـي
و إذا قطبه بقطـب الأرض قطّـع
بخيّطهـا بخـطـي الإستـوائـي
******
و لمّـا بالوجـود العقـل أبــدع
بقانـون الطبيـعـه الفيزيـائـي
تَ يعرف كيـف هالعالـم تـوزّع
ركّب عا سطـح كفّـي "هوائـي"
******
و لأنّـي للوحـي الخـلاّق منبـع
بيـحـس الغشـيـم بـإزدرائـي
طالَـب "إبتدائـي" بكـل مـوقـع
عنـد مـا كـان طالِـب إبتدائـي
******
يمكـن لـو حـدا فيكـن بيسمـع
كلامـي بيفتكـر إنّـي مُـرائـي
لأنّو اللي بيحكـي و مـا بيسمـع
بيظِـن الصَّمـت عالـم بِـدائـي
******
شاعـر بالتلاشـي صـرت أروع
امتـزج "بـلاّ وجوديّـه" ضِيائـي
حملت خشبة صليبي و صرت إطلع
لأنّـو التضحيـه بَدهـا فـدائـي
******
النهر متلي ضَفـاف الـورد ودّع
البحر متلي جلى مِلحـو بْجَلائـي
و خيالي بين بحـر و نهـر بقّـع
كأنّـي ملوّنـو تلويـن مـائـي
******
بيجـوز المجـد تلّـت و ربّــع
على كل شاعر و كاتـب روائـي
و أنا يلّي جْـراس المجـد ربّـع
معي ما فـي حـدا بيقـدر يْتنّـي
لأنّـو بيعـرف جْوابـي نِهـائـي

انا انسان شعري انسيابي
لبست من لوعة الكلمة تيابي
بدمي نزفت حبر بلون احمر
صدى اهات عنات الربابي

سكبت الغيم خمر و صرت اسكر
عا خمرة معتقة باطيب خوابي
بعض شعار قالو يا معتر
انت شاعر مراجل هيك رابي

ما فيك تصب من جوهر مخمر
بكفي حاجتك تكتب غرابي
بعد ما سكبت اول بيت جوهر
جوهر كلمتي جنن صحابي

و انا بمحاورة عصام بكبر
لانو بالشعر و الفن غابي
صارو يحسدوني و صرت اكبر
ما بعرف شو انحكا عليي بغيابي

انا شاعر عا سطح الغيم بسهر
الدني ضاقت عليي و عا جوابي
صرت بالشعر اركب فوق ابجر
و ملّي من وحي الله كتابي

دخلت عا منتدى الشعر المنوّر
شقت المنتدى بحالة كآبي
فتحت النار دغري عالمكبّر
و انا المعروف ما بضيع اصابي

جرحني عنفواني بسيف عنتر
و عصام الشعر جددلي شبابي
و شرود المنبر بسرعة تصور
امير و سيد الكلمة الجميلي
و اله الارتجالي و الكتابي

» عصام يوسف طوني شلهوب
» محاورة مع الشاعر عصام يوسف
» صفحة الشاعر عصام يوسف
» توقيع كتاب عصام يوسف
» شَعرِك يالون الرّيح عصام يوسف