روائع الشاعر طلال حيدر

يارايح

يا راعي القصب مبحوح
جايي ع بالي شروقي

قلّو للقصب ما يبوح
بالسرّ اللي بعروقي

وإن ضعنا سوى بهالليل
خلّي صوتك مسموعي

يا رايح صوب مشرّق
مشرّق ما بو ربيعي

راحوا يرعوا غنمهن
والعشب فوق ضلوعي

وإيّام الـ غابن ولفي
لعدّن ع صابيعي

وعتّم علينا يا ليل
وضيعي يا حلوة ضيعي

قالولي إنّي عشقان
وأني مش داري بحالي

بين الصاحي والغفيان
لمحت خيالك قبالي

كان الصبح شنّو بان
وآدان الصبح عالي

ونازل من صوبن مرسال
من عيني نزلوا دموعي

مينن هن

لبسو الكفافي ومشوا
وما عرفت مين هن..
ماعاد رح يرجعوا
ياقلب حاج تعن
لاحصان جايب حدا
ولا سرج عم بيرن
لك ضحاك
سنك دهب
خليه يبان السن
خليك متل القصب
كل ما عتق بيحن
يابن اسمك حلو
سميت حالي بن
رد العباية القصب
ع الكتف
محبوبي
والعين قوس القدح
وسيوف مسحوبة
راحو
لبسوا العتم !
قامات مهيوبة
ناديت
بالله رجعوا
ماتلتفتو صوبي

ركوة عرب

أحلى من الركوه
على منقل عرب
أحلى من الفنجان
حلوه
متل عُبي القصب
خيط القصب تعبان

جيبوا حدا من دمر
يدقدق وشم
جيبوا من الهامة
والوشم بن محمّص
وهبّ الهوا شامي
غمّازة الْ عَ الخدّ
ماإلها إسم؟
والخدّ قدّامي

ومكحلي ...
والكحل راسمها رسم
مين الْ بَرَا قلامي

ومشنشلي متل الفرس
والسرج خيّالي
بإيدا أساور من دهب
بتخش
بتخش؟
و بيدور الطرب ليوم القيامة...

ياللي بيقروا لغات البن ع الفنجان
شافوا متل طلع الصبح من بين عينيكي

وبهودج الليل بين هالقمر نعسان
والأرض عم تبرم حواليكي

والصيف جايي مزين بعرسان
وجايب معو قوس القدح تيعرفوا عليكي

وقعوا نجوم السماء عن حفة الفنجان
وتعلقوا تحت الحلق ع طراف دينيكي

بتغار منن يمامه بأرض حوران
متل الخواتم على صابيع ديكي

بس نوعسوا الغزلان ع حدود اليمن
هب الهوى من لهفتوا عليكي

وقالوا الشفق قاعد ورى الكثبان
يلم الكحل عن ريف عينيكي

وقالوا بعلامة ما اجى نيسان
عندا حلق مرجان

بس تلتفت بيموج من ميله لميله
متل مرجوحة كان ياما كان

وعندا عقد فضة متل رقص النور
بس تلبسوا بيميل عود البان

بيوقع لحالو البن عن روس السجر
وبينكسر فنجان
وبيصير يتمشى ع مهلوا الزمان

عتمة خياله

لو كان عندي فرس
لضلّ عالعالي

بس ندهيني
بنزل على خيالي

يا بنت راعي الغنم
هالموت مقبالي

ردّوا معي البواب
جايي هوا شمالي

في ناس
قالوا قتل

في ناس
قالوا مات

في ناس
قالوا فتح عتمة خياله
وفات

بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال

يا خيي الدني أذواق. أنا هالحكي بعتبرو بلا طعمة. إنو هيدا بيتسما شعر لأنو طلال حيدر كاتبو.؟ والله لو كان الملكوت كاتبو بعتبرو طق حنك وأكل هوا .

"

بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال

"

» طلال وسليمان
» ثناء حيدر وهيفا العنداري قريبا
» الاستاذ جعفر حيدر
» فيروز في قريتنا / شعر ثناء حيدر
» اهلا بهمس القوافي ثناء حيدر