الضمير والحب الصادق وليالي الجمر

لما الوجع بيصير ينخر بالعضام
بيكون جرح القلب عم يكبر كتير
توقى البكي ولا ترد فورن روح نام
بركي الغفا عا الجرح بيوعي الضمير

حب صادق
ع قد حبّي بتقدري تموني
المونه على المغروم مش صعبه
الصعب إنّو تكذّبي عيوني
وتفكّريني متل شي لعبه
عم إقشعك مطرح ما بتكوني
بعرف هواكي ..وفاهم عليكي
اكتر ما انتي بتعرفي حالك
بكرّس الأرض التحت إجريكي
لما عليها يمرق خيالك
شفافك خدودك لون عينيكي
ريحة تيابك عطرك وشالك
كلّن ع بعضن بعشق وموعود
اغفا واوعى بين إيديكي
يا ها المرا البشرق شو رح قول
ما ضل منّك غير ماضيكي
وذكرى جميله بعالم المحهول
وتا تمسحيها ما بقا فيكي
ضلي وفيه تذكري ع طول..
انّو القلب فاضي ومش مشغول
وبعدو وفي ولا يوم ناسيكي
وانتي وفيه وهيك خليكي

ليالي الجمر
يا رب خفف ها الضغط عنّي
وضوّي سمايي وكشّح غيومي
معبّق إلي سنتين مع إنّي
كابب ببحر عواطفي همومي
مهموم آه مهموم تركتني
ومش بس فلّت ..دم بكّتني
بعقلي وقلبي خلقت الفتنه
عقلي بيقلّي نسيتك والقلب
بعدو بيقلي فيك مغرومي
عقلي بيقلّي نسيتك والقلب
.بها المعمعه قالب حياتي قلب
والعمر ناطر بس ورقة جلب
ومنشان انسا واحبس الدمعات
غمّضت.. تاما اقشع نجومي
ومنشان انسا واحبس الدمعات
طفيّت قلبي وقلت قلبي مات
ما عاد بدي اعشق وليدات
ولا عاد بدي جدد طقومي
ما في مرا بتضل مغرومي

» النحل والحب