جبين السما

موضوع: جبين السما الخميس يناير 17, 2013 10:27 pm

دقيت ب جبين السما راسي
وسمعت صوت الرعد ب دَوّي
مدري لأنو جبينها قاسي
مدري لأني كتير عم قَوّي
فجيت راسي و صار احساسي
ماسه تفج العتم و تضوي
عبيت من تم القمر كاسه
عليت ايدي جبت كاس الشمس
وشربت نخب الضو بالقوه
----
وبعرف اذا قويت رح ضوُّي
-----------------------
تأخرت لازم سكر ،وبكرا
برجع ع ذات الموعد بلاقيك
وهني البلاغه قبل م هنيك
بلكي عبكره منفقع السكره
عا كاس ضو منتركو ذكره
--------------
الشاعر إذا بتموت ذاكرتو
بترسي ع مينا الوهم باخرتو
لازم ع شعرو يسهر و يشقى
ت الشعر يتوصى ب آخرتو
يمكن كتاب يألف و يلقى
سوس الورق للشعر ناخرتو
ويمكن قصيده يكتب و تبقى
أجمل قصيده إنكتبت بسطرين
فيها البشر بتضل ذاكرتو
--------------

طفل كبير،

ها البحر ،طفل مدلل وع سرير
امو بمحبه وعطف ب تضمو
كل ما تشتي الدني بيصير
يشرب يطّلع مي من تمو
بيعرق ع كتر اللعب والتفكير
والفكر فاضي الطفل شو همو
بيوقف ت يمشي بيوقع وبكير
بعدو زغير الارض ب تلمو
مره حرامو بْ ينشف وبِ طير
ومره الهوى بالقطن ب طمو
و عا قد منو ناصح وبكثير
بَيّن على قياس الطفوله كبير
أكبر ب مره ونص من امو
-------------------
لا تقول اني مرقت ع السكيت
ضليت دقدق إنت ما رديت
دقيت باب البيت ع الغيمه
فجأه فتحلي الحلم باب البيت
شفتك مضوي وناصب الخيمه
فوق القمر ،،ت روح شو تمنيت

-----------------