نقد زجلي

نقد ايجابي من محبتنا للشباب وللزجل
مني النقد.. تا ارجع استنو
وبين زجلنا اللي انحكى عنو
اللي كان طه حسين يحضر ضيف
واليوم شو باقيلنا منو
طيب رايس الجوق صاحب كيف
ان عاد او ما عاد شي منو
بعض اللي غنو بها السنه يا حيف
طبلو الدني بابداعن وجنو
بعدن ع ايام الترس والسيف
ما تقدمو بالشعر ما جنو
كل الشتا عم يكتبو للصيف
وبيرددو مواضيع بالحفلات
وبالكاد موضوعين بيغنو



معلّق على ها الجلجله وجرحك صلا
وجبينك من الشوك ع كتافك تكي
وكتافك بحمل الصليب مدهدكي
ورغم الوجع ضلّو عيونك بالفلا
من بعد ما فليت ما شبعنا بكي
ولما رجعت عمّرت أكبر مملكه




الفرق واضح
ما في فرق بين الانا وانتي
انتي وانا تنيناتنا مجانين
ومافي فرق حتى ولا سنتي
في فرق واحد ..بينا من سنين
انتي وانا من غير مله ودين


مقاومه شرعيه
طالع ع بالي طفح قداحي
وكب الهموم وعيش افراحي
مشتاق اسهر ل طلوع الضو
لكن ما بقدر خف مصباحي
الأنسان كيف بيسهر بهالجو
وقتل وضرب لون الفرح ماحي
بتنازل ل محتل بركع او
للي قتلني بسلم براحي؟
لا لا ما بستسلم ...! ويعلى النو
رح ضل قاوم ضد شغل البال
ولو مت مش رح سلم سلاحي


مصلوب متلك بس ما سامحت
وحتى اذا بطلع قليل الذوق
البيشوف روما مملكه من تحت
غير البيقشع ها الدني من فوق


لازم قبل ما تحب تاخد وقت
عندك مرا من أصلها مرتي
وعندك مرا لو بوجها بزّقت
بتقلك تفرج عم تشتي

يا كاتب التاريخ بالمقلوب
كنت بدي سبك من سنين
لبنان وحدو بها الشرق مصلوب
والكل يعني الكل صلابين

يا ناطره ينفذ صبر أيوب
متل الكأنك عامله عمله
مدري ملاني قفّتك بزنوب
وما عاد فيكي الهم تحتملي
بتتحججي إنو هواكي جنوب
وانتي هواكي المال والعمله
من شي سنه باعت الك مكتوب
كاتب بقلبو حب حتى دوب
دابت حروفو وما انقرا جمله

إمّي ما بدّي كتير تهتّمي
من بعد منّك خفّت الهمه
وما عدت يمّي روح عا القدّاس
بطّلت صلّي ملتهي بهمّي
لا تسأليني ان فاقد الاحساس
الأحوال ..عنّا صارت مغمّي
ما عاد فيكي توثقي بالناس
وتا نضل فينا نعيش بيناتن
صلّيلنا من فوق يا إمي