طوني بو شموني وبحر الزجل قديس وشيطان

حوار الغفله بين الشاعرين سليمان طراد و طوني بو شموني ( قدّيس و شيطان )
يناير 2024
الشاعر طوني بو شموني
ألشاعر سليمان طراد
القرّادي
- سليمان طراد 1
في مكسيكي من المكسيك
عنّا عامل بهورجي
يا بو شموني رح خليك
بها الموقع جرصه وفرجه
- طوني بو شموني 1
ايّا فرجه رح بتشوف
يا بن طراد علا المكشوف
رح بتشوف الليله كفوف
وتقول بنفسك خرجي
- سليمان طراد 2
حيّا يا طوني حيّا
لشاعر كسر اكبر روس
من لبنان وسوريا
وطعماهن ع الروس بكوس
وانتي بموجاتي تفيّا
يا ايدي الليله بتبوس
يا بتبيع الشركه ويا
بترجع تعمل كندرجي
- طوني بو شموني 2
يا بحر اللي منشف مي
اكبر تنشوفك نتفه
لو في براسك شعر شوي
بتحرز تا ننتف نتفه
ل سوريا لبنان الخي
كتفن شامخ مع كتفي
يا معنا بتشمخ شي شوي
يا بتهبط درجة ودرجه
- سليمان طراد 3
يا بو شموني مهما تصيح
وتعمل حالك مكسيكي
بتخرس وبتوقف عا الزيح
لما بيكاكي ديكي
بحر الكلمه عرف منيح
أعصابك انو ركيكي
لازم يا طبوش تزيح
من حجران المعمرجي
- طوني بو شموني 3
بْحاول عبّي الفكرة فيك
انت الفكره بتدفنها
بترجعلي بردة انتيك
فكرة ما بيطلع منها
كتافي زرقا واتلنتيك
فكاري الكلمه ومعجنها
ومعجنها الالفه بيحكيك
بسوري ولبناني عنها
قلتلك اشمخ يا شريك
حروفك فينا مكنها
تاري ل خلق ركيك ركيك
وبتبقى ظروفو حرجه
- سليمان طراد 4
بعدك لتلات و خوّيف
وبتمسح جوخ ل شادي
وما بتعرف يا طوني كيف
تمشي بين الصيادي
ع ارشيفك بلّش ضيف
خساره من أبن طرادي
بركي بتبطل تستيف
أو بتبدل لتلتك
أو دبدبتك بالكرجه
- طوني بو شموني 4
شادي عيفو شاعر شق
دروبو وما همّو فخوخك
ولو جينا نحكي عن حق
عا جسمك باهت جوخك
خساره فيي راسك طق
وقيّس عا برجي كوخك
و ربحك فيّي ب مجدي تدق
و تعرض مع كوخك برجي
- سليمان طراد 5
برجك واطي مش مرفوع
وتقيسو بابراجي عيب
من اولتك يا منزوع
عم تتقلد زين شعيب
بلّش تا نكتب موضوع
جديد ومش عنتر وكليب
و ما تضيعني بلفّه وكوع
فرجي مقدرتك فرجي...
- طوني بو شموني 5
ما زالك قرّادي فتحت
عليّي اختمها توقّى
لا تتفلسف فوق وتحت
فتاح معنّى وترقّى
ما قلدت ب فنّ النحت
شاعر و بكلمه محقّه
مهما قبالي فشخه شبحت
بتبقى فشخاتك عرجي
- سليمان طراد 6
فشخاتي عواصف ومواج
وبحري قصدانو مدافع
للدره ن كنك محتاج
اغطس فيي ولا ترافع
عن بهورتك بالكرباج
رح ربيك وفي دافع
لها القتله من ام عجاج
قالت عنك قمرجي
- طوني بو شموني 6
غايب كنت وهلق جيت
عنقك عا سيفي تردّو
لا تمازح عود الكبريت
غابة جهلك مش قدو
فتاح معنّى وتوابيت
ومن عندك قلّو ل عدو
وشادي بآخر ردّه نسيت
مكسوره براسي الخرجي
- سليمان طراد 7
مكسوره؟ رح اتحدّاك
و اتحدّا شادي بظهرك
و خلّي بدر ببيت الياك
يكمشني وظل بقهرك
مش رح خليلك شبّاك
يفرجيك نجوم بضهرك
يا بترجع تعمل سبّاك
يمّا بردّك طنبرجي
- طوني بو شموني 7
مش مكسوره ؟ اللي مكسور
راسك ب القرّاديه
يا باشق ع جناح نسور
خفّف تفنيص شويّه
ظهري ب الاشعار جسور
تا تعلا تكبّش فيّي
يا بيبقى ب الشعر كسور
واحد متلك زعبرجي
- سليمان طراد 8
يا بو شموني سماع و قوم
تحمّم ورجاع تحفظ
شطّي صار بوجه عموم
من موجاتي بيتنفض
وانتي صاير متل البوم
لازم نقّك يتخفض
يا بسحبلك ها الزلعوم
يا بتتهذب يا عمعوم
استرجي خالفني استرجي
- طوني بو شموني 8
يا سليمان الشعر ل خام
نحتو مش متل العنّه
ناقص إلهام و أحلام
و تهذيب ورصّ منّي
خرجك تقعد ب الحمّام
وبحفاظي تظل تغنّي
وتتركلي ملوك الإلهام
تنازل متلي منبرجي
حوار المعنى
- سليمان طراد 1
يا شاعر المكسيك كل ما صاح ديك
فجر الخيانه بحسّ يا طوني عميك
ما زال عارف يا ولد عزمك ركيك
شو حاوجك يا فولز تا تسابق بويك
اللي شعّرك بالغرب شو دمّو سميك
ما فادك و لا نجّمك أكتر إذيك
من هيك مش رح فيك تنجى من الغرق
و لو حلم الله يا صبي بيشدّ فيك
- طوني بو شموني 1
،،
يا نمر من كرتون خفّف لهجتك
قدّام ديبي لا تفيلت نعجتك
الغيره اللي فيك بويك فيّي بجّتك
خوّنتني عا قدّ ضعفك حجّتك
مين اللي شعّرني؟ اضحكت من غنجتك
كل يوم درجه عم بتهبط درجتك
عا كاحلي ب الشعر فقشت موجتك
بتحكي ب غرق يا خجلتك من عرجتك
الله تركو رح شدّ فيك الدينتين
بلكي بتطلع جوهره من لجّتك
- سليمان طراد 2
ما زال بالمكسيك عايش مستريح
شو جابرك تلعب بسكين الدبيح
موجة خيالي ترْكت الكوكب جريح
و تا تسكرك رح خبّرك و ارجع صحيح
جرّه أنا و قصايدي نبيد المنيح
قرّب لعندي دوق منها يا فصيح
ها الجرّة اللي كْمشتها بالدينتين
هي جرّة اللي شرّبو منها المسيح
- طوني بو شموني 2
بّعلمي كنت بحر و قبل تالت جواب
صفّيت جرّه بدينتك شدّوا الشباب
عيف المسيح و ربنّا و حاجه عذاب
تتجيب حجّه مشبعه وهم و سراب
ما عاد ناقص غير تنزل ب الحساب
و تعمل ربابة و يعزفك و همك رباب
و كلّ ل معي مطلوب شاعر سبع غاب
بْيخلق حضور الموهبه رغم الغياب
انشالله انت ما تصير بحضورك معي
حصّ ملح قبالنا شرّف و غاب
- سليمان طراد 3
من يوم ما عليّي الحروف توحوحوا
صرت العرق عن جبهتي ما بمسحو
و من نور الله مواهبي عم ينوحوا
بْموقع خوابي عتاق و بصرف النحو
و في امر يا انطون لازم وضّحو
منشان تفهم و البحر ما تجرحو
نوري قداسه بيظهر على المؤمنين
(الابليس) متلك ما بيقدر يلمحو
- طوني بو شموني 3
هلّق صرت نور القداسه و الهُدى
رَكْعت سهام و صارت تصلّي هدى
ربّ الشعر ذاتو يا صوت بْلا صدى
كون و شو همّي الامس و اليوم و غدا
ببقى انا شيطان شعر ب هالمدا
نورك ع ناري يروح يوقف عا حِدا
الشيطان واجه ربّنا و متلو اكيد
ما بركع ل الله و لا بشوفك حدا
- سليمان طراد 4
الشيطان واجه ربنا..¦¦ بْلا فزلكه؟
الشيطان أخرس.. كل عمرو يا ذكي
لمّا إجى لعنّا تا يبني مملكه
قدّام الله تخرسن وْ راسو تكي
و انت يا شيطان مملكة البكي
جايي تا تفتح مع إلاهك معركه
طبّق شفافك عند ما يحكي إله
و خليك ساكت بعد ما يخلص حكي
- طوني بو شموني 4
الشيطان قلّو بحقّ للربّ العلي
الانسان مش من نار …فوقي ما علي
و من يومها لليوم فاتح مشكله
مع ربّنا و متلي أنا بيغلي غلي
و انت يا سليمان عبد المنجلي
و متلك عبيد كتار حصرم ما حلي
نحنا قسمناكم بلا كترة كلام
هودي إلك يا ربّنا و هودي إلي
- سليمان طراد 5
يا ربّ ساعدني على سُكر و صحي
و فيّق ضميرو و المكر امحي محي
اعقل يا طوني و توب فنّ المسرحي
تهذيب مش قلة حيا و قومي اشلحي
عا الشعر فتّ و بعترفلك يا جحي
إنّو اساسي صرت بديار الوحي
تمسكنت تا صفّيت شيطان الزجل
و انزعت منبر بالإباحيه استحي
زوده
وينِِك يا إلهة البلاغه افصحي
عن شيطنة فنّ الغزل سرّو افضحي
جوق العمر لو كان فيها ملتحي
كان ل ميلاد الضوّ بيقلّو انتحي
- طوني بو شموني 5
بسكر أنا بورده ع سطح المشتري
بسكر و فيّي الموهبه بقلّا اسكري
بسكر بضحكة طفل مهضوم و بري
بسكر ع جسم بيعشق ب تختي العري
بسكر عباده و انت جهلك ما دري
قلّو يا شربل كامله ل ه المفتري
قدّيسنا سكران ب الربّ و أنا
قدّيس تاني فوق خشبة منبري
زوده
عفْلي ميلاد الضوّ شاعر منبري
و عيون شربل ما بتجهل جوهري
العمر . الوطن لولا التقينا يا طري
تنرجّع عْلا الفنّ صورة بيت مري
- سليمان طراد 6
كيف ساقب الموضوع يا شيطان فيق
القديّس و الإبليس من ذات الفريق
القديّس شربل غلّط و حسبو صديق
و قلّو تعا و غنّي بجنبي يا رفيق
شعر الإباحي وقّع الجوقه بضيق
و شربل بدّي بقدسيّتو يفتح طريق
وان ظلّ تارك ضوّ يتشيطن فهام
الجمهور بدّو يحرق الجوقه حريق
زوده
ما كان بدّي انتقد شاعر عريق
لاكن جبرني ها الحوار الما بطيق
التهذيب بالإبداع يا طوني عقيق
بْيخلق الدهشه الصادقه بيبرق بريق
- طوني بو شموني 6
من قبل ما الشيطان غيَّر اتجاه
من نار خلقو الربّ تا يعطيه جاه
و لمّا بشعري الفكر يلمع من عُلاه
مهذب و ازعر يا صبي بيمشو وراه
القدّيس و الشيطان للمنبر دواه
الضوّ كامل كون قدّ الانتباه
هنّي و أنا للشعر رجّعنا عفاه
قدّيس او شيطان عالي مستواه
مْنتقاتل و كل ميل في عندو حلاه
مْنبقى ملوك الشعر و الكون و سماه
و أنت رح بتظلّ عبد من العبيد
يا تحت امري يا تحت امر الإلَه
- سليمان طراد ختام قصيد
اووف اووف
يا شيطان المنابر لا تباهي
بقلّة ها الحيا و كتر التماهي
بردّاتك عم تعرّّي الصبايا
و تعمل منبرك بار بملاهي
يا طوني الشعر في عندو مزايا
و حتّى بيت يلفت اتباهي
بدّو يكون فايت بالحنايا
شاعر روكز المنبر يضاهي
و إذا ميلاد ضوّ من الخبايا
اظهر زعرنه و بيّن فكاهي
مش معناتها كلّ البقايا
لازم تعتبر داهي الدواهي
انا بالشعر بعرف ها القضايا
و بسّ بتطلع مْن الروح آهي
و لأنّي ما بزغزغ بالنوايا
قدر ما يلعب الشيطان فيّي
ما ممكن زعّل بعمري إلاهي .
- طوني بو شموني ختام قصيد
اووووف اووووف اوووووف
يا عبد اللي قلت يا ربّ .. ضيقي
ع حجمك ب الشعر واسع مضيقي
عشت عمرك ل الله انتباهك
فَزَع بلسان ناري تبلّ ريقي
أنا الشيطان جاهي غير جاهك
جهنم ما بتقدر عا حريقي
أنا من النار خفّف اشتباهك
عبيد و ما بتنجوا من حريقي
إلاهك ما انصلب لولا متاهك
و لا شفْت رسالتو الفضل ل طريقي
أنا ع الارض لذّة شوف آهك
الأمس و اليوم و البكرا غريقي
و معي ب الشعر لا تقوي ب آَهك
إذا قدّيس ما بْعدّك صديقي
وجودي بحاجتو حتّى إلاهك
بلا وْجودي انت من دون قيمه
لإنّو التجربه الدرس الحقيقي..