فادي فيباض والبحر شد ورخي

ابو طربوش ..يسأل شو المنبر

البيكرفت الردات يعني كرفتا
وضعاف عا الجوقات يا فادي أتى
قديش فينا نحملو وقلي متى
بيزهر اللوز ..الأبيض بفصل الشتا؟
الشعر يا فياض منّو لتلتا
ولا زنود خصعه ولا رجال معتعتا
المنبر حضور وموهبه ومنطق سليم
اسمع الكلمه ...وصير شاعر يا فتى
هرب هرب


فادي فياض
فادي فياض
حيث فتحت موضوع شعر ومخمخة
وقلبك لحل مشاكل الشعر انتخى
شعري حروفو بالرهافة مضمخة
روح طالب الزقّف لكلمة موسخة
الحفلات معظمها اليوم ملطخا
متل الصبيي بسيليكون منفخة
صورة حلا بتشد كل المارقين
والشد عند الفعل بتشوفو ارتخى


ألشاعر سليمان طراد
يا بواق مهما عا اللبن تتمنفخي
بيبقا حليب الموهبه نار ..انفخي
ما زال شاعرمنبري وكفك سخي
اتعهد الحفله ..وعيب حاجي تنتخي
النسوان مش حفلات افهم يا أخي
النسوان بتسحسخ..وشهوه مسخسخي
لما المرا بتشدّك ..بنظره عيون
تا تشدها...مفروض عزمك يرتخي



فادي فياض
الشاعر يا بو شربل نبي وفادي نبيك
مش تاجر ومتعهد وفايت شريك
وحيثك اخترت الإرتخا وبعدك ركيك
ان ضلّيت رخو بنقّشك عالترتبيك
وقلت المرا البتشدها وبتكون شيك
لو ترتخي قدامها ما بتشتهيك
ان ضليت نايم مرتخي ما بتقبلك
تا تقبلك لازم تشد العزم فيك

ألشاعر سليمان طراد
مين الختار الإرتخى ...يا سامعين
معليش بدي ارتخي متل العجين
وقمّر رغيف الموهبه وفت الطحين
وطعمي يتامى الموهبه والحاضرين
الانسان عزمو بيرتخي لتقل السنين
الرحمه بترخي حالها عا المؤمنين
برخي الحبل وبخاف انك تنشنق
وانت الغبي بتشد عا العنق التخين


فادي فياض
طحينك ابن قسوة حجار المطحني
الرحمة بنت شدة نفوس الموءمنة
يا شب بيتك عالصخور بينبني
مش عالرمل افهم يا بحر الجعدني
شد الحبل عالعنق ما ببهمني
عنقي وعنق الارز بيكعو الدني
وشد الحنك لما بتحكي مع حدا
وشد العزم لا تركع ولا تنحني



ألشاعر سليمان طراد
يا زنود أمي يا حنونه اعركي
لكن المحبه والخميره باركي
شبّهت حالك مطحني وعامل زكي
ونسيت سنبله الملاني بتتكي
وما زالنا بموضوع شد وفكفكي
رح انصحك من قبل خوض المعركه
شد نيعك بس احكي يا ولد
ورخي لسانك بس تا تبلش حكي


فادي فياض
الإم الحنوني تا تحقق غايتك
يا ريتها شدت على تربايتك هههه
لو بترتخي السبلة اللي متل حكايتك
قسوة القمح موكلي برعايتك
يا ريت جاهل ما طلعت ببدايتك
تا تنفهم بكتابتك وقرايتك
لما بتكتب شد ايدك عالقلم
لما بتمحي شد عا محايتك

ألشاعر سليمان طراد
لما تشوف الضوبالغرفه انطفى
بترخي برادي عيونك.. ووقت الغفا
بتعرف البحر بفرد حجه ما اكتفا
مفضل عليك وصعب جهدو ينوفى
الحمّه عليك اشتدت ..وعندي وفا
مش بس ادعيلك يا فادي بالشفا
جايب إلك مرهم وضد الإلتهاب
مسحتو بإيدي بوسها وج وقفا
ههههههههههههههههههههه

فادي فياض
شد إيدك يا بحر وقت الطرش
يما رح بتدهن تيابك والفرش
وركز على التمرين تا تشد الكرش
ما في صبيي بتقبل تشوفك هرش
ما فيك تشفي امبراطور العرش
وانت عم تشحد النغمة من الطرش
كل مين عم يشحد وإيدو بترتخي
بيشد إيدو بس اعطيه القرش

ألشاعر سليمان طراد
لما الحاله تشد ..بتسبب هياج
شارع معوّد عا الحرق والأحتجاج
وحتى الموسيقى والعزف يغني المزاج
ايديك رخي عا الوتر تا يقول حاج
بعرف بخيل وقرشك الممسوح باج
معوّد اللقمه تشتهيها والدحاج
تسبّح ببحري وفوق موجاتي ارتخي
ان شديّت اعصابك بتغرق بالمواج



فادي فياض
رخيت صابيعك على عود الطرب
بس الوتر مشدود تا العود انضرب
رخّي شفافك عند ما تغني عُرب
تا تصير يا سليمان فنان العرب
بحرك رخو ومن صخرة شطوطي هرب
وخدّك عا كتر الضرب صاير منورب
كفي صخر شاطي وخدودك موجتين
كلما بتهجم عا كفوفي بتنضرب

ألشاعر سليمان طراد
رخي وتار الصوت ..لا تغني حكي
وشوف الزجل ما اجملو بالتكتكي
وبالحرب لما تنرمى بالمعركه
رخّي قشاط البندقيه يا زكي
نحنا السلاسي بكل رده محيّكي
نحنا رمال على الشطوط مدهدكي
رمال التحدي كتير رخوه بتبلعك
لا تقرّب على رمالنا المتحركي

فادي فياض
شو باك ساعة موج بالبحر العنيد
وساعة بتصبح رمل متحرك بليد
ثبتلك عا شخصية تا اعتبرك فريد
ولا تضل تنقل بين إيد وبين إيد
يا رمل متحرك تا ما تضلك زهيد
رح اجبلك بالمي عا شلف الحديد
وحط الترابي عليك تا تصفي حجر
ما بحب إمشي غير عالدرب الشديد

ألشاعر سليمان طراد
ما زال راسك حجّر ومتل البلاط
توقى لا شد عليك كل ما بقب باط
دربك شديده قلت..شو ها الاعتباط
ما المي رخوه .وللجبل جيش احتياط
وتا فهمك بالشعر من دون العياط
وتتعلم على الحب وتجدد نشاط
وتا تصير تقرا البنت عا سرير الغرام
لا تشدها بفستانها ..رخي القشاط