تلاتي وواحد حوار عدنان سعيد وبحر الزجل

الحوار اللي صار بيني و بين بحر الزجل سليمان طراد على موقع "زجل و بس"
=============================================
Adnan R. Said
عا فقش الموج يا سْفيني احمليني
تا ابعد عن وطن جمرو كويني
و عا باسبوري اذا الفيزا ما حطّو
اشلحيني بعب شي موجة اشلحيني
الطفالا هون نامو وما تغطّو
بحسرة بتقتل و دمعة حزيني
و بحبر الازرق النعوات خطو
لْطفل مشلوح عا رمل الشواطي
و قبر عم يجمع اولاد المديني
=================
شفت يا بحر شو جايب مصايب ؟؟
يا ريتك مركب الغيّاب جايب
تا يتهنّو ببلدنا و بجمالو
و تا يتلاقو القرايب بالقرايب
انطلبنا نفيّق الشعر و خيالو
نْـوَعّي مجد عنا صار غايب
قلت هالبحر ما بلاقي بدالو
بيرجّعني صبي و لو صرت شايب
و الي سنتين عم اكتب قبالو
و ياما تنيننا عملنا عجايب
بشعري بيكبر و بيشوف حالو
و بشعرو بمجلسي بيصير نايب
ولأنو دولة الشعر و رجالو
ملكها واحد وعالناس دايب
جايي من سما الالهام طالو
و بآخر ملتقى يا بقص راسو
يا اما منرجع الليلي حبايب
==============
يا سليمان نحنا من البدايي
مرجع للشعر من دون غايي
مافي شاعر عا حفلة شعر وقّع
تا ياخد إذن منّا للرعاية
و لأنو تنيننا للشعر مرجع
سماك العالية بتشبه سمايي
حملنا ريشة الشعر اللي بدّع
و بإيد التانيي حملنا العصايي
و على النت اللي احلى الناس جمّع
مواقع شعرنا صارو كفايي
في موقع حلّق و موقع تضعضع
و موقع صار اسمو عا النهايي
و أنا ويّاك قلعة و ما بتوقع
لإلنا المملكة و إلنا الولايي
وصعبة ينجح على النت موقع
ان ما قالو انت او عدنان جايي
و بيقولو الناس و العالم بتسمع
بلا وجودك ما رح تنجح مواقع
ولا في موقع بينجح بلايي
==============
يا سليمان هات من الخبايا
شوية شعر لعيون الصبايا
الصبايا بينطرونا تا نغنّي
قصايدنا مرايا للعرايا
و لأنو بيعرفو بالشعر هنّي
بخيالي غصون و زنابق طرايا
و لأني ازعر و بالشعر جِنّي
و عاطي للحلا كل العطايا
خلقت حسّاس و النهدات منّي
على شفاف الورق كتبت حكايا
و لهلّق بعدني و من صغر سنّي
بِ تمّي ان خرطشت عالتم ردي
لِساني بيركض يمحّي الخطايا
=====================
ألشاعر سليمان طراد
اووف اووف
يا شعر انتي مرجعي ونهجي
بتنحط فوق العين عاالمهجه
مهماعليك الجاهل تطفل
بيضل عندك يا زجل رهجه
بحر الزجل لا تخاف متكفل
يرجعلك الامجاد والبهجه
ويمنع يمرّق خدعتو مغفل
ويتطاول على ملوكنا ويهجي
من هيكي راسي مسكّر مقفل
وجايي انا وعدنان حتى نشوف
ان كان فينا نوحّد اللهجي
**************
ويـــا عدنان يا اغلا حبــــابي
ما بقبل اغلق بوجك بــــوابــــي
وما بقبل ارحمك لا تقول قصّر
لانو للنصر عامل حسابي
ما بدي تقول انو البحر بصّر
وكشف ملعوبك... وحكمك غيابي
قـــول البحر غيــم الروح عصّر
تا يسقي الفلسفه طيـــب الخوابي
واذا بتشوف موج الشعر خصّر
عا خصر الريح وتحول سحـــابي
بيكون البحر قوس النصر نصّر
و عا صوت الموج عم يعزف ربابـــي
غيرو تمكسك... وغيرك تمصّر
تا ضاع الفن وتحوّل رتابي
ولانو كرم افكارو تعصّر
بقي يشرب عصير الضو حتى
عتّق كلمتو باطيب خوابـــي
**********
بعرف بحقي وحقك بيحكي
جاهل... مصيرو... بس مابنحكي
مفكّر اذا بيروح عا المكسيك
بيقدر بيخلق بالشعر ضحكه
انتي و انا هـــادي و اطلنتيك
مرجع مواهب شعرنا المحكي
ما جيت بالموقع انا ربيّك
جايي تا أكد كل شـــي محكـــي
نحنا الرفعنا الشعر عا مداميك ..
بتتخرسن مكاتب زجل لبنان
لما الشعر بينـــاتنــا بيحكــــي
*********************
ويا هيفا بتعرفي عندك معزه
بقلب عدنان وبقلبي.. وب لزّي
قبلنا تنزليــنا وما بجامــل
عملتي بالزجل عا النت هزّي
ولاني معزتك بالقلب حامـــل
جايي الشعر هني وما بعزّي
الخوابي بتقدر تشكّل معامل
ودواليـــها ما فيها نبيـــد مّزي
ولانو المسح مع عدنان شامـــل
تمنّي بس عندي يا مديره
هزّي المسطره للحج هزّي
************
وحسود محاورتنا لو نقلها
تا يكسب عطف ويحلل جملها
ما نحنا من المواقع شاطبينو
لأنو الفسفه جهلو قتلها
ويا عدنان يا سبع بعرينو
ل هيفا عن بحر شعري اسألها
تا تعرف ما حدا قرّص عجينو
ولأنو الست هيفا فضل الها
وإذا ها الحج كنا حاضنينو
ما لازم يعمل الإبداع ملهى
ان غلط بحقنا رح شيل دينو
وانا وياك يا عدنان جينا
ل زجلها وبس.. تا نحقق أملها
==================
Adnan R. Said
دقّو الجراس و يا كنايس هلّلو
جايي مسيح الشعر عالساحة انزلو
جايي تا يدعس عالبحر و يزلزلو
و يعمل عجيبي و للعجايب سجّلو
رب الدني و شيطانها خلقو سوى
و شعر البلا شيطان ما بيطلع حلو
------------------
ألشاعر سليمان طراد
يا بو بهاء تلاتّي وما في رأيس
عملو حكومه ظل بالوضع التعيس
في تلات اشيا فيك بكره يا عريس
مفتن وقاسي وفشختك مش عم تقيس
ادم وحوا وربنا كانوا سوا
تلاتي ..وعليهن انت وحدك يا بليس
============
Adnan R. Said
آدم و حوا !! تنين .. و ابليس الشقي
تلاتة ، و لرب الكون صعبة ترتقي
تركني لوحدي عيش بالقلب النقي
وَسوِس لمحبوبي تا فيي يلتقي
متلي متل الله لوحدي بالسما
و الله لوحدو بلّش و وحدو بقي
==================
ألشاعر سليمان طراد
يا حروف متل السيف عدنان ادبحي
كلما يخربط بالعدد لا تسمحي
لا تمسّحيلو...دموع عينيه امسحي
خلي الحقيقه شمس تغمر مسرحي
آدم وحوا تنين يابليس استحي
والله تلاتي خطيتك ما بتنمحي
يا واحد... تلاتي بشرعي مقدسين
آب وإبن والروح تالوت الوحي
----------
يا مواقع الأبداع مني تبحبحي
وعا كل رده تأوهي وتوحوحي
جايي تا قص شوارب وانتف لحي
وكبّر القيمه بالحوار المسرحي
=============
Adnan R. Said
وحدك حبيبي انت بعيوني قعود
هالزرق صارو بغيبتك عينين سود
و دخلك يا قلبي جود بالخفقات جود
واحد بصدري انت و العالم شهود
و آب و إبن و الروح واحد بالوجود
هنّي المسيح الخلّصك هنّي الخلود
ظلم اليهودي مسمرو فوق الصليب
و جهلك نسف دين المسيحي من الوجود
-------------
ان ما كنت يا سليمان عنوان الصمود
دموعك الليلي بيكرجو فوق الخدود
و تا تصير تعرف كيف بتكون الفهود
كفّي بيقلك خود شو بتريد خود
===============
ألشاعر سليمان طراد
ان ضليّت ليلى عاشق.. ومجنونها
عيون الزرق رح رجّعك من دونها
نظره.. وموعد ..واللقاء ..تصونها
تلاتي ..وبلا الشيطان ما بتخونها..!!
صحرا الجيزه غوص ب مكنونها
لما تفتّح ع البسيطة عيونها
البعد الثلاثي ل مصر اهرامها
بتشهد.. الاهرامات ع فرعونها
------------------
حلوه المواقع نحترم قانونها
ونفهم طبيعتها .وحلا مضمونها
ان كانت قلاعي ومحتمي بحصونها
بهبّط عا راسك سقفها وباطونها
================
Adnan R. Said
يا جاهل الاسرار جهلك وصّلك
عا قمة الاهرام تبني منزلك
انحنيو الضلوع بلغز جايي يسألك
ليش التقو بنقطة وحيدي بالفلك ؟؟
و ما زال عالألغاز تفكيرك سلك
شوف الشمس "وحدة" بفلك ما بيجهلك
وبقيت وحيدي بالسما متل المرا
ال وَحدي انا عا فراشها عايش ملك
==============
تخايل مرا عا فراشها بتستقبلك
مع صاحبك بتدللو و بتدللك
و ما بتشبع و بتصير تصرخلك ولك
بدّي تلاتي و هالجسم مَنّو إلك
===================
ألشاعر سليمان طراد
بيت السعاده ..صح او بيت الهنا
عا الحب..والاخلاص..والعفه.. انبنى
ولما بيجي الشيطان بيهد البنا
قلبك بيفرقع متل حب الكستنا
تلاتي عا واحد قادرين وبالغنا
يقيموا بجوقه وانت عا ايا بنا
بيت العتابا بتعملو غير الاصول..؟
المعنى ثلاثي..وهيك اصل الميجنا
================
Adnan R. Said
شو هالفصاحة الجيت فيها تغتني
منها استحى الفقر ال بإحساسو غني
بيت العتابا مع قوافي ملحّني
عا وزن واحد يا حبيبي منبني
و هلق تا ارجع للدني و عيش الهني
و كيف انبنى الكون ال بيعمرو ما فِـني
آدم بليلة حب و برحم الحلا
بزرة وحيدي صابها ... و عمرت دني
-------------
خلصنا يا بحر الشعر لعب و ولدني
عدنان رب الشعر اركع و انحني
ومع مين بدّي بعد غنّي و اعتني
و بحر اللي اسمو بحر نشّف من سني
=================
ألشاعر سليمان طراد
تركلي العتابا ..وقوم غيّر موضعك
تا آخدك صوب المحيط وفزّعك
ب فلوريدا عا طرافها ..رح قشّعك
مثّلث بيبلع بس ما بيلعب معك
ومن بحر يا قدموس موجو طوّعك
اطهر تلاتي خلّصوا ورح اقنعك
موسى النبي ويونان والتالت مسيح
وب بارمودا مثلثي رح يبلعك
-----------------
قديش كنا نغنجك وندلعك
تاري الغنج يا صاحبي عم ينزعك
مع بحر موجو بلجه الريح اندعك
ما بيرحمك بالشعر جايي يصرعك
===============
Adnan R. Said
كم تم في عند المرا يا حاضرين
واحد .. عليه بدوّب شفافي حنين
و لسان واحد للنهيد و للأنين
بقتل اذا بيقول نحنا جايعين
ويا ابليس يا مقوّي تلاتة عن يقين
غدر و حرب و الوسوسة للخاينين
تلاتة نهانا عنهم الرب العلي
هنّي الهوى و النفس و ابليس اللعين
--------------
يا طالب الزودة انا القلبي حزين
من شخص للكلمة ما عم يعرف يزين
الشعر البلا ورد وزهور وياسمين
ما بيفرحو فيه الصبايا العاشقين
=============
ألشاعر سليمان طراد
قلت المرا بلسان..!! حكيك مش صحيح
لسان المرا فراشات ...وبيجرح منيح
هههه
وتا نرجع الموضوعنا تا تستريح
واعطيك حجّه دامغه ..وننهي المديح
تزكر معي من بعد ما مات المسيح
اول ظهوروا كان عا تلاتي ...صحيح؟
من بعد ما صلبوه فوق الجلجله
عدّن...تلات تيّام ...قام من الضريح
===============
Adnan R. Said
تلّت دماغك زيح من هالدرب زيح
و مجد المسيح الناصري لا تستبيح
عديتن و طلعو تلاتة ؟؟ مش صحيح
وحدو تنين الفصح بلسم للجريح
تروك التلاتة و حط عالموضوع زيح
و اركع لمجد الشعر حتى تستريح
لوما مسيحك واحد وجابو الأله
شو قيمة تلاتاتك بدون المسيح
===================
ألشاعر سليمان طراد
كموش القلم بالإيد ..أوعى تفلّتو
بتلات صابيع ..وكف ايدك سلتّو
ونص الأدب منشان يلبس حلتّو
حبر وورق .فكر انتلى من غلّتو
واللي تحت باطو انجرح بمسلتو
بيكون واحد ..ما بيعرف علتّو
وتا تشوف شو بتعمل كمان تلاتّي
حتى العرق ما بينشرب تا تلّتو
===============
Adnan R. Said
بتلات صابيع الإيد علّق مشنقة
و ابصم بأصبع واحد بلا حرتقه
و بلغة الأرقام في "واحد" ثِـقة
بشوما ضربتو ما بتربح زنبقه
و يا مهاجر الأوطان عا ديار الشقا
عندك وطن زيني بأحلى منطقه
و فوق العلم ارزة وحيدي ملوّني
و لبنان واحد بعد متلو ما التقى
-----------
نحنا العرب صرنا شعوب مفرّقة
للزعبرة خلقنا و لكتر التفرقة
و لو توحّدو جيوش العروبي المطلقه
صهيون كنا مناكلو بالملعقه
===================
ألشاعر سليمان طراد
المسحوق حتى تشوف جوده بلسمو
تلاتي بواحد شعر راسك حممو
ههههه
يا مناصرين الشعر مني تعلموا
نبش الحجج.....من بعد منها تبسموا
ما الشيخ بو عارف بظلو بيحتموا
وعا غيبتو كل القلوب تفحموا
بدفنو كنت وبدينتي سمعت الجميع
قالوا تلات مرات الله يرحمو
============
Adnan R. Said
يا موزّع الرحمات قلبك شو كبير
مليون رحمة قلال عالشيخ القدير
و نحنا بدين الحق قررنا المصير
برحمي وحيدي عالكبير و عالصغير
و مازال جيت بديننا تدق النفير
عنا التقمّص ثابت و أمرو خطير
و الروح وِحدي و الجسد لولا فني
بتنقل عا غيرو من غدير عْلى غدير
-------------------
تكرم عيونك خود من شعري عصير
و زودة صغيري تكون للعجنة خمير
مهما البحر يتفلسف و يحكي كتير
حد المحيط منقشعو بوبو صغير
==================
ألشاعر سليمان طراد
ما جيت صوب الدين أو صوب النسب
فهمي بعد ما سألت ها الخبره اكتسب
بقنع وبرضى بحجّتك,.؟ لكن حسب
مفهوم فلسفه التلاتي عن كسب
اللي ترشحوا عا اللايحه وبعضن رسب
الهن خساره مطنطني وبتنسب
وتا تفرز الصندوق بعد الانتخاب
الأسم الثلاثي ان ما انكتبت ما بينحسب
===============
Adnan R. Said
"واحد" انت يا رب يا عـــــــلّام
"واحد" يا طه يا نبي الإســــلام
وعيسى المسيح العالسما منقول
"واحد" ... و نحنا بغيبتو ايتــام
الله الأحد الله الصمد عا طـــول
غَيرو ما عنا .. غَير بالأوهـــام
و يوم القيامة بمنظري مخجول
بقلّـة وفـــايي اللازمو إعــــدام
و يا حضرة سليمان بدي قــول
كلمة و ما بدي بكلمتي إنـــــلام
شوف الشباب !! البالها مشغـول
"بزهرة" وحيدي بجسمها البسّام
و شوف الصبايا العقلها مشلــول
"بالمارد" العايش عا ريش نعــام
واحد عا واحد فبركو الأسطــول
و الكون لوحة .. و القدَر رسّــام
و كم راس عندك قـول يا طفّــول
واحد .. متل طبل ال بلا انغــــام
و كلشي بهالدنيي خَلق عا أصول
"الواحد" أساسو بلغة الأرقــــــام
من فرد بزرة وفرد نطفة تجــول
برحم" الوحيد " الخَلق كان و دام
و نجمك اذا بكرا صفي عا أفـول
بتابـــوت واحد و بكفن من خـــام
منسّفرك عا عـــــالم المجهـــــول
و عا قبر فيه بتنتهي الأحــــــلام
ان بدك تلات قبور؟؟ مش معقول
زين ان كنت أو روكز و شحرور
الا بقبر " واحــــد " ما رح بتنـام
==================
ألشاعر سليمان طراد
يا واحد ما الك الا الشماتي
بعد ما تسمع الرد المؤاتي
انت شيطان قلب البنت علق
وانا علقتها من التفـــاتي
أرض وبحر والجو المعلق
كون معلّقو بمعلقاتي
السيبي ع تلاتي يا مقلق
اذا بتعمل ع نفسك نقد ذاتي
ومين بيفتح القبر المغلق
تلاتي من اقانيمي وثباتي
وإذا عدنان ع المنبر تخلق
مش معناتها عكّر صلاتي
وعلى تلاتي اذا جفني تقلق
لاني يا زجل عامل إماتة
ما فيك تقول عن انسان طلق
إلا تا يطلّق بالتلاتي
وبجيش وشعب ومقاوم تألق
تلات الوان بهديهن حياتي
الرايه فيهن بتخفق و هلق
قبل ما يطلع عليكن خواتي
وبلايحة النفوس اللي تملق..!
ع ضهر البيك والحلف التلاتي
على مجلس القرية اللي تسلق
ضروري يكتب الاسم التلاتي
وإذا سليمان بالموضوع حلق
بيكون الحبر عم يشرب دواتي
تلاتي قلبهن فيي تعلق
وبدي قول قدام الخليقه
امي الطاهره.. ومرتي ..وحماتي
=============