خمريات زجليه

ونتابع خمريات زجليه
اعترفلي يا زماني ..بظرف جاني
على اللي هاجموني بالمعاني
ما زفّرت بكلامي ولا بزفّر
ولا ممكن زفّر ويجرح لساني
واذا بقلب الخوابي صرت كفّر
ملوك الأرتجالي ما بعاني
وما بقبل خزنتو العدنان طفّر
وبعرف جعبة الموقع ملاني
انا البحر العلى موجي مسفّر
حرف قدموس وحملت الأهاني
لها الأسباب مش معقول نفّر
مواهب شعر متّكلي عليي
واذا رح خونها بخون الأماني
يتبع

انا من زغر سني ما بسمّي
عدوّي..وعا حلا الكلمه بسمي
واذا عدنان عم يهجي .وما بدّو
يخفف لهجتو بيفور دمّي

وانا تا يفور دمّي ما بعدّو
خيي من صلب بيي وإمي
اعزروني لو شفت عا الشط مدو
ما فيي مون بتعقّل ..عا يمّي

انا اللي وقفت بعد الطرد..حدو
وبرفع الشعر نفزّنا المهمه
ومش رح رد لو تقّل بردو
ومهما كانت الرده مهمه

انا عدنان خصمي ما بعدو
ولا بحسو عا كتفي متل همّي
قولولو موقعك قادر يهدّو
اذا قرر يبلّش بالمعنى
خوابي لهفتك بتصير رمّي


اعزرني يا وفا هاك الصداقه
بعرف ما الك انتي علاقه
انا مجروح من اوفا صحابي
هجاني وخزّق كتاب اللياقه

ولأني بعشق نبيد الخوابي
حملت بطيبتي من الشعر باقه
وبعت بلهفتي من اغترابي
كمشة عطر تا فض الخناقه

انا يا ها الخوابي من جيابي
مبخشش شعر.. وبيحلق حلاقه
غير اللي اجى يشحد عا بابي
وغير اللي دخل من ألف طاقه

ما بقبل انهجى وإحمل اصابي
من انسان ما عندو الطلاقه
واذا عدنان بدو من الخوابي
يصوّب مدفع الكلمه عليي
بدي اطبشو وانهي العلاقه


انا معروف ما بنصب شراكي
وما بقبل بالمجد اعمل شراكي
انا أول قصيده بزغر سنّي
طلعت للصبا سفرة فواكي

انتبهي يا سما الألهام مني
بقصيدة ضو بوصل عا علاكي
وبطفي نجوم مجدك مين هنّي
كواكب ناطره بركة رضاكي

انا يا ها الخوابي نبيد دنّي
مخمّر بالشعر مش من وراكي
تركيني ولا بقا بإذني تزنّي
عفت الولدني وعايف سماكي

وحتى تحرجيني لا تظنّي
فييكي تخنقي ثورة حراكي
بكتوب وقت ما بدي وبفني
مش تا انطر جميلة وفاكي

اذا سمعتي شي كذبة حقد عني
وميّة مفتن على البحر حاكي
ما بيعلقّوا ورح ضل غنّي
نكايي بكل حسّادي لأنو
بحر قصايدي بيعرف دواكي