روحانيات ورثاء ووفاة ام ميلاد

يا رب..ساعدني تا اقدر صوم
بعرف انا ما في حدا معصوم
قطّعت قلبي بمسبحىة أمي
وكفيّت درب الجلجله ومظلوم

رح ضل صلي تا القيامه تقوم


يا رب..كلما بركع ..وصلّي
بتصير عيّنيي لهيب شموع
بطفّي عذابي بنقطيّن دموع
وبطلب تا أمي عايشه تخلّي

سافر حنيني وبعدني محلي


ساعة ..كفر

يا ريت ما عندي بقا احلام
وما كنت عا الأخلاق متربّي
تا كنت اسرق دمعة الأيتام
وشقّف سمايي وخانقو ل ربّي
واصرخ وفضّي الهم من عبّي

لمّي معي ..وكبّي ياها الإيام
ما عاد بدّي جمّع وخبي


ارتباك بحري

حاسس بنار..وشوق مش معقول
وجرح جوّاني بوجع مجهول
أوقات ببكي عا زمن غدار
أوقات بيفز الوجع بيقول

انتي عن غيابك صرت مسؤول



طافوحه

ما ضل عندي قلام ابريها
ولا ضل عندي خدود اسقيها
الغربه ما صدّق كنت طافوحه
وعم قولها من نفس مجروحه

وصلت لدقني..وعلقت فيها


صلا من القلب

مش قد قلبي بفرح ب دمّي
لمّا بوجّي بتفتح ..بتنهيد
بتزكّرك شو بتعتلي همي
وبتزكّريني كل طلة عيد
صلّي قبل ما تنام ..يا أمي
وحدو الصلا بيفيد بالتحديد

صليّت من قلبي على همي
انشالله يا امي ها الصلا بتفيد



ساعة صلا

من وين بدي بغربتي ارتاح
وتارك حنان وشوق ببلادي
وعم صارع المجهول والأرياح
وموج العتب بيباطح عنادي
غير الصلا ما ضل عندي سلاح
من القلب الله عا السما بنادي
تراتيل روحي عاملي زياح
وجران عيني مدبح عماده

من هون عم صلي مع ولادي




ليش السما.. عم شوفها رمادي
والغيم من عب الفضا هربان
مهوشل من البارود والدخان.
معقول هيده غيمة بلادي

فيقت مرتي تفيق ولادي
تاقلهن شوفو وجع لبنان


غير الصلا مش طالع بإيدي

مين قال انّك يا سما بعيده
اقرب من دموعي عا تنهيدي
وبالرغم ما بوصّلك بتكّات
وبرقّصك عا طاولة إيدي
بيني وبينك عمر ومسافات
وبعدك عا قلبي هم بتزيدي
أمّي بغرفه حاملي آهات
جمعة ألم عا فرد تنهيده
ايّا صلا مطلوب مني هات؟
قلّي يا الله وخود بإيدي
مش هيك لازم تترك الأمات
تغفا وجع وتفيق تنهيده

غير الصلا مش طالع بإيدي


صلا متواصله

نمت المسا من بعد ما تشكيّت
لألله ..عا ربّي واشرحت همّي
ومن كتر قهري غفيت ما صليّت
ولما وعيت الصبح ما لاقيت
إلا بإيدي مسبحة إمي


انت القيامه

يا حامل الآلم يا يسوع
ما ضل عندي غيرك اسمعني
قادر تخفف عن عبد موجوع
وتخلّصو ..وتعيشّو يعني!

ما ضل عندي يا مسيح دموع



مبارح فتت عا غرفتك ..وبكيت
لقيت فيها تاركي شبيّه
ما نسيت كيف بتركعي ما نسيت
تا تطلبي الغفران يوميّه
ما بخاف منّي تزعلي ما جيت
.....
بعرف... يا إمي راضيه عليي



لا تفزعي ما في أمل ..مقطوع
ضويّت ندري بمدبح شموعي
وقويّت قلبي طلبت من يسوع
يحط إيدو بس تا توعي

ومتل الشتي عم تنزل دموعي


بالكاد فيي اكتوب الأحساس
عا دفاتر الأيام يا إمي
معقول خايف من عيون الناس
واحلام عمري تشتفي بهمّي



ببعت على جناح الألم مرسال
يوعّي الأمل..عا نهنهة روحي
وطول المسافه من حبال البال
قصّر حنيني ووقفّ طموحي
ما ضل في عندي صلا بتنقال
فضيّت قلبي تا انتلت روحي


قديّش دولاب الحلم كذّاب
بيبرم على الفاضي بزمن فاضي
والعمر عم يبرم متل دولاب
الأنسان مهما يصير مش راضي

ومستقبلو صوره عن الماضي


دفتر جروحي سكّرو النسيان
وبالشمع خاتم مدخل جروحي
وتا عيش بالغربه حلم هربان
عم تتطلع النهدات من روحي
حاسس بهمسة آخ من لبنان


عمرو البكي ..ما جاب غير الهم
ووحدو الصلا بيخفف العنّه
بلّشت صلّي من القلب للتم
تا عيونها ما يبعدو عنّي

الأم دنيا...والدني... مش إم..!


الغصه بقلبي منشفّه ريقي
ومكمّشه فيي..!بخوانيقي
..............



ما ضل فيي حد تفكيري
من بعد ما كترت مصايبنا
عم حس صارت ها الدني زغيره
كلما بفكر ب حبايبنا



يا عمر لو ما العيب كنت بقول
الستين عمرك ما تشاطرنا
انتي بتعرف ناطرك ايلول
ونحنا بقينا بغربة المجهول

وما بنعرف ...مين ناطرنا

بعد وفات امي


عشتي معي تا ريشو ولادي
وغلة سنينك كلها عباده
ومنها خطيه بغربتي لو حكيت
كنتي ل نجاحي دعم وزياده
ولما تاكدتي في عندي صيت
ابيض حنينك بلش ينادي
بعتني يا امي مطرح الربيت
ما بحب الا موت ببلادي


سلميلي فوق عا بيي
ما عاد عم تنفع قداديسي
وقولي الو حملتن عا ايديي
احفادك ..وخلصت كوابيسي
ومش بس وحدي الكل بيقلك
كنتي يا ام ميلاد قديسه

قلبك كنيسه وبيتك كنيسه


يا حاملي بقلبك شكر الله
لا تفزعي قلبو ل الله كبير
عادل وعمرو الرب ما تخلى
عن عبد كان يخاف منو كتير

وخوفك يا امي تزعلي الله


روحي يا امي كتير مجروحه
.وجروحها مواويل مبحوحه
سالت الزمن شو بينطر الانسان
تا ينتقل بخور مش دخان
واسالت عن امي انا منشان
ريح ضميري وبعد نحنوحه
قلي بلا كفر سماع يا سليمان
بواب السما للام مفتوحه



صليّت كل مسابح الرهبّان
وما ضل عندي غير مسبحتي
عرفتك قطعتي مراحل الإيمان
واليوم بالفردوس اصبحتي
وشو صار فيي بغربة الأزمان
تا خبرك من بعد ما رحتي
تفضّى حنيني وانتلى الوجدان
ومش بس قلبي بينفجر بركان
عا غيابك ..وعم حس يا إمي
عم تشعل براكين من تحتي


متل الشتي دمعات عينيي
بتنزل عا قلبي جمر مش ميي
...


يا ريت فيي فرفط الأيام
وهر الوقت من زاكرة بالي
تا كنت ابعتلك ورد أحلام
يزيّن سماكي من عمر غالي


غاب اللي كان بها العمر صالح
ومشلح حياتو عا الدني شالح
من بعد حرقة غيبتو عم حس
طعم الوجع عا شفايفي مالح



مبارح فتت عا غرفتك ..وبكيت
لقيت فيها تاركي شبيّه
ما نسيت كيف بتركعي ما نسيت
تا تطلبي الغفران يوميّه
ما بخاف منّي تزعلي ما جيت
.....
بعرف... يا إمي راضيه عليي


الى احبابي و اصدقائي وكل محب خفف بكلمه بحرف شكري الخاص وانشالله نكفيه بالفرح يا رب

لا الآخ رح بتفيد لا الآها
وحدو الرجا مكفّل بملقاها
ومن كل قلبي بقول الله يعين
ولاد الحياة اللي بتتباهى

ها العمر كمشة مفرفطه وتخمين
ها الروح الله جروح خلّاها
تا يزكر الأنسان انو طين
وما في جسد بيعيش لولاها

بس اكتشفت اليوم بعد سنين
أنو الوفايا كتار محلاها
بالرغم حزني اليوم يا محبين
عا أم كسرت خاطري رح قول

البيكون عندو متلكن احباب
بينسا عذابو.. وما بينساها



راحت البركه

كل يوم عم بتروح منّا روح
واحزانا اوقات مشتركه
والقلب حجّر والجرح مفتوح
بعب السما غيماتنا حركه
بتغزي بحر احساسنا وبتروح

تشتّي علينا ...والشتي بركه



دين برقبتنا

أمّاتنا عاشوا العمر بالجوع
تا أمّنوا اللقمه ..وبذّمتّنا
بيضل عنّا دين مش مدفوع
ما بندفعوا بها العمر لو متنا



بيدر العمر

شرع الدني ما بيحترم دستور
ليش راحوا .؟ ..وبعد مــا رحنا
أوجاعنا صاروا عا شكل طيور
بينقودوا بيدر جوارحنا


دمعه علقانه

خلص البكي وما ضل عندي دموع
صرت البكي اشحد من جنوني
ومن كتر من شفت القلب موجوع
حسيّت دمعه فيه مسجوني

معقول دمعه طالعه من الروح؟
لا قادره تكفّي بكي وتروح
ولا قادره ترجع على عيوني


افرحوا مع الفرحين واحزنوا مع الحزينين

من كل قلبي بشكر رفاقي
الكنت على كتفن حملتي لاقي
هودي رفاقي الكلهن اعلام
المتلن انا بالكون ما بلاقي
تحمّلوني ..بس ما بنلام
فيي الجرح علّم بأعماقي
واليوم كفيّت الخمس تيّام
وجايي تا قول وربّنا شاهد
فل الحزن بس الوجع باقي

من بعد إمي..وواجبي الديني
مفروض ارجع ل محبيّني
واشكر جميع الناس.. كــل الناس
وكل الما صرلو ظرف يحكيني
لا تواخذوني الجرح بالإحساس
ووحدو الشعر وحدو البيداوييني
انتو الفرضتوا بالوفا مقياس
أصلي.. ومش تيواند أو صيني
رح ضل حاطت فضلكن عا الراس
انشالله بتجي الإيام يا اخوان
كافيكن بأفراح .مش احزان
ان راد الله يحفظ سنيني


الشاعر عدنان سعيد يسجل عتبو


عدنان سعيد
يا بحر : من بعد البكي و الـغَـمّْ
و خسارة الإمّْ ، و حنين الدّمّ
ناطر تْـفِـك حدادك و إحكيك
حتى ما زيد عْلا همومك هَـمّْ

بدمعه و قصيدي جيت تا عزّيك
و قلّك على نادي اليتامى انضـمّ
و كلمة عتب يمكن تأثِّـر فيك
لا تعدّها يا بحر إبرة سّـمّْ

كيف قدرت تبقى انت هونيك
بغربة ما فيها خال يمّا عَـمّ ؟؟
و إمّك بمستشفى و أمر باريك
رح تعرفو من بعد لحظة تَّمّ

هيدي اللي ضحّت عمر تا تربّيك
و ما تدوق طعم النوم لو تنحَـمّ
و عالخير عاشت عمرها تهديك
حتى ما يحكو بحقّك و تنذَمّ

حتى ما تنقص ثروتك متليك
ما ركبت طيّارة يا صخر الصـمّ
تا تبل قلب الإم و تلاقيك
بأحضانها وردة إجت للشم
و متل الطفل عا صدرها تخلّيك
و عا "بخاطرك يبني" ما تشبع ضّـمّ

شو طلعت قاسي بالوفا يا شريك
و شو صادق اللي قال عن إمّي
مع قلبها كل الوفا بينطَـمّْ

بحر الزجل
لو كان..بتساع الوراق هموم
تا كنت خبّر قصتي وهمّي
مش بس بنطر تا القيامه تقوم
بدّلي على الأسباب وبسمّي

بعرف خطيّه غربتي ومعلوم
قصّرت ..ما حسيّت عا دمّي
ما كنت قادر ارجع وملزوم
مش فقر ..!حتى ينعمل لمّه

ومش بس وحدي بغربتي مظلوم
في كتار متلي ...كتار يا عمي
ومش عذر عم اعطيك تاما تلوم.!!
شاعربشعرو العاطفه مهمي
اتعاب امي من الصعب أوفي
ولو دمعتي بتحمم حروفي
عاشت معي وبتعرف ظروفي
وبعرف لهلق قلبها عليي
بتحكي معي بالجرح يوميه
بتبعت الي بوسات من بيي
وكل البيعزيّني ..بغياب الإم
كانت عليي راضيه إمّي

أخ أخ

ببلاد ما فيها بقا دستور
ما كنت قادر اترك ولادي
وعارف اذا دشّرتهن تا زور
إمّي.. زعلها بيكبر زياده
حكيت معي وقالت بهمس النور
لا تخاف اخواتك بقوا زادي
بعرف يا إمي ..ظروفك ومعذور
بقشع ولادي بوج احفادي
عم ضل احرق دمعتي بخور
وعارف عذاب الروح جلّادي
الله شلحني خلف سبع بحور
ومنشان عيش بغربتي مقهور
بلاد الله عملتها بلادي

بعد جمعتين


عيد ناقص

من وين بيطل الفرح من وين
وها العيد جايي بأولو سلبي
استفقدت إلها كتير ها اليومين
لهلق مش مصدّق ...بعد ...؟ تا العين
شتّت على خدودي دمع قلبي

عيد الميلاد


هي أول المرّات ..يا يسوع
بتولد ..وما في بجيبتي شبيّه
الكانت تصلّي بغربتي عليي
صارت بعيدك عاطفه ودموع

وألله أخدها عا السما هديّه


ضليّت تخلق ..بعد ما صلبوك
بالأربعه وعشرين بالتحديد
قولك اذا بلبنان عملوا عيد
كل اللي غلطو بحقك ونكروك
بيتجمّعوا حواليك تا يهدوك.؟

والكل بيفتّح قناني نبيد.؟



لا تظلموا الحكّام للتوضيح
الحاكم بري ..والحق عا زلمو
هيرودس السفّاح كان منيح
دبّح طفالى ..خاف ينظلموا!!



ضليّت تخلق ..بعد ما صلبوك
بالأربعه وعشرين بالتحديد
قولك اذا بلبنان عملوا عيد
كل اللي غلطو بحقك ونكروك
بيتجمّعوا حواليك تا يهدوك ؟

والكل بيفتّح قناني نبيد؟



الما بينتبه بالغرب ل حالو
بيموت هوّي.. جوع وعيالو
ومن بعد خبره بغربتي مجبور
قول الدني دولاب عم بيدور
بيمرق على المرتاح والمقهور
والعمر عم بيدور كرمالو



ليش السما عواميدها دخّان
وطوفانها بنص الفضا فلتان
وحيطانها عا الغيم مشلوقه
متل الكأنو قلبها مليان