شردات

لما الادب ما يضل عندو حدود
وينباع بيت القدس والأقصى
بيهدو الامل تا تفرح اليهود
أقصى ما فيهن يعملو اقصى

يا ريت فيي دق بالمريخ
وفش خلقي بكوكب الزهرا
وجرح الشمس تا ينز شكو بسيخ
و اسرج الغيمه الداكني مهره

لما القرار يكون مش بالايد
وبيوقع الإنسان بالمحنه
كيف القرار بياخدو تا يفيد
منكن حدا..؟ بيقدر بينصحني

يا ريت فيي بتلتهي يا موت
وما تجيب عني بعدها سيره
بركي إذا عليت نتفي الصوت
بشوف الدني عا همنا زغيري

ما عاد فيي كل ليله نام
ومخدتي عم تحشد ل همي
ومن كتر ما منضاق هالايام
محتاج ليكي كتير يا امي


العيله والضنا
مش بس مش مرتاح مش مبسوط
ومهموم قلبي وهيك كل ليله
عا الشغل رايح والقلب ممعوط
عا الدولة اللي صارت دويلي
بحري عذابي والمواج شطوط
عم صارع الأيام يا ويلي
وبعيلتي متعلّق وملقوط
ما اصعب بها الوقت عيله تعيش
وما اتعس العايش بلا عيله


الصداقه

بعمرو الوقت ما بيزعل من العمر
مهما عليهم يا دني تفيقي
بحيث الرمّاد الضل فوق الجمر
بيحمي الجمر والبحث تتطبيقي
ومهما الفضا يأمر الصفوه أمر
ويقلّها رح شغّل بريقي
ومن الهوا ان صارت عيونو حمر
ما بيترك الجمره ..ولا بيخون
ومتلو انا ما بترك رفيقي


عا قد شوقي ليك شوقي مات
وتخرسنو الضحكات عا شفافي
وعا قد ما في بالوطن همّات
رغم الأمل محروق سلّافي


حياة مرتي بخاف وحماتي
من سر عايش عمر جوّاتي
وفزعان قلبي يفضحو ويقول
شفاتيرك بتشهد عا بوساتي

بقيتي مرا بولاد يا ريتك
ولا تظهري ضعيفي
وتا تعرفي قدّيش حبيتك
فوتي عا أرشيفي

ي اسمعو كلمه ياها الثّوار
وتزكّّرو النوّاب
كل اللي حكمو بلادنا تجّار
إلا حســــــــــــــــآن دياب


فاتح بواب الشر للأشرار
ومسكّره بوجّي
وكلما الوضع ببلادنا ينهار
بيصير في حجّه


ضليّت توبي رقّعو بهمي
تا صار عندي من التواضع توب
ومن بعد بيّي وعاطفة إمي
ما عدت آمن بالحياة بنوب

ليش جيت على دني بعيده
تا صرت مرمى لطابة الإيام
تهددّت وتحمّلت تهديدي
وهمّي بيهددّني .وما بقدر نام


كل الوطن مقهور أو موجوع
عليك يا جبران تا يشوفك
بيسافرو وبيرجعو وممنوع
بسأل حدا من وين مصروفك

لا تآمني بالشعوذي والسحر
عا المجد تا تفوتي
مهما بمجد عشتي المجد.!بالبحر
رح ترجعي تموتي

فيقي بقا من فرشة الأوهام
جهلك بيأذيكي
ما الكل عم يسأل بها الأيام
وين المرا الفيكي

فكّرت محّي قصايدي وما قدرت
كنت فيكي مغرم وغاشي
ومن كتر دينيّي الك ما درت
صار الندم عم ياكل فراشي

صوت البحر سرّو من سكوتو
والبحرشاء المعرفه ومن شاء
كل البيعيشو الحقد بيموتو
وكل البيموتو بالعشق احياء


كوني طبيعه كل زهره بلون
تا كلنا نزورك
وتا ترجعي اجمل مرا بها الكون
فلّي من غرورك

لما المرا بتصير تحكي عن
اعمالها والعالم تفرجي
أول ما تطلع عا دراج الفن
بتفك رقبتها عن الدرجه

ما عدت شوفك ست صرت بشوف
حقد المرا الموجود بالنسوان
وجنس عاطل .مش شبه إنسان
ولوين رايح. بعد مش معروف

مبارح قبل ما نام .صدفه بدير
عا صفحتك.. نظرات عينيي
شفتك بمشهد ما بحبو كتير
تفاجأت ..ِ!شو ..متغيّره عليي؟

بعرف جنون الحب لا تخافي
وبغير حقّي .بس .مش طمعان
وعا قد ما تتفجع شفافي
بيضل تمّك للبحر فجعان

بنحس انو العمر بدو يفل
لما المرا بتقطّع الخمسين
وبتقول إنّو الكل يعني الكل
ختيار حتى الأرز عا صنين

شاهد عليي يا هوا تشرين
ما ضل في ورقه على غصوني
وما ضل عندي وقت للحلوين
مهموم..بدي ادفع ديوني

عم كابر وما بحب افشي سر
وسرّي بقلبي مختبي ومفضوح
وان متت قبلك.. قول ..من غير شر
عا المقبره.. وحدي ما بدي روح


سرير الفجع مغروم بشفافك
مطرح ما كنّا تنينا عشّاق
شفتك ب بوست..وعاش مين شافك
صدري فتحتو . ل السهّام رشاق.!


أمتين بدّي دّوقك تفّاح
وعا غيبتك عم يحترق قلبي
اكمشني بقوّه وشدّني بترتاح
وفضّي نهر شيطانك بقلبي


ما عاد بدي بعد تشكيلي
من بعد ما قدّمت تشكيلي
وطعّمتها بنسوان تيكنو قراط
تا الشعب يرضى...

لا تلعبي بالنار وتثوري
الحل، بدو يضل دستوري
ان ما بتقنعي مني ياها السوره
شوفي الليبي اليوم والسوري

بعدن بيقولو..! منين ها الزمره
والكل عارف نصهن اذناب
ما زال حرقو شارع الحمرا
ما بيوصلو ا عا مجلس النواب

طالع عا بالي خربط الفوقي
ورتب سما لبنان عا ذوقي
وفيلت طيور الحب بالنهدات
وطفي بنار عواطفي شوقي

انهار عمري باقيه انهار
لما الجسم من لوعتو انهار
وجودك نهار بعينا اه نهار
.....،اقفلوها

الفرحه سهل حتى ما ساعتنا
وعارف دراج الريح بدها تزيح
هب الهوا...عا جرود ضيعتنا
والوقت شوفار وبيسوق منيح


يسعد مساكي يا حكومتنا
يا مجد عزتنا وكرامتنا
كتار اللي منّا بينطروا التأليف
والخوف تتغيّب زعامتنا.

ليش الزجل ما كان عا الاعلام
حتى طليع على الفنون يكون
وللحق اول صار ها الايام
بهمة نوابغ بيت بو ا .ن.ط.و. ن

لو يحجروكي بسجن من صوان
وبعيد عن بالي وعن ميولي
ما تفزعي بيضل عندي لسان
يقدح بواب ويخلع قفولي.

تمشي ع راسك استحي ما فيك
ما تفزع من الداء عا حالك
فكر بغيرك وانقبر خليك
بالبيت..حتى تنقذ عيالك