عدنان سعيد وبحر الزجل موضوع التخت والوقايه

الزجل ما بيحلا إللللللا معكن جون عقل طرح الموضوع وكان عفويا

سليمان
عدنان يا حنا بيزني..وحاصلو
ودم الوفا عن دم عطفي فاصلو
يلي معي عم تسهر بتخت العيون
غير العا تختو مكسرتلو مفاصلو

عدنان
يا بحر لما عالمجرّه بترتقي
لحّق حِكَم من شيخ متصوِّف تقي
و لا تخاف كلما مفاصل الشعر النقي
بيتحلحلو بيحلا الكلام المنطقي
و إسـأل الورد اللي بيعشق زنبقي
تا يخبّرك عن شيطنة شعري الشقي
بلحّن الآآه و بنزف دموع الحياة
لما على التخت الموسيقي منلتقي
الزودة
يا وردتي الحمرا على حواضي امرقي
و غيبي معي تا اعرق و تا تعرقي
و دخلك و انتي للعطر عم تسرقي
لا تغمّضي عيونك ... اذا رح تشهقي

سليمان
تخت الموسيقي غير تخت البالحياة
هيدا تخت احلام مره وامنيات
تخوت الدني شياطين عم تغري البنات
وعدنان عارف ها الحكي لهيك استمات
فيق يا عدنان من بعد الثبات
وارجع لعقلك اسهر على انترنات
هيك بتوفر مصاري وبنصحك
الازمه طويله وفي حظر عا السوحوبات

عدنان
عالنت للحلوة لا تطرق بابها
بكرا ايديك بيتعبو أعصابها
تخوت اللي فيها الناس شلحو ثيابها
ما بتشبه تخوت اللي نحنا صحابها
تخوتي انا عمري انصرف عا حسابها
و هلق بقلّك شو انكتب بكتابها
هوني الحياة كمشتها و هوني كمان
مجبور سلّمها لَ يللي جابها
الزودة
روحي اللي شبعت مرمغه بترابها
ابكو عليها شعر يوم غيابها
و قولو : انا اللي حملتها بمصابها
و لليوم مش عارف بعد شو صابها

سليمان
تخوت النسا اسرار من ماضي بعيد
ياما عليها تبهدل ملوك وعبيد
رمز الخيانه وللعهر بيت القصيد
ان قلت الحقيقه ما بتزعل عا الاكيد
تختك عذاب واخ وشوية نهيد
وبعد المرض بيصير ملجاك الوحيد
يعني بيضلو مرافقك حتى الممات
وغير هيك قلي من التخت شو بتستفيد

عدنان
متل الصدا بترد و بترسم صور
كفّي الرسمها و انت ما عندك خبر ؟؟
تخت الورود حواض بتحلّلي النظر
و تخت النظر عينين بتحب السهر
و تخت الطفالى مهد عينو عالكبر
و تخت الكبر عاللحد بيحب السفر
و تخت المصاري جياب و جيابي انا
فيها التقو احلام عمري و الطفر
الزودة
باقي تخوت كتير ... ما بكذّب خبر
تخت الشفاف شفاف بليالي السمر
حتى القمر بدّو سما بالمختصر
تقلّو عا قلبي فوت دخلك يا قمر
و لما القيامي تقوم و يجن الهوى
هيدي السما رح شوفها تخت المطر

سليمان
يا عمر نجد فرشتي والحظ جيب
من تخوت شرشف غربتي ما لي نصيب
سافرت و تغربت بالظرف العصيب
ونمت على تخت عواطفي متل الغريب
و تا خبرك عن سر ها العمر الرهيب
من بعد خبره واسعه بعالم مهيب
تخوت العيون الشارده خبز الوحي
وتخت الدموع المالحه رغيف الحبيب

عدنان
بكّي العيون و عا بيوت الكل فوت
إفتح سكايب و شوف ستّات البيوت
و لاحظ حواسك كيف بتبلّش تموت
لما على الشاشه بتقشع عشتروت
لا شم رح بتشم ... لا بتدوق توت
لا لمس رح تلمس ولا بتقطف فروت
يعني البيشوف الورد من خلف القزاز
غير اللي شمّو و فتفتو فوق التخوت

سليمان
مين قال عندي سكيب لا تبيع الضمير
بالكاد ماشي واتسابي بالكتير
فتفت ورودك تا العطر منها يطير
وخشن تخوت وبس احزر يا فقير
واسمع نصيحة خييك البحر الكبير
ولا تجن في موضوع عم يحصل خطير
من بعد ما انتشرت كورونا بالدني
بحكم الوقايه لازم ترش السرير
الزودة
يا شعر بارك للنسا جاب المدير
فرشه و سرير تفضلو ودقو النفير

عدنان
بلّشت تكتب شعر يا بحر الوديع
تخمين صرت تغار من عمّك طليع ؟؟
لما العطر بيفوح بالتخت البديع
جيش الكورونا بيوقع بأرضو صريع
و حتى الحرارة بتقتلو قال المذيع
يعني عا تختي ان فات بيشوفو الجميع
يا بيحترق تا بينتهي ... يا بيشتهي
يفرش لحالو تخت عالخصر الرفيع

سليمان
يا بو بهاء الداء مش دقة قلوب
ولا تخت مجوز ناطر المؤمن يتوب
عم بنصحك مش بس ما تكتر حبوب
حافظ على عيالك من رياح الهبوب
جن بوطنا شعبنا وخبى العيوب
ومن الوقايه بيفزع وهيدا هروب
بيحط كل الحق عا الدوله غلط
بيستهتر بامراض بتبيد الشعوب

عدنان
بتحكي بدوله الحكم فيها سمسري
و عهر السياسي بأرزها الأخضر سري
سرقو الخزيني و نظّفولي دفتري
و رهنو الكرامه للحقود الخيبري
و تا يسرقو ارواحنا يا همشري
جابو الكورونا تغل فينا و تفتري
هيدا النظام الطائفي و العنصري
الرخّص العرض و جوّع الشعب البري
لولا الشرف للبيع صفّا عالطريق
ما في حدا قادر بِ ليرة يشتري
الزودة
كسّر التخت و خزّق لحافي الطري
و هاتلك شي كم خشبه تا لزّقها بغري
بلكي قبل ما يصير جسمي مهتري
بسلّم جمال الجوهره للجوهري

سليمان
عن دولتي مين قال جايي للدفاع
جايي تا احكي الحق انو الشعب جاع
لما الوقايه بتنرفض والانصياع
لادنى حزر معناتها صرنا بضياع
لما الوباء بينتشر مني سماع
لا بالمدينه بنسلم ولا بالضياع
مفروض فينا نطهر تخوت الغبا
ونمنع على فرشاتنا يحصل جماع
الزودة
يا جون بدنا اليوم يحصل اجتماع
ويحكي علي جعفر بخطه للدفاع
ونحط للصحة وزير وللدفاع
ونحجر على عدنان قدر المستطاع

عدنان
تخت الفقر يا بحر خلّلا سكوتنا
يحكي و يدوي بالقبر تابوتنا
حاجي بقا تتفلسف على بيوتنا
بشموخنا حمينا اللي زارو بيوتنا
و انتو يا حكّام السرقتو قوتنا
تا تهزمونا و تكسرو جبروتنا
ناقص بعد هالدولة الكلها لصوص
تركّبلنا عدّاد فوق تخوتنا
الزودة
يا بحر صعبي فيك يسبح حوتنا
ولا عقلك بيقدر يعقّل خوتنا
عا تخوتنا جوع الشغف عا توتنا
بيعمل غرفنا جزء من ملكوتنا

سليمان
يا الف اهلا ومية كلمة مرحبا
لو يوضعو العداد عا تخوت الغبا
ويا ريت شافو قبل معمل مركبا
ما كان دير عمار بالفتنه اختبى
مطرح ما عنا كهربا ودين انجبى
العداد ما بيظبط تكليفو هبا
وما بينوضع عداد عا تخت الغرام
لا تخاف تخت الحب كلو كهربا
الزودة
لو شعبنا من زمان جن واضربا
ما عاش شعب بلادنا عا شوربا

عدنان
نشوة غرام التخت حب و انسجام
و تدويب متل الشمع مش اشخر و نام
و هلق فهمنا ليش يا ولاد الحرام
للكهربا عم تقطعوها بشكل عام
هيدي السياسي للقهر للإنتقام
و بدّي شعب لبنان يفهمها قوام
نقص الرجولي أجبرت حكّامنا
تفرضلنا التقنين عا تخوت الغرام
الزودة
يا هالمرا عالتخت ما تخلّلي حرام
و ما ترحمي الختيار و تقولي حرام
بسُفرة حلاكي عند ما يغط الحمام
لا تجبري المفجوع فيكي عالصيام

سليمان
كان المنجد ينفض الفرشه بقضيب
حتى الحبيبه تكيف بملقى الحبيب
واليوم يا عدنان صرنا عم نسيب
فرشاتنا وتخوتنا لشعب الغريب
مره بحجة لاجيء ومره قريب
تا صار وضع بلادنا مزري وكئيب
من هيك لازم تاخد الدوله قرار
البيخون شعبو بينضرب مية قضيب

عدنان
ارحم جْناب الشعب من قضبانها
و خلّي الشبيبي تحن عا جيرانها
تخت الشعب دوله الصدق سلطانها
و حْرامها الجيش الحمي أركانها
و حضرة جنابي شب من عرسانها
ما بخونها لولا الحكمها خانها
و كرمال خبّيها من عيون الغريب
برموش عينيي غزلت فستانها
الزودة
لو ناقصة ما منفرح بنقصانها
و بالدمع منطرزلها قمصانها
بلادي اللي ظالمها غضب سكانها
بالولدني عم يكترو صبيانها

سليمان قصيد
يا عدنان الكورونا داء داري
حياتك من مرض ضارب وضاري
ما رح يسلم حدا ان ما الكل ادرك
انو ها المرض فاتك وهاري.
انا ما جيت تا قلل بقدرك
ولا اعطيك تا تسكت مصاري.
بتعرف قيمتك عندي وبدرك
بفضايي مشعشع بجو التباري
لها الاسباب عارق مين قدرك
ونصحك طهر شفاف الحواري
لانو ها المرض معدي وصدرك
بدي توسعو بوسع الصحاري
لانو لو المرض صابك وغدرك
اوعى تظن رح اخد بتاري.
بندر للشفا بشموع ندرك
لانو البينا ورغم المسافي
اخوه صادقه من قلب صافي
لا فيها حقد اعمى ولا تجافي
فيها عاطقه وشوق ومحبه
انشالله دارك ببسلم وداري

عدنان قصيد
يا تخت العشق يا كاتم سراري
يا دايب عا غيابي بإنتظاري
تا حتى زورك و شوفك عشيي
ما بعرف كيف عم يخلص نهاري

بساعة ما خلقت و بطيب نيي
انشلحت عليك تا يزقزق كناري
و قبل دفني برحله سرمديي
عليك بدوب و بفارق دياري

و يا بحر الشعر موجاتك قويي
سمعت قالت إلي : بآخر مساري
عا تخت شطوط دولتنا الشقيي
عا بالي يكون آخر انكساري

اسمعني و خود كلمه جوهريي
انا بالشعر مش خرج التباري
ولأنو جواهر بحورك غنيي
معك بكتب تا كشّف هالدراري

و اذا تخوت القوافي المنبريي
عليها وعيت تا دلدق جراري
و كنت ألها القصيدي العاطفيي
اللي فيها تسوسحو كل الحواري

ما بدّي بآخر سنيني الهنيي
إنهي رحلتي عا سرير جاري
لأنّو أرض جدّي و تخت بيي
هنّي التشتشوني و صعب إغفى
قبل ما تشتش عليهن صغاري