حون كرم وبحر الزجل عوده وهجر

سليمان
أووف أووف

يــا جـــون ...كورونا حلو توقيتـــها
تا إسألك عن ها البلاد الجيتــــها
نــدمـــان انو تركت ضيعتنا وجيت
يما متل فضلي بعد ما نسيتها

وكرمال جون عقل يلا هاي زوده
أووف
ها الردّة بقلب الخوابي بصيتها
عا قلب سدني بتبعت فتافيتها


جان

وقت الكورونا شرها علينا رسي
حٍلة التوبه الكون شفتو مكتسي
عا تركت الضيعة ما في عندي ندم
بندم اذا ترابتها فكري نسي

زوده
يا خوابي القلب عندي ما قسي
حب الشعر باعت الك عن مدرسي

سليمان
اووف اووف

شمس الحقيقه صعب تخفي نورها
وعارف الضيعه ما جرحت شعورها
قبلك رحت واستقبلوني طيورها
وشفت الوجع بترابها وبصخورها
بس الحقيقه مكركبين أمورها
وانت وأنا بغيابها وبحضورها
لما بنزكر اسمها بنبكي فرح
وبنصير نبكي دم لما نزورها

جان

اخ اخ اخ اخ
عن ضيعتك مافي لزوم معلقه
تكتب ولا تخلي لفكار معلقه
بجوها معروف كلما منلتقا
بقلب طيب عن محبه و عن ثقه
عندي يا إبن العم فكره موفقه
بربوعها روحك ما زال مشوقه
فتش عا شي رسام يرسمها إلك
قبالك بحيط البيت صوره معلقه

سليمان
تركني من الرسام ...لا تعمل زكي
وتفتح جروحي ..ما بقا يفيد الحكي
انت وانا ببلدان خير مباركه
وحتى مصايبنا بكورونا مشاركه
بتحن ليها..! بحن ليها..! مش حكي..؟
نفتح على محبة الضيعه معركه
الضيعه... ال ببالي ..حفرتها بدمع الفراق
برفض قبالي حطها وبلش بكي

هرب هرب

جان

ما زالك بدمع الفراق بتكتفي
و بتدوب عالصوره بحنين العاطفي
انت و أنا صرنا بغربه مشرفي
و كاسك صفي بها الملتقى و كاسي صفي
صلي لألله تا الكورونا تختفي
و نرجع على الضيعه على الحضن الوفي
و هونيك بترابتها و بربوعها
حابب شموع العمر فيها تنطفي

سليمان

مين قال ..؟عا الأطلال باني موقفي
وواقف قبال الرسم حامل منشفي..!
حبي وحنيني ل ضيعتي ...مش عاطفي!
حبّي لها ..بالزكريات.. بيكتفي
الرجعه جريمه موثّقه...بحق الوفي
وفزعان فيك يهب جمر العاطفه
وينفخ هوا الأيام عا رماد السنين
والشوق فيك يولع وما ينطفي

جان

ليش تا الأطلال عا بالك خطر
وتنقل عا نفس المشكله و ذات الخطر
وعايش بذكريات ما فيها وطر
متل أرض مشوقه لزخ المطر
و قلبي الوفي عن ضيعتي ما بينشطر
و عا وهج أشواقي إذا دمعي قطر
ما بخاف من هبات جمر العاطفه
بجدد شبابي و ريح القلب النطر

سليمان

قلبك قوي..! حابب تسجّل إنتصار
عا واقعك.. بس الحقيقه انتحار
تزكّر قبل ما تسافر بآخر نهار
كيف افترقنا..! وبكيت عليك الحجار
يمكن تقلّي بغيبتك زاد العمار
وعنا شهاده جامعيه بكل دار..!
ومش بس وحدك هيك بيقولو الكتار
بيكذّبو عا حالهن بالاختصار
الضيعه الجميله..ضاعت بلعب الزغار
وأجمل ما فيها من //الساحه// للمزار//
باعو اراضيها الجميله للغريب
ومن حرقتي..ما بحب ارجع عا الديار

جان

الضيعة الجميله بشوفها بجيل القديم
صحاب النوايا الطيبه و قلب السليم
رغم الصعوبه لكانت و ظرف الأليم
ما نباع شبر من الأرض انت العليم
تركتها و سافرت عا بلاد القويم
و ضل القلب موجود مع جدي الحميم
لما رجعت عا ربوعها متل النسيم
عشت بحماها و سر بقلبي كتيم
و كلما أرض أجدادنا باع الغشيم
نال البلى و بالآخرة نار الجحيم
و عا رجعتك ما بريد تعطيني حجج
تمثل بحكمة سليمان الحكيم

سليمان

وحياة الله عم بتحكي مجاكره
وتخفي وجووه بألف لون ...وماكره
نفسي حزيني رافضه ومش شاكره
أجيال ..!! اتعاب.. الوفايا ناكره
تحججلنا بمطالعه وب مزاكره
وهيي أسامي جدودها مش فاكره
تركني لوحدي بعد ما ماتو الكبار
عمّر عا ذوقي ضيعتي من الزاكره

جان

عطيتك وكاله قوم تا تبني بعجل
ضيعة انت بتريدها من دون وجل
حقد و بغض ما يكون فيها ولا دجل
و مع كل طلة فجر في دقة حجل
و بكره عندما يقترب يوم الأجل
و نوقف سوى قدام الله بلا خجل
قلو تا يكمل ضيعتي بنيانها
مفروض حتى نعمر صروح الزجل

سليمان

لما يا جون بنطلع من عيوبنا
بيزهر ورد أحلامنا عا دروبنا
نحنا ضحايا بسلمنا وبحروبنا
تركنا ضيعنا وما اخترنا هروبنا
وانت وأنا فن الزجل مطلوبنا
وتا تفوح ضيعتنا شعر بطيوبنا
مش هم انو نعمّر الضيعه حجار
المهم تبقا عامره بقلوبنا

جان

بختم معك بقلوبنا بتعمر اكيد
بحب و وفا عن يخفقوا بدم الوريد
كلما لمحبتنا القويه نقيم عيد
عنا العيوب بترحل المطرح بعيد
و مطرح ما جدي و جدك و جارن رشيد
بفية الميسه يلتقوا نهار السعيد
مشي تا نرجع فرد قلب و فرد ايد
و عهد المضى بالكيف و الفرحة نعيد
و عا الحرف حد الزنخلخطه نلتقي
وانت و أنا نغني المعنى و القصيد

سليمان

يا حجار بيت المنزلة لا تشهقي
كلما بعينيكي عيوني تلتقي
المرحوم بيّك كان حلمو منطقي
حتى يعمّر بيت.. ب عمرو شقي
وبالرغم منّك كنت مشكلجي و شقي
كنت الوفي عا الأرث ..بالقلب النقي
بعرف بعد ما رجعت بوسّت الحجار
وغير الحجر قلّي يا حنا شو بقي

جان

سليمان بيي عاش عمرو آدمي
الحب والإخلاص بقلبو نمي
بعقلي زكي و الطيش قلبي ما عمي
بارع متل بيي و جدي منسمي
بالمنزله والبيت روحي مغرمي
وبحبهن بعدا لهلق هايّمي
ولما بحضن الرب صفا مرتمي
و روحو لخالقها الأمور مسلمي
رجعت على الضيعه عا بيت العّمّرو
بَوِّس كفوفو العا لحجار معلمي

سليمان قصيد

يا /كرم برّا/ يا /نبع قطّين/
يا /منزله/ يا كروم يا حساسين
يا /طلعة بعفشا/يا /بيت الصار/
جايين يا اهل الجبل جايين
يا ضيعتي يا خزانة التزكار
كترة ما عم بتغيّري فساتين
مرات خضرا تيابك بأذار
ومرات صفرا من هوا تشرين
متل الكانو الريح موسيقار
سارح ما بين الارز والشربين
وبيدق مهباجك بطل مغوار
متل قصف الرعد بكوانين

يا ضيعتي ..ما ابعد المشوار
وما اصعب الغربه.على المسكين
بس الحقيقه بتغلب التزكار
وبتعيش فوضى بعالم قوانين
ويا جون لا تغلط..ولا تحتار
الغربه حياتك بعد هجر سنين
ومش بس نحنا قبل منا كتار
ماتو ..وكانو كتير مشتاقين
بالصيف.. رح قلك رحت يا جار
وشفت الآحبا كتير مختلفين
بيرنار ما بيحكي مع المختار
وشونتال ما بتحكي مع كلودين
والخي مع خييّو في عندو تار
وولادهن بالبيت مختلفين
ها الجيل..شو ها الجيل يا ستّار
ما بيشتغل ..إلا بالاسافين
قلة مروي وكتر استهتار
باع الاراضي وما عرفنا ل مين
واحد عم يصلي على الدولار
وبيدعي العفة بدنيا ودين
وما زال عنا الحكم للسمسار
مين البيطعمي ناس جوعانين
معقول ارجع ..؟والوضع منهار
وكل شي بلبنان ع التقنين
لا كان عنا يشبعو التجار
ولا بيرحمونا ها السياسيين
بدعي الألاه الواحد الجبار
موت بكرامي بغربتي ولا ضل
بضيعتي فتش ع كيلو طحين

جان قصيد

يا زعرورنا نجوم الليالي
عا صخرك من سماها عن تلالي
عليك الشمس عند الصبح مشرق
هالي عن بتنزل خلف هالي
خلقت للشتي و للصيف مفرق
و ملقى للحبايب و الغوالي
قبالك سيده بتوب أزرق
مَصيَّف بطريركي بعهد خالي
و كلما طير عا التله بيعرق
بيجي يرتاح بفيه الدوالي
كلما بالكرم عنقود زرق
بننطر للعصر تا يصير حالي
بجرن المعصره حبوبو بتغرق
لخمرة معتقه ول كاس حاله
الدني بكانون لم تلمع و تبرق
التلج بصير خمس متار عالي
وعناقيد الجليد المتل بيرق
صورة من الطبيعة بدون آلي
الضيعة بحر و الأجيال زورق
قديم العهد برأيي مثالي
جيل اليوم بعيونو مبزرق
من الإحساس و الإخلاص خالي
الأمانه باعها و المال حرق
عايش عا ضهر غيرو إتكالي
بيو عا فراش الموت بيسرق
كتر ما غشمني عندو و جهالي

و تا ارجع من سنه قلبي تحرق
تا شوف الأخت شي لحظة قبالي
الدهر غدار يا سليمان فرق
حرقه بقيت بقلبي و خيالي
بابك جيت يا سليمان إطرق
تفضل فكر و حلل سؤالي
إذا بتريد قللي مين أعرق
منا شعب في عندو بسالي
ربيعو متلنا مزهر مورق
و حياتو متمم بأوفا رسالي
و أنا و ياك سرنا بفرد ممرق
بطريق الحق و اصول العداله
تا يبقى صيتنا زهرو معرق
ما نعمل متل ها لبايع ضميرو
نحافظ عا الأمانه و عا الوكاله