سعيد بو الزور وبحر الزجل

مبارح صار هالموضوع الارتجالي بين الشاعرين سعيد ابو زور وسليمان طراد . غربلتو ونزلتو بلا تعليمات انشالله ينال اعجابكن .
سليمان
اووف اووف
الشعر بيعرف اربابو
البقيو حدو والغابو
لكن تحت مواج البحر
بيركع نصب على ركابو
يا بو الزور عليك الدور
شرف اعرض اسطولك
جايي البحر يقص الحور
و انتي مخلص من طولك
لا تدبحلي عجل وثور
ادبحني بشعرك وفضولك
ولا تجرحني ي بو الزور
البحر بيحفظ اصحابو
سعيد
ت شوفك بالشعر حليت
يا بحر الطيش البارد
معبي احلامي تلفيت
وع صوت الكلمة شارد
يا ملح المزغول نسيت
خْيالي عالمنبر مارد
لو هالمرة عليك قسيت
بزرُك موجك ب جيابو
سليمان
بجيابي زرّكت الريح
ونفضّت جياب الغيمات
وبلعت الشمس ..وتا يصيح
ديك المنبر والحفلات
وبو الزور بيعرفني منيح
مش قتله آكل قتلات
كلما عن خطو بيزيح
بدبّغ بالقتل جنابو
سعيد
نفّضلي جيابي يا زغير
وسرقني عالعتيمة
واستجدي مني مشاوير
ت عمّر فوقك خيمة
بو الزور ب عرس التفكير
ع سطوح المنبر غيمة
ما في شاعر اسمو كبير
الا وبلّلت تيابو
سليمان
يا بو طاسه ..ها الكذبات
لا تمرقها عا الجمهور .
وتعمل حالك غيمه هات
شو في عندك يا مغرور
بتدوخني بالردات
وبتبللني يا زغيور
لما ميات الغيمات
بتعرف من وين انجابو
سعيد
يا جورة عبّاها الوقت
مَيّ وملح من الحرمان
ميّاتك عتقوا وعتقت
لوما قلبي طيب كان
ت بنور الشمس تعلقت
وشلتك ع جفني المنصان
عمّدتك حتى زهّقت
... النطرة وجبتك بالعدّان
وما رديتك حتى رقت
وميّاتك حليوا وطابوا
سليمان
لما الشعب بيصير عايش عا القروض
كلاب السياسي بتنهشو بكتر العضوض
من بعد قتله وبعد ما صحو الرضوض
قررت ارجع اخر العركات خوض
ي بو الزور اليوم جايبلك عروض
بتخضع لعلم النفس مش علم العروض
بعطيك مجدي وشهرتي واسمي الكبير
عا شرط تكتب شعر واضح مش غموض
سعيد
مفقّي نجوم الليل عالمنبر حصوص
وشعري مذهّب بالمعاني والنصوص
يا لمبة الأفكار بيكفّي تنوص
جويزة خيالك ما بتربح عالأصوص
خليك ع بواب المناجم عم تحوص
من الصعب تفهم عا غموضي بهالخصوص
شعري درر غامض على جهلك اكيد
ما كل عمرو الدر يخفى عاللصوص
سليمان
مفقى نجوم الليل..؟ تاكلهن هري
كان ناقص تقلي طبخت المشتري
يا بو معاني مركبه لا تفتري
عا الشعر ..تا تبين بحجم البحتري .
العله الخفيه غموضها بيقتل بري
وما بتنفضح الا بفحص المخبري
وبو زور خبى عا الاطبا علتو
معقول سيدا...؟او عوارض سكري
سعيد
السيدا يا صايع بالغرب ومطارحو
مكشوف لافي مغزلك ع مشلَحو
وسري المخبى بالغموض بنجحّو
متل الزهر سر العطر بيسوسحو
تذكر الهك ت الحقيقة تربّحو
مرهون للسر المقدّس مذبحو
ومتلو اله القافية ع مسرحو
غموضو خفي مزبوط ..لازم تستحوا
سري قداسة اسم رب الموهبة
قدام كفار الزجل ما بفضحو
سليمان
يا شعر ضوّي حروف فلسفتك وزيد
فولتاج شعرك بالمعنى والقصيد
ويا ليل مهما عيوبك تخبي وحيد
بتضل .عايش بالعذاب وبالنهيد
سر الورد مفضوح عطرو من بعيد
وسر الخوابي بيظهر بطعم النبيد
وسر الممات بدين طائفة الدروز
ما بيفضحو الا التقمص من جديد
سعيد
شو هالزكا... يا فضيحتك ب ثيابها
جيبة غباوة فاضِحا سحّابها هههه
الدعوِة اللي نور العقل من أربابها
سرّ التقمص غامض من حسابها
معروف عنها من صميم كتابها
الايمان فيها سرّها وما عابها
لوما الغموض يكون مفتاح النجاح
ما تسكر عليك وع غيرك بابها
سليمان
سر النجاح بتجهلو والله العظيم
متل جهلك بالنسا و كيد الحريم
هههههه
الرجّال حتى يكون ناجح يا فهيم
في خلف منو إمرأه... تا يستقيم
من هيك جايبلك نصيجه من الصميم
لا تأمّن لحوّا بعمرك يا غشيم
ما في مرا بالكون سر بتحفظو
ولوما المرا من وين تا عرفنا العظيم
سعيد
سليمان داشر مش بعيدة دشرتو
مسرح دجاجة والمسافة حشرتو
مش قشر سطحي فوق جلدو ...بُشرتو
جروح الغميقة مدبّغة عَ بَشرتو
وما زال غشمنتو ب حوّا نشرتو
رح اسألو البطيخ كيفو ب عشرتو
بيستطعم ب لبّو اللي غامض عا عماه
يما بيعرف طعمتو من قشرتو
سليمان
البطيخ والشمام والملفوف شوف
شغلن شغل البقاع ..بيعيش الوف
يا بو قراب معود يخبي السيوف
اياك تتزاكا تا تعمل فيلسوف
قصدتك زياره وكان قصدي بها الظروف
اشرب انا وياك متي.. بس اووف..!!
لقيتك سعيد وملتهي بطيختك
اللي بتاكلو بالبيت...لا تطعمي الضيوف
سعيد
يا شعر قيمة منبرك بحياتها
لا تجيب جاهل عا مدا ساحاتها
الفكرة اذا ما تعمدوا كلماتها
بجرن اللغز.. بتفوش ع مراياتها
ضيفي انا ضيفو وروحي وذاتها
جوات بيتي بكرّمو ب شهقاتها
وبطيخة اللي سرّها جوّاتها
صعبة ع جاهل فهّمو معناتها
الضيف المرتب بطعمو من قلبها
وضيف الثقيل بضيّفو فضلاتها
سليمان
دخيلك يا رجى قلو ل سعيدو
يوضح شو مخربشلي بقصيدو
و زاروب الزهق والشاعريه
انكتبها هون بدي قص ايدو
هههه
شو رايك اعصر الغيمه بايديي
وزهر الوقت عتقلو نبيدو
وحول صحرة اللهفه مويي
والله ظرف ابعت عا بريدو
احسب لمسة الورقه خطيه
وحرف العطر لونلو جديدو
هيدا ي رجا مش عبقريه
هيدا شاعر مفلس رصيدو
انا بحب القصيده عا السجيه
وشاعر تسمع العنه بنهيدو
وبلا ها الفزلكات الهبلنيي
منها الناس شو رح يستفيدو
القصيده ام خلقت عاطفيه
وقلب شعلان بنحس بوقيدو
انا الجمهور تا يفهم عليي
بدي اكتب الشعر البيريدو
لانو اليوم بحكي بطيب نيي
صارو يدمرو بيت القصيده
بشعر ما بيفهمو الكتبو بايدو
سعيد
يا قيمة منبري لا تواخذيني
اذا تركتك على غيابي رهينة
انا ملح الحكي معروف اني
الوحي طوّل غيابو تا لقيني
الفكرة ب دينة القرّاء رنة
ودهب مرصود ع جهدي ويقيني
اذا مش قد وزني وقد فنّي
ما بقبل كلف عليها يميني
الغموض ثقيل من وقت السكنّي
قلبي اللي مخبا بالخزينة
وانت سطحيتك قشر التدني
اللي بينزت ع طراف المدينة
غموضي سر لولو ومش تجنّي
انت صَدفة تحت بحر الضغينة
وقت انشلت يا مغرور مني
رماك البحر عا موجة مهينة
انا نفسَك عميقة عالتمنّي
وانت ..يا ريت ..مكشوفة حزينة
انا دعوة الأم العم تحنّي
كفوف ولادها بعرس السكينة
وانت خليك بصّارة مسنِّة
عم تلت الحكي ب وهم العجينة
انا صبر النمل حمّصت بنّي
ع تكلة سرّ بحلفلك يميني
وانت سطحي مكيّف عم تغني
وناسي العاصفة صارت شبينة
يا بو قشور دخلك حلّ عني
انا بعلبك انا هيكل الجنّة
اذا عندك عقل حكّو بتفهم
لغز منقوش عا صخرة سنيني