اياد احوش وبحر للزجل 2022

د اياد احوش

سليمان:
مشتقلك
متل شوق السجر
للزقزقه بكير
مع صبح انفجر
شلفة حجر بين ضيعتي
وبين ضيعتك
بحياة الله
تشلف عليّي حجر..!؟

ألشاعر سليمان طراد
يا جار.. رغم محبتك.. ها الدهر جار
وكتر القسا بيناتنا عمر جدار
ما ضل عنا بشرقنا مقالع وفا
كترو الخطايا.. لها السبب قلو الحجار


Eiad Kahwash
قللو الحجار وبس
ماقللو الزنود
" وبالقرنة السودا" انزرك اسم الخلود
النهر الكبير
مورّده حدودو جمال
اقطفلك شي ورده و زتّها خلف الحدود .

ألشاعر سليمان طراد
ما في حدود مرسمي بدستورنا
كل الدول من هيك عم بتزورنا
ولما شلفنا وعدنا خلف الحدود
غير الورد ما انزت فوق قبورنا

Eiad Kahwash

سليمان
عبّر شعرك بإبرة جواب
شبّك الضو
وخزّق وراق الضباب
وشوف الزمن
حطّ الدني بصينيّتو
ونحنا ضْيافه
من التراب و للتراب.

الشاعر سليمان طراد
ما عاد شفنا ضو او بدر اقترب
قسم منا ضل والباقي هرب
وتا نكمل الفرحه بجنازه محتمي
ضيافات عم بنروح ع صواني العرب

اياد احوش
الحرب برّا
بس جوّا في سلام
وقلبي قصر للحب
عالي
من الرخام
بفتح عيوني
بشوف أسراب الميراج
بغمّض عيوني
بشوف أسراب الحمام .

ألشاعر سليمان طراد
نيال قلبك طفل وعيونك سرير
غمض عيونك تا السلام يزورنا
يا بو نبيل بغيبتك مات الضمير
واسراب سودا حايمه عا قبورنا
راح الحمام وما رجع الا الغراب
وانتي وانا بساتين دين الاغتراب
(ورجع الزمن حط الدني بصينيتو
وصرنا ضيافه من التراب وللتراب)
صدقت.... يا حكيم


Eiad Kahwash

ن لاقيت أرض بهالدني بعد المدى
مش تابعه لْدوله
ولا فيها حدا
بتروح .. ناخد عيلتي مع عيلتك
ونعيش لاحكّام عنا
ولا عدا ؟

ألشاعر سليمان طراد
اكبر مصيبه ي حكيم جزورنا
بها الارض بعدا مشلشي وزهورنا
خلقت حرس ع بواب احلام الحياة
وبتعيش حتى تموت فوق قبورنا




Eiad Kahwash
الأرض أم الكل
فيها بتنقرا
آيات شعر من الغياب مشفّره
أول تخت .. متلو متل آخر تخت
مافي فرق بن مقبره و بن مقبره .

ألشاعر سليمان طراد
عن سوريا ولبنان لو قلنابحماس
قلبين بشرايين فيها التباس
وما في فرق بين مقبره وبين مقبره
وحدة مسار جروحنا هيي الاساس

Eiad Kahwash
الدرب
مابدو بطاقه ع الحدود
بيروح حرّ
وحرّ بالرجعه بيعود
ياريتني
بن بيتنا وبن بيتكون
درب
ومشي
وع جوانبو معبّى ورود.

ألشاعر سليمان طراد
بيت التركتو صار للذكرا وعتيق
ماعاد يدعس عتبتو حتى الصديق
كلمن عا قبرو قرر يجد السفر
وما ضل غير الشوك سحاب الطريق
سامحني عا السحاب

Eiad Kahwash
عابيتنا في درب
صبيان و بنات
عملناه قجّه مطفّحه بالذكريات
وعاقد ما نقطع دروب
بهالدني
بيضل درب البيت شريان الحياة .


ألشاعر سليمان طراد
لما الوجع بيصير يضرب بالصميم
بيدق قلب العاطفه دقة حريم
بننسا المنا..!! كل ما جسر انقصف
بدرب التلاقي.. وشوق للرجعه عصف
...!
شريان بيت الروح سكر للاسف..
والذاكره روصور صارت يا حكيم




Eiad Kahwash
بكرا عند ما يوقّع الموت الكتاب
ويتعب جسد .. ويفوت عابحر الغياب
برجع ع أول درب مطرح مامشيت
لاكن محمّل فوق ع كتاف الشباب.

الشاعر سليمان طراد
بكرا بترجع ع الكتاف بزلغطه
وخيال مهر المعرفه العلم امتطى
والكل بدو يصيح اهلا بالحكيم
نورت ارض الشام يا ارض العطا

Eiad Kahwash
الدرب العتيقه ل عشت فيها و حدّها
و حجارها للي صرفت عمري عدّها
أكلت من جريي الدرب شقفة حنين
بيجوز لازم موت حتى ردّها

ألشاعر سليمان طراد
لا تموت صوت الحق لازم ما يموت
لو لبسوه الموت خياطين خوت
خزق كفن اموات عاشو بها الوطن
ومن دون ازن تمرد عليهن وفوت
عا ضياع.. فيها مشلقحه اجمل بيوت