ارتجاليات

كيفو عدنان
عدنان كيفك كيف احوالك
كيف الزجل..كيف صحة عيالك
بيخبروني صرت يا عدنان
عم تنتبه بالشعر عا حالك
بتخاف ..؟ لا تفزع من سليمان
سليمان عدّو بيّك وخالك
ياما كتبلك بالشعر قصدان
وياما قبل ما تنام يا عدنان
يا زغير حتى تنام غنّالك
بحر الزجل
عدنان
ممنونك ومشكور يا خيي
عم تسأل عليي بصفا نيي
وصاير اغاني الحب ترويها
ونسيت في اسرار مخفيي
ولما عقدت حواجبي فيها
غنّت الي فيروز غنيي
تا قبلت اني عود احكيها
وغنّج حلاها ودوب حنيي
وحتى ليالي الشعر تحييها
انت هيكي عملت يا بنيي
وغنّيت لعيوني ولياليها
ترنيمة الشحرور للميي
وفِرحِت اراضينا وسواقيها
ورِضيت عليك دموع عينيي
غنّي انبسط وعمول تنزيها
وتمرمغ شويي عا ايديي
ولما الصدارة تنفرد فيها
مفروض تشكرني وتجي وتقول
بعرف يا بيي فضلك عليي
سليمان
من فضل الله الشاعر الموهوب
بيرسم دني بقصايدو وبيدوب
كلما فتح شبّاك عا الزرقة
بيفزع تجي الحجران من محبوب
وبالأمس كان الشعر عا الورقة
ومرسال بين الأهل بالمكتوب
واليوم ضلّت بالقلب حرقة
ابعت الك مكتوب يا بيي
وعارف ما فيك تدوّر الحاسوب
عدنان
لما خلقت يابني ضعيف الحال
بالكاد شكلك رايق وصحّي
غذّيتك بدمع انسكب شلال
ولبّستك من جواهري ودحّي
هههههههههههه
وعلّمتك بكليّة الابطال
رغم فقري وحالتي و شحّي
وكبّرتك وشفتك معي رجّال
وشو بعد بدّك تكرم بضحّي
ولوما عطيتك من جيابي مال
ما جبت حاسوبك من الدكان
وبقيت تكتب شعر وتمحّي
سليمان
بعرف يا جدّي حالتك بالويل
وما عملت مستقبل ..لأحفادك
من ميل قلبك هابط ومن ميل
مفرّغ بجارك كل احقادك
ابنك طلع متلك قليل الحيل
وآخد شوية جهل ما زادك
ولاحق الريسس أو سباق الخيل
وانتي البحر ما بيكسر عنادك
بكتوب بمحّي صح كل الليل
من البخل صرت تقفّل البرّاد
منشان ما قرّب على زادك
كمان سليمان
ليلى كتر ما بتعرف تغرّك
بتدوّبك بعيونها الحلوين
بتحتال حتى تشلّحك درّك
وترّجعك بالعمر عشر سنين
توقّى يا جدّو ينفضح سرّك
وببيّن الأبيض متل صنين
عمرك مواج الموت عا برّك
وحتيار صاير يا قليل الدين
ارجع ل ربّك بنت بتضرّك
ليلى صبيه عيونها شياطيين
وعا مين دخلك متّكل عا مين
عدنان
عايش انا محافظ على حالي
وكل همّي رزقة عيالي
واحلا الصبايا انشفتها حدّي
ما بشوفها ولا بحطها ببالي
وانت النوايا حقد مسودّي
عارف شو بدك يا ضنا حالي
ليك الشمس غفيت على خدّي
و صارت عا خدي رونق تلالي
وليلى قصيدة شعر بتندّي
عملت ب بيتا من الشرف هالي
ومنها لمتل فضلك مستعدي
تسمع حكي اللي بيزحفو عاطول
كرمال بسمة بنت ميّالي
سليمان
اللله يرضى عليك يا جدي
لا تضيّع مع ليلى العمر غدّار
تشيّطنت بالعشرين بيقدّي
توقّى يا جدو صرت عا المهوار
بفزع الكسرة تنقلب شدّه
وعا الراس تاكلها وبلا انزار
صاير عنيد كتير ها المدّه
وكل يوم عم تسكر يا جدي ببار
تعلّم تعيش الآخرة جدّي
وتركع تصلّي عيب يا ختيار
ليلى قبالك كل ما تعدّي
بيعلى الضغط عا شوي وبتنهار
وبعرف انا مش قادر تهدّي
جسمك تلج بس القصيدة نار
خلّصّت من دبحات من مدّي
واياك ترجع تجهل بوصيك
قلبك فرط والحبل عا الجرار
عدنان
وعم ترجع لجدي ومجد جدك
جدك عاشكلو بتطلعو انتو
وجدي بيرفض التهي حدك
او كون مرة مطرح الكنتو
بظفري وبخنصر بقدر بصدك
ديّنت شعري وما تديّنتو
وتا ارجع وغني على ودك
وشعرك ببنت الشعر لوّنتو
كل الصبايا اللوّنو غدك
ما أثّرو ومجدي انا صنتو
وليلى عروس الشعر بتصدّك
وكلما قبالا يا صبي بنتو
بتوقّف المتلك على حدك
حتى انقهرتو وتا تجننتو
وهلق انا تا رد عا ردك
وشريك عمري العمر ما خنتو
وصعبي عليك تنال شو بدك
ليلى متل بنتي بموقع شعر
والبي ما بيتطلّع ببنتو
سليمان
سمعنا يا جدو نزلت عا بيروت
منشان ترقع قلبك المفخوت
من بخلك الجايبلك الجلطة
ونوبة قلب كلما صرفت سحتوت
ههههه
والموت عا روحك متل سلطة
عا الكوع واقف عم يزمّر توت
قصّوك بالساطور ..؟ بالبلطة
وطعموك راحة ..وشوربا وبسكوت
بنتك قلت...؟من وين ها الخلطة
ما انت عا ليلى الشعر بتموت
بعرف أمور الحب مختلطة
عينين ليلى بحر من ياقوت
كيف غلطتت بالشعر ها الغلطة
ما عرفت لي بينزل عا بحر الشعر
وبيعاكس التيار بدو يموت
عدنان
عينين ليلى ؟؟؟ لل بيحبوها
وشو خصني باملاك مش خرجي
بعدا صبيي الكل عشقوها
كل يوم صورة شعر بتفرجي
درة ثميني وما فهمتوها
لولا عرضتوها عا جوهرجي
بيقلكم للاصل ردوها
شرقية الطبع ومش فرنجي
وقلبي وشرايينو بتعرفوها
متل الذهب برج المجد برجي
اجتمعو الاطبّا تا يشوفوها
وفاتو عا قلبي وعشّبو المرجي
ومن بعد ما بالشعر فحصوها
قالو يا عمي روح عندك روح
بيضا ونقيي وللطهر فرجي
كمان عدنان
جايي تدوق لقمة عن طبقنا
قضينا عليك وبقلبك طبقنا
وفتحنالك مضافي حاتميي
رحت تسبنا وتحكي بحقنا
نهلا هالقوافي المخمليي
بتقللا من بيوتك شرقنا
ولا تفكّر بسهرة جهنميي
تشق الموقع المنّو انطلقنا
انت غدّار ريقك سم حيي
وجايي مفكّر تفتفت حبقنا
وعم تطالب بكرسي اوليي
حتى تكبر وتاكل عرقنا
متل ممسوخ عم يطلب صبيي
تا يخرقنا وما في مجرم خرقنا
ونحنا بالقوافي المنبريي
حكي الالهام عا مساكب ورقنا
وتا تسبقنا عا جنة سرمدية
بسبقنا شاركو عقول الذكايا
ويا أعرج انت ما بتربح سبقنا
سليمان
مين جاب سيرتها يا بهورجي
نحنا عا ليلى ما منسترجي
نحنا المرا من عيونها منخاف
وعا دفتري بتضل مندرجي
من جبينها العالي شفت نفناف
وكلما تطّل بزيَّن المرجة
هيدا اللي منها بس عم ينشاف
عالي سماها وبرجها برجي
عويناتها سودا وفي عندا شفاف
للشعر فرجي وللحلا فرجي
وأنت العشت عمرك على أوقاف!
بتوقاف ها المدماك معمرجي
مدماك قصدان وبلا إجحاف
لاكن اذا بتلكلك لسانك
رح جلسو بسدَّان كندرجي
عدنان
دخلك يا كاس العز تعتعني
وشَفّي وشَفّي المجد بلّعني
وحتى من همومي انا إرتاح
بحياة ربّك لا توجعني
وحضرة جنابك عاشق الاشباح
وبمحبتك ما فيك تقنعني
داير عا صفحات الشعر سوّاح
تحركش بسمرا وغيرها يعني
وباقي بموقعنا انا مرتاح
وعزة نفس بتضل تمنعني
قاصد عا حربي الشايفو تمساح
والصيد لما فيه يجمعني
بعطي لكندرجي القوافي وشاح
من جلدك الغير هيك ما بيعني
ويا بحر رح بتشوفني سبّاح
وصعبي عا موج الغدر يبلعني
عايش حياتي اجمع الارباح
بجمهور صار يحب يسمعني
وحدك اذا حبيت رف جناح
والجو النا صار ساحة حرب
يا بودعك يا انت ودّعني
سليمان
انهزي يا بنت الموهبة انهزي
كاس النصر والمجد والعزّة
منو متى يتضيّفي سليمان
بتصيرسكر الطعمة المزّة
جلددي مجلد منجد القصدان
لابس النورقماشة البزّه
من ارزة بشري مجد جبران
جارة الشام واخت ل غزّة
وهاجم عليي ليش يا عدنان
هجمة شبح وبنفس مبتزّة
تا تغز خمجر غدر بسليمان
خمسين مرة مجرب الغزة
اللي بيجمع الأرباح بالدكان
الرسمال قرقة وحدها وزة
وعلان مني ليش يا عدنان
بتعرف الك بعواطفي معزّة
شو طمعّك با الحرب يا فليتان
مهرك ان فز بساحتي فزي
بين الأصايل الجمو يا فلان
ال بيودعك من بعد جولة حرب
تا يكمّل المعروف بيعزّي
عدنان
ما بيكرهك عدنان ياسليمان
وبدّو عا قمة عاليي يخليك
من وقت ما عرفتك قمر نيسان
هنّيت حالي وجيت تا هنّيك
ولما ابتدينا نجوجل الاوزان
وشفتك صغير الضو ما بيرضيك
جبتلك من البهورة الوان
وجايي بإيدي المريلي اعطيك
ولنهايتك ما بجبلك الاكفان
طول العمر حدي رح بعلّيك
وهلق قبل ما تنده الاخوان
حتى عا دفن الموهبة تلاقيك
ومن قبل ما تعزّي اهل لبنان
عزّيت حالي بساعة الشفتك
وعا شعرك بعزّي الشبيبي فيك
سليمان
انا ب نيتي....... العالم عليمي
ماشي على الدرب المستقيمي
ولأني بعرفك من عهد غابر
بعدك صاحبي وخيي ونديمي
لكن عا المنابر لا تـــكابر
حرام ترخص الدره الكريمي
أنا معتاد ع فتح العنابر
من قلبي وفؤادي ومن صميمي
اللي بدو يشك بعيوني الميابر
قدما ها النفس كانت رحيمي
بدو يصير من أهل المقاير
وتا اقضي ع الفساد وعا النميمي
اذا عزيت فيي روح خابر
بموتي الموت عندو صار قيمة
وأنت لو متت يا إبن الأكابر
واجب قول انك كنت صاحب
لكن بالشعر منّك غريمي
عدنان كان صاحبي آجروني
عدنان
وانا متلك بدفنك يا زميلي
اذا ما متت من ضربة زميلي
لانك صاحبي ومش خصم قاسي
رح بجبلك طليع بدون حيلي
وبدفعلو مصاري من كياسي
تا يعمل صورتك صورة جميلي
وبقلو كنت عندك حساسي
اصيل وجيت من عيلي اصيلي
وبيسامحني الاهي عالنجاسي
اذا كذّبت ونشرت الفضيلي
وببكي عليك ويزيد الحماسي
ورح بيشاركو كل القبيلي
وبيهيك بكون عنوان القداسي
وخدمتك مرتين على القليلي
مرة بعركة الشعر القياسي
رحمتك بالجوابات التقيلي
ومرة بموتك الما كان قاسي
جبتلك طليع وعا حسابي
ومش من عادتي ربّح جميلي