طليع حمدان الميريلاند

الميريلاند

يا ميريلاند للشمس اعزميها

و بكاس نبيذ عالشاطي سكبيها

و أنا بكاس و متى الكاسين رنوا

شربيني فلسفة و نور شربيها

و شعري من حروفوا الشهد جنوا

تتوعى من بعد ما تسكريها

الشفق حمص لرمل الشط بنوا

بفنجان الشفق شفة سقيها

ليك ِ البحر لما بان سنوا

ابتسم لك بسمة الحب النزيهة

و عمل عيدوا عشاطي صدق ظنوا

عملها للشمس شمعة و طيفيها

و غابت غصب عنها و غصب عنوا

غص و ما قدر كلمة حكيها

ركضي يا مواج هديها و لنوا

عملي الشاطي مخدة و نيميها

و هيّ دموعها تتعود حنوا

بنت لبنان ما بتنسى أبيها

لعطيها تذكرة للشمس منوا

حنينوا قال سبحان لعطيها

يا لبنان الكواكب فيك جنوا

مثل ما الأم جنت عا بنيها

الجداول لغير عندك ما تهنوا

البلابل غير نبعك ما رويها

و أنا من طيورك لفيك غنوا

مهما الحزن للنغمة كويها

بدي ضل غنيلك لأنوا

القصيدة ما بسميها قصيدة

إذا لبنان مش موجود فيها

*********

يا بيروت الحزينة يا خزينة

طول عمرك عتاج الشرق زينة

و نصرخ يا عروسة كيف حالك

صرنا نقول كيفيك يا حزينة

كيف حال اليتيمة بليل حالك

غمرها الحظ من غمرة أمينة

كيفوا هاليتيم إلي و مالك

يا أمي جعت شو راح تطعميني

كيف بيوتك و كيفوهن عيالك

يا ست البيت يا قلعة متينة

يا أجمل ياسمينة شو جرالك

الورق هرهر عكعب الياسمينة

مهما الحرب تجرحلك جمالك

الثمينة بعدها بقلبي ثمينة

أن كان الرماد باقي من دلالك

برمادك يا حياتي كحليني

و لو عندك بقي كوخ بمجالك

تركيني بكوخك ولا تهجريني

و إذا ما ضل إلا شغل بالك

بشغل البال عندك شغليني

ليك ِ هالبحر بعدو قبالك

عم بيقل لك بليل السكينة

بقلب المي خل ليلي خيالك

إذا خيالك رحل بتجوعيني

و أنا يا ريتني سفينة بخيالك

و أنت ِ عمتشدي بالسفينة

و قلبي بيربح جميلة بحبالك

لما بالحبال تربطيني

تركيني عيش عشاطي رمالك

و عأوربا ما بدي تاخديني

إذا الإغريق من وردوا رمالك

مش بالورد فيك ِ غرقيني

فيك ِ بعيش مهما قل مالك

و بإيطاليا مابدي تعيشيني

و لا بسويسرا بنسى كمالك

و لا باريس بدي تسهريني

بسهر بين عذرية تلالك

و لا عقصر تتشر تعزميني

تقلبي يرف كل ما رف شالك

و بنسمة مرجحك و تمرجحيني

تركيني مع جنوبك مع شمالك

تركيني أنتهي فيك ِ تركيني

مهما بالغرب لاقي بدالك

لا أغلى من شعب لبنان عندي

و لا أجمل من مدينتا مدينة

و على الميلين شاطينا بذا توا

مداين عزنا سمعت صلا توا

و قال البحر ألهن تقبروني

و صار يزقف بفرحة بنا توا

و أنا كل الشواطي بيعرفوني

خلقت جدول حنون بسقسقاتوا

جناين فيك لا أحلى و لا أروع

خزاين عطر لزهور لحفالي

و على خيام البدو من جديد برجع

نكانوا بيشبهوا خيام الدوالي

مهما صار عترابك لا تفزع

قدر ما تفرق الشعب المثالي

الأهالي إلي استقوا من فرد منبع

بجيهن يوم بيعودوا أهالي

و هلق يا جبلنا ما بيمنع

تجي تسمع ملوك الارتجالي

بدالك ما ألوا لبنان مرجع

و لا المنبر إلو شاعر بدالي

أنا لمتلك جبل من فرد مقلع

بيوتي شعر كلماتي تلالي

و مثل ما الأزرق قبالك بيركع

ما بدي دشر بلبنان شاعر

إلا ما يجي يركع قبالي

*******

ببيت الدين غنى الشعر بيتوا

و لما لون إحساسي عطيتوا

قالوا كان لونك مش تحدي

و لزرع العاطفة بشعرك عبيتوا

الزغلول إلي ألو بقلبي مودة

ببيت الدين عقلبي حنيتوا

لو بدلوا يجي عملاق ضدي

كنت من أول الحفلة طفيتوا

أنا بجوقة الربيع نقلت ردة

الربيع بكلمتي الحلوة لقيتوا

و بكفيني خليل و شحرور حدي

جبل و عليه منبرنا لقيتوا

يا زين الشعر مش ضربة مهدة

و لا تجريح من شاعر عنيتوا

زغلولك مثل زهر المندي

و إلا دموع شعري ما سقيتوا

و بعد منها ببلدة كرم سدة

أنت و شاعر كبير إلتقيتوا

بكلام الشتم و بلون التعدي

بخمس قروش كلوا ما اشتريتوا

و أنا مثل الندي عليكم بهدي

و مني بخاف تتكونوا نأذيتوا

بسيف الغدر كنت بقص يدي

لسيف الغدر لو مرة قتنيتوا

أنا بالشعر قلّقت المخدة

و صباح النور عسريري هديتوا

تخد الفجر بيّن حد خدي

مثل قنديل شح كثير زيتوا

و لأني عأرض بيروت بدي

كتف طير بالماضي حميتوا

بعتلي زين فكر زين قدي

يا ريتوا بالشعر أكبر يا ريتوا

على كل حال بدي بنار حدي

أكوي الجمر أكتر ما كويتوا

قولوا لزين عالمنبر يهدي

لأني بعد بيت الدين جايي

تحاكم أبو علي عبواب بيتوا

القصيدة لشاعر الزجل طليع حمدان