مستحية

موضوع: مستحية الأربعاء مايو 14, 2008 4:22 pm

حاجي بقا مني مستحية = وبتحرنقيني وذايبي فيي
انقسنا حرارتنا سوا بالحب = اكثر بتطلع من خمسمية

فيكي اذا غيري تطلع شب = فيي بتغلي نار حربية
وبنزل بقاتل نرفزة وبسب = يللي عليكي زغزغ النية

قلبي عليكي نار عم بيهب = اكثر ماقلبك لاهب عليي
وبفزع نسيم الشوق كلما هب = يجرح نعومةّ ورد جورية

وشعري عليكي بعاطفة منكب = وعم غار من نظرات عينيي
ومن نبع تحنانك كثر ماغب = بلّش تمني مش أنانية

تمنيت إتخصص إلك بالطب = وغيّر قسم طب اليونانية
بثاني أبو قراط الشعر يارب = إتجسد بأحلام وردية

وتتوعكي ومايكون إم وأب = ودكتور غيري وتحملك ديي
تاإفحصك لما العين تضب = والشمس تغفى وقامتك ع التخت
وقامتي من فوق محنية
==================

موضوع: رد: مستحية الجمعة أكتوبر 31, 2008 10:52 am

شو ها الحيا من قلب دايب بالغرام***بيحط روحو فوقها متل الحرام
يا حرف حاجي تحبّها والله حرام***تترك سنينك ضايعة بلا أحترام
منّي ومنّك كنت بتركها بسلام***وبلعن الساعة لشفتها وبرجع بنام
وبروح أحلم كل يومي بمرا***تا يصير مرج العاطفة ورد وخزام

هههههههههههههههههههولك روح حتى بالغرام غشيم

موضوع: رد: مستحية الجمعة أكتوبر 31, 2008 4:42 pm

تاتصير تفهم بالغـــزل والعاطــفـي = بتـعــرف بأنو الحب سـيـّــد موقفي
لافيك تغفى مطرح الحرفي غــفـي = ولا فيك توعى جنب بنت مشـرّفي
مابريد تعطيني دروس العجرفــــي = قنّي لورداتك ميــــــاه بمجــــرفي
وشوف البيحب بقلب صادق يـاولد = غير اللي قلبو مع عشيقة مناصفي

===========================

موضوع: رد: مستحية الجمعة أكتوبر 31, 2008 5:26 pm

مين القلك هيك بتحب البشر***منّي نصيحة رجاع لوصايا العشر
منخارك المفطوص بالحب انحشر***وحتى غرامك متل شي ايدز انتشر
أكرم أباك وأمّك وأوفي العشر***ولا تشتهي النسوّان من بيت الدشر
وبالعاطفي ما تضل تلعب كشتبان***واللي بقلّي لأ رح قلّو فشر

موضوع: رد: مستحية الأحد نوفمبر 02, 2008 8:46 pm

مغلط يا سليمان، مانو غشيم أبدا بالغرام
"وشوف البيحب بقلب صادق يـاولد = غير اللي قلبو مع عشيقة مناصفي"
===========
"وبروح أحلم كل يومي بمرا***تا يصير مرج العاطفة ورد وخزام "

ثم يقول: "ولا تشتهي النسوّان من بيت الدشر'
ما هذا التناقض يا سليمان?!!!!!!

موضوع: رد: مستحية الإثنين نوفمبر 03, 2008 5:46 pm

يا ناطر يرّدوا عليي الأنسات***شو صار يا محروف ناسي الوجبات
ليلى اللي عطيت بالتناقض بيّنات***نسيّت وجود الضد يظهر محسنات
وجود القلق بيزيد طعمة بالحياة***الأضداد فينا عايشين بكل زات
ضد الخطيي خير بيّن للبشر ***وطلوع الله عا السما ضد الممات

مشرف عدد الرسائل : 519 تاريخ التسجيل : 15/03/2008

عرفتك حسودي وماقدرت مرة تســـود = مزعوج من ليلى وردودا ياحقـــــــود
كل اللي حكيوا الحق عم يقروا بنــــود = وميزان عـــــدلك صاير بحالةّ شـرود
الأضداد هيي الأصل في غاب الأسـود = وأيّــــــــا حـــــكم بتفضّلو أهّب جنود
ومخطي اللي قلك بس الله بالســــمـــا = ووجـــود الله بـــكـل أصقاع الوجــود

===================

موضوع: رد: مستحية الأربعاء نوفمبر 05, 2008 12:13 pm

[size=24]الله يا حرف سماع أوحد بعبدو***وبيضل بالفردوس ساكن معبدو
ثابت بوج الشر حتّى يبعدو***ويرد متلك ناس تاهو وألحدوا
شوف الثبات وعود ربّك وحّدو***ولا تضل تنقل متل نقلات البدو
ثبّت خطاك بتوصل لمجد الأله***البقيوا عا الخط الدين عاشو وخلّدو

بدك فلسفة تكرم عينك
[/size

مشرف عدد الرسائل : 519 تاريخ التسجيل : 15/03/2008

وحـدّت الله ! وكيف ؟ عيـــــــسى بتجهلو =اب وابن والروح مش ثابت.؟حـلو
البيقول كــــافــــــــــر حرف بدي بـهـدلو = بشرع الخليقة كفرت لازم إقــتـلو
ورجاع إنجيلك تاتقرا إحمـــــــــــــــــــلو = وإنقل وفتش ع الأيــــــات بداخلو
كاتب إيمــــــــــــــانو الكان قـد الخردلي = من مطرحو مزحزح جبل وبينـقلو
==============================

كلما فكاري بمستحية تغازلـــــــــــــــــوا = سليــمان شو خصو تايدخل بسألو
تا إفحصو وتاغربلو وتا صوّلـــــــــــــــو = وتاحـــــرّم المتلو بساحاتي يدخلو
=======================

موضوع: رد: مستحية الأربعاء نوفمبر 05, 2008 2:55 pm

يا منتدانا الصرت أجمل منتجع***فيك القصيدة الثابتي وفيك السجع
شوف بوطنّا بينقلو طيور البجع***وعش الدواري بيت ثابت للهجع
صيامك اذا ما بيثبت بيصبح فجع***وسهم البطولي ان شك ...!!!ثابت...؟ ما ارتجع
عندك السم بينتقل متل المرض***والبنج وحدو بيقدر يهدّي الوجع

مشرف عدد الرسائل : 519 تاريخ التسجيل : 15/03/2008

سليمان شوف. الشعر حنكة مش غريم = والحرف بحر ومــــــاج بقبال الأديم
موسى انتقل عا مصر بالعهد القديــــم = ولو ضل ثابت كـــــان الله والعلــــيم
ويوسف اخد مريم العذرا يا فهــيـــــم = وخلّص من الأعدام يسوع الرحــيـــم
وطير لتنقّل صعب صــــــــيدو بتقشعو = بس البيثبت عا الغصن طـير الغشيم
==============================

موضوع: رد: مستحية الخميس نوفمبر 06, 2008 4:31 pm

من صميم القلب أهنئ كل من الشاعرين سليمان وحرف لا على ربح المعركة لأنها ما تزال محتدمة، بل على النقلة النوعية في عمق المعاني، والبيان. هي قفزت نوعية في العطاء الشعري، والنغم الموسيقي فضلاً عن الفلسفة التي تحدى بها سليمان غريمه حرف، فإذا بحرف يضرب على نفس الوتر، فترى الوتيرة التي ارتفعت في شعر سليمان قابلتها وتيرة أخرى في شعر حرف، فإذا بالشاعرين يتعملاقان بشعر يجب أن يقرأ مثنى وثلاث ورباع.

موضوع: رد: مستحية الخميس نوفمبر 06, 2008 10:07 pm

اليومي فتحت النت شفت...؟؟مشاركي***الموقع سبقني وقال أهلا ب بو زكي

يا حرف حاجي تنقل خبار وحكي***خليّك ثابت متل جندي بمعركي
التثبّيت للأطفال شغلي مباركي***وعا الحق لازم تثبت بلا فزلكي
ان كنّك مراقب...!!! للوزارة ب تشتكي***من جيل صار النقل عندو مسلكي
وكل البينقل بالفحص يا فيلسوف***غشّاش نمبّر ونّ ما تعدّو زكي

بنطلب من الأب حنا يشرحلنا شو معنى التثبيت بالدين المسيحي وشكرا

موضوع: رد: مستحية الجمعة نوفمبر 07, 2008 11:41 am

لوما التحُّرك دحرج حجار الضريح = بقلب المغارة ضل يسوع المسيح
ولوما النبي هاجر على مكي صحيح = كان الكفر بالناس بعدو مستبيح
نقلةّ غزالة تنقل بخفة وزيح = ومتل السبل إحني انعصف بالكــون ريح
وريشة البتغشى مع عزف عوادها = لحن الخلود بتعزف ومابتستريــح
===========================

موضوع: رد: مستحية الجمعة نوفمبر 07, 2008 5:56 pm

تركني كنار بضل عا الغصن الودود***ولا بروح بنقل بالشجر متل القرود
ولوما بوطنّا يثبتوا فيـــــــــه الجدود***كانت فرنسا حكمت سنين وعهود
ولوما ثبات الخط ما نرسمت حدود***ولا ضل عنّا لا تحدّي ولا صمود
ولوما الوتر بالعود ثابت يا حلو***كان القصب بيجنّ وبيخرس العود

موضوع: رد: مستحية الجمعة نوفمبر 07, 2008 8:23 pm

بين الثبات والتحرك، والثبوت والحركة، والثابت والمتحرك قامت الفلسفة وتطورت. تفلسف حرف فانتج حركة متافزيقية تناغمت مع الوجود، وبين المتافزيقيا والبعد الوجودي الديكارتي أنتج حرف ردا قويا جعله يقول في نهاية المطاف هذا البيت الرائع:

"وريشة البتغشى مع عزف عوادها = لحن الخلود بتعزف ومابتستريــح".
في الجهة المقابلة نرى الشاعر سليمان يؤيد التبوث كأنه يريد زعزعة أبعاد الميتافزيقيا والتشديد على مثل ديكارت في الكائن السابح في الفضاء بدون حركة، ولكنه يفكر، فاستنتج ديكارت القول المأثور: " أنا أفكر إذا أنا موجود".
سقط سليمان في خطأ في بيته الأول، هل يستطيع حرف اكتشافه والابداع في الرد كما عودنا?!!
لكن سليمان أبدع في البيت الثاني، وأعطى للثبات بعدا وطنيا، بل وعاما بدونه لا حركة استقلال، كانه قال: الحركة من الثبات.
لنرى هذا البيت الريادي:

"ولوما بوطنّا يثبتوا فيـــــــــه الجدود***كانت فرنسا حكمت سنين وعهود".

لله دره ما أقوى معانيه في البيت الثالث، وهنا على حرف أن يدرك كيفية الرد، وأترك ذلك لعبقريته المعهودة.
وفي بيت سليمان الرابع تأكيد ثاني على فلسفة أن الثبات أصل الحركة.

موضوع: رد: مستحية السبت نوفمبر 08, 2008 1:27 am

مجّوِز انا ومنجيرةّ الراعي العتـيـق = يما بّـيانو وأورغ لل لحـــن الرقيق
وثابت انت يادبش متل المنجـنـيــق = والسيف ثابت ما إلو رهجي وبريق
سلطان باشا الحرّك الثورة العريـق = وقلو لأدهم خنجر من النــوم فــيق
ولوما المحامي يحرك وراق التهـم = ما في ولاقاضي ثبّت الحكم الدقـيــق
============================

موضوع: رد: مستحية السبت نوفمبر 08, 2008 11:05 am

سلطان باشا ثبّت الثورة وقفي***وسد بعمامي بوز مدفع ...؟؟قاصفي
عندك مواقف ثابتي ومشرّفي***وما تغيّرت مهما تجنّ العاصفة
الثابت وفي حكمة ما بدها فلسفي***واللي بينقل خاين وما بيكتفي
وموقف أخدتو بالسيادة يا وطن***ورح ضل ثابت ما بغيّر موقفي

اوووووووووف اوووووووووووووووف
رح عيدها ويا مواج تا أمشي....؟؟؟ وقفي***حرف البكي بلل بدمعو الملحفي
شوف السياسي اليوم عنّا مقرفي***نقلو البارودي الكتف تاني بالخفي
ههههههههههههههههههههههههههههههههههههههههههههههههههههه

موضوع: رد: مستحية السبت نوفمبر 08, 2008 1:33 pm

ثابت المبدأ صح من حيث الوجــود = لكن مع الأحداث تغـيـيــر البنـود
القصة القصيرة والمثل حكمةّ ودود = صعبة ماتتعــــاطف قيمها تاتجود
وأصعب عليها الأنسجام بلا جنــود = مهما عرفت تعبيرها قاسي ولدود
قسوةّ الواقع بالوطن متحـــــــركي = جرّب اذا بتـثـبيتها بتحمي الحدود
==========================
فصل الشتي بيزت تلجو عا الجرود = وبحركتو بيخيط ثياب الورود

هيذي حقيقة واضحة بواقع شهود = إطلع ع متن الفلســفة وبالعـلم رود
==========================

مع انك خصمي بالشعر!! بس شو بدنا بالحكي بتعجبني بربي ويلا هات

موضوع: رد: مستحية السبت نوفمبر 08, 2008 8:13 pm

بالفلسفة والدين ثبّت موقفك***تا تصير فلتي بالبلاغة ونعرفك
بتعرف بو شربل بالقوافي أتحفك***وتا تضل ثابت حد منّو وقفّك
كتر البكي حرّك لهيب عواطفك***ومهما حركت بالمنتدى مش شايفك
الشعّار لازم تثبت بموقع زجل***ودم البيحرك عا التماس بينسفك

موضوع: رد: مستحية السبت نوفمبر 08, 2008 9:04 pm

ما فيك شك أن المعركة قد احتدمت، يلا يا شباب نحن معكم حرف وحرف من القصيدة(مش تحيزا لحرف) وهو اعترف بعظمة لسانو عن قدرة سليمان، بس هويي مش هين.

موضوع: رد: مستحية الأحد نوفمبر 09, 2008 2:21 am

ثبوتك قبال الشمس بيسبب حروق = بيلغي غروب الشمس وبـيلغي الشروق
خليك متل الدم مـاشي بالعـــــروق = ولا تـثـبّـت الكيــــدون انت وعم تسـوق
متل القلم خليك مش متل الدبـــوق = فوق الورق روح وتعا و عالشعـر روق
ولوما على الكارة نـلّوح بالعجـيـن = من خبـــــــزنا المرقـوق عمرك لاتذوق
=======================

موضوع: رد: مستحية الأحد نوفمبر 09, 2008 2:01 pm

عا القلب حاجي تشد تقسا تمرتو***خليّه ثابت بالمحبة الغمرتو
شوف الغصن لم هزّ هرّت ورقتو***وضلّ الوفا يشحد ثبات بثمرتو
المرحوم بيي ضل...!!!يرحم تربتو***ثابت عا مبدا ودين الله و سيرتو
وحتى العقل بيضل ثابت بالجسد***وما تحرّكوا الأعضاء ألا بأمرتو

مشرف عدد الرسائل : 519 تاريخ التسجيل : 15/03/2008

شوباك عم تحسد الموتى بالقبـــــور = وثابت بلا احساس ماعندك شعــــور
ما الغصن ثوبو بيشلح بيلبس شهور = وثوبك متل طحلب مثبت ع الصخور
وطلّع ع ابن العصفورية من دهـور = من دون عقل منحسبو وكــلو فجـور
ودير الصليب بينطرك متلو كمـــان = شرّف تافيه نثبتك آخـــــر عصـــور

================

موضوع: رد: مستحية الإثنين نوفمبر 10, 2008 4:06 pm

" عا القلب حاجي تشد تقسا تمرتو***خليّه ثابت بالمحبة الغمرتو"
أجاد سليمان في هذا البيت.

"ما الغصن ثوبو بيشلح بيلبس شهور = وثوبك متل طحلب مثبت ع الصخور"
ووفق حرف في الرد على سليمان مبينا التجديد المستمر في الطبيعة.

أما قول حرف أن سليمان يحسد الموتى في القبور، فلا نراه في مكانه، لآن سليمان ذكر بمواقف والده العزيز، الثابت على المباديء والقيم، ويمكننا القول: " هذا الشبل من ذاك الأسد".