سهر .. ومكتوب د. إياد قحوش

سهر .. ومكتوب

د. إياد قحوش 25/03/2008


سهر.. ومكتوب

د. إياد قحوش



الى نهر الصّدق الذي اعتمد فيه قلم الشعور..

بينما حمامة الخيال ترفرف،

وصوت الجمال يغني موسيقا الحب ..

الى: إيريس نهري







انْكبّ السّهر .. عالّليل

كبّايي

وتاتـْلقّفو خِرقِة قمر

جايي

تِمْرُق عَ شبّاكِكْ يامَهْيـوبِه

وتْزَيّقْ

عْـلى الرّيـح بِراديـي

*

البطْحَه .. شجر

شي نصّ مسكوبِه

بْأرض الحلم

بِتْفـوت بِمْرايـي

بْتِقْشَع خْيالِك .. مِتِلْ لَعّـوبِه

شيْ بْتِشْرَبـو .. بْتِرْجـع مْعَبّـايي

*
وْتِكّـايْتِك .. إنتي وْعمِتْدوبي

جَدْول موسيقا .. اتْدّرْكَب حْكايـي

بِتْصيـر

تِقـرالِك بْمكْتـوبي

وِبْتاكْلِـك نيران الِقْـرايي

*

كِرّي الْحَكـي

وْلِفّيـه كَبْكـوبِه

وْكِلْمـا صَفَرْ

كانونك بْ نـايي
بْيـِرْجع جَمِر

آهــات

مَسْحـوبِه

مِنْ مَـوقد الشّوق

للّي بالمكتـوب
يْطَقْطِس دَفـا مِن تحت تِكّايـي

أضيف بتاريخ :02/06/2007 | الكاتب :د. إياد قحوش
المشط



غِرْقـانْ

لِجْمَـامُو بِنَهْرِ سْكُـوتْ

بْينْزَلْ بِطَعْجِه

بْيِكِمْشُو لبنـانْ
بْيِطْلَعْ بِمَوْجِـه

بْتِنْغَمَرْ بيروتْ

بْيُوقَفْ عَلَى الْمَفْرَقْ

بْيِنْطُر شْوَيّ شْوَيّ

بِيْشُوف حَالُو قْبَـالْ

شِلاّلْ

عَتْم .. وْمَيّ

بِيْزِتّ حَالُو..
خْطَيّ

بْيِسْرَحْ عَلَى الْمَسْرَحْ

وِبْتِخْلَق الألْحـَانْ

ألْحـان مَكْسُورَه

بْتِزْحَطْ مِنِ بْلُودانْ

بْتُوصَلْ عَلَى شْتُـورا

وِبْيِعْجَق الْمَطْرَحْ

ألْوان عَمْ تِطْلَعْ وَرَا ألْـوانْ

وْألْوانْ عَم بِتْفُوتْ

مْبَيَّنْ بِالِمْرَايِـي
بْعِيدِه طَريق الشَّـامْ

وْجِسْر الزَّعَلْ مَفْتُـوحْ

يارَيْت فيه يْنـَامْ

هالرَّايح وجـايِي

وْتَعْبـانْ

شـُو تَعْبـانْ

تَعْبـان مِتْلِ الصَّوتْ
الْحامِلْ عَ ضَهْرُو الْمَوتْ

وْغِرْقـانْ لِجْمَامُو

غِرْقـانْ .. إيْ غِرْقـانْ

وْبِتْحِطّ شَكْلِه الْبِنْت عَاشَعْرا
وِبْتِتِرْكُـو وْبِتْرُوحْ

فارس .. بِحَمّامُو

مِلْقِي .. وْكِلُّو جْرُوحْ
وْبيكِزّ عَ سْنـانُو

وْعَم يِدِلُفُو كْمَامُـو

وْعَم يِحْلَم بْبُكْـرا
تَتْعُـود ليه الرُّوح
وْتايِعْزُف بْيـَانُو

يْخَلِّي الْوَقِتْ مَنْحُوتْ

عَـاقَدّ وِجْدانُو ..



وْهالشَّرقْ ..

عا فِكْرَه

مِتْلِ الْمِشِطْ .. بِيْعيـشْ

وْمِتْلِ الْمِشِطْ بِيْمُوتْ

وْأمِّي عم تْنَقِّي عَدَسْ

أضيف بتاريخ :19/03/2007 | الكاتب :د. إياد قحوش




وْأمِّي عَمِ تْنَقِّي عَدَسْ

كانِتْ عَمِ تَّمْتِمْ

مِدْرِي عَمِ تْصَلِّي
وِتْوَقِّعْ حْرُوفا .. تْطِيْرْ

تَطِيْر وِتْعَلِّي
وِتْدِّقْ عَاباب السَّما
تِشْحَد الْبَرْكِه

تْصِيْر إلْنَا سْرِيْرْ
وْمَرْجُوحْةِ تْراتِيْلْ

أمِّي وْتِتْنَهَّدْ

وْمابَيْن نَهْدِهْ

وْبَيْن نَهْدِهْ تْشيْلْ

بَحْصَهْ زْغِيْرِه تْكِبّها بَرَّا

وِتْقُولْ:

هَالْمَرَّه

الْمَفْرُوض قِلُّنْ يِرْجَعُوا

طَالِت الْغَيْبِه كْتِيْرْ.

طَالِت الْغَيْبِه كْتِيْرْ ياأمِّي

أيْ طَالِت الْغَيْبِه

وْيللّي بْحِضْنِكْ فَرْفَرُوا عْصَافيرْ

وْنَطُّوا .. وْكانوا وْلادْ

راحُوا وْصارُوا بْعَادْ

وْكِلْ واحِد بْمَطْرَحْ
وْقِلْتِلِّك بْنِيْسانْ رَحْ نِرْجَعْ

وْبَعْدِكْ ناطْرَه بْإيْمانْ

ْقِلْتِلِّك بْنِيْسانْ رَحْ نِرْجَعْ

تَافَرّحِكْ .. لَكِنْ
هَيْ كِذِبْتِي بْنِيْسَانْ

وِالْعِمِرْ مابْيِرْجَعْ







وْأمِّي عَمِ تْنَقِّي عَدَسْ

وِقْبَالْ هالصُّوْرَه

الِمْعَلَّقَهْ عَ الْحَيْطْ

وِبْعَيْنْهَا دَمْعَهْ

اتْطَّلَّعِتْ فينا

وْقالِت وْلَنُّو يَومْ بِالْجِمْعَهْ

طِلُّو .. تَ نِتْغَدَّى

وْهَبّ الْهَوا الْغَرْبي

طَيَّر الصُّورَه

فَوقْ طَاوِلْةِ الْغَدَا

وْأمِّي الْخِتْيَارَهْ

الْكَانِت بْتِمْشِي عَ الْهَدا
ألله .. أمي كيف .. عَم تِرْكُدْ

تَ تْجِيْبْ إلْنا صْحُونْ

قَدَّيْش قالِت كِلُو .. بَسْ تِشْبَعُوا بِشْبَعْ

وْمِينْ قالْ لَوبِيْصِرْلْنا نِرْجَعْ

ناكُل سوى الِمْجَدَّرَه

مينْ قالْ مامْنِرْجَعْ ؟