ذكرى وواقع !

موضوع: ذكرى وواقع ! الجمعة يناير 23, 2009 3:28 pm

سمعوا عن ضيعتي ولاتواخذوني = وعي حلـم الحقيقة ع جفونــي
خلقت ع ترابها إســرح وإلعب = وحسّ الكل أهــــل بيقربونــــي

ومرة وقعت بالســــاحة بملعب = من كثرةّ غلبتي ومن جنــونــي
كواعي تقشّروا ووجـّي تشطـب = ركضوا كثار إخوي عـاملونــي

حرمة جابت الشاش المرطـــب = وجارة من الدوا الأحمر دهوني
وبـِ بنج العاطفي جرحي تقـطب = كـــــأنو بجانبـي الأم الحـنـوني

هيك ربيت حب الكل إكـســـب = قراب بعاد كانوا يحملونــــــــي
زجل غنيلنا يقولوا وما إتعـــب = ومع خيي الكبير يحـــــاورنـــي

مرة يبوسوا خيي المـــــــــأدب = ومــرة يزقفوا ويبوســـــــونـي
ويرجع والدي بشعرو المذهّــب = قصايد بكر يختم ياعيــــــونـي

وخيي بعد ماوعينـــــا تــغـرب = وتركنا الوالد بداعي السخـونـي
خلوا العمر بعيونـــــي معــذب = وشلالين يعطوا الدمـــع مونـي

وصرت بضيعتي إنسـان متـعب = وإشيا كثار صاروا بيزعجوني
ياريت بعود طفل بألـــف مطلب = إصرخ تين وقضامي عطـوني

ولاشوف بجيرتي إنسان أعـزب = جـــــــايي جديد ينده شرفونـي
مدشّر ضيعتو وفينــــا مقرّب = ع عرسو وعرس إختو يعزمونـي

وبجيل جديد صفـّا الحل أصعب = وطفــــالى قد إبني بينطرونـي
اذا مريت حـدّن قــــول مرحب = افتكـــرتـن متل ماتربيت هنـي
قبل ما الوقت إرمي بيسبقوني

* * * * * * *

الله عا ها الأيام ربّونا***مسبّة ما كانوا يتركونا نقول
ويـــاما بقضيب التوت ضربونا***منشان نمشي دربنا عا أصول

بعرف انا كانوا بيحبّونا***ويرحم تراب اللي زرعنا حقول
واليوم ما في شيخ أو بونا***بيقدر يمون على شباب اليوم
ومينو بربك يا حسن مسؤول

عا مين الحق

عا مين الحق : سؤال مهم،
على الأيام?
على الحرب?
على استيراد الأفكار?
على المدنية الحديثة وقد قيل: " مَن تمدن تفدن"
آه الحق عا مين?

يا ضـــيعة طيفك الغالي قــبالي ... بخفق قلبي وعلى ملعب خَــيالي
ولأني من ترابك يا أبـــــــــــيي ... بأســـمك على حالي بشوف حالي

يا أغنى من الحروف الأبجديي ... يا أغلى بالدني مـــــــن كل غالي
نجوم الليل فوقك مـــــزهـريي ... تلال الــــزهر ع كتافك لآلـــــــي

أنا مُِشـــــتاق أرجع يا وفيي ... لــــترابك على ساحة نــــــضالي
أنا مشتاق ضُمكْ بين ديــي ... ونام بحضنك ويــــــرتاح بـــــالي

وكني غبت عنك مش خطيي ... لومي الجاهـــــــليي والــــــجهـــــالي
ومهما دارت الأيام فـــــــيي ... الغِنى بيبقى غِـــنا بأسمك لأنـــــــي
غَني بحُــــــــــبك ولوّ قلْ مــــــــالي

" لأنـــــــي
غَني بحُــــــــــبك ولوّ قلْ مــــــــالي"

أصيل استاذ حسن

» كلمة وفاء في ذكرى إنطلاقة ج.م.و.ل