عتب ع سليمان

موضوع: عتب ع سليمان الخميس أبريل 09, 2009 1:01 pm

بعتب يا شاعر ليش ما وصّوك
انو المواقع صار بدها ديوك

تذكّر مع اللي راح ما خليّت
شاعر بشعري يضل عندو شكوك

حرقتو عا نار الموهبة بالزيت
ودجاج بلدي أكلت ما كفّوك

ومن يومها بالذبح شو التزيّت
وقررت اشوي دجاج وفراريج
كل اللي فاتو لهون من فيس بوك
==============

هالمستوي بالشعر هابط يا زميل
بيني وبينك في مسافة ألف ميل

ما بريد شوفك دوم عالمنبر ذليل
ولو كنت شو ما كنت ما بعدك دخيل

شرف معي عا هيكل الشعر الجميل
من شرفتو بتطل عالوادي الظليل

شوف القمر سهران بشلوح النخيل
ووردات عن تغفى ع صوت السلسبيل

إن كنت جايي تحارب الباع الطويل
لغم الشعر حكمت لا تلعب بالفتيل

خليك بالمطبخ يا طباخ الدجاج
ولا تنزل على المعركة بتوقع قتيل

يا حرف بمروج الشعر أسرح --- ومهما خيول مواهبك تجمح
بيبقى بإيدي السوط بالميدان --- قادر خيول الجامحة يلفح
وحدي أنا العتبان عا سليمان --- قلي حرف شاعر على المسرح
ومطرحو بالمنتدى مليان --- مبين عليك مبهبط المطرح
وعالفايس بوك الموقع المنصان --- زهر الشعر بعنايتو فتح
قطفلك شي زهرة مفتحة بنيسان --- بلكي الندى من شعرك بيرشح
بدجاج مشوي وأرنبي وصيصان--- حاجي بسخافي مسمعي تجرح
ان ضليت تدبح مستوى القصدان --- سيف النقد عنقك رح بيدبح
قلي شو بدك يا غصن يبسان---- بدك شعر نحنا ملوك الشعر
بدك مزح مهضوم تا نمزح

مشرف عدد الرسائل : 519 تاريخ التسجيل : 15/03/2008

رجع النسر زموا ياقوابــــــــــــــــــر = من دربو لأنـــو الخـصم قابر
مابدو خصم شي تكتك شي تيـــــعة = متل مابتــــعرفوا ديـك المنابر
رجع من بعد هالغيبة السريعــــــــــة = بشعرو خاطر المكسور جابر
تايمسح كل من ردلوا القطيـــــــــعة = قبل مايعتلوا ع خشاب مجدو
روحو يحطها بقلب المقابر
==========

اذا حبوا عمالقةّ التحــــــــــــــــــدي = مرة يجربــــوا يعلــــــــــوا لحدي
يراعي جاهزي ويدي قويــــــــــــة = فيهن جيت حتـــــى بل يــــــــدي

منكم مين هاوي العنتريــــــــــــــــة = وعامل عبقري وزهـرو منـــدي
انا غاوي قوافي حربجـــــــــــــــية = العندو متلها بينعـــــــــــــد قـــدي

انا مارحت بين الشاعريــــــــــــــة = حالي شـــــــــوف كلما كتبت ردة
انا بالأرتجـــــالي قد ميـــــــــــــــي = حرف مابيعرف السيف المصدي

غلطت خصمي حسبتو محل خيي = عرّم بالكـــــــــــذب واحتد مــدة
واذا بيتــــــــــــكاثروا الأعدا عليي = تاقطش روس من فات بحروبي
ولغيت من القلب كل المودي

=================

ياحكمت ويافادي بهالقضية = ليكن جيت من دون الاذيــــــــة
العتب مرفوع عنا بمنتدانــا = يافيس بووك الطفالى الشاعرية

حكمت بالغزل حقق منانـــا = وكذبو مرتــــجل عامل خطيـــة
وابن فياض للأم بهنـــــــانا = كتب حرفيـــــــــن لكن قد ميـــة

اذا الواجب لعركتمكم دعانا = من هالمسطــــــرات المهتريــــة
العتب ماشفتكم ع مستوانــا = عتبت ع صاحبي ومجبور قلو
بقايي غياب كان اهون عليي===============

أول بيت مكسور يا حرف....

hikmat chedid helou كتب:

أول بيت مكسور يا حرف....

"ياحكمت ويافادي بهالقضية"

هيدا مكسور يا حرف. ولو نتبه

لازم يكون

"ياحكمت وفادي بهالقضية"

لي ما عام نقدر نكبر الأحرف؟

أنا يا حرف جايي من البدايي --- على هالمنتدى مش للدعايي
جايي دعوة سليمان لبي ---- وبرحليون أشكرها كفايي
بزرع كلمتي وبحصد محبي --- وبزوغ الفجر من بسمة رضايي
لبست الليل بدلة البدر قبي ---- وغيم البالفلك مشلح دفايي
شفت هالمنتدى جواهر معبي --- وبحك الجوهرة عندي هوايي
فحصتك ..معدنك شفتو مخبي --- تنك لكن مصفح للحمايي
أنا شعري شهرتو بعون ربي ---- والفايس بوك لبيوتي مرايي
إذا هبت رياحي عليك هبي ---- متل الرمل بتضيع بمدايي
عملت قلبي معك قلب المربي ---- يا حرف الجيت تا تهجي الدوايي
وإذا خيلك معي بيشب شبي ---- بدك تطلع بأخر سباقك
آخر فارس بيوصل ورايي

كنت غايب وما فاحت ورودك --- وصرت جاضر ومش كافي وقودك
وإذا بتشرد بليلة شاعريي ---- ضمير الشعر ما حس بشرودك
ومعك لو جيت عالعركي القويي ---- جنودي رح بتقضي عا جنودك
ما تحمل سيفك وتهجم عليي ---- ان ما كان السيف أتخن من زنودك
إذا يا حرف رح تحتك فيي ---- بدموعك رح بغرق خدودك
كنت غايب عن الموقع شويي ---- رجعت ما زدت هالموقع إفادي
غيابك ما بيفرق عن وجودك

مشرف عدد الرسائل : 519 تاريخ التسجيل : 15/03/2008

عرفت حِكــمَات ماعندو جراءة = وبـرائـــة بتهمو وطالع براءة
ياحكمات إلـفـــظ مش ياحِكمت = بتتعـــلــّـم على أصــول القراءة

حروفي عليك قبل الشعر حَكمت = حـــــكم مبرم بهالقافي وأدائة
وكفوفـــي ع خدودك لكم لكمت = تاتوعى يامُرائي رجاع إحكي
الحرف بالشعرمابعمرو ترائى
======

ويابن فياض ياجايي تلــــــــــبي = دعــوة للتحدي مستحــــــــــــبي
بحضوري بتسكت بتحكي بلايي = وحرف الموهبي من فضل ربي

انا وحياة عينك عن هــــــــدايي = عفاريت الزجل فيكم بربـــــــــي
وانت ممنوع تاتعمل دعـــــــايي = قبل مادقك بهالجــــــــــرن كبي

ومعك ماردت يتحقق منـــــــايي = ولابتحرز بحربي هب هبـــــــي
وعلى الفيس بووك رايح بالنهاية = كسّر هالمرايا فوق راســــــــك
وعلى كورس شعر تنضب ضبي
=========

بيخبروني عنك بتــــفــــــــهـــــم = وبالعكس بـرهنــت الحكي مبهم
لا انت من حكمات اشــــهم كنت = ولا كــــــــان منك بالزجل اشهم

من جنود شعرك بالقوافي بنـــت = مافيك تصـمد مع حرف ملهـــــم
ومابين فكرة وبين شب وبنــــت = وزهرة وعـبير بيظهر المفعـــــم

انكنك ياروحي بالزجل ما انهنت = وحابب تذوق بعلقتي العلـــــــقم
دموعي رح بتكرج ع ضعفك انت = وبالآخـــرة فروج رح اشويك
وحكمات حدك رجـعـّو مبلكم
==========

وابن شديد حــابب صرت لخـــــو = ان شفت الســــم منو عم يبخــو
وابن فياض بــدو يفور دمــــــــــو = وزنودي حبــال شنقو تايرخوا

سمالله عليه عم يحكي مــاهـمــــــو = فكاروا بالجهــــل شايف تنخوا
الله يحرسو ويبقى لأمـــــــــــــــــــو = عـايـش وهــــم طار بجو رخو

خايف أوجعو ويمـسح بكــــــمـــو = وع جو الحرف تايوصل بطخو
وعلى الفايس بووك مطرح ما التموا = جمـّـعـــّــــــلي جلابيط المعنى
الحرف لاتقول ناصب غدر فخو
==============

وعلى روح الشبيـــبة اليوم صلـوا = توفوا قبل ع مجــالي ماطــلوا
ملاك الحرف والفياض حــــارس = ع باب المـنتدى يمكن يضــلو

قلت عن حرف صاير بالفوارس = اخــيـر بخبرك شو اللي حصلو
ان منو هربت فيك الرمح غارس = وحتى يطــاردك بيضل هاجم
وين ماهربت خلفك رح يضلو

================

كنت افتكرتك شاعر وموزون --- لقيتك بسجن البهورة مسجون
شعرك ركيك ومطلعك أهوج --- وأفكارك فقاقيع من صابون
وحتى تخبي ضعفك المحرج --- ملون حروفك تا تسلّي عيون
بألوان أحمر أصفر بنفسج --- بلكي الشكل بيعوّم المضمون
كلما بغرورك راسك تبنج --- ما تفتكر حالك صرت شمشون
وكبريتتك لو عودها توهج --- ما تفتكر حالك صرت نيرون
انت كذبة هزلها روّج --- فضحتك بموقع شعر برحليون
وعا إنكسارك جيت إتفرج --- ومتل النعامي الخايفي خليك
هربان راسك بالأرض مدفون

وشوشني الأرز فوق الرواسي --- في جاهل غايتو تكسير راسي
سألتوا مين هالشب العا قدو --- قلي حرف ناطور المراسي
قلت بدو سني طموحو يشدوا --- صوبي وهالمشقة رح يقاسي
وبكتب الأدب والشعر بدو --- عشر سنين إعداد ودراسي
وقبل ما يصير سيفو حد حدو --- وقبل ما يصير من أهل الفراسي
ما بقدر حملوا دفي بيدو --- لأنو خشة دماغو القويي
رح تغطي عا خشات النحاسي

توقى شر ضرباتي القويي --- إذا فرام الوعي براسك ما لقّط
ما فيك تصير نمر الشاعريي--- إذا بتلبس جلد نمر المرقط
ومعي بتشعر ببرديي عشيي --- على ركابك أثرها اليوم سقط
حرف ناقص إنت بالأبجديي --- وأنا بإيدي قلم ساعة ما بدي
بخلي حرفك مزوزق منقط

هربت منك صحيح بهيك حالي --- تا أحفظ قيمتي وإحمي كمالي
أنا حبوب اللآلي الما بتخسر --- وانت عيون جاعن للآلي
وتحت شمس النقد عا كل منبر --- رح بتضل لاحقني لأنو
وين ما بروح لاحقني خيالي

مشرف عدد الرسائل : 519 تاريخ التسجيل : 15/03/2008

رككت شعري بقصد ع قـــــدك = حتى يضل المستوى حدك
وصابون باعثلك مع فقـــــاقيع = ترغي وتفقع قد مــــــابدك

ومع كل فقعة نعوتك بــــتـذيع = بجرزك يابحر الميت ومـدك
شو قصتك خرفان عم بتضيع = بألوان حرباية الربيع تشوف
اعمى القلب والعين منعدك
========

محلك عود اقعد عن دراسي = ياغيلم شعر مابتعـــــلا رواسي
لغيرك عيب تاتقــــــعد محلو = وتزحط زحط لو طل الأساسي

يافادي فكرك المغـــرور قلو = التبر مابينحسب مــتل النحاسي
انتي ودفك المـــــــابستحلو = ولا بستحليه ياخــــذ درس قاسي

فيوز دماغك الملطـوش كلو = بدو غـــيار عن خبــرة ودراسي
لازرعاتك بحقل النــور غلوا = ولا افكارك بتــــــعرف قداسي

ياذلو الماعرف حرفي ياذلو = الكلـــمة محولي بحربي قواسي
واذا بجوي القوابر رح يعلوا = بلا ريش وبلا رقبة بيـــعودوا
لانو كبير ع قياسن قياسي
===========

اذا الثعلب بساح الحرف وع وع = الحرف ما انهم مهما كثير بعبع
بلا مالـــــوّن حروفي الغــــنــيـة = أكبـــر خصم بحروبي تضعضع

واذا المدرار بالصبح وعشـــــية = متـل الطبل صوت الحرب قعقع
شو بيهـم حرف الأشبــــــــهـيـة = الخـاض معمعة وجفتـــو ع كتفو
مابيرحم بليقة ولا سكعكع
======

سمالله عليك شو عندك مراغــة = وكلامك صفصفي وخرج الملاغة
هجمت ماعرفتني حامل شميزر = وشراشير القــــــــوافي والبلاغـة

انا بالمرتجل بسبق الليـــــــــزر = لونك بصبغو بحرفي صبــــــــاغة
وعجين بقطعك من فوق ميـزر = لاتنــــــزل ع مدى مجالي الطويلة
ومعك رشاش حامل نص باغة
==========

يافياض وحي النوم غـــــــاطك = ع مرمى الحرف كول الوهم شاطك
صوتك ضفدع وزايد نقيـــــــقو = وخيوط العنكبوتـية ســـــــــــــياطك

انتي وصاحبك ع الفور فيــــقوا = وقلو شـــــــــــــوي خفف اعتباطك
وبقلب المنتدى بيوجد رفيقــــــو = الصرخ يــاحـرب بـهوى ارتباطك

والقبلك اجا وواقع بضيـــــقــــو = من الفـــايس بووك ذاتو اختلاطك
المابيعرف حرف يسأل صديقو = ويافـــادي اليوم متلو رح يصيبك
زناقك قاطع وشنقك قشاطك
========

خلقت للشعر شــــاعر ع مزاجي = نسر مابرحــم بجوي دجاجي
حرف الضـــــــاد قـدمسني بدرة = لنطق اليـــعربي مرفوع تاجي

عملت ناطور احمـي الخلف مرة = اذا هجـموا الجدايا ع حراجي
عن حرج الأرز ابـــــعـد مضرة = لأنـو الأرز تانصونوا بحاجي

هجم حكمات من بــــــــــرا لبرا = رجع فياض من خوفو يناجي
ولأنو المجد ع حروفي تمـــــرا = مــافي حل عنـــــــــــو تايقلي
بيقدي ياحرف دخلك وحاجي
==========

موضوع: رد: عتب ع سليمان السبت أبريل 11, 2009 9:02 am

يا حرف مواهبك وقعت شهيدي --- لأنو ثروتك طلعت زهيدي
وإذا رح كرمك بالشعر أكتر --- يمكن اعملك ساعي بريدي
إلك يومين بالشعر المهوّر --- يا ريت عطيتني فكرة جديدي
وعم تلوّن متل طفل الزغيّر --- وحرفك لون داكن لون فاقع
متل فستان نوريي بليدي

---------------------------------------------------

يا حامل شميزر إنتقامي --- وشراشير ما بتقرب مقامي
خليلك رصاص الما بينفع --- أنا قنعان برصاصة قلامي
باغة ونص باغة يا مدلع --- مش هيدا هدف شاعر عصامي
وأرض لبنان كانت ما بتولع --- إذا بيفنى السلاح الإنقسامي
أنا فكري سلاحي بكل موقع --- وأنت ميليشيا إرهاب دامي
أهوج داير الطرقات يقطع --- لأنك ما حملت روح التسامي
رصاصاتي اللي منها النور شعشع --- بعيدي عنك بمليون قامي
وبعد ما أصرعك في هيك موقع --- رح تكتبلك الرحمة العليي
عا قبرك بعد ما حط الرخامي

--------------------------------------------------

انتبه يا حرف بيكفي تجني --- على كل حال خايب فيك ظني
صوتي كيف شبهتو بضفدع --- وبعد ما سمعت صوتي عم يغني
على كل حال لو ضفدع ما بفزع --- اتركني نق عا بحيرات فني
وكلما برغشي متلك بتقطع --- قادر إبلعك بالشاعريي
إذا بتمر مرة حد مني

--------------------------------------------------

هدي إذا رح تقدر تهدي --- حدي لا تقرب والشمس حدي
من مطلعك صار السمع مسموم --- ومن نيّتك نقّزت لمخدي
يا حرف شو بدك بهيك هجوم --- ما زالك بهالكار مش قدي
سآل اللي قبلك منهك ومهزوم --- من قبل ما تألف معي ردي
وقبال لمدقة يا حص الثوم --- بهورة وغرور بيقدي
بالأرض لو طرحتك ما فيك تقوم --- إلا ما إرجع شيلك بيدي
وعا منبري وبجونا المحموم --- كل السألتن عن حرف قالوا
مسمار عم يندق بمهدي

--------------------------------------------------

خلي فكرتك فكرة عميقة --- وخيالك دشر جناحو طليقة
لا تحكي بثعلب وضفدع بزمك --- ودجاجي وبيضة أو بليقة
إذا جايي عليي تبخ سمّك ---- وتصليلي متل حيي عتيقة
سنّك بسحبوا وفروج همك --- بساحة سيرك أو روضة حديقة
وإسم الأرز ما تمرّق عا تمك --- لأنك محل والأرزة عريقة
وإذا بيطعموا الأرزة بدمك --- بيهروا غصونها الخضرا وتيبس
وتصفي حطب خرج الحريقة

------------------------------------------------------

يا جايي تشنق حروف المعاني --- وعنق فياض والفكرة الملاني
قبلك في يهودي هيك قرر --- وعلى فادي الدياني كان جاني
صلب عيسى وقبض فضة وما فكّر --- إنو رح بيندم عالخياني
ومتلو إنت يا حرف المهوّر ---- لتشنق حالك بتيني ملاني
اشنقني ويتّم بموتي المنبر ---- تا أجيال الزجل ترجع تصلي
لفادي الموهبي وفادي الدياني

مشرف عدد الرسائل : 519 تاريخ التسجيل : 15/03/2008

يا فادي عيف منبرنا المـــوقر = لانو باب فلسفـــــــــــــــتك مدقر
شوخصك انت بي فادي الدياني = الفدا أرواحنا وع الجــــــو صقّر

انت عا منبر الكلمة أنانـــــــي = وانا حرف السكب شعرو مجوهر
ومن درسك اذا جايي تـعـــاني = بضربة كف من تمك تهــرهــــــر

انا حرف المنابر يا زمانــــــي = وما عندك من رصيد الشعر جوهر
حرف ماحب بقبالك يعانــــــي = ويسكبلك قصيد الشعر مرمـــــــــر

انا عا النت شاعر أولانــــــي = وحكمت بشنق عا شــاعر تأخــــر
لأنو بعد ماعطيتو معانــــــي = فيها من حلا النغمات ســكـــــــــــر

اجاني بالزجل قاصي ودانـــي = عصرت الغيم موت ودم أحمــــــر
وصلت لاصدق و أعلى مكاني = ومن حروفي السكبـتــا بفـرد ردة
تركت قدموس ع الكلمات يسكر

=============

يا فدّو مين قلّك حرف قاسي = الحرف بالعلم منــــجد بالدراسي
وانت استاذ قالولي الجماعة = ومركب فكرتك عا الجــــهل راسي

انا بطق القصيدة بربع ساعة = وما عندي بالزجل غش ونجاسي
اذا بتجيب عا الفيس الأذاعة = موقع شعرنا بيـــــــــبــقا الأساسي

ياوجه البووم بسنين المجاعة = القرد لو شافها ســــاب الحراسي
وحروف القافية هيّي المناعة = واذا بتكـتب قصيدي بلا حروفي
كأنو البحر زقيّتو بطاسي

=========
واذا افــــــــــــكارك بتبقى رزيلي = على دروب المهــمة المستحيـــــلي
رجال السيــــــف بدهن حد سيفي = رجــــال الفكر في الهن وسـيــــلي

رصاصي طقلت ع صدرك ياحيفي = رصاصة خسرتها بقامي هزيلي
وبدون مقاوم الكيفو ع كيـــــــفي = لومـــا رصاصنا ع الدم خرطـــش
مادشّر ارضنا هالاسرائيلي
==========

وتاتحرق ارزنا من شيش لحمـي = قلبك بـــــــــان لونو متل فحمي
رح اغليك ع نار المواقــــــــــــــد = وع عظمك مابخلي غير شحمي

اذا كنك حواس الخمس فاقــــــــد = الارز مـــافيك فوق الطود تحمي
ع كعب الارز افضل ضل راقــد = لانـــــــو كل مابتــــــــقب راسك
بدو يطير مني بدون رحمي

=========

بحياة ربك مين ع الفيس ببوك = ضحكوا عليك وللحرف ودوك
ماعرفت بدو ملوك بالســـاحـة = ومتلـك مابدو بالزجل صعلوك

خليك نايم فوق طرّاحـــــــــــة = ولا تروح طُرح وخبّر الدفشوك
مافيك بحري تقطعو سباحـــة = بالفايس بوك بيصرخوا الاطفال
والمنتدى عرش انبنا لملوك
=======

يابن فياض ليش عملت خضة = وعكس يوضاس عم إقبض الفضة
يوضاس باع معلمو ياســـــوع = والحرف قاتل كــــــــــــافر تفضى

تفضى بلا ايمان ضوا شموع = وراح ينذر قــــبل مــــــــا اتوضى
يربح ع حرف بمنبرو مطموع = يعلا صقرمش متل افعــــــى يفح
ومش قادر يعضو ربع عضة
=======

وسمعت صوتك فيديو يوتيوب = وقت البــعيد الأم رحت تجوب
وحكيت عني وعن حرف تاني = بين الألف والميم مافي عيوب

هونيك كنت مركّب معــــــــانـي = ومع كل كلمة كنت عم بتذوب
لكن شو صابك ضمن ميدانــــي = بلشت تحكي الحرف بالمقلوب

يمكن لانـــي نار شعلانـــــــــي = وعليك بقسى والحرب مرغوب
لكن بعد مابزيد دوزانــــــــــــي = عليك خايف لو بعـــلــّي الدوز
تهرب متل غيرك بعد ماتتوب
==================

موضوع: رد: عتب ع سليمان السبت أبريل 11, 2009 4:52 pm

[b

]هي أول المرات يا سليمان --- بشوف شاعر بالوهم غرقان
بينهان مرة تنين وتلاتي --- وبيجود أكتر كلما ينهان
بيشبه سنبلي بحقل قمحاتي --- راسها شامخ ومش مليان
ورفاص عا سريري بغفواتي --- ان ما بكبسوا رح إقشعوا عليان
علقت بلسانو بجولاتي --- ومتل نسوان الفرن خلقان
يمكن إلى أهون بعلقاتي --- كون بلسان الجاريي علقان
تعودوا خدودو عا لكماتي --- احمروا وصاروا يشبهوا الرمان
وتعودو شفافو عا خبزاتي --- شبعوا وسبوا المعجن المليان
يا حرف ما ضيعت أوقاتي --- عليك غير تا أعملك فنان
راحت ضيعان عليك سهراتي --- بأول نيسان رجعت عالموقع
وضليت كذبة عا مدا الأزمان

------------------------------------------------------

لا تزايد عليي يا دم تقيل --- إنك مقاوم والدما بتسيل
كلنا بلبنان وحدة صف --- وقفنا سويي ضد إسرائيل
ومش بس بسلاحك منطعم كف --- لشارون لما عا وطنا يميل
بالعلم فينا عا بعض نلتف --- بالشعر بالدين بصلا وترتيل
إفهم يا ناسي دماغك على الرف --- لما السلاح يكون وحدتنا
منقضي عا باراك وعا عزرائيل

--------------------------------------------------------

يا حرف عيد الأم بيقلي --- كلما الربيع الأرض بيحلي
وينك تعا يا شيخ هالشعار --- للإم فوت لمعبدك صلي
صليت والإمات كانوا كتار --- وبقلوبهن في نور متجلي
ذكرت حرفين بتقا وإكبار --- حروف الألف والميم تا علّي
والله وكل الأنبيا الأطهار --- باركوا هالعيد والطلي
وما ذكرت حرفك إنت يا سمسار --- حروف الألف والميم فيهن طهر
لكن إنت حرفك حرف علي

----------------------------------------------------------

إذا بحلل بيوتك هالعليلي--- بلاقيها جنب شعري هزيلي
بقراها وبتذكر الغابي ---- ومخلوقاتها المنها قليلي
فيها البوم فوق السطر رابي --- وفيها القرد بالبسمة الجميلي ....
وفيها العض ونياب الصلابي --- وفيها الصقر والأفعى الذليلي
ودجاجات بتقاقي عا بابي --- وضفادع ما بتعكر سلسبيلي
يعني يا حرف بعد الكآبي --- دشّر منتدى الشعر الخليلي
ولا تزعجني ولا تزعج صحابي --- شفلك مزرعة وعمول راعي
وبكل هكتار ربيلك فصيلي
---------------------------------------------------------

وإذا بتكتب قصيدي بربع ساعة --- اسمحلي قلك برافو وفظاعة
الشوك بسرعتو الحقلي بيملي --- غير القمح هالبدو زراعة
والجوهر ما مرة انباع جملي --- لأنو صناعتو أغلى صناعة
وأنا يللي بسرعة بتبتسملي --- ما بتدخل عا قلبي عن قناعة
إنت يا حرف رايح فرق عملي --- إذا بيغلى الحكي بتسكت وتجمد
وإذا بيرخص بتطوش كل قاعة

------------------------------------------------------------

وعا هيكي طفل ما عدلي جلادي --- ما عاد بينفعوا إلا العيادي
بيتو قزاز بيراشق حجارة --- كلماتو عصا من كل وادي
أنا هيدي إلي آخر عبارة --- بحواري الكحّل عيون النوادي
ما بدي وقتنا يمرق خسارة --- وننحت بالبيوت بلا إفادي
وإنت يا حرف عن وجي توارى --- بيكفي حملت من إسمي شهادي
افتخر فادي معك مرة تبارى --- إذا بتفهم بتجمع در شعري
وبتعلق على صدرك قلادي

----------------------------------------------------------------[/b]

موضوع: رد: عتب ع سليمان السبت أبريل 11, 2009 5:10 pm

[

يا شباب بعض الطلب من حرف يفتح موضوع انا بعتلو رسالة بعتها حرف لفادي عفوا عا الخطأ
لأنو ضعيق النت عندو

حرف

فرفط يا ورد الموهبة زهورك ودوب***عا شب جايي يحج عا أرض الجنوب

فادي يا فادي الحب ما بيرحم قلوب***والموت كلمة معلّقة بتم الحروب

توقّى بطش حرّوف من وجّو هروب***ولا تضل واقف متل الغيرك عا الدروب

ان ضليّت تطلق بالغنا لسان الهجا***بخليّك شهر ونص عايش عا الحبوب

[/b]

موضوع: رد: عتب ع سليمان السبت أبريل 11, 2009 5:32 pm

كمان يا شباب بعت حرف هودي

يا استاذ الطفالى مش ندامي = تعلق مع حرف بالشعر دامي
اذا مدرس صفوف الجامعية = معي بتقرقش كواعك ندامي

انا بلا مواخذي محتاج مية = بحربي يهجموا مافي ملامي
وكلما تكاثروا الإعدا عليي = بقول المات عن قلةّ السلامي

وبوجهن بفتح قبور المنية = النسر بالشعر مابيرحم حمامي
وفادي وحكمت الهجموا سوية = منهم ماحدا بينجح لحتى
حرف ع النت يمضيلو العلامة

وبدك علامة خــــــــــوذ استفـــــهام = وعني تحرى حاجتك أوهــــام
الودوك صــــــــــوبي بالزجل غشوك = وحياة عينك ع الضيم مابنــام

ضحكـــــــــــوا عليك وتشتشي علوّك = بعلوو شفرة ع بلاط رخـــــام
وشاعر مخادع صرت ع الفيس بووك = وبمنتدى الشعار علّي مقــــام

هونيك بالتحضير لـــــــــــــو جبروك = تعمل متل غيرك بطل مقـــدام
وبالإرتجالي هــــــون مــافي صكـوك = من هيك مابتفيدك الأحــــــلام

حبيت احسبكن قبالي ديـــــــــــــــوك = ماقبلت يادجاجي ملاني عظـام
المملوك مابيعلا بعرش ملـــــــــــوك = إلا إذا غيرت فــــــــــيك اللوك
وعملت زلمي بآخر الايام

======
يافادي الماشفت منك إفــــادي = بيكفي الحرف يامغفل تعـادي
بصوتك طل نادي الحرف ربي = تاإفتحلك بــقول الشعر نـادي

حاجي خلف اصبع مستــخبي = متل انســـان ماعندو مبـــادي
تاتقبض مرجلي إدفــــع ولبي = حوار جديد تاتبوس الايـــادي

اذا بالقلب في عندك محبي = ومش مشلوخ من حرف المعادي
انكنت استاذ بصفوفك مربي = هون الحرف رب الشاعريــــــة
مربي كثير شعرا من بلادي
==========

يا بن فياض نشّفت القريحــــة = كتبت بيوت خسعة ومش منيحة
انا ريحة الوردة المستحــيــــة = وع غير القلب ما بتدخل الريحة

ما بدي تقول حرف العبقــريــة = جــــــــايي يعملك فكر الفضيحة
وعي قدموس عيّطلي يـــا بيي = وأخــــذ ابن الغزالي كم نصيحة

انت ما فيك تتهمني بحـــيـــي = وخيــــالي سكّت ديوك الفصيحة
انا بالشعر قيمة ومعنويـــــي = وع الفيس البوك جولاتي مريحة

عملت ع النت قوي حربجـــية = شريحة ترفــــع وتمحي شريحة
وفيك رضيت تتهجـّم علـيـــي = تـــــــــاإعزم كل شعــار المواقع
ع باربكيو رح اعمل ذبيحة

يافادي الحرف قوم ودق كاسو = اســـــاس المرتجل باني اساسو
الوحي بيزورني الصبح وعشية = ورجع من مرجتي مطيب نفاسو

انا حروف المعاني الجوهريي = وجســـم ما ضل موقع عا قياسو
انا شركة الطاقــــــــة العالمية = وجبــــيــني ما حدا يا ولاد باسو

وانت شركة قاديـشا او الجيّي = بـــــــــدون فيول واللمبات ناسو
انا مغارة طبيـــــعي جعيتاوية = الفـــضـــــا قنبازها الغيمة لباسو
انا بالشعر جــــــــنة سرمدية = ركـــــــع رضوانها زدلو حواسو
وانت بالمنتدى ع شــكل حيي = وحنش سمّو طبيعي في ضراسو
وانا لحاف السما ضيـّـق عليي = فلشت بسطي ع فادي وصرت إسطي
وجبينو بالوحل حرّوف داسو

=======

موضوع: رد: عتب ع سليمان السبت أبريل 11, 2009 9:40 pm

يا حرف عمرك صار فوق الأربعين --- لكن بعمر الموهبي بعدك جنين
بتبني قصيدك عا فكار مفلسين --- وبتصير تشقع بالسطور الفارغين
الجيي وقاديشا ليش تا بشعرك تهين --- وإبن الجنوب بكل موطنا ضنين
عايش عالحبوب وما بخجل يا فطين --- لوما حبوب القمح ما بتعجن طحين
وتا معجن الإلهام ما يحمل زغل --- جايي تا شيلك متل شعرة من العجين

مشرف عدد الرسائل : 519 تاريخ التسجيل : 15/03/2008

فياض شوف الداء بدو أدويــــَـــة = وجهلك استصعب ع المرض والأوليا
جنوبي شمالي بشعر علاّ الأوديـا = ع الحرف مابتربح جيــوش وألــويــا
بيني وبينك في فروق وتوريــــــا = ياجهل شاعر مدعي بشـعرو ويـــــــا
ناسي أنا سليمان بدي كرّمــــــو = بيــناتنا قطّعت شَـــــعــــــــر مــعاوية

عدلت البيت يا شباب اسمحولي لأنو معو حق حكمة عا السرعة كل شي مقبول وبطلب من خيي فادي يعدل بيتو لأنو بعتقد كمان عا السرعة كاتبو ومش معناتها فادي بيكسر

- بخصلي مهتريي ما بتملي جرار

مش معناتها مكسور لسمحالله بس بدك توصلو تا ينوزن هههههه متل بيتي بدك تقّطعو تا ينوزن ههههه
بعدنا عا الموضوع قطع ووصل ههههههه

============

يا شاعرنا حرف....ولو لي عطول بتكسر الشعر هيك؟ معي كسرت وقلت كانت مطوعة الكهربا...سامحناك...و هلأ كمان كانت مقطوعا؟...
"
ناسي لوما سليمان بدي كرّمــــــو

"
مش مكسور هيدا؟......

شفت لي أنا ما عاد جاوبتك...؟ بس في عندك بعض الشردات الحلوين....بس هيدا التكسير لازم تشتغل عليه...

يعطيك العافية

[center] [size=24]عا منبري يا حرف بعد الإختبار --- بخصلي مهتريي ما بتملي جرار
لو قطعت شعر معاوية وشعلت نار --- ما فيك توصل ليل جهلك بالنهار
بين القطع والوصل بعطيك الخيار --- حاجي بشعر الصفصفي تخفف عيار
فتحنا معك موضوع بلكي بالغلط --- تشطح معي بصورة جميلي بالحوار[/[/center]size]

مشرف عدد الرسائل : 519 تاريخ التسجيل : 15/03/2008

خليك قطع بوصل بس بلا مــــيـــــاه = لســــــانك بعركةّ حرف تفكــيرك بلاه
بقطع ع ذوقي بوصّل لعند الألـــــــــه = ذنبو ع جنبو المابيعلى مستـــــــــــواه
واحلا ماتكتب حرف بالموضوع تاه = نقي اللي أهون انت شو البدك ايــــّـــاه
انردت القطع رح بقطعك ع منــبري = انردت الوصل فيـس بوكك بدّور عـزاه
==========
ياريت كنت الحرف بتشبّع عـشـــاه = يما غداه طلعت كان لحــــــمـك شواه
فكرت غنجك هون بيحقق منـــــــــاه = مـاعرفتني كرهت الغرور وكل جـــاه

===================

[center] دخلك اقطعني متل قرص من الرحيق --- تا ذوب عالشفة على التم الرقيق
اقطعني عجيني من الخميري والدقيق --- اخبزني اهديني لليتامى عالطريق
خود القطع قطّع وراقك يا غريق --- اتركلي الوصل تا خلصك من كل ضيق
جربت أوصلك نباريش الهوا ---- من الضربة القاضيي مش رح تفيق

--------------------------------------------------------------

صعبي سباحة تقطع البحر الغميق --- ولا تقرّب نحاسك عا خزنة من العقيق
سليمان حتى تنجح بموقع عريق --- حرف حطوا إحتياطي بهالفريق هههههههههههه

----------------------------------------------------------------------

خيي حرف اكيد كلنا عالسرعة منسهى أحيان عن الوزن خصوصي إذا عم نكتب إرتجالي بس سمحلي وضحلك إنو الشطر : بخصلي مهتريي ما بتملي جرار
منو مكسور لأن اللام بكلمة بتملي مشددة ومنها مسكني [/center] .

مشرف عدد الرسائل : 519 تاريخ التسجيل : 15/03/2008

قطّعت لحمك بالسيوف وبالســياخ = ومن ريحتك ع النت بو شربول داخ
وصلتك بخيط زغير بعد الإنتفـاخ = تا صرت غمّي مقطـــــبّة ونتفة مخاخ
شلهوب قلّي يا حرف فيّاض نــاخ = وحكمت حبيب القلب متلو قــــــال آخ
هو كلهن قطعو ع قبرك بالزجـــل = واللي وصل ع القبر بلّش بالصـــراخ
====================

نشالله تكونوا ياشباب بتحبوا الغمة و الآنسة ليلى معزومة أاول وحدة ع الغدا
هههههههههههههههههههههههههههههههههههههه
================================

شكرا على العزيمي الدسمة عزيزي حرف، والأدسم منها هالأبيات الجميلة، وأعتقد أن ضربة فادي " القاضية" استطعت النفاذ منها ورديت عليها بهجوم صاعق، وأظن أن الشاعر فادي فياض لم يحسن التعبير في القول بقطع شعر معاوية، حيث لم يصب المعنى، وإنما ضرب المثل لا بقطع شعر معاوية بل شعرة معاوية وهو القائل أي القائد معاوية: " بيني وبين أعدائي شعرة..." أظن أن فادي أراد التعبير ولكن القول بالشَعر كله يضلل المعنى،
لا أنكر أن في شعر فادي جماليات كثيرة، أنتظر المزيد.

مشرف عدد الرسائل : 519 تاريخ التسجيل : 15/03/2008

لمـا ابــن فـياض عاد من السفـــر = استبشرت خير وقلت بوصولو انحشر
من القطع خاف وبالمفيد المختـــصر = وضعتو ع نـــار الموقــدةّ حتى كفر
يومـين صارلو وليش تايغض النظر = شو مستحي تخمين مش جايب بُشر
ولومـــــا انقطع نايلون حق التذكرة = لابيرجعوا ولا بيوصلوا كانوا البشر
=======================

يا آنسة ليلى. العزيمة بالعِبـــــــــــــر = وأجمل من الشعّار في عندك صور
وفياض خشبة الحرف فارمها ونشر = وقطعت حيلو بمصر ع راسو دشـر