بحلم يطلّو--غزل

--------------------------------------------------------------------------------

بحلم عابكرا... عيونِك يطلّو...----يدقّو على الشبّاك و يضلّو
و توقع الدرفة مجرّحة تجريح----و قضبان عاقضبان ينسلّو
و مطرح ما كانو تعلّقي مْراجيح---و حوض الربيع يمرحِك فِلّو
و طلّع متل يلي ماشاف منيح..----إفرك على جفوني تاينشلّو
و ترجعي سرقة عاجنح الريح----و تْلوحِيلي.. عالمدا كِلّو
و شو بخاف ديّاتي على التلويح----يهرّو وراكي بدهن يْفلّو

و إنتي تنامي بَقْوة المشوار----و حدِّك تنام الريح مِنْغْلبة
تنامي بغرفة..و ينعس الغيتار----و يصير بدّو ينام بالعِْلبة
و تتقلّبي..بين الحبق و الغار----عالحلم قَلْبِة و عالغطا قَلبِة
و لما من القَلْبِة انوجعت بنار----سمّيت من يوما الوجع.."قلبي"

و ما أجملِك انتي عالوْسادة----فْراشِك مْنقّط..تختِك رمادي
و النوم... مشتقلِك قبل جيليْن----دادي بيزحف عالهدا دادي
و عم يرقصو عاكتافِك حْرامين----و خزّق حرامو الليل بالوادي
تايقطّبو بنجمة تْرد العين...---و يشلح عالحْرامين سجّادي
و شبّهت عينيكي... بمنْقادين----و ما زال أحلامن..بمنقادي
بغمّض بعد عيني ما عندي عين----تا يْغمْضو قبلي..عازوّادي

عينين دخلِك شو لها مْطاليب----تاروح إبعت بهجتي تهريب
و خدّين شو مشتقلهن نوّار----من يوم خِلقو تْعرّبو تِعريب..
خدّ الدمع.. فوقو الدمع بحّار----و مش موج مِشْيو..موج و مْزاريب
و خد الخجل..حطّ الشمس عالنّار----كرمال تحْمر عالخجل و تْطيب
لا تدمعي قدّامها شي نهار!!----خايف تْحنّ عْلى الشفق و تغار
----و تروح تسبح بالدمع...و تْغيب

ما عاد إلقى دموع بالمرّة----لا تدْمعي و تْعادوي الكرّة
و ان صار زعّلتِك أنا شْويّة----و طافت العين و فاضت الجرّة
بقدّم عيوني جْرار فضّية----أحسن ما توقع دمْعتِك برّا
و ترجع ملاني جرّتي ليّي----و تاتخلصي من دْموع محْمرّا
إكسر الجرّة و إكسر الميّي----و إكسِر شو عندي كل شي نظرات
----و لا يعود يكسرها الدمع مرّة

إبراهيم ياسين 14/04/2009

الله يا ابراهيم كل ما اقرالك قصيدة يا جار بقول ما خوف بعد في جزل اصيل

وخدلك ها النقروشة

نزلت الغيمي

من السما

نقطة وحي

وصارت قصيدة

شعر

يا

يا مللاح

لبست خيالك

بالجمال

وشاح

وبعدك بتكسر

جررتك

ماااااا بتستحي

حلوووو

و ترجع ملاني جرّتي ليّي----و تاتخلصي من دْموع محْمرّا
إكسر الجرّة و إكسر الميّي----و إكسِر شو عندي كل شي نظرات
----و لا يعود يكسرها الدمع مرّة

عمللك شي امسييي عننا يا برهوم بزحلة عممك امطانيوس

إلنا الشرف يا جار، إذا بحضورك و تحت إشرافك بنعمل أمسيات كمان