عامِك العشرين

بعيد ميلادها العشرين...هديتها هالقصيدة

مبارح عشيّة... تربّعو السنين----مدري عاأيا أرض بالتكوين
و عام المضي نطروه لما يطل-----حتّى يودّو عامِك العشرين


و عيدِك و صرلي ناطرو من شهور -----كتّف الشوق... و ألجم الأسرار
و أبرم الليلة... حول حالي و دور------- برْيو عادعساتي زوايا الدار
و طلّ الصباح ...بعيدِك المنظور---و سْبقت حالي عاخطى المشوار
طارد الدرب... و قطّف المنثور------ و ضمّ الهديّة و باقة الأزهار
و قْصدْت غيمة ...مع صباح النور------- نسّلتها أربع وْتار زغار
تاكل مرّة يحفّها العصفور... ---- تمرق الريشة... تْلعّب الأوتار


و كل شي شفت عالمفرق حْساسين----و بْلابل تعمشق على الشربين
ما سْمعت نغمة و لا شفت منقاد---- إلا و عم بيعدّ ...للعشرين!!


و صدفة التقيت بعامِك العشرين----و من قبل منّي... ماحدا شافو!
شفتو ملاك... مجنّح بتشرين---- جايي عا غيمة و جانحو لحافو
بصدرو درع مشدود برْياحين---- بإيدو علم... و بإيد مقدافو
محفور من خدّو على الجبين----لوحة أسامي كل أسلافو
و إيّام ...معقودة بالشرايين...----و عملو مسابح... ما بينشافو!
كل مسبحة... حبّاتها تلاتين----انعربو اتنعشر شهر عاشفافو
و ستّة عاصدرو تعلّقو نْياشين---- و الستّة الباقين... عا كتافو...


و عابساط متل نعومة النسرين---- تربّع عليه بهيبة سلاطين
و مدّ الخرايط حدّ منو و صار --- يفتّش عابيتِك عامِك العشرين


و قرّبت شفتو حسب تصويري-----لاطي بكعب صنوبرة كبيرة
حدّو الخرايط و الخطوط حدود----و عم يشرد و يعرق من الحيرة
و لما كعي و صار الأمل مسدود----- و شافِك بعينيّي عم تطيري..!!
تفتّق على الصرخة صدر الجرود:---- "حلّفتك تدلني على الديري"
حسّيت كل شي في عتم موجود--- بارود ...عم يمشي بتفكيري
و دير السبق عامنقل البارود-----ما في جمر... أسرع من الغيرة!


و دربيْن عندو بيتِك من سنين----- في درب بيودّي بثبات و لين
و عادرب لثّمها العتم بالريح--- وقّفت دلّو لْعامِك العشرين


اتركتو... يروح... يمرّ عا غابو----- و خلّي الجوارح يجرحو تيابو
و ما يشوف إلا نياب عطشانين---- رح تخزق العتمة على غيابو
و غصون متل سياط شعلانين----تروح و تجي.. و تبوّس جنابو
تايصير يمشي مشية التسعين..---- و تعلّق الفشخة على ركابو!


و متل الجريح... بنار و سْكاكين-----يتمايل... و يلْوي عالبساتين
و صخرة تروح..تعود صخرة تطل-----و تصبح مخدّة عامِك العشرين


و قرّب من الصخرة... بحنيّة----و لمّو عن الوادي بإيديّي
و يبكي ضمير الفعل عالسكّيت---عاذنب فيي و ذنب مش فيّي
ذنبي لإني عاشق و حبّيت------ و بالحب معذورة الأنانية
ما قدرت إني إبعتو عالبيت------مازال... بقدر آخدو هديّة!!


و آخد البسمة و شمعة التزيين----و يمشو ورا منّي المدعوّين
بتياب عم تضوي..بهدايا جداد-----بصحكة السهرة برهجة الأعياد
و أوصل عابيتِك سهرة الميلاد----و جبلِك بإيدي..عامِك العشرين