البَحر وأنا والليل والمحبوب

البَحر وأنا والليل والمحبوب

وكاس... وشمع شلّال دمعاتو

ومتل الشَّمع خايِف الليل يدوب

وتمرق برمشة عَين ساعاتو

*********************

وهَوني فَرَاشة تحوم حَول النّار

حَروَقِت صابيعي تا إحميها

قالِت إلي: يا مغَفّل .. الأقدار

حكْمِت عَلّيي إحتِرِق فيها

******************

حَسَّيت دَمعة زارِت الأجفَان

والدّمع متعَوّد عَ عَينَيي

مَسحِت دموعي شفافها بتَحنان

بيِشبَه اللّحن بقَلب غنّيي

شفاف المحبوبة مش شفاف الفراشة... بس يمكن الفراشة هيي المحبوبة ال عن تحوم حول النار...

لَيش البِكي؟... حَدَّك قَمر سَهران

وكاس احتَرَق وشفاف خَمريي

والموج جايي من وَرا الأزمان

حامِل معو شي ألف خَبريّي!!!!!!!!

يمكِن لأنّو جَفنِك النّعسَان

وشفافِك بيتمَقطَعو فيّي

*******************

تخبّيت من ذاتي ...بوِسع الكَون

وعَن حِس...ضَاق الكَون عا ذَاتي

يا رَيت قادِر إنتقل من هَون

عا كَون تاني ...يساع دَمعاتي

يسلَلم تمك يا شاعر أحسنت اتحفونا يسا شباب

الله يخليلي ياك ... القصيدة بتحلا أكتر وقت بتعجبكن

Ra23 ya estez 7kmat sallem timmak

عم حنا... رايك كتير بيهمني وشهادتك تاج عا راسي. تسلم

فتّق حكي وقطّب شفاف ..وروح

تعمشق...!!! بورد العاطفي وغنّي

وخليّك يا شيطان بالجنّة

غازل ملاك جهنّم و مسموح

ترجع خطيّة ااادم اتتّني

كـل شـي تكـوّن بيـن أشياء ونبـــات

بيحمل إســم.. تا يميـّـزو عقـل البشـر

بحسـّـك بتجـهـل شو أسامي الكاينـات

من هيـك لمـّـا تعبـّــر بترســـم صـور

الله واكبر

رائع يا حكمت

الله الله يا بو شربل. حللت القصيدة مظبوط بهالبيت الرائع. تسلم... حطيت ايدك عالجرح

طوني رائع متل عادتك بشكرك

خيي علي الله يخليك،،، بشكر لطفك الله يديمك

كيف الشِّعر من دون حَكي بينسَاب

عا داخلِي منعيونِك الزَّرقا

وبصير فَلفِش دَفتَر الأهداب

وَرقة... وَرَا وَرقة.... وَرا وَرقة

عيونِك بقلبي بترتِكِب إرهَاب

وبتفجِّر بنفسي ألف حَرقَة

الله عطاكي سحرك الخلّاب؟؟؟؟؟

َيّما سرقتي هالَحلا سِرقَة؟؟؟؟؟

الله يسلم تمك حكمة

عن يتهموك حملت محاية
شعرك صلا وترتيل بالاية
الخلاب منظر والحلا مانطال
لاكن بوصفك طايله كفاية
بتحكي الجمال مصوره مشعال
من زهور شعرك صار بوكاية
سكبته بحلا وحنا وغيره ئال
مراية سحرعكست على عينيك
مدري الحلا وائف عالمراية

حلو كتير يا عم حنا... تسلم.

العنقود... لازم يعصرو الَخمّار

ويغَرّبو عَن جِزء من ذاتو

ويطَهّرو... ويقَطّرو عالنّار

كرمال يخلَق خَمر جَوّاتو

وشِلح الوَرد يَللّي مَلان زرَار

بيقَطّفولو زرَار وَرداتو

زِر عا صَدرا بيولَع نَار

يا ريتني وَرقة بوَرقاتو

وزرّ تاني بيِجرَحو العَطّار

تا يصير يبكي من جروحو عطر...

وتتعَطّر السَّمرا بدمعَاتو

عطرك هوى وورودك فراشي

ونحلك بيسرق شهد تا يكفّي

وخدود شعرك طابعة الشفّي

وبيضل نهر قصايدك ماشي

يا سلااااام

نقّط ندي عا وراق ورداتك

تا يغل دمع الغيم بالزهرة

ويضيع عتم الليل بالسهرة

فتّق عراوي الصبح من زاتك

يا عين

وها السمرة الحبيّتها مسكين

راحت مع الأزهار تنزيها

تركها شو بدّك تبتلي فيها

عطر القصيدة بيجرح السكيّن

عا الشعر

دوّب حلا وعطّر وراقك طيب

وخليّك ملهي تفتّق عراوي

وان كنت بعدك عا الغزل ناوي

من وين حق العمر رح بتجيب

بحر الزجل وجنزرال الغزل
بو شربل

حطمة شديد

بذكُر صَبي كان بصبيّة يموت
وكانو عيونا كلّ أحبابو

منعيونها يغرُف زَجَل مَنحوت
ويرسم حَلاها شِعر بكتابو

كان يقطفلا كبوش التّوت
ويجمعلها الوَردات بجيابو

طَلبِت يْجبلا مَرمَر وياقوت
منبلاد... خَلف البَحر وعبابو

صار الزَّمَن يمحي حلم مَكبوت
ويحفُر سنينو حَول أهدابو

لِم عاد لاقى البيت كلّو سْكوت
وتبقى الدّني كلاّ خلف بابو

صار يبكي حُب عشتَاروت
لِم ...شاف دمع الدِّلف عَ عتابو

قَلّو الصَّدى عا بيتنا لا تفوت
طال الهَجر يا جامع المَرمَر
الأحباب خلصو دموعن وغابو

بحر الزجل بو شربل

حسيّت فيك و وضعك مداري

ودشّرت نهر عواطفك جاري

وما كنت يا بن شديد عزم شديد

ضليّت راخي النيـــع يا جاري
ههههه

مغروم فيها وضارب مواعيد

وبتحب غيرك ....؟انت مش داري

تركها مع سليمان حاجي تزيد

أوجاع قلبك توبك عياري

تعلّم يا أبني الحب مش بالايد

ولا فيك تبقا تحب ح.....اري

هههههههههههه
حب المرا بدو هوى وتنهيد

وشوق وقناعة وعاطفة كبيري

وما يكون بين الناس أجباري

جنرال الغزل

حكمة شديد

يا ليل لَو بَعطيك أسراري
وجرحي... وحَنيني... ولَوْعتي... ونَاري

بتصير تغزل مِنِ العتمة نور
وبتصير تكتُب متل أشعاري

شو بخاف إحرُق زهرِةِ الَمنتور
لولا سقَيتَا مَدْمَعي الجاري

وبخاف إعدي الحزن للشّحرور
لَو يسمع الجَرحَة الْ بأوتاري

بتعير دَمعَاتَك لحَوْض زهور
وبيرجعولَك... حُكم إجباري

لاكن أنا يا ليل يا مَسرور
قَضَّيت عُمري إجمع الدَّمعات
وقَدَمتُن هديّة ...مش عْيَاري

بحر الزجل بو شربل
بحر الزجل
بو شربل

يابدر ضوّي العتم كرمالي
تا شوف روحك طالعة قبالي

تركني مع الوردات شم عطور
ونيّم قفير النحل عا ديالي

يا ليل انتي صاحبي المغرور
بتعرف حياتي وكل أحوالي

الهديوك عتمة وشلّحوك النور
هودي من الحسّاد يا غالي

لا تخاف تهدي الحزن للشحرور
الشحرور صوتو مخرسن الآلي

وانتي بصوتك متل شي دبّور
بتشرّد الزيزان بحقالي

خليّك بين الورد والمنتور
جانح فراشي من الشهد خالي

ولا تضّل تكتوب شعرك المكسور
وللوزن هيك تضل ما تبالي

علّي بجوّك تا تشوف نسور
وتصير متلي بالزجل عالي

وتراك ورد العمر يا أموّر
ودوّر عا شمس الموهبة يا ليل
وغنّي مع الأشعار يا لااالي

حكمة شديد

صديقي سليمان... قصيدتك كتير حلوة...الله يقويك. بس شفلي هالجواب يللي عا نفس قافية الصدر والعجز بقصيدتك. هاهاهاها ....يا نقطة ببحري...هاهاهاها
عن أمزح أكيد.

يا بَدر طَفّي الضَّو كرمالي

ّمّمترَس وَرَا وَزَّال عرزالي

نامِت عا زِندي شمس ... سَطعِت نور

ضَو القَمَر ما عاد يحلالي

كل ما بحاول غَنّج المَنتور

وإغرَق بِ هالِةْ عِطرها الغَالي

بتجِنّ ... وبيزداد نورَك نور

وبيصير ضَوّك يرسم خيالي

مُغرَم إنت متلي ؟؟؟؟... بمَرا ... وبعطور ؟؟؟؟

وبجفون ؟؟؟؟... وجدَاديل ميّالي ؟؟؟؟؟

وبعيون من سِحرا السِّحر مَسحور

بنظرة... بترمي صَفّ خِيّالي

وبشفاف ... خَمر معَتّق منِدهور

وشحفان... عَنّ الَخمر عا بَالي

مهما فضَحت سِرّي... إنت مَعذور

أرجوك... غبلَك ساعتين وعود

قَضّي بَقِيّة عُمرَك قبالي

بحر الزجل بو شربل

يلا تا شوف لوين بتوصل ساقيتك هههههههههههه
مش مزح حقيقة هههههههههههههههههههه

يا ليل غطي البدر بحرامي
وخلّي النعس يغفا عا أحلامي

وفيّق شذا الوردات حاجي خمول
وكشّف جبين الزنبّق النامي

كيف لاك عين تلووووم...عنّي تقول
نقطة ببحر الذوق وتحامي

عن صوت متل الساقية مسلول
بيشحد دفا من موج ألهامي

انتي صدى النسيان والمجهول
وخيبة أمل مشلوح قدّامي

يا ما عا كتفك مرتكي أيلول
وياما مخبّى عيوب فينا نقول
يا ليل أنتي أكبر حرامي

محيط الزجل وجنرال الغزل
بو شربل

في الحقيقة أطربني هذا الشعر الرائع، واسكرني خمره المعتق في خوابي القافيه، وأنعشتني موسيقى الكلمات العذبة، وأمتعني اللعب على الكلمات واستخراج المعاني.
لِم لا!