تضامن مع أهالي الكارثة بسبب وقوع الطائرة

الطارت ما طارت طيّرت أحلام

وجروح فتحت بالقلب والروح

وأم البتبكي دم ما بتنلام

هيي الوحيدة لأبنها بتقول

عا بلاد غربيي ما بدي ترووووووووح

****************
والشب حلمو يترك بلادو

ويبرم عا رزقة هون مفقودي

واللي مسافر اااااخد ولادو

ما كان عارف سفرتو مشوار

وأم المنيي فيه موعوووودي

*********************
قديش بدك يا بحر أرواح

تا تحن نتفي وتخمد مواجك

ريّح أهل رجّع أمل وارتاح

والكل صدق صار محتاجك

رد الأخدتو حي عا بلاجك

************

غيّر يا أزرق عمرنا المكتوب

ولا تخاف بعدك بحر بنهابك

وفكّر يا بحر بأهل عم بتدوب

نطرت أمل يطلع من عبابك

***********
شو ذنب طفلة عمرها سنتين

متل الورد تا تموت بالبستان

قديش قاسي يا غراب البين

ما تركت ينعم بالدني أنسان

********
بعرف ما عندك ذنب يا أزرق

ولا كان خصّك انت قالولي

لو فيك تترك شخص ما يغرق

رح نعبدك وتصير أمثولة

*********
لكن ما فينا نغيّر المكتوب

ونشيل من كتب القدر ونحط

وعا الشط ياما ناطرين قلوب

وبعدون أهالي الكارثة عا الشط

********************

من كل قلبي بقدم تعازي لأهلنا بلبنان ولكل أهل الطائرة المنكوبة

ونتمنى من الشعراء التضامن ولنو بيت زغير

بو شربل

وردة بعمر سنتين عم بتنام
و الفجر عم بيجهجه و يطلع
و مات الحبر بريشة الرسام
و ما ضل الا ينرسم مقطع
و هونيك بين النوم و الاحلام
و مين قال انو ما بقا ترجع
و العمر صعبي يلحق الايام
و الموت صاير بالدني اسرع
قديش فينا عايشي الالام
و نضل نركض تا نحوش الكون
و ما يوم كنا بالدني نقنع

يابحر ياغدّار ياخوّان
كنت افتكرتك

صاحب الإنسان
كيف طاوَعَك قلبك
على مْساكين
تقلب مواجك
تخطف الخلاّن
***
هودي زنود
بتزرع بساتين
وعَ كتافها
بتتبدّل الأزمان
***
بْدال يابحر
ماتبلع حساسين
ليش بزمانك
مابلعت جيوش
يلّي إجو
تَ يدمّرو لبنان

بغصا سالتو لخالق الاكوان
وين العدل في ناس عن تغرق
لبحر فتكرتو بيحمل لاطنان
بدم الملايكي تْلَوَّنْ الازرق؟
..............................
قلي يا ابني بعرف الصدمة
كبيرة و مصايب حلت بشعبك
عود عيونك تكشح العتمة.
تشوف الحقيقة و اتركو لقلبك
..............................
البحر أنظلم و استقبل الركاب
يحضن جتت و ركام طيارة
اصل السبب غيمة و طقس قلّاب
اصطادت حلم هالناس. غدّارة
...............................

اقدم اشد التعازي الى عوائل الشهداء

عصام يوسف

برد و شتي
و الليل عم ينساب
متل الحكي
من قصّة الكذّ ّاب
و الوقت عم بيضيق
عا خيالو .. يفك الزّرار
ينزّل السحّاب
مخنوق ..
مدري شو شغل بالو
متل لْ كأنّو
في حدا عالباب
و عجقة قصايد
ما بينقالوا
و أصحاب
عم بيودّعوا أصحاب
.....
طلعوا عـَ سلّم ..
هالفضا قبالو
و فاتوا
من الباب
لْ بَلا بوّاب
و دمع و شتي
فوق السطح سالوا
و السلّم
معلّق متل مزراب
.....
طارت
و طار العمر .. نيّالو
مبسوط
عم بيلوّن السرساب
و ما بيعرف
شو مخبّالو
و شو اللي برم
مع برمة الدولاب
.....
فجأه ...
وقع هالريح خيّالو
متل الغروب
الواقع من غْياب
و العاصفه
تدعس على جبالو
متل الصبيّه
اللابسه قبقاب
...
و بقلبها الأصوات يتعالوا
و صمت القدر وحدو
اللي عندو جواب
و بوقتها
شو قولكن قالوا ؟؟
لْ ما بيعرفوا
إنّو الدني من تراب !!
....
هونيك .. حلوي
عيونها جالو و شردت
بذكرى
الورد و العنّاب
و قدّام .. شب
و كل آمالو تبخّروا
بين الضْباب .. ضْباب
و ختيار ..
بالمقعد على شمالو
رايح لحتّى يزور
إبنو لْ غاب
قال .. وصّى
مع إبن خالو
يوصّلو
عا مدخل الركّاب ..
....
خيالك يا طيّاره
على هلالو
متل الصليب
لْمن شقى و عذاب
و الليل ..
متل الجلجله تلالو
عا جوانحك
عم يصلب الأحباب
...
بلّش الريح يْهوج
شلاّلو و القوس
يتكسّر على النشّاب
و جوانح
اللي من التعب مالو
تدهدكوا متل النعس
عا هْداب ...
...
عالبحر
وصلت لفّها
بشالو
و الموج صابيعو
عـَ حرف الباب
و لمّا البحر
فيها نفخ حالو ...
فكّرتها ...
بالبحر منجيره
و الموج ..
عم بيسمّع الغيّاب !!!

من بعد ما دمع الامل صفّى
والليل تحت بطانتو لفّا
لفّت عم تودّع سما لبنان
والموت بجناحاتها تخفّى
موعود فيها وناطر بتحنان
وحكم القدر في موعده وفّى
بلمحة بصر جهّزلها الاكفان
وصارت عروس وللردى زفّا
وضوّا البرق قدّامها الميدان
تا كلّ شمعه بجفنها طفّى
طفل اللّي كان بكرسته غفيان
عالموج نام وغفوته كفّى
وفتّح بوابو البحر للعرسان
ولضيوف عازمهم ع سكره الموت
تا يشربوا كاساتن مقفىّ

مصيبة على لبنان بالإجمــــــــال = مكتـــــــوب إلنا كل سنة تخلق
ونحنا علينا بمجمل الأحـــــــوال = نرضـى بمشيـئـــةّ ربنا المطلق

كل بيت إنساني بحزن انطـــــال = رضيــــنا بقدرنا منخلق منعلق
ولو كان قاسي عابعض العيـــال = اللـــــــــــه يلهمهم صبر ألـمــق

ويرحم اللي توفوا سوا بهالحــال = ويكون لهم عاجنتو مــمـــــرق
اللي انشال منهم والبعد ما انشال = هيذي جريمة جوعها الأزرق

يابحر لاتخلي الجفا رسمــــــــال = حلمك تاتبلع كون وتحقــــــــق
خليك أشفق بس عالأطفــــــــــال = ولنو ضحية فيك ماتغــــــــرق

مبارح هاييتي هزّهــــــا الزلزال = وضل القسا رغم الأسى يشفق
ومن بعد إسبوع وربع ينشـــــال = أطفـال تحت الردم عـم بتعيش
وأغصان خضرة بعدها بتورق

* * * * * * * *
رحمهم الله وأسكنهم فسيح جنانه وألهم ذويهم الصبر والسلوان

حلو يا ابو اسامة

زعقه .. بسما لبنان - تعزية لأهلنا بلبنان بالشرق

د. إياد قحوش 27/01/2010

زعقه .. بسما لبنان

تعزية لأهلنا بلبنان بالشرق

د. إياد قحوش

كلْ ما بيْقفّي ليل
بيـصفّـي
بالبحر صفحةْ ميّ
بتقفّي
كواع جوّا البحر
بعد كواع
وبتضيع أطرش فات عازفّة

**

نْ كان الحبر
دمعة مدن وضياع
ازْرَقّت
وهيّي عم تطفّي
نار الزمان

..
البحر دفتر ضاع
بعبّو الحبر
شَفّه بعد شَفّه

**
ياهالبحر هالرايحين
ارجاع
فيهن بلا بالدرب مَ تكفّي
خبز الأرض
إلهن صباحو جاع
وخدّ النبيد اشتاق للحفّه

**

طارو
ومَ عرفو الجوّ رح يوقاع

زعقه ..
بجبل لبنان بتشفّي
بتقصّ من قلبو
تلات رباع
وبتشقلبو صخره عن الحفّه

**

وانفتحت الأمواج
تمّ ضباع
هاجت ع طفل بقلب الِمْلفّه
تعلّي البشر
وتزتّها بالقاع
ساحر تقيل ولعبتو الخفّه

**

ياجوليا
وينك؟
طلعتي دراع
نزلتي ألف لفّه بألف لفّه
وصار السمك يبكي
من الأوجاع
وأيّوب مزّق سورة القفّه

**

ياهالبحر
صفحاتك بتنباع

حكايات
طفل الموت بتغفّي
بسّ الشرق سهران
حزنو مشاع
بتفوت طيّارة تلج منّو
بتطلع جمر حارق
مَ بيدفّي

قالوا شوصار وشو السبب معقول = ناقص سما لبنان تمشي نزول
بيكفي شقا بيكفي الشعب حرمان = عطشان صيفو وبالشتا مبلول
قصور ومباني شاهقة وجوعان = ناطر رغيف الحاف من مسأول
اما المريض ان زارتوا الادران = يعاني الالم والآه قرع طبول
هاجر يعد ماباع بيتو الكان = مرهون قيدوبفايده ومشلول
حسرة بقلوب الاهل والاحزان = دفعوا الثمن والهم باقي يجول
حرب الطبيعه وعاصفه وطوفان = وبرق ورعدوالبحر صار الغول
سبحان من قسم رزق انسان = بعد لو كتب لانكره المقبول
رضينا القضى نتعالج بايمان = لو شاء ربي ما غرق اسطول
***
الشاعر اللبناني
ابو شوقي

وبعــدْن بيقولو
ها الــبَحر
نعـــمي
للرزق مـــَصدر
للبشَر دعمي
من جـــهـــْتي بشوفك
متل شـــــارون
بتبلع دنــــــــي لاكن
ما بتطعمــــي
والبـــَعض بيشوفك كحل
عَ جفــــــون
يمــــكن لأنو قلــــبك
المعـــــمـــيِ
شــَعـَّل بأحشائك ألف
آتــــــــون
وخبـــــز الحياة البلملح
معــــــجون
من طلتــــــك صفـــَّى

بلا طعمــي