حلقات أوووف عا الأوتيفي

شربل كاملة : إفتتاح:
هرب تشرين من حلم الرقابي --- ونسج كانون كنزات الضبابي
وكتب عا جبالنا قصدان فنو --- بحبر التلج وقلام السحابي
ولما عواصف الإعصار جنوا --- وعي بعب الشجر وجعة كآبي
انتفض نهر الجرد مارد كأنو --- ودعس بالبحر دعسات الإهابي
وانا مني قوافي بكر جنوا --- وبمنجيرة عذابي الآخ رابي
وفيي المنبر تمجد لأنو --- بيوعى عا قصيدة شعر مني
وبيغفى عا منجيرة عذابي

اشبعي يا سنين حاجي تاكليني --- اتركيلي رغيف من معجن سنيني
عجني العمر طفل وصرت إكبر --- وبتلجة شيبتي بيطلع عجيني
وقبل ما العمر فيي شعر يسكر --- خبزت الذوق عا لهفة حنيني
وطعمت الشعر من خبزي المقمر --- وسجنت الموهبي فيي رهيني
وإذا بحري عا بحر الشعر أبحر --- بعمل لمعة الكلمة سفيني
وتا عمّر عا خشبة كل منبر --- مديني ينرفع فيها جبيني
جبلت المجد بالفكر المنور --- وصرت عمّر بيوت الشاعريي
بيت وبيت تا صاروا مديني

جقرت البحر وتخرسن هديرو --- وجبرت الشعر يعصف زمهريرو
حملتوا طفل عا زنودي تا يكبر --- ما ذقت النوم تا هزهز سريرو
وعا هالشاشي يا فادي جيت تظهر --- ومش عارف انا المنبر أميرو
انا بفعل ما بظهر بس مظهر --- انا مني النحل حوّش عبيرو
وانت جايي تباري يا معتر --- وعتم الإدعى بعدك أسيرو
وانا عني المخبّر راح خبّر --- انا الشعر وانا صحوة ضميرو
انا مرجع الكلمة بكل محضر --- وفادي متل ما بدي بديروا
وما زالو شرّف على هيك منبر --- مصيرو اليوم يقعد حد مني
وما يعرف حد مني شو مصيرو

فادي فياض : إفتتاح

قالوا الزجل ذبلان عنابو----مشتاق للصيف وشهر آبو
غصنو العبي عا شجرتو عريان ---وريح الشمالي سارق تيابو
ليلو جروح معذبي وأحزان --- وفجرو حلم ضايع بسرسابو
متل الكانو الليل توبو كان --- وخبا الفجر ببطانة جيابو
قلتلهن عا هالحكي غلطان --- اللي هيك حاكي كفنوا ترابو
روحو اسألوا عن شعرنا نيسان --- كيف القصيدي ملونة عشابو
روحو اسألوا عن شعرنا البستان --- بنكهة زجلنا كل أطيابو
روحو اسألو عن شعرنا الشطآن --- فوق الشواطي مواجنا انسابو
وعودو بعد ما تسألوا بإيمان --- جملة احفرو عالأرز وخشابو
ياما بيوت عتابها بتنهان---وبيت الشعر ما انهانت عتابو
بمطرح ما في خير ودفا وألوان --- وقلوب غيري ببعضهن دابوا
بيكون في شاعر إبن لبنان -- وسع المدا كتابو و وبحبر الشمس
غمّس الريشي ووقع كتابو


يا شربل كاملي تحصن زيادي --- زغر حظك رماك قبال فادي
إذا بتكون قمة بغير موقع --- حدي ما بتطلع غير وادي
انا لما بمروجي الطقس ربّع --- احترف نيسان عا بوابي الشحادي
وعا سطح الغيم لما صرت أطلع --- كان النسر بعدو عم يدادي
ان كنّك شمع عالمدبح مشعشع --- انا بخور ببيوت العبادي
وإذا كنك شهادة شعر أروع --- انا الإيد اللي ختمت عالشهادي
وإذا بتكون جيش الما بيفزع --- انا الفكر الرسم خطة قيادي
يا شربل كاملي ان ما كنت مقلع --- شعر ما فيك تتحمل عنادي
بدي رخام حد رخام يلمع --- ما بدي دبش معدوم الإفادي
بدي جبين حد جبين يدمع --- ما بدي خد تاكي عالوسادي
بدي سبع حدو سبع يسبع --- ما بدي جمال تسرح بالبوادي
ان كنت قد الحمل حدي تموضع --- وإذا ما كنت عا قد المهمي
ابعتيلي غير شاعر يا بلادي
قرادي :

شربل : الله الكوّن هالأكوان---غط الريشي بوجه النور
وخرطش عا جبين الوجدان--- مجد جبيل وصيدا وصور
وتا يكسر جوع الحرمان--- وما يضل المنبر مهجور
خرطشني شاعر لبنان --- وروحن هالمنبر فيي

فادي :
صيدا وصور بهالتعبير--- وجبيل عليك تمنوا
انك تتواضع تا تصير– شاعر والمجد بفنو
عندك شاعر بحر كبير--- ساكت وبيحكو عنو
وشلال اللي بيحكي كتير--- بينشّف بالصيفيي

شربل
اعصرني العنقود الحساس --- ونشفني بمنطق علمي
وغفيني بجرة إحساس --- وما تفيقني من حلمي
وعود اسكبني خمرة بكاس --- ومزمزني كلمي وكلمي
ودوخ ودوّخ فيي الناس --- بأطيب خمرة شعريي

فادي
يا هالعنقود المعصور --- ما تنكر فضل الخمار
من الشمس غزلتلك نور --- حتى خدك أشقر صار
ولوما قطفتك للجمهور --- عصرتك وغليتك عالنار
بتصير شفاف الدبور --- تبوّس خدك يوميي


موضوع المعنى : البحر والشط

فادي :
انت وأنا يا بحر من ماضي قفي --- بحرين مرة شرود مرة عاصفي
خلقنا على شواطي الرمل والمعرفي --- نفلش عطايانا وكرمنا ما خفي
انت عالشاطي بحنان وعاطفي --- عم تفلش مواجك مشاعر مرهفي
لكن انا عا شط شربل كاملي --- عم إفلش مواج الأدب والفلسفي

شربل :
يا بحر مهما يكون عندك عنفوان --- بتهجم بطل عالشط وبترجع جبان
ومهما تعربد بالبلاغة والبيان --- بتتكسر مواجك عا شط الإمتحان
شطي صبي جهلان حنيي ملان --- لكن انت غدار يا بحر الزمان
ضاع الأمان بلجتك لكن أنا --- مر الزمان وبعدني شاطي الأمان

فادي :
لملم رمل جهلك يا شاطي واختبي --- التاريخ بيقلك بكتب المكتبي
بحري فتح صدرو وحضن موسى الأبي --- وصان النبي يونان بعد التجربي
وحول غيومو السود نيي طيبي --- وودا مع الطوفان عبرة مذهبي
هالبحر مفضل عالبشر من عهد نوح--- شو فضل رمل الشط عا نوح النبي

شربل :
يا بحر ياما جوعك علينا جنا --- ياما بلعت ناس وما رجعتن لنا
ويونان عاصي عالمعاصي وعالفنا --- والحوت منو ما قدر نال المنى
والشط زهّر بالصبايا واغتنى --- ونحل العيون من الحلا جمّع جنى
وكل بحر عندو شط من حولو انبنى --- وبحر الشعر شطو انا بليل الغنا
والبحر حد الشط حدو بينتهي --- والشعر بحرو بينتهي حدي انا

فادي
عالشط ما بتقشع خصور ولا نهود --- لوما البحر يطفي اللهيب من البرود
ما في كتاب يحد شطحات الشرود --- وما في سياج يحد شهقات الورود
بحري حمل بجبيل أحرف للخلود --- قدموس راح وأحرفوا بقيت شهود
المركب عا حد الشط فيك توقفوا --- والأبجديي بحر ما بيعرف حدود

شربل
متل الشمس يا مواج عا شطي افلشي --- جداديل مرخيي عا كتر الفلفشي
بيني وبين الشط همس وشوشي --- بيفهم عليكي لو انكتبتي خرطشي
وقدموس عا شطي مشي وموجك غشي --- ووهج الحرف لبّس غرورك دروشي
وبعدك انت يا بحر بتودي المواج --- تبوس أثر قدموس مطرح ما مشي

فادي : قصيد

انا البحر اللي ما بيسكت هديري--- مصير الكون مربوط بمصيري
ولادي التلج والنبع المتيم --- وزيري الريح والغيمي سفيري
من سلاحي يا شاطي ما بتسلم --- البرق والرعد عا جنابي ذخيري
إذا بغضب بموجاتي ما برحم --- ببلع شط وبغرّق جزيري
السما دفتر شعر شاعر استلهم --- قصايد غيم دمعتها غزيري
شعاع الشمس ريشي بإيد ملهم --- وفصل الصيف ملهم شكسبيري
وما كان على وراقو الجو غيم --- لوما محبرة شعري وأثيري
وبديري طفلها جايع ميتّم --- ملحي داب غيري بهيك ديري
بعد ما الخبز عالسفرة تقدم --- شو موقف شط ما بيدوب غيري
يا هالملح العلى الشاطي تكوم --- استحي من كمشة الملح الزغيري
وشفت الرمل عالشاطي تألم --- وشعل من لهبة الشمس المنيري
عملت من الزبد بالموج بلسم --- وصرت عالشط بمواجي الوفيري
مرة إدهنوا عالحرق مرهم --- مرة إفلشوا شرشف حريري
وبمطرح ما أثر قدموس علّم --- عا شاطي جبيل والقلعة الكبيري
لأنو عصرنا عالشط اجرم --- التلوث بلش يعذب ضميري
بعتت الموج تا الشاطي تحمم ---- مش تا بوّس الدعسة بمسيري
الدعسة محيت تا قدموس أرحم --- وبمطرح ما مشو حروفو الكتيري
فلشت شرشف طهر انضف وأنعم --- حتى العصر ما يقدر يدنس
حضارة ابجديتنا الشهيري

شربل :
انا الشاطي يا بحر وعار مالي --- انتحر موجك الأهوج عا رمالي
رأس مالي صبايا وخصر لولح --- وانت دايب حسد من راسمالي
على رمالي الحلا لما تشلقح --- يشحد لون أسمر من خلالي
قلبي من قفص صدري بيشطح --- تا يرسم لوحة السحر الجمالي
وكلما تفرعوا الحلوين بفرح --- بزهّر عاطفي وبشوف حالي
وانت يا بحر كترة ما مملح --- غطس فيك الحلا وما صرت حالي
انت مالح وفيك الكذب أملح --- وملحك عا ركابك لا تغالي
بتجي عالشط ثوب الملح تشلح --- تا تصبح للخبز ملحو المثالي
انت باب السفر لم جيت تفتح --- هجر خيي العا قلبي كتير غالي
من قبالي سرقتوا لغير مطرح --- اسرقوا من مطرحوا وردوا قبالي
انا الصخر ومكاني ما تزحزح --- بترجف كل ما بتلمح خيالي
بتجي مشبشب قوي بالصخر تنطح --- بردك شايب من العزم خالي
انت يا بحر فرصة ما بتمنح --- اللآلي الفيك مش مصدر عدالي
وإذا حوتك على وجك بيطفح ---- بيلغي كل قيمي للآلي
كفا بحالك يا بحر الجهل تمدح --- وطنا ما انسما موطن رسالي
لوما الحرف عن شطو ترحرح --- ونشل هالكون من بحر الجهالي
القصيدي شط والأفكار مسرح – وبحر الإرتجالي بحر عالي
وانت مهما ببحر المي تسبح --- بدي ضلني شدك تا جبلك
آخرتك عا شط الإرتجالي


موشح :
فادي:
مشوق أغمر أزهارك --- وبلهفة نصير
نعمل بجنينة دارك--- احلا مشاوير
ويشرب من بير سرارك --- حبل التفكير
ويفلت من إيد فكارك --- حبل الكلمات

سهرنا مع بدر وخمرة --- وشمع المسكوب
وجمر الموعد يا سمرة --- يدفي لقلوب
تمنيت الجمرة الحمرا --- تبقى وما تذوب
وما يطلع عمر الجمرة --- بعمر الشمعات

شربل :
غطستي بالبحر وليكي --- حولك شو صار
الموجة عم تهجم ليكي --- ومنك بتغار
عيون الناس حواليكي --- عا الشط كتار
ومن تحت المي عليكي --- عيون السمكات

عا رمل الشاطي الخاطي --- قررتي النوم
وجسمك سبحان العاطي --- حارمنا النوم
والبحر عليكي لاطي --- وبعدو لليوم
بيبعت موجو عالشاطي --- يبوس الرملات

في الحلقات التي تجمع شعراء من سوريا , من واجبنا ان ننقل ما يبدعون :

افتتاحية :

الشاعر موسى زغيب :
تـْصَوَّر أثير مْصَقَّع بـ ْ كانون ... النُّوّار نِسْيِتْ نحلتو تـ ْجَنّي
وْ تـْصَوَّر مدينه طـْموحها مسجون ... وْ مفقود منها الشِّعر و الرّنّه
الهزّار شاعر مُتْعَب وْ محزون ... مْخَبّي بذاكرتو نَغَم فَنّي
وْ كلـْما نَفَخ فيه الهوى المجنون ... بـْيِتْأوََّه وْ بيلـَحِّن الرَّنه
وْ حتّى الطيو الـ ْ عالشّجر بتكون ...ما حَوَّلِت صَمْت الجَبَل جنّه
لوما السّما تِبْعَتْلها حسّون ...وْ شاعِر يِفَلّي الريش و يغَنّي
==
يا هالشباب الـ ْ عَمـ بتتحَدّو ... اختارو القَوافي و العَزِم شِدّو
الشاعر تـَ يِقْدر يكشف الأسرار ... مفروض أمسو يْطِلّ عا غَدّو
وِ يْكون بحر وْ كلمتو بَحّار ... تعرف بِجَزْر الموج وِ بـْ مَدّو
وِانْ شاف جذع مْوَجَّعو المنشار ... يِِشْفَق عليه وْ يِنْوِجِع قَدّو
الشاعر لأنّو بْيَعْرِف الإعصار ... مِن خَيمة الأيتام شو بَدّو
ثْياب المَلَك طِلعو عليه قـْصار ... و الحِبْر شامِة عِزّ عا خَدّو
جَبّار لو حافي دَعَس بالنّار ... بـْيِبْقى القَلم و الدّفتر بـْ يَدّو
==
ضَلّ يِعجِنّي وَحيْ لـْ مَطْلَعْ ... تا صِرْتْ شوف وْ فَكـِّر وْ إسْمَعْ
الحَبّ الـْ بيِطْلَع مِن قمح مبذور ... لوما فـ ِ جوعْ وْلاد م َ بْيِطْلَع
و النَّبع يَلـّي بْيِنْبَع وْ بيفوُر ... لوما العَطَشْ بالنّاس مـ َ بـْيِنْبَع
و السَّيف مِثْل الحَقّ مِثل النُّور ... بْيِنْزَل يخوض المَعْرَكه مْفَرَّع
و الرّيح لمّا عالشّجر بِتْثور ... وَحْدو الأرز مـ َ بـْيِركَع بـ ْ لبنان
و الشِّعر مثل الأرز مـ َ بـْ يِرْكَع
============
الشاعر البسطاطي :
صَلـّي يا مسا بـ ْ هَيكَل خـُشوعي ... وْ ضَوّي شمعدانَك مِن ضْلوعي
حتّى تـ ْطَرِّز مْن النّور هالِه ... إسْحَب خَيط أشقَرمِن شْموعي
لأنّي محبره وْ حِبر الأصاله ... طَرْطَش بالسَّما وْ رَوتـَشْ دروعي
شـ ُ حِلوه تِشْرَب النّجمه خيالي ... وْ قَمَر نيسان يسكَر مِن طـْلوعي
لأنّو هالعمر مثل الغَزاله ... بيهرب قـَد ما يركض رجوعي
صِرِت كلما بْطلـِّع شوف حالي ... شجْره وْ هالفَضا زَهره بـ ْ فُروعي
حْلِمِت بالفلسفه مَحـّي الجَهاله ... وْ شَمْس الحَق لـَبِّسْها سُطوعي
حتّى الكَون يِشْعَل مِن خْيالي ... صِِرِت حِكّ السّما بـ ْ صخرة وُلوعي
يـ َرَيْتِكْ يا دِني تـْلاقي بَدالي ... كِنِت بِرْتاح وِ بْفَرّق جموعي
لاكِن بِفْزَع تـْهرّ الّليالي ... و تتدَحّرَج قمار الشّاعريه
إذا بـ ْ سَقف الحلم بيدِق ّ كوعي
==
وْ يـ َ امّ الأبجَديّه بـْتِسْمَحيلي ... إحكي كلمتي وْ قَدِّم دليلي
لأنّي عالجرح مـ َ قـْدِرت كابِرْ ... يـ َ إمّا بْـ مُوت يا بِرْوي غَليلي
الموت قـْبال مجد خـْيال عابِر ... وْ أنا عا مَفْرَقو عابِر سَبيلي
إذا ضَوَّيْت شَمْعه عالمَنابِر ... الشّمس قـْبالها بـْتِطـْلـَع هَزيله
أنا تـْ فَتِّح زهوري مْن المَحابِر ... الرَّمِل بيصير عا إيدي خَميره
وْ مُلوك الموهَبه مِن عهد غابِر ... واحد صاحبي وْ واحد زَميلي
أنا مِن تَدمُر: الأعماق سابِر ... بْخَصِر زنّوبيا السَّمرا النَّحيله
و مِن بُصرى, مِن مْلوك الاكابِر ...على بْعَلـْبَك وِصِل شِعري جْميله
أنا مِن تَدمُر: الأعماق سابِر ... بْخَصِر زنّوبيا السَّمرا النَّحيله
و مِن بصرى, مِن مْلوك الأكابِر ... لِبْسِتْ قلعة بْعَلبَك جْميله
صَرلي سِتّ سَبْع سْنين صابِر ... تـ َلاقي خصم مِن ذات الفَصيله
لـ َ كان بْخاطري التّاريخ جابِر ... وَ لا الحاضر كفوفو مِشْ بَخيله
بَعِدْ مـ َ بْسوريا شْحَنْت العَنابر ... وْ على لبنان حِمْلِتْني الأصيله
بِدّي تـ ْسَكّرو بـْ وجهي المَعابِر ... إذا مـ َ النَّصر عـ َ كـْتافو حَمَلني
عِمِلـْني للزَجَل شَيخ القَبيله
====================

الشاعر : معن محمد ( طرطوس )
يا شاعر اللي جيت تِتْبارى ... حتّى الفَن يْشوفَك بْشاره
إتْعَب على الكلمه مِتِل نَحّات ... بيحِط ّ روح بـْ كومة حـْجاره
وْ ما بين أصل وْ بين منحوتات ... بـْيِتْرُك عيون الفَنّ محتاره
وِ بْعَصر عَمـ ْ بيعَمّر النجمات ... ـ َيْمِدّ صوب الغَدّ عبّاره
كَنِّسْ بِزند العَولَمه الرَّدات ... من بضاعة سوق مِنْهاره
وْ غَسِّل بنهر التجربه الكلمات ... و شَمِّسْهُن عـْلى جْناح طيّاره
تا يعرفو إنّو الشِّعر ما مات ...وْ إنّو بهالكون اللي حاره صار
الشِّعر أجمَل شَبّ بالحاره
==
وْ أنا بعرف أنا شو مستَوايي ... وْ شـ ُ دَرْجِة دِقـِّتي بـ ْ حقل الرِّمايه
وْ بَعرِف لو بـ ْ غَنّي قـْبال مَنْجَم ... الذَّهَب مِن فرحتو بْيِسْرَح وَرايي
أنا الشِعر الطَواني ليل مُعْتَم ... قَبِل مـ َ الأرض تِفْصُل عَن سَمايي
وْ عِنِد مـ َ الغَمْر غَطّى كلّ مَعْلـَمْ ... كِنِتْ فَوقو وْ شِفِت سَطّحو مْرايه
وْ لـَمّا الشَّر بالدّنيا اسْتَحْكَمْ ... دَعَيت العَدْل وِ احْبَسْت الجِنايه
وْ جَبَرْت مْراكب الفينيق تِفْهَم ... شِعِر وِ تـْوَزِّع حْروف القـْرايه
وْ إله الشِّعر (أبّولو) المُعَظـَّمْ ... وْ أساطير المَلاحِم و الرِّوايه
وْ أبو الطَّيّب و قَبلو ألف مُلـْهَم ... وْ شِكِسْبير وْ ألف مِنّو وُ جايي
هَودي كلـّهن للنور مَوْسَم ... وْ مِنّ بـْيِشْحَدو شَمس الهِدايه
أنا الألوان بِخْيالات مَرسَم ... انْطَبَع سِحْري عـ َخَدّ اللانهايه
غِبِت خَفْقه بـْجَوارِح قلب مُغْرَم ...ظـْهَرِتْ بِحْناجِر الإيمان آيه
وْ بُشْرى بْتِسْحَر الكَرْم المْبَرْعَم ... طِفِل بين النبوعه و السقايه
وْ عِنِد مـ َ خْلِقِتْ لَحْم وْ دَمّ رَنـَّم ... الشِّعِر أجمَل حُروفو بـْمُلتَقايي
وْ بِميلادي لـْبِسِتْ تاج الـ ْ مْفَخَّم ... وْ على الكرسي لـْبِسِتْ مَجدي عَبايه
إذا حَسّان عالشّهره مـْصَمَّم ... وْع َكرسي وْ تاج عَمْـ يِتْعَب كِفايه
أنا ما جيت حتّى التّاج إغْنَم ... وَلا بـْتِلبَق لإسمي هالحكايه
مِن حيث المَلَك مـ َ اعتاد يِحْلـَم ... لـ َ بالكرسي الخِلِق قاعِد عليها
وَلا بـ ْ تاج الـ ْ عـ َ راسو مْن البِدايه
=======================
جولة قرّادي

( إنقَطَع الإرسال عندي , و لم أسمع اللازمة )
(((حتّى تـْعَوِّض كلشي راح ... بالتسجيل وْ تنسيقو)))
غير ما تِمْلـُك مِتلو جْناح ... ما فيك تـْكون رْفيقو
===========

معن :

الشِّعر مْسافِر بالقصدان ...و الرّحله صَوب القِمّه
وْ حضنتنا أرزة لبنان ... وْ بـِقـْصايِدنا مِهْتَمّه
وْ لـ َ تـْواخِذْني يا حسّان ... مِشْ عارِف إنَّكْ امّي
كِنتْ طـْلـَبْت عـْلى الميدان ... شعّار بـْإسمي يـْليقو
===
بسطاطي:

النّسّر السّوري الـ ْ مـ َ بـْيِرْتاح ... جار الشّمس بتحليقو
غير ما تملـُك مثلو جْناح ... ما فيك تْكون رْفيقو
=
الشّمس مْن: عْيون السّيمان ... بْترخي جْدايِلها الشَّقرا
بـ ْ تِتْدَحْرَج عـ َ: كـْفَر ذبيان ... بـ ْ توعى بـ ِ هْياكِل: فَقرا
وِ مْحَمَّد بِزْمانو كان ... اُمّي وْ لـ َ بْيعرِف يِقْرا
راح وْ دَشَّرْلـَك قرآن ... يـْخَلـّي الأموات يـْفيقو
===
الـ ْ آخِذ عِلـْم بـ ْ وَحي وْ عَونْ ... مْن القـُدره الرّبّانيّه
لا بالطعمه وْ لا باللون ... بـْيِتْقارَن فيك وْ فِيّي
و هالشَّعب اللي راسِخ هَون ... ما بَشَّر بالأمّيّه
بالحرف العَلَّم هالكَون ... وَدّى مْراكِب فينيقو
===
الفينيقي أوَّل إنسان ... وَدَّى مْن الخالِق تَفْويض
يـْخَضـِّع بالبحر الطّوفان ... حتّى مِنّو النّور يـْفيض
تـ َ حْصان لـْسانَك يِنْصان ... لازِمْلو مْعلـّم ترويض
يِقْرصلو لـْجام الوِجدان ... و يـْشِدّ عـْلى خـْوانيقو
===
لـْساني فَكّ رْموز الدَّهر ... بـْصوت عـْصافير الجَنّه
وْ هاجِم أنْت بـْ خَنْق وْ قَهْر ... وْ لـَجْم وْ مِشْ عارِف إنّي
اطـْلَقْتو وْ صارِت دُنيا الزَّهر ... نهر الإبداع الفَنّي
وْ لولا لـْجَمْت لـْساني : نهر ... الإبداع بـْيِِنْشُفْ ريقو
===
أيّا إبداع بـ ْ لوحات ... بْيِخْلـَق حرّيّه مْن الضَّيم
بْتِربى بِشْلوح الأرزات ... وْ بِتْطَوفِن عا وادي التَّيم
لوما عا بحر الكلمات ... يِتْبَخَّر إبداعي غَيم
وِ يْشَتّي فَوقَك آيات ... النقطة بِتْعَبّي مْضيقو
=================
((ما اجمَلـَكْ يا بـُخـْل بسطاطي ))
موضوع المعنّى : الكَرَم و البخل :
معن :
مِثِل مـ َ بْيِعْزم الكون كْواكبو ... تْزَيِّن ليالينا بـَلا مـ َ نـْطالِبو
وْ مثل مـ َ بـْيِعزُم النَّهر جْوانبو ... برحلة كَرَم يِسْقي المَدى وْ مـ َ يْحاسبو
عا كَرِمْ سِحري العاجِبَك بِعْجايبو ... خجلان تقطـُف مِن عَجيب مـْواهبو
عازمَك ْ عالكَرم عَبّي وْ لا تـْزين ... الكَرِم ْ أكرَم بالعَطى مِن صاحبو
===
بسطاطي :
لمّا الغروب يـ ْرَوْتِشْ بـْ شَمس الأصيل !!! ما بـ ْ يِقْبَل لون باللوحه تشيل
وْلمّا النهر يِنْحَت بِجَفن السّهل ميل ... مـ َ بـْيِقبَل يْميل الكحل عالسّهل ميل
شو قيمة الكَرْم العِطي وْ رَبَّح جْميل ... وْ تـ َ الخالِق يمَيِّز كْتيرو مْن القليل
بالأشقيا الـ ْ مِثْلـَك تكارَم عالبَشَر ... بالأنبيا المِثلي خِلِق كَفّو بَخيل
===
المِثلي كـْتار وْ اشقيا بيزَلزلو ... هالكَون تا مِنّو البخل يِسْتَأصلو
وْ يِرجَع القَمح يـْزورنا بِسْنابلو ... وِ مْن الشُُّعور يْزَهّر الشِّعر الحِلو
وْ الله كريم وْ ما بـِْبْخَل مَنْهَلو ... إلا ّ على دجّال دَنـَّس هَيكَلو
لمّا نبي مـ َ بـْيِكرمو الله الكريم ... بيكـُن مِن جملة الـْ عَمـ ْبيدَجّلو
===
ما أجمَلو شْعور النّهور بـ ْ هالـ ْ وِدى ... بيشَهْوِن الزهره على قطرة نَدى
وْ ما اعظَم شْعور القيامه مْن الرَّدى ... بيحَرْقِص الخَشْبه عـ َ مسمار الفِدى
وْ هَيْك الكرامه شْعور مِن مجد ْ وْ مَدى ... مـ َ بـْيِنْوَهَب مـ َ بـْيِنْعَطى مـ َ بـْيِنْهَدى
حتّى الكَرَم بيقول بتراب الوَطَن: .......... إيّاك تِتْكارَم بِذَرّه عا حَدا
===
ما اكْرَمَك يا رَبّ يـ َ مْبَكـّي السَّحاب ... تا صار جَنّه الرّمل بالأرض اليَباب
وْ عا سيرة تْراب الوَطَن: إلاّ خطاب ... ( يا عـُرب طاب المَوت) ما بِرْضى جَواب
حيث الشّهيد بـْدون مِنّه وْ لا حساب ... الـ ْ خَلّى التّراب مْقَدَّس وْ غالي وْ مُهاب
وْ لوما كرم دمّ الشّهاده بالشّهيد ... ما ضَلّ إلنا بْهالوَطَن ذَرّة تراب
===
اتْركْلي العَرَب, إيّاك تِزْلـُف زَلـْفها ... و تِتْكارَم وْ تضرُب الألف بـ ْ ألفها
وْ قَوس القَدَح يِبْدا سهامو شَلفها ... تـ َ الأرض تشرب مَزْمَزه من دَلفها
هالبِنْت اللي بِتْقَدّم حَلاها لـ ْ ولفها ... بـْرُخْص وْ بَساطه ما بـْ يِبْقى بـْحِلفها
وْ يـَلّلي بإحساساتها بْتبخل عليك ... بِتَْضَلّ طول العُمر تِرْكـُض خلفها
===========
معن :
يـ َ حسّان القضيّه ما حَسَمْها ... بخل هالبِنْت عالشّب ّ الـ ْ عَزَمْها
هَيدي إسمها بالحُب حيله ... تَتِتْأكَّد ْ إذا شْعورو احْتَرَمها
البخل كرباج بيذِل ّ الفَضيله ... أنا عَنّو سْألِت دُنيا بـ ْ اُمَمْها
قِلِت يا مَوهَبه عَنّو اشْرَحيلي ... قالِت يَبَّس الكلمه بـ ْ قَلـَمْها
قِلِتْ يـ َ قـْلوب أخبارو حْكيلي ... قالِت مِن حَبايِبْها حَرَمْها
وْ تَإتـْأكـَّد زِرِتْ غابه ظـَليله ... السِّحِر و البحر مِن جمْلة خَدَمّها
البخل قالي بـْيِرميني قَتيله ... إذا بـْيِمْرُق جَنِب غابه عَدَمْها
و نِحْنا شْعوبنا بـْمُطْلـَق حَصيله ... قَبيله و الكَرَم رَنْدَح نَغَمها
وْ إذا بخْلـَك طِفي نار القَبيله ... كَرامتنا بيِتْنَكـَّس عَلـَمها
الكَرَم هـُوّي الحيله و الوَسيله ... الـ ْ بِآلـِف بَين فرحِتْها وْ ألـَمْها
وْ بِتَدْوير الزَّوايا المًسْتَحيله ... بِخَلـّي لاءها تصبَح نَعَمها
وْ بِآخر رَدّ جِبْتِلـّي مثيله ... عن البِنت الكَرَمْها ما رَحَمْها
وْت َنفرض بالعَكس كانت بخيله ... وْ بِعَين الشَّب هالمَوقَف دَعَمْها
الـْ رِكِض عَدْروب هالبِنت الجَميله ... شـ ُ اللي بْيِجْبرو يِركـُض وَراها
لوما يـْكون طَمْعان بـ ْ كَرَمْها
===============
بسطاطي:
يِسْعد مسا تـْرابِك يـ َ فخّاره ... يـ َ رْفيقة الأيّام يا جاره
لـَون الشّمس عا خَدِّك المِحْمَرّ ... مثل الـ ْ كأنّو شِغل سنّاره
مثلِك أنا عْلـَيّي الحلم بيمرّ ... وْ تا خَمّرو بعْيون سهّاره
بْخَبّيه بِقْراني القَبو الـ ْ مِسْمَرّ ... وْ لـ َ بْضَيّفو عـ َ بْواب خمّاره
الورده إذا فكَّيت مِنها زِرّ ... بتِشْلـَح رَبيع, بـْتِلـْبُس غـْياره
مِن هَيك مـ َ بْتعطيك منها زرّ ... تـْضَحّي بـْصِبا وِ تْصير ختياره
تاج المَلَك: لـ َ تْشيل مِنّو الدّر ...مـْحَل الفَضاوه بْتوسَع الطاره
الطاقه اللي وَسَّعها الكَرَم بِتْخِرّ ... وْ بيشِنّ منها المعتدي غاره
طيرو الـْ على الأغصان عمـ بِتْكِرّ ... بْتعطي كَرَم صيّادها شْراره
بـْتِعْلـَق بِمِشْكاكو وْ مـ َ عاد تـْفِرّ ... علقة السَّمكه بـْ قلب سنّاره
إسأل ( كَرَم ) هالنغمتو بِتْكرّ ... مثل دفقة نهر هَدّاره (( المقصود الياس كرم ))
عا قَدّ مـ َ تْكارَم بِبَحر وْ بَرّ ... ما ضَلّ عندو مْن النّهر باره
مْلوك المَجوس اللي مشو بالبِرّ ... عا (بيت لحم) بـ ْ أوّل زّياره
حِمّلو هَداياهن لـُبان وْ مُرّ ... وْ شو ضَيَّفو المَذْوَد بالمْغاره
هالمسبحه الـ ْ حبّاتها بتكرّ ... ابْلِفّ خيط المسبحه شْكاره
وْ لو شفت نهر العمر عمـ بيمرّ ... بـْشِدّ الوقت تـ َ يْصير قطّاره
وْ هَيكي يـ َ حاتم طَيّ مشْ مضطرّ ... تِتْكَارَم وْ تِتْحَمَّل خْساره
الأشْرَف إذا بِتْموت إنت وْ حرّ ...وْ لـ َ تْقَدّم قـْرابين للأصنام
وِ تـْضَلّ فيك الأرض دوّاره
========================

موشح زغيب :

لوحي بـْ شجرة ماضينا ... تـ َ غـْصـون نـْكـون
وْ تمرُق نسمه وْ تِلوينا ... غـْصون عـْلى غـْصون
=
عالصّدر الـ ْ كلـّو مْحبّه ... وتلجاتو نار
زَهْرتْ ليمونة حُبّي ... وْ عقـْدت أسرار
وْ مهما تـْشِكـّي بْهالقَبّه ... عـْراوي وِ زْرار
القَبّه ما فيها تـْخَبّي ... زهر الليمون
==
(كرم)
ليلة عا كتفي تْكيتي ... وْ قلتيلي بَعد
ماضي حُبّي مـ َ نْسيتي ... وْ أيّام السّعد
خَدْتي بَوسه وِ مـْشيتي ... رعبون الوَعد
ان مـ َ قـْدرتي الوَعد وْفيتي ... ردّي الرّعبون
===
(معن )
حْمامه بيضا وْ شَطَّبتي ... باقي العنوان
رْميتي الظَّرف وْ مـ َ طْلـَبتي ... إلاّ النّسيان
لولا بـْيِقرا شـ ُ كـْتبتي ... نوح الطّوفان
كان فَكَّر إنتي الجِبتي ... غَصن الزّيتون
===
( حسان )
الشّمس عأْلى الكون بـْتشرَق ... منِّك بِتْغار
مْن عيونِك كانِت تِسْرَق ... حلم الأسرار
نيرون بـْ عنفو بـْتِغرَق ... روما بالنّار
وْ إنتي عَينيكي بـ ْ تِحرَق ... روما وْ نيرون
===
إنتي مِنْتي عا فَنّي ... وْ عا هالعينين
دَيَّنتي سْنيني جَنّه ... و ْ مـ َ طْلـَبتي الدَّين
لو إمِّك قالِت إنّي ... مـ َ بـ ْمَلـّي العَين
تـْقول الـ ْ بِتْقولو عَنّي إمِّك بتمون
===
الشّلال الفَوق كـْتافِك ... عامِل إنزال
ما دَشَّر مِن أوصافِك ... غير الأطلال
كيف بدّو موسى الشافِك ... يوعى مازال
عيونِك خمره وِ شْفافِك ... معمل أفيون
==================

ختامية الشاعر زغيب:

شاعِر مَرَقت الدِّني, فيها كَسَل وِ طْموح
وْ بعض الظواهر صِرِت أعرف خَوافيها
القَصـْبه بتشكي وَجَعْها بنايها المبحوح
المرأه بتخفي وَجَع أسرارها فيها
وْ مهما يدِبّ العطش بالزنبقه الـْ بتلوح
بتضَلّ تمرُق مرا أو بِنت تسقيها
و مهما بيوت الجرد تحمل ثلج عـَسطوح
بيضَل تحت السّقف موقد يِدَفّيها
شاعِر لأنّي حْملـِت هَمّ الجسد و الرّوح
بـْلـَمِّع عـ َ أشيا و لاكِن ما بـْسَمّيها
من هَيك كلـْما التَقى الممنوع بالمسموح
مـ َ بْقول كلمه لـِكي تا كون عانيها
بِرْسُم عـ َ وجه الورق صورة قلب مجروح
بِتْحَيّديها كأنِّك ما فهمتيها
بِسقي زهورِك دمى تـ َ العطر منها يْفوح
بْتِبْخُل بِشَمّة عطر عالكـان ساقيها
وْ كلمة: يـ َ شاعِر تعا.. قلبي إلـَك مفتوح
مِن شان الله قـُليها وْ ما تـْخَبّيها
بِفـْزَع يضيع التـَّعَب و الشّوق مِنّي يـْروح
وْ يِنقال كل الكلام و ما تـْقوليها
========================

حلقة مميزة لم تحمل طابع معيّن في زاوية معينة من المدارس فقط , بل حملت البرنامج الاسبوعي للدروس جميعا ً : أدب لغة فنّيّة تاريخ جغرافيا قومية و حتّى فنّ النحت : مبارك للشباب على هذه الجولة المميزة :
كان لي شرف نقل و كتابة ما جاد بها الشعراء تأليفا ً و أداء:
البداية كانت مع الشاعر زغيب :

يا حَور دخل اللي عِطْيَك هالحلا وْهالطّول
وْ خَلاّك تشمخ و تدعَس بالنهر حافي
لوح الغصون الخُضُر, بكرى بـْ يِجي أيلول
دَهْمَك مرور الزّمن و الوقت مش كافي
وْ نيسان فَصـَّل خَضارو للمرج مريول
وْ لَبـَّس شجرة اللوز قمصان شفـَّافه
وْ زهر البنفسج لِطي خلف الصّخر مخجول
وْ زَرَّد بعنقو النّدي مْناديل و كْفافي
وْ عمشوف خيط الشّمس بين الشّجر موصول
من غصن شجرة دِلِب لـ َ غصن صفصافه
وْ قد ما علينا القمر دَبَّل عيونو نـْزول
صارِت تشوفو الشّمس وِ تْفَكـّرو غافي
جايي تَهَنّي الشّباب الطـّامحين وْ قـُول:
عا قَدّ حضن الشّعر ما في حضن دافي
إنتو صليب الوعد عـ َ كـْتافكن محمول
لاكِن صليب الجّهد محمول عـ َ كـْتافي
***********
شفيق ديب :

لأنّي صعب إتحّمّل غيابَك ... رْجِعِت رَوحِن شَبابي من شبابَك
رْجِعِت للشعر يا لبنان صَلّي ... شفيق الدّيب مستاهل ثَوابَك
زْرَعِت عـَ بْوابَك مْن شْهور فلـّه ...سَقاها الجّود مِن سكبة سَحابَك
وْ لأنّي بْدال فلـّه اقـْشَعِت غَلـّه ...ارجعت و زْرَعت عمري عا بْوابك
ارجِعِت شَقْشِق ثياب الليل يلـّي ... سَكَن جفني وْ مَع رْموشي تشابَك
صَبَغتو بـ ْ نور و اطْرَشْتو عـ َضِلـّي ... خِفِت مـ َ الليل يصبغ انسيابَك
ارجِعِت لابِس صَباحي وْ مِن مَطَلـّي... خَوابي النّور وِقْفِتْ عا حسابَك
وُ مَيََّلت السّـــما مِنشان خـَلـّي ...خمر الفجر يِدْلـُق عا هضابَك
يـ َ بـِن لبنان يـ َ رْفيقي يـ َ خِلـّي ... السّوري خِلـَّك, صْحابو صحابَك
الزمن لو يحبس فْصولو بـ ْ مَجلـّه ... المجلـّه اثنعش صفحه مِن كتابَك
وْ لأنّو الشّعر و المنبر محلـّي ... وْ لأنّو الشّاعر بيِلبُس ثيابَك
ثيابَك شِعر و تْرابَك تَجَلـّي ... وْ لأنّو ترابَك بـْ يِطْفَح مَشاعِر
ارجِعِتْ فَصـِّل ثيابي مِن ترابَك
***
وْ إذ الفارس زَأرْ و الرّعد صَفَّق ... يِجو يْغَنّي ارتِجالي مش مْلَفَّق
أنا بالارتجالي إخلقت عالـِم ... وْ شَفَق شِعري على الكَونين شَفَّق
وْ لوما الشّعر بالسّطر المُسالِم... خَبّالي حروفي وْ ما ترفَّق
عَسَطح الشّرق بتمَحّي المعالم ...إذا مزرابها فَوَّر و دَفَّق
جيبو خَصم سَيطَر عالعَوالِم...وُ راياتو بأعلى جَوّ خَفَّق
وَصيّه بـ ْ قـُلها وْ مـ َ بـْكـُون ظالِم...لـ َ إشهَدلو بِميداني غَلَبني
إذا عـْلَيي بـ ْرُبُع ردّه توَفّق
***
وْ جايي و ْ حامِل زهوة عْطوري ... من ياسمين الشّام و الجّوري
وْ نغمة عَتابا جِبت مِن عنّا ... و سْوَيحلي فَوِّح شذى زْهوري
وْ شِفْت الفِنيقي وْ قال: بِتْمَنّى ... تْوَدّي امانه بـْجانِحِ شْعوري
قَلـّي يـ َ إبني بْشَعْبَك تْغَنّى ... في أوغَريت وْ شَعْشِع بـْ نوري
وْحتّي بـِخَيّ الـ ْخَيّ يِتْهَنّى ... سَلـِّم على صَيدا وْ على صوري
و اليوم فينيق الزّجل غَنّى ... وْ جايي بـْ جوانح شِعر اسطوري
يِنثـُر ثَقافة شِعر وِمـْعَنّى ... في أبجديّه حْروفها يِحْكو
قصّة شَفيق الشّاعر السّوري
******************************
سمير هلال :
النّبي سْليمان بـ عْصور القديمه ... بِنِي للرب هيكل اُرشَليمي
و حتّى يْعَمّرو يِرْفَع عتابو ... مِشي عا بوصلة روحو الحكيمه
وْ قَصَد لبنان تـ َ يْلاقي جَوابو ... بِمَعْمَرجي إبن صُور الكريمه
وْ بِأمر مْن المَلَك حيرام جَابو ...شلوح الأرز للغايه السّليمه
بِفَضل مْقايَضه بْتِرضي حِسابو ... الخشب بالقمح و الصّفقه غَنيمه
وْ تَجَلـّى هيكل بْرَونَق شَبابو ... وْ حَمَل رمز الحياة المستديمه
وْ عـ َ أيّام السّبي نَفَّذ عِقابو ... نَبوخَذ نَصَّر بـ ْ هجمه أليمه
وْ رِجِع مِن بعدها تْشَقَّق حجابو ... عـ َ صَلـْب الرَّب عا كبْر الجّريمه
وْ بَعِد ْ مدّه مَرَق زلزال صابو ... وْ وَقَع عالأرض كَومه بـ ْ دون قيمه
و صار تراب يِبْكي عا ترابو ... و مضيو الأنبيا وْ نِزْلو المَباني
و بِقْيِتْ أرزِة الرّب العظيمه
***
أنا إبن الأراميه الوَفيّه ... سمير جْبال معلولا العَليّه
بِشِعْري حامِل الحرف الأرامي ... تَحيّه للشعوب الفِينِقيّه
عَطاني الأخطل الشّامي عَلامه ... وْ أبو تمّام شَيخ العَبقَريّه
وْ شِهِد ْ ذاتو المَعَرّي عا كَلامي ...شَهادة عبقريّه معنويّه
و شِهدو مَعْهُن كـْبار الأسامي ... ديك الجِّن مِن حمص الأبيّه
و إبن الفارض الصّوفي إمامي... وْ أبو فيراس حمدان الحَميّه
وْ أبو ريشه عُمَر ذَهََّبْ وِسامي ... وْ تَغَنّيت بْسلال بـُحـْتـُريّه
وْ مِن البَدْوي الجَبَل جِبْت العَمامه ... وْ حَداثة آدُنيس اللاذقيه
وْ جايي وْ جايٍِب بْ جعبة سَلامي ... قصيدة شِعر للأرزه هديّه
زَجَل مَوزون و التّوقيع شامي ... طَوق الياسمين الـ ْ ذاب عطرو
على مْخَدّة نزار الشّاعريّه
***
مع ردّة الشاعر زغيب :
يا ســَــمير تْوَقـَّى ديب ... الجايي بـ ْ غايه مَستوره
تا يِلـْطيلـَك مثل الذّيب ... الـ ْ عَمـْ يِلطى للقَرقوره
==
عا منبر بِنْيو الشحرور ... وْ كَمّلنا خَلْفو مدّه
مازَال جيتو لـ ْ عَنّا طيور .. ريشَن إلفه وِ مْوَدّه
تْوَقّو للقول المكسور ...وْ كونو عصفور وْ رَدّه
بحيث بْردّات العصفور ... ما في ردّه مكسوره
======================
شفيق:
يـ َ هْلال بْروح قـْوافيك ... بْلوغ الذّروه وْ لاقيني
وْ فَهّمني شـو اللي مْخَلّيك ... تْباري الزّخم العشريني
شِعري أسطوره يـ َ شْريك ... ملوهِجْها بـ ْ جمر سْنيني
وْ لو مهما تْجرّب ما فيك ... تْزَعْزِع مَجْد الأسطوره ..
===
سمير :
شايِفنا قرقوره وْ ذيب .. لاكِن معكوسه الصّوره
---
يا داعيني إتْحَدّاك... وْ إيدَك عا قلبَك كامِشْ
ساعة مَلقايي وْ مَلقاك... بْنِطْلـَعْ مضمون وْ هامِشْ
سِحر الأسطوره اسْتَهواك... وْ عمـ ْ يِتْقَلـّد جلجامِشْ
بدَّك شي متحَف يِرْضاك ... وْ يِقْبَل يِعْرِضْلـَك صوره
===
شِفت النّاس المجتمعين ...بْهَيكي سهره مشهوره
مِن هالرّده عرفو مين ... الذيب وْ مين القرقوره
---

بْصَمْتِلّي بـْرَدَّك بالحال.. الاسطوره مِشْ رح بتموت
بْمتحفنا إلها أعمال ... صوره مِن جوهَر ياقوت
وْ جسم الفاني مهما قال ... عالجّوره مجبور يْفوت
وْ مازالـَك فاني يـ َ هْلال ... مبروك عـْلـَيك الجوره
===
يا شايف حالَك مزيون... بلوحة من ياقوت وْ عاج
ضيعان اللوحه مـ َ تْكون ... باللوفر و الارميتاج
المتحف مـ َ بْيِملـُك مخزون ... من تمثال وْ لوحه وْ تاج
لولا مْن الكنز المدفون ... بـْقلب الجّوره المطموره
===
اتركني باللوفر مِنْصان ... بالأقسام السّوريّة
وِ مْتاحِف صيدا بْلبنان ... وِ جْبَيل يـْرِدّو عـْلَيّي
وْ لمّا جبران بـْوجدان ... بشرّي يِتْجَلـّى فِيّي
عَبْواب مـْتاحِف جبران ... تـْفَضَّل سِدّ الفاتوره
===
لـ ِ مْغاره متحف لوحات ... جوره بالصثّخر القاسي
جْعيتا وْ معها الضّوايات ... تـْذَكـّرهُن كنَّك ناسي
جوره مقـْلـَعْها رْخامات ... وْ جوره مقلعها ماسي
انشَلّله بـْيوفوك حْسابات ... هالفاتوره المأجوره
========================
و جولة معنّى : أخذ ْ و عَطا & و شيل و حطّ :
سمير :
ثَوب السّما مْطَرَّز بحبات الحقيق ... جْنبنة ورد نعسان عا شرشَف رقيق
هَيدا الشِّعر, و الشاعر بـْيِفْتَح طريق ... واسِعْ مـ َ بِتـْحَوْزِق بحورو عا مَضيق
وْ شَرده عليها تـْشَهوَن الخمر العتيق ... وْ صوره نَبَشْها مِن قلب وادي غَميق
وْ رزنامتو جْديده و عـَلـ َالله ما تكون ... ماشي عـ َ رزنامه قَديمه يا شَفيق
============
شفيق :
غِبْ الفَضا وِ سْكار يا شاعر اسكار ... و امزج فكر جبران مع خمرة نزار
ِوْ يا سمير بْموجب شْروط الحوار ... خمّر دموعَك في خوابي الجلـّنار
رزنامة شْهورَك خريف الإنهيار ... وْ راس السّنه خلقان لـَحروفي شِعار
وِ بـْ محكمة رأس السّنه جايي شَفيق ... تـَيشيل من رزنامتَك آخر نهار
=============
رزنامتي بالشّعر غابه مْلوَّنه ... بتصير للميلاد شجره مْزَيَّنه
وْ تقويم للهجره مع البدر السَّني ... ما بَين مكّه و المدينه مْعَنْوَنه
وْ رزنامتي بالعمر مِن عمْر الدِّني ... وْ راس السّنه لو حكـْمها عـْلـَيّي جِني
بِتْشيل سنة العَبقَري آخر نهار ... وْ بِتْحط سنة الجهل أوّلة السّنه
==============
رزنامتَك شاشه وْ بِمَشْهَدها الشّهير ... شوك الفَنا بـْيِنْشال عـَحْساب العَبير
يَعني السنين الـ ْشالها الفجر الأخير ... اللي صار فيها بي جَنابَك رح يصير
خَصْمَك مَصير المنبر وْ جايي المصير ... يـْشِيلـَك إذا مـ َ بْيِقْشَعَك شاعر كْبير
يا رَيتَك فـْهِمت المصير الـ ْ ناطرك ... وِ عـْرِفت حالَك وين فايِت يا سَمير
==============
ما اكفَر الـ ْ بيكُون عالواحه دَخيل ... وْ بيصير بدّو يْشيل مِن دَربو النَّخيل
وْ ما انبل الـ ْ بيضَلّ عالعالَم فَضيل ... وْ لو حَط بالحسبان نكران الجميل
بْتَعرِف انا فايِت لعندَك يا زَميل ... لاقي مصير الجّود عـ َ كْفوف البخيل
بِتْشيلني: مِش مِن صفات المكرمه ... بالمكرمه بِنْحط ّ أكثر ما نشيل
===============
تـْرَوّى عـ َ هالحَطـّه الشّهيره و العقال ... هَبّ النّسيم عـْلى الصّبايا وْ شال شال
وْ بالمكرمه اللي حْكيت عنها بهالمجال ... لازم تْشيل الجّوع وتْشيل الزَّوال
وِ تْشيل للمحتاج مِن هالمال مال ... ان ما شِلتهُن ضايِع جَوابَك يا هلال
وْ لوما إله الكاينه مْن الجّد شال ... روح الحياة السّاكنه بـْضِلع الشمال
لـ َ رْجِعت في جسم الفَنا حطَّيت روح ... وْ لا شَافِت عْيونَك مَقاييس الجَمال
=================
سمير :
الـ ْ شال الضّلع مِن جدّ البرايا ... رِجِع حَطّو بِخَفْقات الحَنايا
وْ بِدي آدَم يشيل مْن اللآلي ... عقود يْحطّها بـْعنق الصّبايا
وْ الله الـ ْ شال كمشة طين بالي ... وْ عَطانا جسم من أحلى العَطايا
كان الجسم صَفّى جسم آلي ... لوما يْحطّ روحو بالزّوايا
النحل عندو رساله وْ بالرّساله ... بِشيل العطر بجبال وْ وَدايا
وْ تَمَيَّز عن فراشات الحقاله ... عنِدْ ما حًَطّّ شَهدو بالخلايا
أنا بالشعر لو حَطّو قبالي ... قَوايا الشّعر مـ َ بْخاف القوايا
وْ تـَ اصفن بالطّبيعه وْشوف حالي ... عـَ رفراف السّما بـْ حطّ المرايا
مَرَق مَرّه مَلَك صاحِب جَلاله ... برحلة صيد بسنين الخَلايا
وْ بِدي مِنْ قَسوتو يْطارِد غَزاله ... وْ قصدو يْشيلها بْسَهم المَنايا
تَجَلّى نورها عالتّل هاله ... وْ عَكَس عا غايتو طِيب النّوايا
وْ أمَرْ يِبنو لـ َ إلها دَير عالي ... بْمَحَلّو حَطِّت العذرا بَهاها
عَلامه عا مَشارِف صيدنايا
==================
شفيق :
الصخر تَتْشوف روحَك مِن خِلالو ... ضروري يِنْحَتو الشّعر وْ جَمالو
و يــشــيـل النّوايا المختفيه ... لأنّو الشاعر بْيِنْحَت ظِلالو
وْ عـ َ ذِكر الرّوح شو صَرلـَك يـ َ خَيي ... نسيت الخالِق بـْ سَطوِة جَلالو
رِجِعْ شـــال الأمانه السَرْمَديّه ... اللي شِلْناها وْ مـ َ شالتها جبالو
وْ ذَكَرت الشَّيل و الأرباح فِيّي ... الشَّيل بـْ صَفّنا وْ مِنّا خِصالو
شِيل الشَّيل مِن رَدَّك عَلَيّي ...جَوابَك بالغَلَط جاوَب سُؤالو
الغاصِب حَطّ ألغامو الشَّقيّه ... وْ انا شِلت اللغم معْ إحتِلالو
وْ بِوَقْعِة خَيبَر اقشاع الحَميّه ...أبو الحَسْنَين لمّا الباب شالو
وْ شَفيق بـْ ذو فِقار الشّاعريّه ... يـ َ ويلو اللي بـْ يِنْزَل عا مَجالو
وْ مَسيح الكون بالرّوح الوَفيّه ... بِتاريخو جَميع النّاس قالو
جَهْلَك حَطّ مسمار الأذيّه ... وْ صَلبو في يَمينو وْ في شْمالو
وَلاكِن بالفِدا شال الخَطيّه ...و شوفو الفرق و احكو بْراسمالو
بِثالِث يَوم سَيطَر عالمَنيّه ... وْ بِـِروح المعجزه الـ ْ مِن ربّ خالِق
رِجِع شال الحجاره وْ شال حالو
==============

قصيدة غزليّة للشاعر سمير :
إنتي حلم عصفور بِحكايه ... إنتي شفافِك نور عـ َمْرايي
إنتي قصيده مِن خيال الرّيح ... أو سحِر مِن فينيسيا جايي
حبّة كرز عا اوّل التّلويح ... تْعَرِّت بظل الشّمس تِخبايه
شوفي الورد ما فَضَّل التّفتيح ... لو ما رَوا التّفتيح تِعْرايه
مُعجَب أنا وْ مش لازم التّوضيح ... أكثَر لأنّو ما إلي غايه
لـ َ تْقابلي الاعجاب بالتجريح ... وِ تْمَرّقي عالحرف محّايه
واضِح مَعِك بَسّ الغموض مْليح ... غَمضة جِفِن للعين بردايه
حِلو الغَزَل نِتْبادَلو تلميح ... وْ نِقْرا كلام الرّوح تِهْجايه
يا داخله قلبي بلا تصريح ... ما بدّك بـْهالقلب توصايه
بـْ حُبِّك لـَمَسْت الكفر و التّسبيح ... وْ كلما بآيات الشّعر صلـّيتْ
بـْسَبِّح بـآيه وْ بِكْفُر بـآيه
=================
غزلية للشاعر شفيق :
شفافِك وَقت ما يِسْألو عنّي ... بْسافِر لَحتّى إكمش حروفك
حروفِك بِصيرو يهربو منّي ... وِمْسافره بحروفِك بـْشوفِك
بشوفِك بأسراري شَفَق مجروح ... وْ لولا شْرِبِت خمره مِن نْهاري
بِتْسافِر الخَمره بـْحَنايا الرّوح ... تَتْبَلـِّش بـْتهريب أسراري
بْشوفِك بأبياتي قصيدة نور ... وْ ساكنه بأبيات آهاتي
وْ لولا اقْصَدِت هالنّور مرّه زُور ... بِتْسَكّري شْبابيك أبياتي
وِبْشوفِك بـْنايات وَشْوَشْها ... الراعي وغنّاها بـْلَحِن صوفي
وْ روح الموسيقا صعب إكمِشْها ... بالرَّغم إنّو النّاي عـ َ كْفوفي
وْ بالرّغم إنّي مْزاعِل البَسْمات ... وْ قَدّمْتها قربان لـَوْلوعي
لولا بـْدموعي بِلْمَحِكْ بالذَّات ... بـْتِتْقَمَّص البسمات بدموعي
وْ ما زال خَيَّم ليل أحزاني ... وْ ما عاد صبح الوَعد لاقاني
بـْليل الوهم صرنا انا و الصّدق ... كلمين عم يكذب على التّاني
وْ ما زال غَطّى الزّهر نفنافك ... و الشاف سِحر الكاينه شافِك
شْفافِك وَقِت ما يِسْألو عَنّي ...يِمْكن حروفِك يِهربو مِنّي
لاكِن لَوَين بْيِهربو شْفافِك
====================
موشّح :
الشاعر زغيب :
بدّي بِكْرومِك خَبّي... قَلبي الموعود
بلكي بْيسرقلو حبّه ...من شي عنقود
==
يللي زْرَعتي عا تِمّي ... خَيبات العمر
سْقَيت وْرودِك مِن هَمّي ... تا صارو غمر
وْ إلاّ ما آخد شَمّه ... مْن وْرود الحُمر
وْ لو بيكون عـْلى دَمّي ... كَنْزِك مرصود
=============
شفيق :
الموصلـّي بـْ نشوِة ذاتِك ... وَعّى زِرياب
وْ زِرياب عـْلى مـْقاماتِك ... أوتارو قـْراب
وْ لمّا غافَل ضِحكاتِك ... همساتِك جاب
تـ َيْدَوزِن عا همساتِك ... أوتار العود
=====
سمير :
حَمْلِت سَلـّه بْإيدَيها ...وْ بُرنَيطه بَرْم
اسواره طوق حْوالَيها ... عمـ تبرم بَرم
وْ لمّا مرقو عَينيها ... عـ َ جْفون الكَرم
صارو يِتْخَبّو عـْلَيها ... عْتاقيدو السّود
=====
من الليله سِحر وْ جودِك ... ما عاد يغيب
بْحَيثِك حلـّيتي وْرودِك ... قِدّام الدّيب
خَلـّيني بْليل جـْعودِك ... إغرَق بالطـّيب
وْ إخْلـَق من فجر خدودك ... شلال وْرود
====
عا أرزة حُبِّك لافي ... وْ قلبي مِشْتاق
ما فيها النّحله تْجافي ... زهر السّماق
وْ كلّ المسْح الجغرافي ... بين العشّاق
مافي لـُو وْجود وْ لا في ... ترسيم حْدود
====================
مع ختامية الشاعر زغيب :
أووووووووووووووووووووووووووف
قَلّي بْتِنْدَم. قِلِتْ: لا بِنْدَم وْ لا بْريد
يِرْجَع بقلبي الهوى يِفْتَح مَشاريعو
بِعْت العَذاب وُ خَلًص و الجّمر صار جْليد
و نْسيت دَورة وجه حلوه تـَقاطيعو
صارِتْ بِوجهو البَراءة تـْشَقّر عْناقيد
وْ يِعبُس التّوبه هَمِسْ تـ َ السِّر مـ َ يْذيعو
قَلّي بْخاف الطّيور تْهاجِر القرميد
و أيّام ضحك الصِّبا مِن عمرنا يْضيعو
مـ َ اشْعَرْت إلاّ وْ نَبَت للطير ريش جْديد
وِ ارْجعت إطلُب أمر تا نَفّذو وْ طيعو
كرمال شحطة قلم عا دفتر مْواعيد
رْجِعت اشتَريت العذاب الـ كنت عَمـْ بيعو
قَرَّب لـِصوبي بَعِد مـ َ تْبَسَّم مْن بْعيد
اتْطَلـَّع بِوجهي وْ ظَهَر سِرّو بِتَطْليعو
وْ سَلـَّم عَلَيّي بـِإيدو وْ شَدّني بالإيد
حَسّيت قلبي انْعَصَرْ ما بَين صابيعو
_________________________
نهاية الحلقة ..
==
أمّا الحلقة القادمة فـ :
الـبـســــطـاطـي
( معلّم الترويض)
( و يا ويلي عـ َ هيك حلقة )