شادي موسى وبحر الزجل ارتجاليات

حوار كامل

الشاعر سليمان طراد

أووف أووف

حسّان سيف الشعر مش سيف الملك
بشعرو الحقيقي قلوب احبابو امتلك
الغدر اللي بيّن فيك عا المنبر غريب
طعن الأخوه بالضهر منّو إلك

الشاعر شادي موسى
بطعن الضهر ايدي ولامرة جانية
هيدا تحدي غصون شعر وجانية
ون كان خصمي بعركتو الاولى انعرك
يرد اعتبارو بمعركتنا التانية

سليمان طراد
يعني اعترفت بغلطتك تضرب عفاك
خسرت الصداقه لا بقا تفتح شفاك
لا تفتكرفي شاعر بحجم الدني
ببيع مجدو بس تا يطعن قفاك

شادي موسى
وين اعترفت بغلطتي؟ افهم كفا
تفسر عاذوقك ردتي بقلة وفا
المابيحسب حساب الهزيمة بمنبري
لايقول بعت المجد تا اطعن قفا

سليمان طراد
ما بصدقك تا تقوم ترفع اصبعك
وتحكي الحقيقه وكلنا رح نسمعك
يعني بتقصد كل ما تحاور حدا
مفروض يلبس درع ويغني معك..؟

شادي موسى
ليش الدرع ليش التدرع والصفوف
شعار نحنا سلاحنا صورة وحروف
البيشوف حالو بيزعل ان مرة خسر
المفروض حالو عالمنابر مايشوف

سليمان طراد
الشاعر زكي لا يغشك المجد انتعل
الأنسان شاعر مش غلط لولا اشتعل
بيزعل اكيد ان شاف خي بيغدرو
بسهم الخيانه..!! بيلبس تياب الزعل

شادي موسى
انكانت الختمة نار شعر وشاعله
عم تنحسب غدر وخيانه وبلبله
ماكان في شعار بليالي الزجل
بحفلة تحدي عالمنابر تعتلي

سليمان طراد
المنبر كره والموهبه هيي القدم
في روح حلوه منبريه من القدم
جبلي حدا من كل شعّار الزجل
عيّر عدوّوه بالعماله وما انعدم.؟

شادي موسى
بحفل المدينه.. المصطفى لما اصطفى
ختمة قوية والزجل فيها احتفى
تقبّل ابو الياس الهزيمة بكل روح؟
او جعدن وصرّخ " غدرني المصطفى"؟

سليمان طراد
تزكّر معي شعّار عا المنبر عظام
تا تربح الزقفه تصير من العضام..!!
ما تقول انو كان قصدك تربحو
قول قصدك تحرجو قبال النظام

شادي موسى
لاكان قصدي احرجو ولا اهزمو
ولااترك بيوتو عا حالو يندمو
حكيت الحقيقة والحقيقة بتنفهم
واللي مافهمو يراسلوك بيفهمو

سليمان طراد
أيا حقيقه شاعر بحجم البلاد
عم تتهمو من الغش بالدوله استفاد
ومعروف عنّو ثورجي وشعرو انتفض
ضد كل مسؤول غارق بالفساد

شادي موسى
شوباك افهم ختمتي عا اصولها
وحلل بيوتي بعرضها وبطولها
ليش عالمنبر بيقول علا الفساد؟
وعاشاشة التلفاز مابيقولها؟

سليمان طراد
شادي بسيط تسمعّوا قويلتو؟
بيقول لازم كان يظهر ميلتو
يمكن لأنو بالنتيجه من البشر
بيخاف يخسر من لسانو عيلتو

شادي موسى
بعلمي قلت عنو كأنو بتعرفو
والثورجية بموقفو وبتشرفو
المفروض لايحكي ولايتمرد بقا
مازال خايف من نتيجة موقفو

سليمان طراد
الثوره يا شادي مش خناقه ولا شجار
الثوره هدفها بحق تصحيح المسار
حسّان ما بيسكتو الا الردى
يعني الهدف حريّتو وما في هزار

شادي موسى
حسان طبعو ياطراد بوجه عام
المقاوحة متلك على ذات النظام
بيهجي النظام.. بحجة بيعمل حروب
ان صار السلام بيركض بيهجي السلام

سليمان طراد
حسّان بالقانون بس بيحتمي
وبالأنظمه في ازعر وفي ادمي
بالأنظمه لم شاف معدوم السلام
فضّل شرف حريّتو عا الأنظمي

شادي موسى
القانون بالدولة بتجي شرعيتو
مهما النظام بيغتني بخطيتو
الارهاب لو كنو على المشتى سطي
بحسان شو بيعمل شرف حريتو؟

سليمان طراد
هيده طبيعة كل زمره آمره
بتقول لا تثوروا وبلاها مغامره
وكلما الفقير يقول كاسك يا وطن
بيتسابقوا كلّن بيقولو مؤامره

شادي موسى
شو خصني بالغامرو والثوّرو
البيهم خيي بكل موطن حاورو
انتو اللي جوا تآمرو بنهب الوطن
نحنا اللي برا مع الجوا تآمرو

سليمان طراد قصيد

كل الدني مرايات مكسوره
وعروش من خلوات وديوره
وحكّام يا شادي بها البلدان
خلّت شعوب الشرق مقهوره

الشاعر نبي موهوب مش سلطان
حاكم بأمرو نص معموره
والشاعر الفهمان وين ما كان
بيوصل بجسر محبتو جسورا

لا تخاف ع حسّان مش زعلان
حسّان شاعر ما وقع جوره
وعند الحقيقه من بشر إنسان
بيزعل طبيعي ما خلق صوّان
وحريّتو عن شرقنا صوره

شادي موسى قصيد

الناس ياسليمان مرمية
مابين شرقية وغربية
عيون الوطن بيعاكسو النظرات
عين غرب وعين شرقية!!

عيون الغرب غمزت على ثروات
من المغرب لارضو الخليجية
وعيني انا من عمق عمق الذات
دمعت عاسورية الطبيعية

هيهات ترجع سوريا هيهات
متل الامس سهرات شعرية
امن وهنا وحب وحلا وسهرات
واوتار تغفى بحضن غنيّة

بس اللي صار وشرد الحفلات
ست سبع سنين مؤذية
زود بقلب الشاعر الاهات
وحوّل ليالي الصيف شتوية
بديت ب حرية.. وعلت رايات
وكبرت وصارت حرب نارية
وحسان متلي تلوع اللوعات
بس الفرق نقطة اساسية
التكفير لما لحضن بيتي فات
وهد الكنيسة قبال عيني
تطلعت بعيوني عالمرايات
وقلت؛ رزق الله شو كنا بخير
وكفرت باللي قال " حرية"!!